Baebol i Save Halpem Yu Blong Faenem Glad

BAEBOL i no wan buk we i talem meresin blong ol sik. Be hem i tokbaot ol filing blong man, we sam oli gud mo sam oli nogud. Mo hem i talem wanem we ol filing ya oli save mekem long tingting mo bodi blong man. Hem i se: “Sipos yu yu stap glad oltaem, sik i no save spolem yu. Be sipos tingting blong yu i stap kam nogud oltaem, bambae yu stap long rod blong ded nomo.” Mo hem i talem tu se: “?Yu yu letem tingting blong yu i foldaon long dei blong trabol? Paoa blong yu bambae i smol nomo.” (Ol Proveb 17:22; 24:​10, NW ) Yes, taem tingting blong yumi i foldaon, yumi no moa gat paoa, yumi slak mo i isi nomo blong samting i kam spolem yumi. Taem tingting blong yumi i foldaon, yumi no moa wantem traehad blong jenis no blong askem narafala blong i halpem yumi.

Tingting we i foldaon i save spolem man tu long saed blong spirit. Plante taem, ol man we oli ting nogud long saed blong olgeta wan, oli harem se neva God bambae i save frengud wetem olgeta mo blesem olgeta. Simone, we yumi tokbaot long fashaf, i no ting se “God i save agri long wan woman olsem hem.” Be, taem yumi ridim Baebol, yumi luk we God i gat gudfala tingting long saed blong olgeta we oli traehad blong mekem hem i glad.

God i Rili Kea

Yumi ridim long Baebol se Jeova “i stap klosap long ol man we tingting blong olgeta i kam nogud, i stap sevem ol man we tingting blong olgeta i foldaon olgeta.” God i no save tanem baksaed long “man we i harem nogud tumas long hat blong hem mo i daon we i daon olgeta.” Be hem i promes se bambae hem i ‘save stap wetem ol man we tingting blong olgeta i stap daon, i save leftemap tingting blong olgeta, blong tingting blong olgeta i stap strong long hem.’​—Ol Sam 34:18; 51:​17, NW; Aesea 57:15.

Wan taem, Jisas we i Pikinini blong God, i mas talem long ol disaepol blong hem se God i stap luk ol gudfala fasin blong ol man blong Hem. Jisas i yusum wan pijatok se, taem we wan smol pijin i foldaon long graon, God i save​—hemia wan samting we plante man maet oli no tingbaot nating. Mo tu, Jisas i poenemaot se God i save evri smosmol samting long saed blong man, olsem, hem i save hamas hea i stap long hed blong yumi. Ale, taem Jisas i talem ol pijatok ya finis, hem i se: “From samting ya, yufala i no fraet. Long fes blong hem, yufala i gud moa, i winim plante smolfala pijin ya.” (Matiu 10:​29-31)a Jisas i soem se nomata wanem tingting we wan man i save gat long saed blong hem wan, be sipos man ya i gat bilif, hem i sas tumas long ae blong God. Yes, aposol Pita i mekem yumi tingbaot se “sipos wan man i ona long God, mo i mekem ol samting we i stret long fes blong hem, bambae God i glad long hem, i nating we hem i wan laen blong Isrel, no i kamaot long wan narafala laen olgeta.”​—Ol Wok 10:​34, 35.

Holem Wan Tingting We i Stret

Baebol i pulum yumi blong gat wan tingting we i stret long saed blong yumi wan. Tabu spirit i pusum aposol Pol blong raetem se: “From we God i givhan gud long mi long gladhat blong hem, mi mi talem long yufala evriwan, se yufala i no mas letem tingting blong yufala i go antap. Tingting blong yufala i mas stret gud, mo yufala i mas makem laef blong yufala, stret long fasin blong bilif ya we God i givim long yufala.”​—Rom 12:3.

I nogud yumi tinghae tumas long yumi wan gogo yumi kam flas. Be i nogud tu sipos yumi daonem yumi wan mo yumi ting se yumi nating nomo. Tingting we yumi mas gat long saed blong yumi wan i mas stret. I min se yumi mas luksave se i gat sam samting we yumi gat gudhan blong mekem, be yumi mas luksave tu se yumi no naf blong mekem evri samting. Wan Kristin woman i talem olsem se: “Mi mi no wan woman we i stretgud, be mi no wan woman we i rabis tu. Mi gat gudfala fasin mo slak fasin, sem mak olsem ol narafala man.”

I tru, i isi blong talem se yumi mas gat wan tingting we i stret, be blong gat tingting olsem, i no wan isi samting. Samtaem yumi mas faet strong blong sakemaot ol nogud tingting we yumi gat long saed blong yumi wan, from we maet yumi gat ol tingting ya blong plante yia finis. Nating se i olsem, taem God i halpem yumi, yumi save jenisim fasin blong yumi wetem tingting tu we yumi gat long saed blong laef. Hemia nao samting we Baebol i pulum yumi blong mekem. Yumi ridim se: “Yufala i mas finis long olfala laef ya blong yufala bifo, we yufala i stap folem ol fasin blong yufala nomo. Olfala laef ya i stap mekem yufala i wantem tumas ol samting we oli blong giaman nomo, mo we oli stap spolem yufala nomo. Laef blong yufala mo tingting blong yufala i mas kam niuwan olgeta, nao bambae yufala i kam niufala man, . . . Nao bambae ol man oli save luksave se laef blong yufala i folem trutok blong hem, mo i stret gud, i tabu, i blong hem nomo.”​—Efesas 4:​22-24.

Sipos yumi traehad blong jenisim ‘tingting blong yumi’ we i stap bos long ol fasin blong yumi, ale bambae yumi save wokem wan fasin blong tingting long gudfala saed blong ol samting, i no long nogud saed. Lena, we yumi tokbaot long faswan haf, i luksave se sipos hem i no traem sakemaot tingting ya se i no gat man i laekem hem mo i no gat man i save halpem hem, ale bambae hem i no save winim ol tingting ya se hem i nogud. ?Wanem gudfala advaes blong Baebol i bin halpem Lena, Simone, mo sam narafala, blong oli jenisim tingting blong olgeta?

Sam Rul Blong Baebol We Oli Givim Glad

“Yufala i mas putum ol trabol blong yufala long Hae God, nao hem bambae i blokem yufala, i sevem yufala.” (Ol Sam 55:22) Faswan impoten samting we i save halpem yumi blong faenem glad, hemia prea. Woman ya Simone i talem se: “Taem tingting blong mi i foldaon, mi prea long Jeova mo mi askem hem blong halpem mi. Evri taem mi harem save paoa blong hem mo hem i lidim mi.” Taem man blong raetem Sam i talem se yumi mas putum ol trabol blong yumi long Jeova, hem i wantem mekem yumi tingbaot se Jeova i kea long yumi. Mo antap long hemia, hem i wantem soem se Jeova i tingbaot yumi olsem ol man we yumi naf blong kasem help blong hem. Long naet blong lafet blong Pasova long yia 33 K.T.,b ol disaepol blong Jisas oli stap harem nogud from we Jisas i talem se bambae hem i lego olgeta. Jisas i talem se i gud oli prea long Papa, nao hem i gohed i se: “Yufala i mas gohed blong askem ol samting long hem, mo bambae yufala i save kasem, nao bambae yufala i glad we i glad.”​—Jon 16:​23, 24.

“Man we i stap givim presen i go, hem i save harem gud moa, i winim man we i stap kasem presen blong hem.” (Ol Wok 20:35) Yes, Jisas i tijim se man i save faenem trufala glad long laef sipos hem i gat fasin ya blong givim. Advaes ya blong Baebol i pulum yumi blong tingbaot narafala. Ale samting ya i pulum yumi blong fogetem ol tingting ya se yumi no naf mo yumi nogud. Taem yumi halpem ol narafala mo yumi luk olsem wanem oli gat tangkiu from ol samting we oli lanem, samting ya i mekem yumi harem gud long saed blong yumi wan. Lena i harem se wok ya blong talemaot gud nius blong Baebol long ol man i halpem hem long tu rod. Hem i se: “Faswan samting se, wok ya i givim glad long mi mo i mekem mi mi harem gud olsem we Jisas i bin tokbaot. Mo namba tu samting se, taem ol man oli lesin mo talem gudfala toktok, samting ya i halpem mi blong faenem glad.” Taem yumi givim taem mo paoa blong yumi fulwan blong givhan long narafala, bambae yumi luksave se ol tok ya blong Ol Proveb 11:25 oli tru tumas we oli se: “Man we i stap givhan long ol man, oltaem ol man oli stap givhan long hem.”

“Taem man i stap harem nogud, hem i no save glad long laef blong hem evri dei. Be man we hat blong hem i glad, i olsem we hem i mekem lafet oltaem.” (Ol Proveb 15:​15, NW ) Yumi wanwan i save jusum wanem tingting we yumi mas gat long saed blong yumi wan mo laef blong yumi. Yumi save stap olsem man we i gat nogud tingting long saed blong evri samting mo i stap harem nogud long evri samting, no yumi save stap olsem man we i gat gudfala tingting, we “hat blong hem i glad,” mo i harem gud olsem we i stap long wan gudfala lafet. Simone i talem se: “Mi traem bes blong mi oltaem blong holem gudfala tingting. Mi mekem tingting blong mi i stap bisi taem mi stadi long Baebol mo taem mi joen long wok blong prij, mo mi prea oltaem. Mo tu mi traem blong no joen tumas wetem ol narafala man we oli tingting nogud oltaem long evri samting. Mi rere oltaem blong leftemap tingting blong narafala mo mekem wok blong narafala.” Ol fasin olsem oli givhan long man blong faenem trufala glad. Baebol i talem samting ya taem i se: “Yufala we fasin blong yufala i stret, i gud yufala i glad, yufala i harem gud from ol samting ya we Hae God i mekem. Yufala we i stap obei long hem, i gud yufala i singsingaot from we yufala i glad.”​—Ol Sam 32:11.

“Wan trufala fren i soemaot lav oltaem nomo, mo hem i olsem wan brata we i rere blong givhan long taem blong trabol.” (Ol Proveb 17:​17, NW ) Taem yumi talemaot tingting blong yumi long wan we yumi laekem hem tumas no long wan fren we yumi trastem hem, samting ya i save halpem yumi blong bos long ol nogud filing we yumi gat long saed blong yumi wan, mo blong winim ol filing ya bifo we oli winim yumi. Taem yumi toktok wetem narafala, samting ya i save givhan long yumi blong luksave mo skelem ol samting long fasin we i stret moa. Simone i talem se: “Wan samting we i halpem mi plante, hemia taem mi talemaot ol tingting blong mi long narafala. Yu mas gat wan fren we yu save tokbaot ol filing blong yu long hem. Plante taem i nidim nomo blong yu tokbaot samting ya, ale yu save harem gud bakegen.” Taem yu mekem olsem, bambae yu luk se ol tok blong proveb ya oli tru tumas we i se: “Taem man i stap wari, fasin ya i stap mekem tingting blong hem i hevi, be gudfala tok blong fren blong hem i save leftemap tingting blong hem bakegen.”​—Ol Proveb 12:25.

Samting We Yu Save Mekem

Yumi tokbaot sam nomo long olgeta nambawan advaes we Baebol i givim blong halpem yumi blong winim ol nogud filing mo blong faenem trufala glad. Sipos yu yu stap faet strong agensem olkaen filing ya se yu yu nogud, mifala i leftemap tingting blong yu blong yu ridim mo stadi moa long Tok blong God, Baebol. I gud yu traem wokem wan filing we i gud mo i stret long saed blong yu wan mo long saed blong fasin fren blong yu wetem God. Mifala i wantem tumas se Tok blong God bambae i lidim yu blong yu faenem trufala glad long evri samting we yu mekem.

[Ol Futnot]

[Tok blong pija long pej 7]

Taem yu folem ol rul blong Baebol yu kasem trufala glad