Yu Mas Mekem Ol Desisen We Oli Waes

1, 2. ?Yu yu laekem blong mekem desisen? ?Yu yu glad long ol desisen we yu mekem?

EVRI dei, yumi mas mekem plante desisen. ?Olsem wanem? ?Yu yu laekem blong mekem desisen? Samfala oli wantem mekem prapa desisen blong olgeta. Oli talem se oli gat raet blong mekem olsem. Oli no wantem nating se narafala man i mekem desisen blong olgeta. Be samfala oli fraet taem oli mas mekem wan desisen we i bigwan. Oli ridim ol buk blong givhan long olgeta, no maet oli pem bigfala mane blong go luk wan man blong givim advaes.

² Plante long yumi oli luksave se i gat sam desisen we yumi no gat raet blong mekem. Nating se i olsem, i gat plante samting yet we yumi save mekem prapa desisen blong yumi long hem. (Gal. 6:5) Be ating yu luk se sam desisen we yu mekem oli no waes mo oli no givhan long yu.

 3. ?Wanem advaes i stap we yumi save folem blong mekem desisen? ?Be from wanem i hadwok yet?

³ Yumi ol man blong Jehova, yumi glad from we Jehova i givim ol klia advaes long yumi. Sipos yumi folem ol advaes ya taem yumi mekem ol bigfala desisen, bambae yumi mekem Jehova i glad mo yumi kasem blesing from. Be sam desisen we yumi mas mekem, Baebol i no givim advaes we yumi save folem. ?Long taem olsem, yumi mekem desisen ya olsem wanem? Yu traem tingbaot. Baebol i talem se yumi no mas stil. (Efes. 4:28) Be samfala oli ting se stil, hemia taem we man i tekem samting blong narafala we i sas, be i no taem we hem i tekem smol samting nomo. Oli ting se stil, hemia taem we man i karem samting blong narafala from we hem i wantem nomo, be i no from we hem i nidim. Long ol samting olsem, ?wanem i save givhan long yumi blong jusumaot rod we i stret? ?Wanem i save lidim yumi?

 4. Taem yu mas mekem wan desisen, ?maet narafala i givim wanem advaes long yu?

⁴ Taem yu mas mekem wan bigfala desisen, maet wan narafala Kristin i givim advaes long yu se tingting blong yu i mas stret mo klia. Hemia i tru tumas. Baebol i talem se yumi no mas hareap blong mekem wan desisen, i se: “Man we i stap wok hareap, neva hem i save kasem i naf.” (Prov. 21:5) ?Be tingting we i stret mo klia i minim wanem? ?Hem i minim nomo se yu no hareap blong mekem desisen? ?Hem i minim nomo se yu tingting gud, yu no mekem i strong tumas long yu mo long narafala, mo yu luksave evri samting we i joen wetem desisen ya? I tru, ol fasin ya oli save givhan long yu blong yu mekem wan gudfala desisen. Be i no hemia nomo. Plante moa samting oli joen wetem tingting we i stret mo i klia.—Rom 12:3; 1 Pita 4:7.

 5. ?Yumi no gat tingting we i stret gud from wanem?

⁵ Taem yumi bon, yumi no gat tingting we i stret gud. ?From wanem? From we yumi sinman finis. Yumi no stret gud long bodi mo tingting blong yumi. (Sam 51:5; Rom 3:23) Mo tu, bifo we yumi save trutok, yumi stap wetem ol man we Setan i “satem tingting” blong olgeta, nao yumi no save Jehova mo ol stret fasin blong hem. (2 Kor. 4:4; Taet. 3:3) Taswe, nating se yumi tingting plante long wan desisen, be sipos yumi folem tingting blong yumi nomo, maet tingting blong yumi i trikim yumi.—Prov. 14:12.

 6. ?Wanem i save givhan long yumi blong yumi gat tingting we i stret mo i klia?

⁶ Yumi sinman, be Papa blong yumi long heven, Jehova, i stret gud olgeta. (Dut. 32:4) Yumi glad tumas we hem i givim janis long yumi blong jenisim tingting blong yumi mo mekem tingting i stret. (Ridim Efesas 4:23.) Be yumi mas kam naf blong skelem ol samting wetem tingting we i stret, mo ol aksen blong yumi oli mas soemaot samting ya. Yumi mas blokem ol samting we yumi nomo i wantem, mo yumi mas folem tingting mo fasin blong Jehova.

7, 8. ?Wanem stori i soemaot se yumi save mekem stret desisen, nating se yumi kasem trabol?

⁷ Yu traem tingbaot wan eksampol. Plante papa mo mama we oli go stap long narafala ples, oli sanem pikinini blong olgeta i gobak blong stap wetem bubu blong hem. Nao papa mo mama ya tugeta i wok blong kasem mane.a Wan mama we i go stap long narafala ples, i fesem desisen ya. Sam fren mo famle oli stap tok strong long hem mo man blong hem, se tufala i mas sanem smol boe blong tufala i go stap wetem bubu blong hem. Be from we woman ya i stadi Baebol mo i gohed gud, hem i kasem save se wok ya blong lukaot long ol pikinini, God i givim long ol papa mo mama nomo. (Sam 127:3; Efes. 6:4) ?Olsem wanem? ?Mama ya i folem kastom we plante man oli ting se i stret? ?No hem i folem samting we hem i lanem long Baebol, nating se hem i no save wok blong winim mane, mo ol man oli agensem hem? Sipos yu, ?bambae yu mekem wanem?

⁸ Yangfala woman ya i harem nogud from we ol narafala oli stap fosem hem. Ale hem i talemaot evri samting long Jehova, mo hem i askem long Jehova blong i lidim hem. Hem i storian long tija blong hem tu mo long sam narafala long kongregesen. Nao hem i kasem save long tingting blong Jehova. Mo tu, hem i tingbaot se taem wan pikinini i stap longwe long papa mo mama blong hem, hem i save harem nogud tumas. Woman ya i tingting gud long ol vas blong Baebol, nao hem i luksave se i no stret blong sanem pikinini i go stap wetem bubu blong hem. Olgeta long kongregesen oli givhan long hem blong i lukaot long pikinini ya. Taem man blong hem i luk samting ya, mo i luk se pikinini i glad mo bodi blong hem i gud, hem i agri blong stadi Baebol, mo i folem woman blong hem i go long ol miting.

9, 10. ?Tingting we i stret i olsem wanem? ?Yumi mas mekem wanem blong kasem tingting we i stret?

⁹ I gat plante stori olsem, we oli soemaot se taem yumi gat tingting we i stret, hemia i no min se yumi folem tingting we narafala i ting se i stret mo i isi. From we yumi sinman, tingting mo hat blong yumi i save kam olsem wan hanwaj we i spid tumas no i slo tumas. Sipos yumi folem hanwaj ya, yumi save kasem trabol. (Jer. 17:9) Long sem fasin, sipos yumi no wantem kasem trabol, yumi mas mekem tingting mo hat blong yumi i laenap wetem tingting blong God.—Ridim Aesea 55:8, 9.

¹⁰ Baebol i givim gudfala advaes ya se: “I nogud yu ting se save ya blong yu naoia, hem i naf blong givhan long yu. Yu mas trastem Hae God long olgeta tingting blong yu. Long olgeta samting we yu stap mekem, yu mas tingbaot hem oltaem, mo sipos yu stap mekem olsem, hem bambae i soemaot stret rod long yu, blong yu yu folem.” (Prov. 3:5, 6) Vas ya i talem se, ‘I nogud yu ting se save blong yu naoia, hem i naf.’ Mo hem i talem tu se yu mas “trastem Hae God” Jehova. Hem nomo we tingting blong hem i stret gud. Taswe, taem yumi mekem wan desisen, yumi mas lukluk long Baebol fastaem blong faenemaot tingting blong God. Nao yumi mekem desisen ya folem samting we God i wantem. Taem yumi folem tingting blong Jehova, yumi soemaot se tingting blong yumi i stret.

11. ?Yumi mas mekem wanem, blong yumi kam naf blong mekem ol desisen we oli waes?

¹¹ Yumi mas kam naf blong mekem ol desisen we oli waes, mo folem olgeta. Be hemia i no isi nating. Olgeta we oli jes kasem trutok, oli luk se samting ya i had we i had. Baebol i talem se olgeta oli olsem ol smosmol pikinini. Nating se i olsem, sloslo oli save kam gud. Yumi save tingbaot wan pikinini we i stap lan blong wokbaot. Fastaem, hem i mas mekem ol sotfala step nomo, mo i gohed olsem gogo hem i wokbaot gud. Olgeta we oli jes kasem trutok nomo, oli mekem i sem mak taem oli stap kam naf blong mekem ol desisen we oli waes. Aposol Pol i talem se olgeta we oli kam bigman finis long trutok, “oli stap traehad longtaem finis, nao oli naf blong jusumaot wanem fasin i gud mo wanem fasin i nogud.” Yes, blong kam naf blong jusumaot samting we i stret, yumi mas gohed nomo blong traehad. Hemia nao samting we olgeta we oli jes kasem trutok oli mas mekem.—Ridim Hibrus 5:13, 14.

12. Yu talem wan eksampol, olsem wanem yumi save lanem blong mekem ol gudfala desisen.

¹² Olsem yumi luk finis, evri dei yumi mas mekem plante desisen, sam we oli bigbigwan mo sam we oli smosmol. Ol man we oli stadi long bisnes ya, oli faenemaot se klosap stret haf blong ol desisen we yumi mekem, yumi no tingting gud long olgeta fastaem. Ol desisen ya oli stanap nomo long ol fasin mo kastom we yumi folem longtaem finis i kam. Yu traem tingbaot wan eksampol. Evri dei, yu mas jusum wanem klos we bambae yu werem. Maet yu luk se hemia i no wan bigfala samting, taswe yu no tektaem tumas blong mekem desisen ya. Be from we yu yu wan man blong Jehova, yu mas tingting gud fastaem, se klos we yu wantem werem i stret no nogat. (2 Kor. 6:3, 4) Taem yu go long stoa blong pem klos, maet yu tingbaot wanem stael we bambae yu pem. ?Be yu tingbaot sipos klos ya i stret? ?Yu tingbaot praes blong hem? Taem yu mekem ol gudfala desisen long ol smol samting olsem, yu yu stap kam naf blong jusumaot samting we i stret. Ale samting ya bambae i givhan long yu blong mekem ol bigfala desisen tu.—Luk 16:10; 1 Kor. 10:31

13. ?Yumi nidim wanem samting, blong yumi save folem desisen we yumi mekem?

¹³ Taem yumi mekem wan gudfala desisen, i no isi nating blong folem. Samfala oli wantem lego sigaret, be oli no winim from we tingting blong olgeta i no strong gud. Taswe yumi mas gat strong tingting blong folem desisen we yumi mekem, mo yumi mas wok had blong folem. Ale, ?wanem i save givhan long yumi, blong yumi mekem tingting blong yumi i kam strong moa? Yumi mas trastem Jehova blong i givhan long yumi.—Ridim Filipae 2:13.

14. ?Wanem i givhan long Pol blong i mekem samting we hem i save se i stret?

¹⁴ Pol i save gud se i no isi blong mekem samting we i stret. Hem i talem se hem i wantem mekem “ol gudgudfala fasin,” be plante taem hem i no naf blong mekem. Hem i save gud samting we hem i mas mekem. Be i gat wan samting we samtaem i blokem hem. Hem i talem se: “Long tingting blong mi, mi glad tumas long Loa ya blong God. Be mi luk we rabis fasin ya, we i stap wok long laef blong mi, hem i narafala. Hem i agens long Loa ya, we long tingting blong mi, mi glad tumas long hem. Fasin ya i stap mekem mi, mi olsem slef blong fasin blong sin, we i stap wok oltaem long tingting blong mi.” ?Olsem wanem? ?I no gat samting we i save givhan long Pol? Si, i gat. Hem i talem tangkiu tumas long God, we hem i yusum Masta blong yumi Jisas Kraes blong givhan long hem. (Rom 7:18, 22-25) Long wan narafala taem bakegen, Pol i talem se hem i save win nomo from ‘paoa blong God we i bigwan tumas.’—2 Kor. 4:7.

15. Yumi mas gat strong tingting blong mekem samting we i stret. ?From wanem?

¹⁵ Sipos yumi wantem mekem God i glad, yumi mas jusumaot samting we i stret, mo yumi mas gat strong tingting blong mekem. ?Yu tingbaot yet ol tok we Elaeja i talem long ol man Isrel we oli mekem wosip long Bal long hil ya Kamel? Hem i talem se: “?Wetaem bambae yufala i mekemap tingting blong yufala? Sipos [Jehova] i God, i gud yufala i mekem wosip long hem. Be sipos Bal i God, i gud yufala i mekem wosip long hem.” (1 King 18:21) Ol man Isrel oli save gud se oli mas mekem wosip long Jehova nomo. Be oli wantem mekem wosip long Bal tu. Oli no save “mekemap tingting” blong olgeta. Josua i defren olgeta. Plante yia bifo, hem i talem long ol man Isrel se: “Sipos yufala i no wantem biaen long [Jehova], be naoia yufala i mas jusumaot wanem god we yufala i wantem . . . Be mi, wetem ol famle blong mi, bambae mifala i biaen long [Jehova] nomo.” (Jos. 24:15) ?Wanem blesing we Josua mo ol man we oli biaen long hem oli kasem from strong tingting blong olgeta? Oli go stap long “gudfala graon ya we i gat ol gudgudfala samting long hem,” hemia Promes Lan.—Jos. 5:6.

16, 17. ?Wanem blesing we yumi save kasem taem yumi mekem desisen we Jehova i glad long hem?

¹⁶ Yu traem tingbaot wan brata we i mared, i gat tri smol pikinini, mo i jes baptaes. Hem i no stap kasem bigfala pei long wok blong hem. Be hem i jusum wok ya from we hem i no wok long ol wiken, nao hem i gat taem blong go prij mo go long miting wetem famle blong hem. Wan dei, wan man we i wok wetem brata ya, i talem long hem se i gud tufala i jenisim wok blong tufala, mo tufala i go wok blong wan narafala kampani we bambae i givim moa pei long tufala. Bifo we brata ya i mekem desisen, hem i tingting gud mo i prea. Hem i tingbaot se sipos hem i jenisim wok blong hem, maet hem i mas wok long wiken tu. ?Olsem wanem? ?Sipos yu, bambae yu mekem wanem?

¹⁷ Brata ya i tingbaot se sipos hem i tekem wok ya, ?bambae hem i fren moa wetem Jehova no olsem wanem? Ale hem i mekem desisen se bambae hem i no tekem wok ya we i givim moa pei long hem. ?Yu ting se biaen hem i sore we i mekem desisen olsem? Nogat. Hem i luk se famle blong hem i kam klosap moa long Jehova, mo hemia i moagud i bitim we hem i kasem bigfala pei. Hem wetem woman blong hem tufala i glad tumas taem fasbon gel blong tufala we i gat ten yia, i talem se hem i lavem tufala, mo i lavem ol brata mo sista, mo i lavem tumas Jehova. Hem i talem se hem i wantem givim laef blong hem i go long Jehova mo baptaes. Gel ya i folem gudfala eksampol blong papa blong hem, we i putum wosip blong Jehova long fasples long laef blong hem.

18. ?From wanem i impoten se evri dei yumi mekem ol desisen we oli waes?

¹⁸ Longtaem finis i kam, Jisas Kraes i stap lidim ol man blong Jehova oli wokbaot gud long wol blong Setan, olsem we Moses i lidim ol man Isrel oli wokbaot long draeples. Naoia Jisas i stap rere blong finisim ol rabis fasin blong wol ya. Bambae hem i lidim ol man blong hem oli go long niufala wol we stret fasin nomo bambae i stap long hem, olsem we Josua i lidim ol man Isrel oli go insaed long Promes Lan. (2 Pita 3:13) Taswe, i no taem naoia blong yumi gobak long ol tingting mo fasin blong yumi bifo, mo long ol samting we bifo yumi ting se oli impoten mo yumi wantem. Naoia i taem blong kasem save klia wanem samting we God i wantem blong yumi mekem. (Rom 12:2; 2 Kor. 13:5) Ol desisen we yu yu mekem evri dei, oli mas soemaot se i stret nomo we yu kasem blesing blong God, gogo i no save finis.—Ridim Hibrus 10:38, 39.