Stap Sef Longwe Long Ol Trap Blong Man Blong Kasem Pijin

“[ Jeova] bambae i sevem yu long man blong putum trap blong kasem pijin.”—OL SAM 91:3, NW.

 1. ?Hu ya “man blong putum trap blong kasem pijin”? ?From wanem man ya i wan denja long ol Kristin?

I GAT wan man we i wantem kasem mo spolem evri trufala Kristin, man ya i waes moa i bitim olgeta man long wol, mo hem i save gud rod blong trikim man. Ol Sam 91:3 (NW) i tokbaot hem se “man blong putum trap blong kasem pijin.” ?Hu ya enemi ya? Stat long Jun 1, 1883, Wajtaoa i soemaot oltaem se man ya hem i Setan. Olsem wan man we i putum trap blong kasem pijin, bigfala enemi ya we i waesgud blong trikim man, i traehad blong lidim ol man blong Jeova oli gorong, nao oli foldaon long ol trap blong hem.

 2. ?From wanem Baebol i talem se Setan i sem mak long wan man blong kasem pijin?

² Long taem bifo, ol man oli kasem ol pijin from we oli wantem harem ol naesfala singsing blong olgeta no lukluk ol naes kala blong olgeta, no from we oli wantem kakae mit blong olgeta, no yusum olgeta blong mekem sakrefaes. Be i no isi blong kasem ol pijin from we oli fraet mo oli no save kam klosap long man. Taswe, long taem bifo, taem man i wantem kasem wan pijin, fastaem hem i mas lukluk mo wajemgud ol fasin blong pijin ya. Biaen, man ya i mas traem faenem wan rod blong trikim pijin ya mo kasem hem. Taem Baebol i talem se Setan i olsem wan man blong kasem pijin, hem i givhan long yumi blong kasem save long fasin blong Setan blong trikim yumi. Setan i lukluk gud long fasin blong yumi wanwan. Hem i makemgud ol samting we yumi laekem blong mekem oltaem, mo ol fasin blong yumi, nao biaen, hem i haedem ol trap blong hem blong i save kasem yumi. (2 Timoti 2:26, NW) Sipos Setan i kasem yumi, samting ya bambae i spolemgud fasin fren blong yumi wetem God, mo bambae yumi ded blong olwe. Taswe, blong blokemgud Setan, yumi mas luksave ol defren trik blong ‘man ya blong kasem pijin.’

3, 4. ?Wetaem ol trik blong Setan oli sem mak long trik blong wan laeon mo wan posen snek?

³ Man blong raetem Ol Sam i yusum pijatok blong soem se ol trik blong Setan oli sem mak long trik blong wan yangfala laeon no trik blong wan snek. (Ol Sam 91:13) Taem wan laeon i hanggri, hem i go stret long anamol we hem i wantem kakae mo i atakem hem. Long sem fasin, Setan i save yusum sam man no sam loa blong gavman blong agensem ol man blong Jeova stret. (Ol Sam 94:20) Strong fasin agens olsem i save mekem sam Kristin oli lego Jeova. Be plante taem, strong fasin agens ya i no mekem samting we Setan i wantem. Samting we i kamaot se fasin ya i mekem ol man blong Jeova oli joengud moa. ?Be, wanem narafala trap blong Setan we i haed gud, we i olsem trik blong snek?

⁴ Taem wan man no wan anamol i no luk wan posen snek we i haed, wantaem nomo snek ya i save jam long hem, i kakae hem, i givim kil we i blong ded nomo. Long sem fasin, Setan i yusum waes blong hem we i hae moa i bitim waes blong man, blong spolem yumi. Blong winim sam man blong God, i olsem we Setan i posenem tingting blong olgeta, i trikim olgeta blong oli mekem samting we hem i wantem, be i no samting we Jeova i wantem, ale oli kasem bigfala trabol from. Yumi glad from we yumi save ol plan blong Setan. (2 Korin 2:11) Naoia bambae yumi tokbaot fo trap blong Setan we oli sem mak long trap blong wan man blong kasem pijin.

Fraet Long Ol Narafala Man

 5. ?From wanem trap ya blong “fraet tumas long ol narafala man” i wokgud?

⁵ ‘Man blong kasem pijin’ i kasem save se ol man oli wantem blong ol narafala oli glad long olgeta mo oli joen wetem olgeta. Ol Kristin tu oli tingbaot tingting mo filing blong ol man we oli stap raonabaot long olgeta, mo oli tingbaot se ol man ya bambae oli gat wanem tingting long saed blong olgeta. Setan i save samting ya, mo i yusum tingting ya. Olsem nao, hem i mekem sam man blong God oli foldaon long trap ya blong “fraet tumas long ol narafala man.” (Ol Proveb 29:25) Sipos ol man blong God oli fraet long ol narafala man, nao oli joen wetem olgeta blong mekem samting we God i putum tabu long hem, oli foldaon long trap blong ‘man blong kasem pijin.’ Mo oli foldaon long trap ya tu, sipos oli no mekem samting we Tok blong God i talem se oli mas mekem.—Esikel 33:8; Jemes 4:17.

 6. ?Olsem wanem wan yangfala i save foldaon long trap blong ‘man blong kasem pijin’?

⁶ Tingbaot wan yangfala we i go long skul. Maet ol fren blong hem long skul oli pulum hem blong smok, ale yangfala ya i smok. Taem yangfala ya i aot long moning blong go long skul, hem i no gat tingting ya nating se bambae hem i smok wan sigaret. Be kwiktaem nomo, hem i stap mekem wan samting we i save spolem bodi blong hem mo mekem God i no moa glad long hem. (2 Korin 7:1) ?Olsem wanem yangfala ya i foldaon long trap ya? Maet hem i stap joen wetem sam rabis fren mo hem i fraet se bambae oli no moa glad long hem. !Ol yangfala, yufala i no mas letem ‘man blong kasem pijin’ i trikim yufala, nao yufala i foldaon long trap blong hem! Blong hem i no kasem yufala, yufala i mas lukaotgud blong no foldaon long ol trik blong hem, nating se oli smosmol nomo. Yufala i mas lesin long woning blong Baebol blong no joen wetem ol rabis fren.—1 Korin 15:33.

 7. ?Olsem wanem Setan i save mekem se sam papa mama oli no moa skelemgud ol samting long saed blong spirit?

⁷ Ol Kristin papa mama oli tinghevi long wok ya we Baebol i talem se oli mas mekem, hemia blong givim samting we famle i nidim long saed blong bodi. (1 Timoti 5:8) Be Setan i wantem se ol Kristin oli putum tingting blong olgeta fulwan long wok ya nomo blong kasem samting we oli nidim long saed blong bodi. Maet sam Kristin oli stap mestem plante miting from we oli lesin nomo taem bos blong olgeta i askem blong oli mekem sam moa wok. Maet oli fraet blong askem spel, blong oli save joen long ful program blong distrik asembli, mo blong wosipim Jeova tugeta wetem ol Kristin brata sista blong olgeta. Blong no foldaon long trap ya, yumi mas “trastem [Jeova, NW].” (Ol Proveb 3:5, 6) Mo tu, yumi mas tingbaot se yumi evriwan, yumi haf blong famle blong Jeova, mo se Jeova i talem se bambae hem i lukaot gud long yumi. Sipos yumi tingbaot samting ya oltaem, bambae yumi no save bitim mak long wok blong kasem ol samting long saed blong bodi. ?Ol papa mama, sipos yufala i mekem samting we Jeova i wantem, yufala i bilif se Hem bambae i mekem sam samting blong lukaot gud long yufala mo famle blong yufala? ?No yufala i foldaon long trap blong Setan, nao yufala i mekem samting we hem i wantem from we yufala i fraet long ol man? Mifala i wantem tumas se yufala i prea mo yufala i tingting gud long ol kwestin ya.

Trap Ya Blong Ronem Ol Sas Samting

 8. ?Olsem wanem Setan i yusum ol sas samting blong trikim man?

⁸ Setan i yusum ol sas samting tu blong trikim ol man oli foldaon long trap blong hem. Plante taem, ol bisnesman tede oli pulum man blong kam rij kwiktaem, long fasin we man i no wokhad mo i mekem ol kruked wok. Sam man blong God tu oli save foldaon long trap ya. Samtaem, samfala oli talem long narafala se: “Yu wokhad naoia. Taem bambae yu kasem naf mane, yu save slo daon mo haremgud long laef. Long taem olsem, yu save mekem wok blong paenia.” Samfala long kongregesen we oli no gat stret tingting, oli save talem ol toktok olsem, mo oli yusum ol brata sista long kongregesen blong oli save winim bigfala mane. Yu mas tingting gud long ol toktok blong ol man olsem. ?Yu no ting se ol toktok blong olgeta oli sem mak long tingting blong rijman ya long parabol blong Jisas, we God i talem se hem i “no gat hed”?—Luk 12:16-21.

 9. ?From wanem sam Kristin oli foldaon long trap ya blong wantem plante moa samting?

⁹ Setan i yusum rabis wol ya blong pulum ol man blong oli wantem plante moa samting. Fasin ya blong wantem ol samting tumas, i save kam insaed long laef blong wan Kristin, i holemtaet hem, nao trutok i no moa save gat paoa long hem mo “hem i no save karem frut.” (Mak 4:19, NW) Baebol i leftemap tingting blong yumi blong harem gud long kakae mo klos we oli naf long yumi. (1 Timoti 6:8) Plante oli no folem advaes ya long laef blong olgeta, ale oli foldaon long trap blong ‘man blong kasem pijin.’ ?Olsem wanem? ?Flas i pulum olgeta blong tingting se oli mas gat wan gudfala laef? ?Olsem wanem long yumi wanwan? ?Yumi wantem tumas blong gat ol samting, nao yumi putum trufala wosip i go long namba tu ples long laef blong yumi? (Hagae 1:2-8) Long laef tede, i hadwok tumas blong kasem mane, ale samfala we oli lan blong gat gudfala laef, oli lego ol samting long saed blong spirit, nao oli traehad blong mekem se oli gohed blong gat gudfala laef. Sore tumas long olgeta ya. !Tingting olsem blong wantem plante moa samting i mekem ‘man blong kasem pijin’ i glad tumas!

Trap Ya Blong Wajem Ol Samting We Oli No Stret

10. ?Ol wanwan Kristin i mas luklukgud long wanem samting long laef blong olgeta?

¹⁰ Wan narafala trik blong ‘man blong kasem pijin,’ hemia blong spolem stret tingting we man i gat long saed blong samting we i gud mo samting we i nogud. Bighaf blong ol kampani we oli stap wokem ol sinema mo buk tede oli gat sem tingting we ol man blong Sodom mo Gomora oli bin gat. Ol nius tu we oli raetem long ol magasin mo we oli soem long televisin, oli soemaot raf fasin mo oli pulum man blong intres long ol samting long saed blong seks. Bighaf blong ol samting long ol niuspepa mo televisin, we ol man oli lukluk mo ridim taem oli spel, oli spolem man blong i no moa luksave “wanem fasin i gud mo wanem fasin i nogud.” (Hibrus 5:14) Be i gud yumi tingbaot toktok blong Jeova we hem i talem tru long profet Aesea, i se: “Yufala ya, we i stap talem ol fasin we oli nogud, se oli gud nomo, mo ol fasin we oli gud, se oli nogud, sore tumas long yufala.” (Aesea 5:20) ?Olsem wanem? ?‘Man blong kasem pijin’ i yusum finis ol rabis sinema no buk olsem blong spolem tingting blong yu? I impoten tumas we yumi luklukgud long laef blong yumi.—2 Korin 13:5.

11. ?Wajtaoa i givim wanem woning long saed blong sam stori long televisin?

¹¹ Klosap 25 yia bifo, Wajtaoa i givim woning we i stanap long lav, blong ol man blong God oli lukaotgud long ol program long televisin we stori blong olgeta i stap gohed smosmol evri dei. Ol stori ya we oli kolem ‘soap operas’ long Inglis, oli soemaot ol samting we i hapen long laef blong ol man mo woman blong wol mo ol rabis fasin we oli mekem long saed blong seks.a Wajtaoa i tokbaot olsem wanem ol man oli no luksave se ol program ya oli stap gat paoa long tingting blong olgeta, i se: “Ol woman long ol stori ya oli wantem blong faenem ol man we oli lavem olgeta. Ale oli yusum samting ya olsem eskius blong mekem olkaen rabis fasin. Long wan stori olsem, wan yangfala gel we i no mared be i gat bel, i talem long fren blong hem se: ‘Be mi mi lavem Victor. Mi no kea. . . . !I impoten tumas we mi mi gat wan pikinini blong hem!’ Wan naesfala miusik i stap gohed sloslo long semtaem we yangfala gel ya i stap toktok. I had blong ol man oli luksave se samting we gel ya i mekem, hem i nogud we i nogud. Man we i wajem stori ya, hem tu i harem se i laekem Victor. Hem i sore long yangfala gel ya. Hem i agri se samting we gel ya i mekem ‘i stret nomo.’ Wan sista we bifo hem tu i stap wajem ol program olsem, be biaen, hem i jenisim fasin blong hem, i talem se: ‘I wan sapraes blong luk olsem wanem yu faenem eskius taem yu gat ol tingting we oli no stret. Yumi save se rabis fasin long saed blong seks i nogud. . . . Be mi mi luksave se long tingting blong mi, mi stap agri wetem rabis fasin we man no woman i mekem long ol stori ya.’ ”

12. ?Wanem sam samting we oli soemaot se ol woning long saed blong ol program we oli kamaot long televisin, oli stret nomo?

¹² Afta we haf ya blong Wajtaoa i kamaot, ol program ya we oli stap spolem hat blong man oli kam plante, mo i isi blong man i wajem olgeta. Long sam ples, man i save wajem ol program olsem blong 24 aoa evri dei. Ol man, woman, mo plante yangfala oli fidim tingting mo hat blong olgeta oltaem wetem ol program olsem we oli luk long televisin. Be yumi, yumi no wantem giaman long yumi wan. I rong blong tingting se i oraet nomo blong wajem ol rabis fasin long televisin, from we oli sem mak nomo long ol samting we yumi stap luk long wol ya tede. Wan Kristin bambae i neva save tingting blong singaot ol rabis man olsem, oli kam insaed long haos blong hem. ?Olsem wanem? ?I stret sipos Kristin ya i jusum blong wajem ol samting we ol rabis man ya oli stap mekem long televisin?

13, 14. ?Samfala oli talemaot se ol woning long saed blong televisin oli givhan long olgeta olsem wanem?

¹³ Plante man oli luk se taem oli obei long woning ya we ‘slef we i stret mo waes’ i givim, oli kasem gudfala samting from. (Matiu 24:45-47, NW) Taem samfala oli ridim advaes blong Baebol we i kliagud, oli raetem leta blong talem olsem wanem haf ya blong Wajtaoa i gat paoa long olgeta.b Wan sista i raetem se: “Mi mi stap wajem ol program ya [ol ‘soap operas’] blong 13 yia. Mi bin tingting se mi mi oraet long saed blong spirit from we mi go long ol miting mo mi joen sam samtaem long wok blong prij. Be mi mi gat sem tingting olsem ol man blong wol we oli stap wajem ol program ya. Mi tingting se sipos man blong yu i mekem i nogud long yu no yu harem se hem i no lavem yu, i stret nomo we yu go slip wetem narafala man, hemia i fol blong man blong yu nomo. Taswe, mi tu mi mekem rabis fasin ya mo mi mekem sin agens long Jeova mo hasban blong mi, from we mi bin harem se ‘i stret nomo’ blong mekem olsem.” Kongregesen i bin putumaot sista ya. Biaen, hem i luksave sin blong hem, i tanem tingting blong hem, mo kongregesen i tekembak hem. Ol haf blong Wajtaoa we oli givim woning long saed blong ol program ya we oli stap kamaot long televisin, oli givim paoa long hem blong i no moa wajem ol samting we Jeova i no laekem nating.—Amos 5:14, 15.

¹⁴ Wan narafala Kristin we ol program ya oli gat paoa long laef blong hem, i talem se: “Mi mi krae taem mi ridim ol haf ya blong Wajtaoa, from we mi faenemaot se hat blong mi i no moa stap fulwan long Jeova. Mi promes long God blong mi se bambae mi mi no moa letem ol program ya oli kontrolem laef blong mi.” Wan Kristin woman i talem tangkiu from ol haf ya long Wajtaoa, nao biaen, hem i talemaot se hem tu i stap wajem ol program ya. Woman ya i raetem se: “Mi stap tingbaot . . . sipos ol program ya oli save spolem fasin fren blong mi wetem Jeova. ?Olsem wanem ‘ol man mo woman’ ya oli save kam fren blong mi, mo long semtaem mi save stap olsem wan fren blong Jeova?” Sipos 25 yia bifo, ol program ya blong televisin oli bin spolem hat blong sam Kristin, yumi save se oli mas gat bigfala paoa moa tede. (2 Timoti 3:13) Yumi mas lukaot gud long trap ya blong Setan, hemia evri samting we oli no stret we yumi ridim no yumi wajem, nomata sipos oli ol program long televisin [ol ‘soap operas’], ol vidio gem we oli raf, no ol vidio blong miusik we i tokbaot rabis fasin long saed blong seks.

Ol Smosmol Trabol We i Kamaot Bitwin Tu Kristin

15. ?Olsem wanem Setan i kasem samfala?

¹⁵ Taem ol smosmol trabol oli kamaot from we tu Kristin i no agri long wan samting, Setan i save yusum samting ya olsem wan trap blong mekem ol man blong Jeova oli seraot. Nomata wanem blesing we yumi gat long wok blong Jeova, yumi tu yumi save foldaon long trap ya. Samfala oli foldaon long trap blong Setan from we oli letem ol smosmol trabol i spolem pis, fasin joengud mo ol gudgudfala samting long saed blong spirit we Jeova i givim blong mekem yumi haremgud.—Ol Sam 133:1-3.

16. ?Olsem wanem Setan i yusum trik blong traem spolem fasin joengud blong yumi?

¹⁶ Long Wol Wo Wan, Setan i traem blong finisim ogenaesesen blong Jeova long wol, taem hem i pusum ol man blong oli agensem hem. Be Setan i no win. (Revelesen 11:7-13) Stat long taem ya, hem i yusum ol trik blong traem spolem fasin joengud blong yumi. Taem yumi letem ol smosmol trabol oli seraotem yumi, yumi mekem rod blong ‘man blong kasem pijin’ i spolem yumi. Long fasin ya, yumi save blokem tabu spirit, blong i no wok long laef blong yumi mo long kongregesen. Sipos samting ya i hapen, Setan bambae i glad from we taem kongregesen i seraot mo i no moa gat pis, samting ya bambae i spolem wok blong prij.—Efesas 4:27, 30-32.

17. ?Olgeta we oli gat smosmol trabol wetem narafala Kristin, oli mas mekem wanem blong stretem trabol ya?

¹⁷ ?Wanem samting we yu save mekem, sipos yu gat wan smosmol trabol wetem wan narafala Kristin? I tru se evri trabol oli no sem mak. Maet i gat plante risen we oli mekem se trabol i kamaot, be i no gat risen we i mas blokem yumi blong yumi no stretem trabol ya. (Matiu 5:23, 24; 18:15-17) Advaes we i stap long Baebol i kamaot long God, mo i stretgud. Taem yumi folem ol tingting blong Baebol, ol advaes ya oli wokgud oltaem. !Yumi kasem gudfala frut oltaem!

18. ?Sipos yumi folem fasin blong Jeova, olsem wanem hemia i save givhan long yumi blong stretem ol smosmol trabol?

¹⁸ Jeova i “rere blong fogivim” man, mo hem i “fogivim” man tru. (Ol Sam 86:5, NW; 130:4) Taem yumi folem fasin blong Jeova, yumi soemaot se yumi pikinini blong Hem. (Efesas 5:1) Yumi evriwan yumi sinman mo yumi nidim tumas blong Jeova i fogivim ol sin blong yumi. Taswe, yumi mas lukaot gud sipos yumi harem se yumi no wantem fogivim narafala. Yumi save kam olsem slef ya long parabol blong Jisas. Slef ya i gat bigfala kaon long masta blong hem, mo masta ya i fogivim hem finis from kaon ya. Be slef ya i no wantem fogivim wan narafala man blong wok we i gat kaon long hem, we kaon ya i smol nomo. Taem masta ya i harem nius blong slef ya we i no wantem fogivim narafala, hem i sakem hem i go long kalabus. Jisas i finisim parabol blong hem wetem toktok ya: “Sipos yufala evriwan i no fogivim ol brata blong yufala long olgeta tingting blong yufala, bambae Papa blong mi long heven i save mekem sem fasin ya tu long yufala.” (Matiu 18:21-35) Yumi mas tingting dip long pijatok ya mo yumi mas tingbaot hamas taem we Jeova i glad nomo blong fogivim yumi. !Hemia bambae i givhan long yumi taem yumi stap traem blong stretem wan trabol wetem brata blong yumi!—Ol Sam 19:14.

Stap Sef ‘Long Ples Haed Blong Hae God’

19, 20. ?Long taem ya we i fulap long ol denja, wanem tingting we yumi mas gat long saed blong “ples haed” mo “sado” blong Jeova?

¹⁹ Yumi stap laef long wan taem we i fulap long denja. Sipos Jeova i no lukaot gud long yumi wetem lav, Setan bambae i spolem yumi evriwan. Taswe, blong blokem ‘man blong kasem pijin,’ yumi mas stap long wan ples blong haed, hemia “ples haed blong Hae God” we i mekem yumi sef “long sado blong hemia we i gat olgeta paoa.”—Ol Sam 91:1, NW.

²⁰ Jeova i givim woning long yumi bakegen mo bakegen. I gud we oltaem yumi lukluk ol woning ya olsem ol tok blong lukaotgud long yumi, be yumi neva mas ting se ol tok ya oli stap blokem yumi tumas, olsem we yumi kalabus. Wan man we i waes moa i bitim olgeta man long wol i wantem spolem yumi evriwan. Sipos Jeova i no givhan long yumi wetem lav, i no gat wan long yumi we i save sef, bambae yumi evriwan i foldaon long trap blong man ya. (Ol Sam 124:7, 8) !Taswe, i gud we yumi prea blong Jeova i sevem yumi long ol trap blong ‘man ya blong kasem pijin’!—Matiu 6:13.

[Ol Futnot]

?Yu Yu Tingbaot?

• ?From wanem fasin blong “fraet tumas long ol man” i wan trap we i save kilim man i ded?

• ?Olsem wanem Setan i yusum ol sas samting olsem wan trik?

• ?Olsem wanem Setan i mekem samfala oli foldaon long trap ya blong wajem mo ridim ol samting we oli no stret?

• ?Wanem trap we Setan i yusum blong spolem fasin joengud blong yumi?