Yu Mas Lukaotgud Long Presen Ya We God i Putum i Stap Blong Yu

1, 2. (1) ?From wanem yumi jusum blong givim laef blong yumi long Jehova? (2) ?Wanem ol kwestin we yumi save askem long saed blong presen we God i putum i stap blong yumi?

PLANTE milian man oli jusum blong mekem wok blong Jehova mo blong biaen long Jisas Kraes. (Mat. 16:24, NW; 1 Pita 2:21) Yumi tinghae long desisen ya blong givim laef blong yumi long Jehova. Yumi no mekem desisen ya from we yumi save sam vas nomo blong Baebol. Be yumi jusum blong givim laef blong yumi long God from we yumi stadi gud long Baebol. Samting ya i mekem se yumi kasem save long trutok we i mekem bilif blong yumi i strong. Trutok ya i laenap wetem presen we Jehova i putum i stap blong olgeta we oli ‘save hem, mo oli save Jisas kraes we hem i sanem hem i kam.’—Jon 17:3; Rom 12:2.

² Sipos yumi wantem gohed blong holemtaet ol kristin fasin, yumi mas mekem ol desisen we oli waes, we Jehova i glad long olgeta. Long stadi ya, bambae yumi tokbaot ol impoten kwestin ya: ?Wanem presen ya we God i putum i stap blong yumi? ?Yumi mas gat wanem tingting long presen ya? ?Yumi mas mekem wanem blong yumi save kasem presen ya? ?Wanem bambae i givhan long yumi blong yumi mekem ol desisen we oli waes?

 3. ?Wanem presen we God i putum i stap blong (1) ol tabu Kristin, mo (2) ol “narafala sipsip”?

³ Wan smol grup blong ol Kristin bambae oli kasem ‘ol gudgudfala samting ya we God i putumgud olgeta oli stap long heven, se oli blong olgeta. Long ples ya ol samting ya oli no save kam nogud, mo oli no save kam roten, mo oli no save lus.’ Ol Kristin ya oli gat nambawan janis ya blong rul wetem Kraes long heven. (1 Pita 1:3, 4) Sipos ol Kristin ya oli wantem kasem presen ya, oli mas “bon bakegen.” (Jon 3:1-3) ?Be olsem wanem long plante milian “narafala sipsip” blong Jisas we oli stap givhan long ol tabu Kristin blong talemaot gud nius blong Kingdom? ?Wanem presen we bambae oli kasem? (Jon 10:16) Ol narafala sipsip ya bambae oli kasem presen we Adam mo Iv tufala i neva kasem samtaem. Hemia laef we i no save finis long wan paradaes long wol. Long paradaes ya, ol man bambae oli no moa harem nogud, oli no moa ded, mo oli no moa krae from man we i ded. (Rev. 21:1-4) Taswe, Jisas i talem long rabis man we i hang long pos klosap long hem, i se: ‘Tru mi mi talem long yu tede, bambae yu yu stap wetem mi long paradaes.’—Luk 23:43, Nyutesteman wetem Ol Sam long Bislama.

 4. ?Wanem sam blesing we yumi stap harem gud long olgeta tede?

⁴ Tede yumi stap harem gud long sam blesing we oli joen wetem presen ya we bambae yumi kasem. From we yumi bilif se ‘Jisas Kraes i pem rod finis, blong olgeta man oli go fri,’ yumi gat pis long tingting blong yumi mo yumi fren gud wetem God. (Rom 3:23-25) Yumi kasem save long ol nambawan promes we oli stap long Baebol. Mo tu, yumi harem gud tumas blong joen long bigfala kampani blong ol brata mo sista raon long wol. Mo yumi gat nambawan blesing ya blong stap olsem ol Witnes blong Jehova. !Taswe, yumi wantem lukaot gud long presen ya we God i putum i stap blong yumi!

 5. ?Setan i traem blong mekem wanem long ol man blong God? ?Wanem i save givhan long yumi blong yumi stanap strong long ol giaman trik blong hem?

⁵ Sipos yumi no wantem lusum nambawan presen we God i putum i stap blong yumi, yumi mas lukaot long ol trik blong Setan. Oltaem nomo Setan i traem blong pulum ol man blong God. Hem i wantem se oli mekem sam samting we i save spolem olgeta, nao oli no moa kasem presen we God i putum i stap blong olgeta. (Nam. 25:1-3, 9) Setan i save se taem blong hem i sot tumas, taswe hem i gohed strong moa blong traem pulum yumi i go krangke. (Ridim Revelesen 12:12, 17.) Sipos yumi wantem ‘stanap strong long ol giaman trik blong Setan,’ yumi mas gohed blong tinghae long presen ya we God i putum i stap blong yumi. (Efes. 6:11) Stori blong fasbon boe blong Aesak, hemia Esao, i givim woning long yumi long saed ya. Yumi mas tingting gud long tijing we i kamaot long stori ya.

6, 7. ?Esao hem i wanem kaen man? ?Mo wanem presen we bambae hem i kasem?

⁶ Klosap 4,000 yia bifo, Aesak mo Rebeka tufala i gat tu pikinini boe we tufala i twin, nem blong tufala Esao mo Jekob. Taem tufala twin ya i stap gruap, tufala i no moa gat sem fasin mo tufala i no laekem sem samting. “Esao i kam wan nambawan man blong lukaot mit long bus, we i no wantem stap long haos, oltaem i wantem go stap long bus.” Be “Jekob i kam wan kwaet man nomo, we oltaem i wantem stap long haos.” (Jen. 25:27) Wan man we nem blong hem Robert Alter mo we i stap transletem Baebol, i talem se: “Hibru wod we oli tanem i kam ‘kwaet man,’ i minim wan man we tingting blong hem i klin mo we i fasgud long God.”

⁷ Taem Esao mo Jekob tufala i gat 15 yia, bubu blong tufala, Ebraham, i ded. Be promes we Jehova i mekem long Ebraham i no lus. Sam taem biaen, Jehova i talem promes ya bakegen long Aesak. Hem i talem se, olgeta we oli kamaot biaen long Ebraham bambae oli blesem ol man blong ol narafala kantri. (Ridim Ol Wok 3:25.) Promes ya i soemaot se pikinini we Jenesis 3:15 i tokbaot, we i minim Mesaea, bambae i kamtru long laen blong Ebraham. Esao hem i fasbon boe blong Aesak, taswe Mesaea bambae i kamaot long laen blong hem. !Hemia wan nambawan presen we Esao bambae i kasem! ?Olsem wanem? ?Hem i tinghae long presen ya?

8, 9. (1) ?Esao i mekem wanem long ol raet we hem i holem olsem fasbon? (2) Plante yia biaen, ?Esao i kasem save long wanem samting, mo hem i mekem wanem?

⁸ Wan dei, taem Esao i kambak long bus, hem i luk we Jekob “i stap kukum ol red bin blong mekem supsup long hem.” Ale Esao i talem long hem se: “!Ei, mi mi hanggri tumas! Yu tekem red supsup ya i kam.” Be Jekob i ansa long hem i se: “Sipos yu mekem promes se bambae yu no moa save holem ol raet we yu gat from we yu yu fasbon, mo yu glad blong givim ol raet ya long mi, bambae mi save givim sam supsup long yu.” ?Esao bambae i mekem wanem? Hem i girap i talem se: “!Sipos mi ded, samting ya bambae i no save givhan long mi!” !Yes, Esao i jusum supsup blong Jekob, be i no moa wantem ol raet blong hem olsem fasbon! Jekob i wantem se Esao i promes blong lego ol raet blong hem, ale hem i talem long Esao se: “Be fastaem yu mas mekem wan strong promes, se ol raet we naoia yu yu holem, bambae yu no moa save holem, mi nomo bambae mi holem.” Esao i no moa tingting tu taem, hem i lego ol raet blong hem olsem fasbon. Biaen long samting ya, “Jekob i tekem supsup ya wetem bred i kam, i givim long hem. Hem i kakae finis, nao i girap, i wokbaot i go. Samting ya i soemaot we Esao i no tinghevi nating long ol samting ya we hem nomo i gat raet blong mekem from we i fasbon blong papa blong hem.”—Jen. 25:29-34.

⁹ Sam yia biaen, Aesak i ting se bambae hem i ded i no longtaem. Ale Rebeka i mekem plan se Jekob nao bambae i kasem raet ya blong fasbon we Esao i lego finis. Taem Esao i kasem save se hem i mekem wan samting we i krangke, hem i go luk Aesak mo i talem se: “!Papa! !Plis yu blesem mi tu! . . . ?I no moa gat sam samting i stap we yu no talemaot yet, we yu save askem long God blong i givim long mi, blong blesem mi?” Taem Aesak i talem se hem i no save jenisim blesing we hem i givim finis long Jekob, Esao ‘i krae bigwan.’—Jen. 27:30-38.

10. ?Jehova i gat wanem tingting long Esao mo Jekob? ?Mo from wanem?

¹⁰ ?Wanem fasin blong Esao we stori ya i soemaot? Esao i soemaot se hem i tinghae moa long ol samting we tingting blong hem i wantem. Be hem i no wantem kasem ol blesing we bambae oli kamaot from ol raet blong hem olsem fasbon. Esao i no tinghae long raet blong hem olsem fasbon, mo i klia se hem i no lavem Jehova. Mo tu, Esao i no tingbaot ol trabol we bambae ol pikinini blong hem oli kasem from samting we hem i mekem. Be long saed blong Jekob, i defren olgeta. Jekob i rili tinghae long presen we bambae hem i kasem. Yu traem tingbaot. Papa mo mama blong hem, tufala i givim advaes long wanem woman we hem i mas jusum blong i kam woman blong hem. Ale Jekob i obei long advaes blong tufala. (Jen. 27:46–28:3) Be, blong hem i faenem wan woman olsem, hem i mas gat longfala tingting mo i mas lego plante samting. Nating se i olsem, Jekob i kam wan bubu blong Mesaea. ?God i gat wanem tingting long Esao mo Jekob? Jehova i talem long profet Malakae, i se: “Jekob wetem olgeta we oli kamaot biaen long hem, mi mi lavem olgeta moa. Be Esao, wetem olgeta we oli kamaot biaen long hem, mi mi no laekem olgeta nating, mi agens long olgeta.”—Mal. 1:2, 3.

11. (1) ?From wanem stori blong Esao i stret long ol Kristin tede? (2) ?From wanem Pol i joenem fasin blong slip olbaot wetem fasin blong Esao?

¹¹ ?Olsem wanem? ?Samting we Baebol i talem long saed blong Esao, i stret long ol Kristin tede? Yes, i stret long olgeta tu. Aposol Pol i givim woning long ol man blong God, i se: “I no mas gat wan long yufala we i slip olbaot, no we i no tinghae long ol samting we oli tabu, olsem Esao. Hem i salem raet we hem i gat olsem fasbon, from wan smol pis mit nomo.” (Hib. 12:16, King James Version) Woning ya i stret yet long ol Kristin. Yumi mas gohed blong tinghae long ol samting we oli tabu. Hemia bambae i givhan long yumi blong yumi no mekem samting we tingting blong yumi nomo i wantem, nao yumi lusum presen ya we God i putum i stap blong yumi. ?Be from wanem Pol i joenem fasin blong slip olbaot wetem fasin blong Esao? From we sipos yumi gat sem fasin olsem Esao, bambae yumi sakemaot ol samting we oli tabu, ale yumi mekem ol rabis fasin we tingting blong yumi nomo i harem gud long hem, olsem fasin blong slip olbaot.

12. (1) ?Setan i mekem wanem blong traem pulum yumi? (2) ?Taem yumi mas mekem wan desisen we i no isi, wanem sam eksampol long Baebol we oli save givhan long yumi?

¹² Yumi ol man blong Jehova, yumi no mekem sam samting we oli save pulum yumi blong foldaon long rabis fasin blong man wetem woman. Be yumi prea long Jehova God blong i givhan long yumi blong no foldaon taem narafala i pulum yumi blong brekem loa blong hem. (Mat. 6:13) Be taem yumi stap traehad blong holemstrong long bilif blong yumi, Setan tu i gohed strong blong traem spolem bilif blong yumi. (Efes. 6:12) Hem i god blong rabis wol ya, taswe hem i save olsem wanem blong pulum yumi. Hem i yusum sam samting we tingting blong yumi nomo i wantem, blong traem yumi. Ol samting ya we oli stap traem yumi, oli sem mak nomo long ol samting we oli stap traem ol narafala man. (1 Kor. 10:8, 13) Yu traem tingbaot. Maet yu gat janis blong kasem wan samting we yu wantem tumas, be yu mas brekem loa blong God blong kasem samting ya. ?Bambae yu mekem wanem? ?Bambae yu mekem olsem Esao, yu talem se: “!Hareap! !Givim long mi!”? ?No yu stanap strong mo yu ronwe long samting ya we i traem yu, olsem Josef i mekem taem woman blong Potifa i traem pulum hem?—Ridim Jenesis 39:10-12.

13. (1) ?Tede, plante Kristin oli mekem wanem desisen, olsem Josef bifo? ?Be olsem wanem sam Kristin oli jusum blong mekem olsem Esao? (2) ?Eksampol blong olgeta we oli jusum blong mekem olsem Esao, oli mekem yumi tingbaot wanem impoten samting?

¹³ Plante brata mo sista blong yumi oli fesem sam samting we i traem olgeta, ale oli mas mekem wan desisen. Oli mas jusum se bambae oli mekem olsem Esao no oli mekem olsem Josef. Plante oli mekem ol desisen we oli waes, ale Jehova i glad long olgeta. (Prov. 27:11) Be sam Kristin oli jusum blong mekem olsem Esao, ale klosap oli lusum presen we God i putum i stap blong olgeta. Evri yia, bighaf blong olgeta we kongregesen i stretem no i putumaot olgeta, hemia olgeta we oli mekem rabis fasin blong man wetem woman. !Taswe i impoten tumas we naoia yumi rerem hat blong yumi! !Mo yumi mas mekem bifo we yumi fesem ol samting we oli traem bilif blong yumi! (Sam 78:8) I gat tu samting we yumi mas mekem. Tufala samting ya oli save kam olsem wan stonwol we bambae i blokem yumi long ol samting we oli traem yumi, mo bambae oli givhan long yumi blong yumi mekem ol desisen we oli waes.

14. ?Wanem ol kwestin we yumi mas tingting gud long olgeta?

¹⁴ Fas samting we yumi mas mekem, se: Yumi mas tingting gud long frut we bambae i kamaot from samting we yumi mekem. Jehova hem i God ya we bambae i givim presen long yumi. Taswe yumi mas lavem hem. Sipos lav blong yumi long hem i bigwan, bambae yumi tinghae moa long presen ya we hem i putum blong yumi. Yu traem tingbaot. Sipos yumi lavem wan man, yumi no wantem mekem hem i harem nogud. Be yumi traehad blong mekem se hem i glad long yumi. Long sem fasin, sipos yumi wantem mekem samting we tingting blong yumi nomo i wantem, yumi mas tekem taem blong tingting gud long trabol we bambae yumi save kasem, mo ol narafala tu oli save kasem. Yumi mas askem se: ‘Sipos mi mi mekem samting we mi nomo mi wantem, ?wanem bambae i hapen long fasin fren blong mi wetem Jehova? ?Samting ya bambae i mekem wanem long famle blong mi? ?Bambae i mekem wanem long ol brata mo sista blong mi long kongregesen? ?Ol narafala bambae oli foldaon from fol blong mi?’ (Fil. 1:10) Mo tu, yumi save askem se: ‘?I stret we mi harem gud blong smoltaem long rabis samting we tingting blong mi nomo i wantem, be biaen, mi harem nogud bigwan from samting we mi mekem? ?Mi mi rili wantem krae bigwan olsem Esao, taem mi luksave se mi mekem wan samting we i nogud?’ (Hib. 12:17) I gud yumi tingting gud long ol kwestin ya. Samting ya bambae i givhan long yumi blong yumi “agens long ol rabis fasin,” be yumi “holemstrong ol gudfala fasin.” (Rom 12:9) Antap moa, taem yumi lavem Jehova, hemia bambae i pulum yumi blong yumi holemstrong long presen ya we hem i putum i stap blong yumi.—Sam 73:28.

15. ?Wanem bambae i mekem se yumi save kam strong blong blokem ol samting we oli traem yumi?

¹⁵ Seken samting we yumi mas mekem, se: Yumi mas kam strong moa, blong yumi blokem ol samting we oli save traem yumi. Jehova i mekem plante rod we oli givhan long yumi blong yumi kam strong, nao yumi save agensem ol samting we oli traem bilif blong yumi. Sam long ol rod ya, hemia ol Kristin miting, wok blong prij, prea, mo fasin blong stadi long Baebol. (1 Kor. 15:58) Evritaem we yumi talemaot ol trabol blong yumi long Jehova, mo evritaem we yumi prij, i olsem se yumi stap mekem stonwol blong yumi i kam strong moa, nao hem i save blokem ol samting we oli kam traem yumi. (Ridim 1 Timoti 6:12, 19.) Yumi mas wok had oltaem sipos yumi wantem se yumi kam strong. (Gal. 6:7) Ol Proveb japta 2 i soemaot samting ya.

16, 17. ?Sipos yumi wantem mekem ol desisen we oli waes, yumi mas mekem wanem?

¹⁶ Ol Proveb japta 2 i pulum yumi blong yumi traehad blong kasem waes mo blong yumi kam naf blong tingting gud. Tufala fasin ya oli olsem ol gudfala presen. Oli givhan long yumi blong luksave samting we i stret no samting we i no stret, mo yumi mekem wan desisen we i stret. Mo oli givhan long yumi blong luksave sipos yumi mas bos long tingting blong yumi no yumi mekem samting we yumi nomo i wantem. Be sipos yumi wantem gat ol fasin ya, yumi mas rere blong wok had. Baebol i soemaot stamba trutok ya, i se: “Pikinini blong mi. Yu mas lanem ol samting ya we mi stap tijim yu long hem, mo yu no mas fogetem ol fasin ya we mi stap talem long yu se yu mas mekem. Yu mas lesin long ol waestok ya, mo yu mas traehad blong haremsave olgeta. Yes, yu mas askem strong long Hae God, blong i mekem yu yu gat save, mo yu mas askem long hem oltaem, blong yu save haremsave mining blong ol strong samting. Oltaem yu mas traehad blong kasem waes ya, olsem we yu save traehad blong faenem silva, no wan narafala samting olsem, we man i bin berem. Sipos yu stap mekem olsem, bambae yu save kasem mining blong tok ya we i talem se, ‘Yu mas tinghevi long Hae God, mo yu mas ona gud long hem.’ Nao bambae yu save fasin blong hem moa, blong yu savegud hem. Hae God nomo i save mekem man i waes. Fasin blong save mo fasin blong haremsave, tufala i stap kamaot long hem nomo.”—Prov. 2:1-6.

¹⁷ Taswe, i klia se sipos yumi wantem se yumi naf blong mekem ol desisen we oli waes, yumi mas folem ol advaes ya blong Ol Proveb. Yumi mas letem ol tok blong Jehova oli jenisim ol fasin blong yumi, yumi mas prea oltaem long God blong i lidim yumi, mo yumi mas gohed blong lukaotem save blong God, olsem we yumi lukaotem wan sas samting we i haed. Sipos yumi mekem ol samting ya, bambae yumi naf blong stanap strong taem ol samting oli kam traem yumi.

18. ?Yu mas gohed blong mekem wanem, mo from wanem?

¹⁸ Jehova bambae i givim waes mo save long man, mo bambae hem i mekem man i naf blong kasem save mo luksave ol samting. Hem i save givim ol presen ya long olgeta we oli wok had blong kasem. Taem yumi traehad blong lukaotem ol presen ya, mo yumi yusum olgeta long laef blong yumi, bambae yumi kam klosap long Jehova, we hem nao i givim ol presen ya. Ale, fasin fren we yumi gat wetem hem, bambae i olsem wan stonwol we i blokem gud yumi taem ol samting oli kam traem yumi. Sipos yumi kam klosap long God mo yumi ona gud long hem, bambae yumi no save mekem samting we i no stret. (Sam 25:14; Jem. 4:8) Taswe, i gud we yumi stap harem gud long fasin fren blong yumi wetem Jehova, mo yumi folem waes blong hem long laef blong yumi. Samting ya bambae i pulum yumi evriwan blong yumi mekem ol desisen we oli mekem Jehova i glad, mo i mekem se yumi no lusum presen ya we Jehova i putum i stap blong yumi.