9. ?Man blong raetem Sam 90 i talem se wan taosen yia i olsem wanem long tingting blong God?

⁹ Tabu spirit i pusum man we i raetem Sam ya blong talem se, long tingting blong Man we i Wokem yumi mo we i laef olwe, wan taosen yia i wan sot taem nomo. Man ya i toktok i go long God, i se: “Fastaem yu tekem graon, yu mekem mifala long hem, mo oltaem yu stap mekem mifala i gobak long graon bakegen [“yu mekem mifala i kam olsem graon we oli brebrekem i kam ases nomo,” NW ]. Yu stap talem se, ‘Ol man long wol, yufala i mas gobak long graon.’ Long yu, wan taosen yia i olsem wan dei nomo, i olsem yestedei we i pas finis, i olsem wan aoa nomo [“fo aoa we wajman i gad,” NW ] long naet, we i pas kwiktaem nomo.”—Ol Sam 90:3, 4.

11. ?From wanem yumi save talem se wan longfala taem i sot nomo long tingting blong God?

¹¹ Nating se man i laef plante yia olsem Metusela we i kasem 969 yia, be long lukluk blong Jeova laef blong ol man i sot moa i bitim wan ful dei. (Jenesis 5:27) God i stap luk wan taosen yia olsem we i 24 aoa nomo, olsem yestedei we i pas. Mo tu, man blong raetem Sam ya i talem se, long lukluk blong God, wan taosen yia i olsem fo aoa we wajman i gad long naet. (Jajes 7:19) Ale, i klia se wan longfala taem long tingting blong yumi, i sot tumas long Jeova God, we i laef olwe.