I Gat Wan Taem Blong Evri Samting

Baebol i talem se: “Olgeta samting we oli stap kamtru long wol ya, oli stap kamtru stret long taem we God i putum.” King Solomon bifo i raetem ol tok ya mo hem i gohed i se, i gat wan taem blong bon mo wan taem blong ded, wan taem blong bildim mo wan taem blong brekemdaon, wan taem blong laekem tumas mo wan taem blong no laekem nating. Biaen, hem i se: “?Yumi stap kasem wanem long ol hadwok ya blong yumi?”—Prija 3:1-9.

SAM man we oli ridim ol tok ya, oli talem se Baebol i tijim se God i makemaot wan taem blong evri samting i kamtru long laef blong wanwan man, we i min se Baebol i sapotem bilif ya se God i makemaot finis laef blong wanwan man. ?Olsem wanem? ?I tru se Baebol i sapotem tingting ya se God i makemaot evri samting we i hapen long laef blong man? From we “olgeta tok blong Baebol oli kamaot long God,” wanem we yumi ridim long wan vas blong Baebol i mas joen wetem ol narafala vas blong Baebol. From samting ya, i gud yumi luk wanem we ol narafala vas blong Baebol i talem long saed ya.—2 Timoti 3:16.

Samting We Yumi No Tingbaot

Solomon i gohed blong raetem long buk blong Prija se: “Nao mi stap lukluk ol samting we oli stap hapen long wol ya. Sam man oli ron spid be oli no win long resis, sam man we oli strong be oli no win long faet. Ol man maet oli gat waes be oli no gat kakae, mo ol man we oli gat hed be oli no kam rijman. Mo ol man we oli gat save, be ol narafala man oli no tinghae long olgeta.” ?From wanem? Hem i eksplenem se: “From we, samting we yumi no tingbaot, i save kamaot long yumi enitaem nomo.”—Prija 9:11, NW.

Solomon i no talem se God i makemaot evri samting we oli stap hapen long laef blong man. Defren olgeta, hem i talem se ol man oli no save talemaot wanem samting stret bambae i hapen long laef blong olgeta, from we ‘samting we oli no tingbaot, i save kamaot long laef blong olgeta enitaem nomo.’ Samtaem, man i stap long wan ples no i stap mekem wan samting, nao wan trabol i kasem hem we hem i no bin tingbaot.

Tingbaot tok ya se: “Sam man oli ron spid be oli no win long resis.” Maet yu tingbaot no yu ridim stori blong wan resis we plante man oli save long hem. Hemia 3000 meta resis blong ol woman long Olympik gem blong yia 1984, long Los Angeles, Kalifonia, Yunaeted Stet blong Amerika. Long resis ya, i gat tu woman. Wan i blong Briten mo narawan i blong Yunaeted Stet. Tufala tugeta i wantem tumas blong winim gol medol. Long medel blong resis ya, tufala i bangbangem tufala. Wan long tufala i foldaon nao i aot long resis, mo narawan i harem nogud tumas nao i kam namba seven long resis ya.

?Yu ting se God i makemaot finis samting we i hapen long resis ya? Maet samfala oli talem yes. Be i klia se samting we i blokem tufala blong winim resis ya, hemia wan aksiden nomo. Long stat blong resis, i no gat man we i tingbaot se bambae tufala i bangbangem tufala olsem. ?Be yu ting se God i makemaot finis se bambae tufala i bangbangem tufala? Bakegen, maet samfala oli talem yes. Be traem tingbaot. Ol man we oli tokbaot stori blong tufala long radio no televisin, oli talem se tufala tugeta i strong mo tufala tugeta i wantem tumas blong winim resis ya, mekem se tufala i traehad blong winim tufala, nao tufala i aksiden. Olsem we Baebol i talem, “samting we yumi no tingbaot, i save kamaot long yumi enitaem nomo.” Nomata se man i reregud blong mekem wan wok, oltaem i gat sam samting we hem i no tingbaot i kamtru, mo ol samting ya i gat paoa long mak we hem i wantem kasem long wok ya. Taswe, ol samting we oli hapen long laef blong wanwan man i no from we God i makemaot ol samting ya finis.

?Be, Baebol i minim wanem taem hem i talem se: “Olgeta samting we oli stap kamtru long wol ya, oli stap kamtru stret long taem we God i putum”? ?I gat sam samting we yumi save mekem we bambae i gat paoa long ol samting we oli hapen long laef blong yumi long fiuja?

Wan Stret Taem Blong Evri Samting

Toktok we God i pulum Solomon blong raetem i no blong talem se God i makemaot ol samting we oli hapen long laef blong wanwan man mo fiuja blong hem, nogat. Hem i stap tokbaot stamba tingting blong God, mo samting we stamba tingting ya bambae i mekem long ol man. ?Yumi save samting ya olsem wanem? Ol narafala vas long Prija japta 3 i talem samting ya long yumi. Afta we Solomon i tokbaot ol samting we oli stap kamtru “stret long taem” we God i putum, hem i talem se: “Mi mi savegud ol hevi samting [“wok,” NW] we God i givim long yumi, blong yumi karem long laef ya blong yumi. Hem nao i putum stret taem blong ol samting ya oli kamtru.”—Prija 3:10, 11.

God i givim plante wok we ol man oli save mekem. Solomon i tokbaot sam long olgeta. God i givim wan narafala samting long yumi tu. Hemia fasin ya we yumi fri blong jusum wanem we yumi wantem mekem. Be, evri wok i gat wan stret taem blong hem we bambae i karem frut we i beswan. Traem tingbaot tok blong Solomon long Prija 3:2, i se: “Hem i putum taem blong man i planem garen, mo i putum taem blong man i tekemaot kakae long garen.” Ol man blong wokem garen oli savegud se evri kakae i gat wan stret taem blong hem blong planem. ?Wanem bambae i hapen sipos man blong wokem garen i planem wan kakae long taem we i no stret blong planem kakae ya? ?Sipos kakae ya i no givim plante frut, nating se man ya i bin wok had blong planemgud kakae ya, yu ting se i stret blong hem i blemem God se God nao i makemaot finis samting ya blong i kamtru olsem? !No nogat! Hem nomo i no planem kakae ya long stret taem blong hem. Sipos hem i bin folem taem we Man we i Wokem Olgeta Samting i putum blong ol samting oli gru, bambae kakae ya i save karem plante frut.

Taswe, God i no makemaot samting we bambae i hapen long laef blong wanwan man. Defren olgeta, God i stanemap sam stamba rul blong ol wok we man i mekem we oli folem stamba tingting blong hem. Blong ol man oli karem gudfala frut long wok we oli mekem, oli mas luksave mo wok folem stamba tingting blong God, mo folem taem we hem i putum blong mekem samting. God i no makemaot laef blong wanwan man, be samting we hem i makemaot, hemia fiuja blong wol ya, mo i no gat man we i save jenisim plan blong hem long saed ya. Jeova i yusum profet Aesea blong talemaot se: “Tok blong mi bambae i . . . mekem olgeta samting we mi mi mekem plan se i mas mekem, we i no mestem wan long olgeta, bambae hem i mekem evri samting we mi mi sanem hem blong i mekem.”—Aesea 55:11.

?Ale, wanem ya “tok” blong God no stamba tingting blong hem long saed blong wol ya mo fiuja blong ol man, we ‘bambae i mekem evri samting’ olsem we God i wantem?

Kasem Save Long Taem We God i Putum Blong Mekem Samting

Solomon i soemaot wan trutok long yumi. Afta we hem i talem se: “Olgeta samting, hem i wokem oli naes long stret taem blong olgeta,” hem i gohed i se: “Laef we i no save finis, hem i putum long hat blong olgeta, blong bambae olgeta man oli no save faenemaot olgeta wok we trufala God i mekem, long stat blong olgeta i go kasem en blong olgeta.”—Prija 3:11, NW.

Ol man oli talem plante toktok long saed blong vas ya. Be samting we vas ya i talem i tru nomo, hemia se, i gat wan taem we long hat blong yumi, yumi evriwan i tingbaot from wanem nao yumi laef, mo wanem nao fiuja blong yumi. Long histri blong man, ol man oli harem nogud taem oli tingbaot se laef blong olgeta, hemia blong wok had blong kasem samting blong laef, mo biaen, oli ded nomo. Yumi ol man yumi defren olgeta long ol narafala samting we God i wokem, from we yumi no tingbaot laef blong yumi naoia nomo, be yumi tingbaot laef blong yumi long fiuja tu. Mo yumi wantem tumas blong laef olwe. ?From wanem? Olsem Baebol i talem, hemia from we God i ‘putum laef we i no save finis long hat blong man.’

From samting ya, plante man oli stap tingbaot sipos i gat laef afta we man i ded. Samfala oli talem se i gat wan samting insaed long yumi we i gohed blong laef afta we yumi ded. Sam narafala oli bilif se taem yumi ded bambae yumi bon bakegen long wan narafala bodi, mo samting ya i gohed olsem evri taem we yumi ded. Mo sam narafala oli bilif se God i makemaot evri samting long laef blong wanwan man mo se man i no save mekem wan samting blong stopem ol samting ya blong oli no kamtru. Be sore tumas we ol bilif ya oli no givim wan ansa we i mekem man i harem gud. Hemia from we Baebol i talem se “ol man oli no save faenemaot olgeta wok we trufala God i mekem, long stat blong olgeta i go kasem en blong olgeta,” sipos oli traehad long prapa paoa blong olgeta nomo.

Long ol yia we oli pas, plante man blong stadi oli harem nogud from we oli wantem tumas blong save long laef, be oli no save faenemaot ansa blong ol kwestin blong olgeta. Be from we God i putum long hat blong yumi, tingting ya blong wantem laef olwe, i stret nomo blong lukluk i go long hem blong i givim ol ansa we yumi nidim blong harem gud. From samting ya, Baebol i talem long saed blong Jeova se: “Yu openem han blong yu, nao yu mekem we olgeta samting we i laef oli harem gud, from we oli kasem ol samting we oli wantem tumas.” (Ol Sam 145:16, NW) Taem yumi stadi long Tok blong God, Baebol, yumi save faenem ol save long saed blong laef mo ded, we i mekem yumi harem gud. Mo bambae yumi kasem save long stamba tingting blong God long saed blong wol ya mo ol man.—Efesas 3:11.

[Tok blong makem poen long pej 5]

“Sam man oli ron spid be oli no win long resis.”—Prija 9:11, NW

[Tok blong makem poen long pej 6]

Sipos man blong wokem garen i planem wan kakae long taem we i no stret blong planem kakae ya, ?yu ting se i stret blong hem i blemem God se God nao i makemaot finis se kakae ya bambae i no karem frut?

[Tok blong makem poen long pej 7]

Yumi tingbaot laef mo ded from we God i ‘putum laef we i no save finis long hat blong yumi’