Trastem Tok Blong Jeova

“Mi mi trastem tok blong yu.”—OL SAM 119:42.

 1. ?Ating hu nao i raetem Sam 119, mo man ya i gat wanem tingting?

MAN we i raetem Sam 119 i laekem tumas tok blong Jeova. Maet hemia Prins Hesekia blong Juda. Ol filing insaed long singsing ya we i kamaot long God oli laenap gud wetem fasin blong Hesekia. Taem hem i king blong Juda, hem “i putum tingting blong hem i stap strong long Hae God.” (2 King 18:​3-7) Wan samting we yumi savegud se: Man we i wokem singsing ya i luksave se hem i nidim ol samting long saed blong spirit.​—Matiu 5:3.

 2. ?Wanem bigfala tingting insaed long Sam 119? ?Oli folem wanem fasin blong raetem singsing ya?

² Bigfala tingting insaed long Sam 119, hemia se tok no mesej blong God i gud tumas.a Man we i wokem singsing ya, i raetem ol haf blong hem folem alfabet. Ating hem i raetem olsem blong mekem se i isi blong lanem. Ol 176 vas blong hem oli folem alfabet long Hibru lanwis. Long olfala lanwis ya, Sam ya i gat 22 haf blong hem, we i gat 8 laen long ol wanwan haf ya, mo ol 8 laen ya oli stat wetem semfala alfabet. Sam ya i tokbaot ol tok blong God, ol loa, ol rul, ol fasin, ol tijing, ol tingting, mo ol rod blong hem. Long stadi ya mo long nekis stadi, bambae yumi yusum wan Baebol we i tanem gud olfala Hibru hanraet blong Sam 119. Sipos yumi tingting dip long ol samting we i kamaot long laef blong ol man blong Jeova bifo mo naoia, bambae yumi kasem save moa long mining blong singsing ya we i kamaot long God, mo bambae yumi gat moa tangkiu from Tok blong God, Baebol.

Sipos Yumi Obei Long God Bambae Yumi Glad

 3. ?I minim wanem se laef blong yumi i stret? Talem wan eksampol.

³ Man we i wantem kasem trufala glad i mas folem loa blong God. (Ol Sam 119:​1-8) Sipos yumi mekem olsem, Jeova bambae i lukluk yumi olsem wan man we ‘laef blong hem i stret.’ (Ol Sam 119:1) Hemia i no min se yumi no save mestem samtaem, be i min se yumi traehad blong mekem samting we Jeova God i wantem. Noa “i wan stret man, we ol man oli no save jajem hem.” Hemia from we “oltaem hem i stap fren gud wetem God.” Taem Bigfala Wota i kavremap wol, God i sevem olfala man ya blong bilif, Noa, wetem famle blong hem, from we hem i obei long ol tok blong Jeova long laef blong hem. (Jenesis 6:9; 1 Pita 3:20) Sem mak tede, taem God bambae i finisim ol rabis fasin blong wol ya bambae hem i sevem yumi sipos yumi ‘obei long ol loa blong hem,’ hemia i min se sipos yumi mekem samting we hem i wantem.​—Ol Sam 119:4.

 4. ?Sipos yumi wantem stap glad mo yumi wantem we ol wok blong yumi i gat frut blong hem, yumi mas mekem wanem?

⁴ Jeova i no save lego yumi sipos ‘tingting blong yumi i klin, nao yumi presemgud hem,’ mo sipos ‘oltaem yumi obei long ol tijing blong hem.’ (Ol Sam 119:​7, 8) God i no lego Josua, lida blong ol man Isrel. Josua i folem advaes ya blong ridim ‘ol tok blong God long dei mo long naet, blong i save mekem olgeta samting we tok ya i talem.’ From samting ya, ol wok blong Josua i gat frut blong hem, mo hem i waes. (Josua 1:8) Taem Josua i kam olfala we klosap hem i ded, hem i stap presem God yet, mo hem i pulum ol man Isrel blong tingbaot se: “Yufala evriwan i savegud long tingting blong yufala we Hae God ya i givim ol gudgudfala samting ya long yumi, stret olsem we hem i promes bifo finis.” (Josua 23:14) Olsem Josua mo man we i raetem Sam 119, yumi save stap glad, mo ol wok blong yumi bambae i gat frut blong hem, sipos yumi presem Jeova mo trastem tok blong hem.

Tok Blong Jeova i Mekem Yumi Klin

 5. (a) Eksplenem olsem wanem blong stap klin long saed blong spirit. (b) ?Wanem help we ol yangfala oli save kasem sipos oli mekem bigfala sin?

⁵ Yumi save stap klin long saed blong spirit sipos yumi obei long ol tok blong God. (Ol Sam 119:​9-16) Yumi save mekem samting ya, nating se papa mama blong yumi i no bin givim gudfala eksampol long yumi. Hesekia i ‘mekem laef blong hem i klin.’ Ating hem i mekem olsem taem hem i sakemaot ol giaman bilif blong ol hiten man. ?Olsem wanem sipos wan yangfala we i stap mekem wok blong God tede, i mestem nao i mekem wan bigfala sin? Hem i mas tanem tingting blong hem, prea, mo kasem help long papa mama blong hem mo long ol Kristin elda. Olsem nao, hem i save kam olsem Hesekia we i ‘mekem laef blong hem i klin mo i obei.’​—Jemes 5:​13-15.

 6. ?Hu ya tufala woman we tufala i ‘mekem laef blong tufala i klin mo tufala i obei long ol tok blong God’?

⁶ Tingbaot Rehab mo Rut. Nating se tufala i laef longtaem bifo we man ya i raetem Sam 119, be tufala i ‘mekem laef blong tufala i klin.’ Fastaem, Rehab i wan woman blong rod long Kenan. Be biaen hem i kam wan woman blong mekem wosip long Jeova mo ol man oli save hem from bigfala bilif blong hem. (Hibrus 11:​30, 31) Rut we hem i woman Moab, i lego ol giaman god we hem i wosipim fastaem, nao hem i mekem wosip long Jeova mo i folem Loa we God i givim long ol man Isrel. (Rut 1:​14-17; 4:​9-13) Tufala woman ya we tufala i no blong Isrel, tufala i ‘obei long ol tok blong God,’ nao tufala i gat nambawan blesing ya blong kam bubu blong Jisas Kraes.​—Matiu 1:​1, 4-6.

 7. ?Olsem wanem Daniel mo tri Hibru yangfala oli stap klin long saed blong spirit mo givim wan gudfala eksampol long yumi?

⁷ “Taem [ol man] oli smol pikinini nomo, be tingting blong olgeta i stap finis long ol rabis fasin.” Nating se i olsem, mo nating se yumi stap long rabis wol ya we Setan i bos long hem, be ol yangfala oli save gat wan laef we i klin. (Jenesis 8:21; 1 Jon 5:19) Taem Daniel mo tri narafala Hibru yangfala oli stap kalabus long Babilon, fofala i ‘obei long ol tok blong God.’ Fofala i no save ‘kakae ol kakae blong king,’ from we ol samting ya bambae oli mekem we fofala i no moa klin long fes blong God. (Daniel 1:​6-10) Ol man Babilon oli stap kakae sam anamol we Loa blong Moses i putum tabu long olgeta from se oli no klin long fes blong God. (Levitikas 11:​1-31; 20:​24-26) Taem ol man Babilon ya oli kilim anamol, oli no mekem blad blong hem i ron, ale oli brekem loa blong God from we oli kakae mit we blad i stap long hem. (Jenesis 9:​3, 4) !Yumi luksave from wanem fofala Hibru yangfala ya oli no save kakae ol kakae blong king! Fofala ya we oli obei long God oli stap klin long saed blong spirit, mo long rod ya oli givim wan gudfala eksampol long yumi tede.

Tok Blong God i Givhan Long Yumi Blong Holemstrong Long Hem

 8. ?Blong kasem save long loa blong God mo folem, yumi nidim wanem fasin mo save?

⁸ Wan impoten samting we i save givhan long yumi blong holemstrong long Jeova, hemia se yumi mas laekem tumas tok blong Hem. (Ol Sam 119:​17-24) Sipos yumi olsem man ya we i raetem singsing blong Sam 119, bambae yumi wantem tumas blong kasem save long “ol gudgudfala samting” long loa blong God. Bambae yumi ‘wantem we yumi wantem tumas blong savegud ol tingting blong Jeova,’ mo bambae ‘ol rul blong hem oli mekem yumi harem gud.’ (Ol Sam 119:​18, 20, 24) Maet yumi jes givim laef blong yumi i go long Jeova. ?Be yumi wokem finis fasin blong “wantem tumas tok blong God we i klin gud”? (1 Pita 2:​1, 2) Yumi mas kasem save gud long ol stamba tijing blong Baebol, nao bambae yumi naf blong kasem save long loa blong God mo folem.

 9. ?Taem samting we ol man oli wantem i defren long loa blong God, yumi mas mekem wanem?

⁹ Ating yu yu laekem ol rul blong God mo oli mekem yu yu harem gud. ?Be olsem wanem sipos “ol haeman” oli tok agens long yu? (Ol Sam 119:​23, 24) Tede, sam haeman oli traem fosem yumi blong folem ol loa blong man i bitim we yumi folem loa blong God. ?Taem samting we ol man oli wantem i defren long samting we God i wantem, yumi mas mekem wanem? Sipos yumi laekem tumas tok blong God, bambae yumi holemstrong long Jeova. Bambae yumi talem sem tok olsem ol aposol blong Jisas oli talem long ol man we oli agensem olgeta, oli se: “Mifala i mas obei long God, mifala i no save obei long man.” ​—Ol Wok 5:29.

10, 11. Soem olsem wanem yumi save holemstrong long Jeova nating se yumi kasem bigfala trabol mo traem.

¹⁰ Nating se yumi kasem bigfala trabol mo traem, be yumi save stap tru long Jeova yet. (Ol Sam 119:​25-32) Sipos yumi wantem holemstrong long God, yumi mas glad blong letem hem i tijim yumi mo yumi mas prea oltaem blong hem i tijim yumi. Mo tu, yumi mas jusum blong ‘holem ol fasin we God i wantem.’​—Ol Sam 119:​26, 30.

¹¹ Hesekia, we maet hem i bin raetem Sam 119, hem i jusum blong ‘holem ol fasin we God i wantem.’ Nating se Hesekia i stap long medel blong ol man we oli mekem wosip long ol giaman god, mo nating se maet sam memba blong haos blong king oli laf long hem, be hem i holem ol fasin we God i wantem. Ating ol trabol ya i mekem hem i “harem nogud we i nogud.” (Ol Sam 119:28) Be Hesekia i trastem God, hem i wan gudfala king, mo hem i mekem “ol samting we Hae God i glad long hem.” (2 King 18:​1-5) Sipos yumi dipen long God, yumi tu yumi save stanap strong taem ol traem oli kasem yumi, mo yumi save holemstrong long God.​—Jemes 1:​5-8.

Tok Blong Jeova i Mekem Tingting i Strong

12. ?Olsem wanem yumi wanwan i save folem tok blong Ol Sam 119:​36, 37?

¹² Taem yumi folem tok blong God, hemia i givim strong tingting we yumi nidim blong stanap strong tru long ol traem long laef. (Ol Sam 119:​33-40) Wetem tingting daon, yumi lukaot ol tijing blong Jeova we oli save givhan long yumi blong ‘holemgud loa blong hem long olgeta tingting blong yumi.’ (Ol Sam 119:​33, 34) Olsem man blong raetem Sam ya, yumi askem long God se: “Plis yu mekem we oltaem bambae mi wantem moa blong obei long ol rul we yu yu mekem, i winim we mi wantem kam rijman,” hemia i min se kam rijman long rod we i no stret. (Ol Sam 119:36) Olsem aposol Pol, ‘oltaem yumi stap mekem i stret nomo.’ (Hibrus 13:18) Sipos bos blong yumi long wok i wantem we yumi giaman no stil, yumi mas mekem tingting blong yumi i strong blong folem tok blong God. Oltaem Jeova i blesem man we i mekem olsem. Mo tu, Jeova i save halpem yumi blong sakemaot tingting blong wantem mekem samting we i no stret. Taswe yumi mas prea olsem: “Blokem ae blong mi blong mi no stap lukluk ol samting we oli nating nomo.” (Ol Sam 119:​37, NW ) Yumi neva mas wantem wan samting we i nating nomo mo we God i agensem. (Ol Sam 97:10) Fasin olsem bambae i mekem se yumi no save lukluk ol doti pija blong seks no joen long wok blong ol rabis spirit no long wan narafala rabis fasin bakegen.​—1 Korin 6:​9, 10; Revelesen 21:8.

13. ?Ol disaepol blong Jisas we ol man oli ronem mo kilim olgeta, oli kasem strong tingting olsem wanem blong oli save talemaot tok blong God we oli no fraet nating?

¹³ Stret save long tok blong God i mekem tingting blong yumi i strong blong prij long ol narafala man. (Ol Sam 119:​41-48) Yumi nidim strong tingting blong yumi no fraet blong ‘ansa long olgeta we oli stap tok nogud long yumi.’ (Ol Sam 119:42) Sam samtaem maet yumi harem olsem ol disaepol blong Jisas we ol man oli ronem mo kilim olgeta, taem oli prea se: “Hae God, . . . Plis yu givhan long mifala, blong bambae mifala i talemaot ol tok blong yu, we tingting blong mifala i strong.” ?Wanem i hapen biaen? “Tabu Spirit i kam fulap long olgeta, nao oli stat talemaot tok blong God we oli no fraet nating.” Semfala Hae God ya i save mekem tingting blong yumi i strong blong yumi talemaot tok blong Hem we yumi no fraet nating.​—Ol Wok 4:​24-31.

14. ?Wanem i save givhan long yumi blong gat fasin olsem Pol we hem i no fraet blong prij?

¹⁴ Yumi save kasem strong tingting blong prij we yumi no fraet no sem, sipos yumi tinghae long “trutok” mo yumi ‘stap obei long loa blong God oltaem.’ (Ol Sam 119:​43, 44) Sipos yumi stadi oltaem long tok blong God, Baebol, bambae yumi naf blong ‘stanap long fes blong ol king mo talemaot ol rul blong God.’ (Ol Sam 119:46) Prea mo tabu spirit blong Jeova, tufala samting ya tu bambae oli halpem yumi blong toktok long gudfala fasin mo talem ol tok we i waes. (Matiu 10:​16-20; Kolosi 4:6) Long faswan handred yia, Pol i no fraet blong tokbaot ol rul blong God long ol haeman. Olsem nao, hem i prij long Feliks we hem i hedgavman blong Rom, nao Feliks i ‘lesin taem Pol i stap tokbaot fasin blong bilif long Jisas Kraes.’ (Ol Wok 24:​24, 25) Pol i prij tu long hedgavman Festas mo King Agripa. (Ol Wok 25:22–26:32) Jeova i save halpem yumi tede tu blong prij wetem strong tingting, we yumi “no sem nating long gud nius.”​—Rom 1:16.

Tok Blong God i Save Mekem Yumi Harem Gud Bakegen

15. ?Olsem wanem Tok blong God i save mekem yumi harem gud bakegen taem samfala oli stap laf nogud long yumi?

¹⁵ Tok blong Jeova i save mekem filing blong man we i harem nogud i kamgud bakegen. (Ol Sam 119:​49-56) Sam samtaem yumi rili nidim help blong yumi save harem gud bakegen. Nating se yumi no fraet blong prij olsem ol Witnes blong Jeova, be samtaem “ol praod man”​—hemia ol flas man we oli no wantem obei long God—​‘oli stap laf nogud long yumi.’ (Ol Sam 119:51) Be taem yumi stap prea, maet yumi tingbaot sam gudfala tok blong Baebol we ‘oli mekem tingting blong yumi i kam strong bakegen.’ (Ol Sam 119:52) Maet yumi stap prea nao yumi tingbaot wan loa no rul blong Baebol we i mekem yumi harem gud bakegen, no i givim strong tingting we yumi nidim blong winim wan trabol.

16. ?Nating se samfala oli agensem ol man blong God, be yumi no mekem wanem?

¹⁶ Ol praod man we oli laf nogud long man blong raetem Sam ya, oli man Isrel​—yes, oli ol memba blong nesen ya we i blong God. !Bigfala sem long ol man ya! Yumi no mas mekem olsem olgeta ya. Yumi mas holem strong tingting blong neva gowe long loa blong God. (Ol Sam 119:51) Long ol yia we ol Nasi mo sam narafala man nogud oli mekem rabis wok blong olgeta, plante taosen man blong God we oli kasem ol raf fasin ya oli no gowe nating long ol loa mo rul blong Baebol. (Jon 15:​18-21) I no strong tumas blong obei long Jeova, from we ol loa blong hem oli olsem ol gudfala singsing we oli mekem yumi harem gud bakegen.​—Ol Sam 119:54; 1 Jon 5:3.

Talem Tangkiu Long Jeova From Tok Blong Hem

17. ?From we yumi tinghae long tok blong God, yumi mekem wanem?

¹⁷ Yumi soem se yumi gat tangkiu from tok blong God taem yumi folem tok ya long laef blong yumi. (Ol Sam 119:​57-64) Man blong raetem Sam ya i ‘promes blong obei long ol tok blong Jeova.’ Taem ‘hem i wekap long medel naet,’ long taem ya tu ‘hem i presem God from we ol tingting blong hem oli stret gud.’ !Yumi tu, sipos yumi wekap long medel naet, hemia wan gudfala janis blong prea long God blong talem tangkiu long hem mo presem hem! (Ol Sam 119:​57, 62) From we yumi tinghae long tok blong God, ale yumi lukaot ol tijing blong Hem, mo yumi glad blong ‘stap fren long olgeta man we oli stap wok blong Jeova’​—hemia ol man we oli gat bigfala ona mo respek long hem. (Ol Sam 119:​63, 64) Long olgeta ples long wol, yumi no save faenem ol fren we oli moagud i bitim olgeta ya.

18. ?Olsem wanem Jeova i save ansa long prea blong yumi taem ‘ol man nogud oli putum wan trap blong kasem yumi’?

¹⁸ Yumi prea wetem fulhat blong yumi blong askem Jeova wetem tingting daon blong hem i tijim yumi. Taem yumi mekem olsemia, yumi stap ‘askem long hem blong i sore long yumi,’ from we yumi wantem se hem i glad long yumi. Yumi rili nidim blong prea taem ‘ol man nogud oli putum wan trap blong kasem yumi.’ (Ol Sam 119:​58, 61) Jeova i save katem rop blong ol enemi we oli holemtaet yumi, blong mekem yumi fri blong gohed long wok blong talemaot Kingdom mo pulum ol man oli kam disaepol. (Matiu 24:14; 28:​19, 20) Samting ya i hapen plante taem finis long ol kantri we gavman i putum tabu long wok blong yumi.

Bilif Long Tok Blong God

19, 20. ?Olsem wanem i gud tumas we oli panisim yumi?

¹⁹ Taem yumi kasem trabol, bilif long God mo tok blong hem bambae i givhan long yumi blong stanap strong mo blong mekem samting we hem i wantem. (Ol Sam 119:​65-72) Man blong raetem Sam ya i talem se ol praod man ‘oli stap tokbaot hem long ol giaman toktok.’ Be nating, hem i gohed i talem se, ‘i gud tumas we oli panisim mi.’ (Ol Sam 119:​66, 69, 71) ?Olsem wanem i gud tumas taem wan man blong Jeova i kasem trabol olsem?

²⁰ Taem yumi kasem trabol, yumi prea long Jeova wetem fulhat blong yumi, mo samting ya i pulum yumi blong kam klosap moa long hem. Ating yumi spenem moa taem blong stadi long Baebol tu, mo yumi traehad moa blong mekem i wok long laef blong yumi. Frut we i kamaot se laef blong yumi i moa hapi. ?Be olsem wanem sipos taem yumi fesem ol trabol olsem, yumi soemaot sam nogud fasin olsem flas tingting mo kros? Sipos yumi prea wetem fulhat blong yumi mo kasem help long Tok blong God mo spirit blong hem, yumi save winim ol slak fasin ya, mo yumi save kam strong moa blong ‘putum niufala laef ya olsem prapa klos blong yumi.’ (Kolosi 3:​9-14) Mo tu, trabol mo hadtaem i save mekem bilif blong yumi i kam strong moa. (1 Pita 1:​6, 7) Ol trabol we i kasem Pol i mekem i gud long hem, from we hem i lanem blong dipen moa long Jeova. (2 Korin 1:​8-10) ?Olsem wanem? ?Ol trabol mo hadtaem we yu yu kasem oli mekem fasin blong yu i kamgud moa no nogat?

Trastem Jeova Oltaem

21. ?Wanem bambae i kamaot taem God i mekem ol praod man oli sem?

²¹ Tok blong God i soemaot plante risen blong trastem Jeova. (Ol Sam 119:​73-80) Sipos yumi rili trastem God we i Wokem yumi, bambae yumi no save sem. Be from nogud fasin we sam narafala oli mekem long yumi, maet yumi nidim help blong harem gud bakegen, mo maet yumi wantem prea olsem: “Plis yu mekem [ol praod man] oli sem.” (Ol Sam 119:​76-78) Taem Jeova i mekem ol praod man ya oli sem, ol rabis fasin blong olgeta bambae oli kam long klia ples mo bambae hem i leftemap tabu nem blong hem. Yumi save bilif strong se ol man we oli mekem trabol long ol man blong God bambae oli no winim wan samting. Long ol yia we oli pas oli no waepemaot ol Witnes blong Jeova, mo long ol yia we oli kam tu bambae oli no save waepemaot ol man ya we oli trastem God wetem fulhat blong olgeta.​—Ol Proveb 3:​5, 6.

22. ?Olsem wanem man blong raetem Sam ya i kam “olsem olfala skin blong nani, we i no moa gud blong putum waen long hem bakegen”?

²² Tok blong God i mekem se yumi strong moa blong trastem hem taem ol man oli mekem i nogud tumas long yumi. (Ol Sam 119:​81-88) From we ol praod man oli bin mekem i nogud tumas long man blong raetem Sam ya, hem i harem se hem i kam “olsem olfala skin blong nani, we i no moa gud blong putum waen long hem bakegen.” (Ol Sam 119:​83, 86) Long taem bifo, oli wokem ol botel long skin blong anamol, nao oli fulumap wota no waen long olgeta. Sipos oli hangem ol botel ya long kijin klosap long faea, smok i save mekem skin i kam drae mo strong. ?Olsem wanem? ?Sam hadtaem we yu yu stap kasem oli mekem yu yu harem “olsem olfala skin blong nani”? Sipos yes, yu mas trastem Jeova mo yu mas prea olsem: “Oltaem yu yu lavem mi tumas. Plis yu no letem mi mi ded, yu holem mi mi stap laef, blong mi save obei long ol rul we yu yu mekem.”​—Ol Sam 119:88.

23. ?Yumi bin tokbaot wanem long stadi blong yumi long Ol Sam 119:​1-88? ?Taem yumi stap wet blong stadi long Ol Sam 119:​89-176, maet yumi traem ansa long wanem kwestin?

²³ Ol samting we yumi bin tokbaot long fas haf blong Sam 119, oli soemaot se Jeova i lavem tumas ol man blong hem from we oli trastem tok blong hem mo oli laekem tumas ol tijing, ol tok, ol rul, mo ol loa blong hem. (Ol Sam 119:​16, 47, 64, 70, 77, 88) Hem i glad tumas we ol man blong hem oli obei oltaem long ol tok blong hem. (Ol Sam 119:​9, 17, 41, 42) Taem yumi stap wet blong stadi long narafala haf blong nambawan Sam ya, maet yu save traem ansa long kwestin ya: ‘?Mi mi rili letem laet long tok blong Jeova i soemaot rod blong mi?’

[Futnot]

?Bambae Yu Yu Ansa Olsem Wanem?

• ?Olsem wanem blong kasem trufala glad?

• ?Olsem wanem tok blong Jeova i save mekem yumi stap klin long saed blong spirit?

• ?Olsem wanem tok blong God i save givim strong tingting long yumi mo mekem yumi harem gud bakegen?

• ?From wanem yumi mas bilif long Jeova mo ol tok blong hem?

[Tok blong pija long pej 11]

Rut, Rehab, mo fofala Hibru yangfala we oli kalabus long Babilon, oli ‘obei long ol tok blong God’

[Tok blong pija long pej 12]

Pol i no sem blong ‘talemaot ol rul blong God long fes blong ol king’