?Yu Yu Stanap Long Wanem Fandesen?

WAN haos i dipen bigwan long fandesen blong hem blong i save stanap strong longtaem. Samtaem Baebol i yusum samting ya olsem wan pijatok.

Profet Aesea i tokbaot Jeova olsem man ya we i “wokem fandesen blong wol ya.” (Aesea 51:13) Fandesen ya hemia ol loa blong God we oli no save jenis samtaem. Ol loa ya oli kontrolem wol mo oli holem hem i stap long stret ples blong hem we i no save muv nating. (Ol Sam 104:5) Mo tu, Baebol i tokbaot “ol fandesen” we laef blong ol man i stanap long hem. Ol fandesen ya hemia stret fasin, loa mo oda. Taem ol fandesen ya oli “kam nogud,” from we i no gat stret fasin, i gat kruked fasin mo raf fasin, ale, laef blong ol man i olbaot nomo.​—Ol Sam 11: 2-6, NW; Ol Proveb 29:4.

Rul ya i stret tu long ol man wanwan. Taem Jisas i finisim Bigfala Toktok blong hem antap long Hil, hem i talem se: “Man we i harem ol tok ya blong mi, nao i stap mekem ol samting we mi mi talem, hem i olsem wan waes man we i wokem fandesen blong haos blong hem antap long wan bigfala ston. Nao biaen, taem ren i kam, mo wota i stap ron bigwan, mo win i blu, i stap kilim haos ya, be haos ya i no foldaon, from we man ya i wokem fandesen blong hem antap long bigfala ston. Be man we i harem ol tok ya blong mi, be i no mekem ol samting we mi mi talem, hem i olsem man we i no gat hed, we i wokem haos blong hem long sanbij nomo. Nao biaen, taem ren i kam, mo wota i ron bigwan, mo win i blu long haos ya, haos ya i foldaon. Mo taem hem i foldaon, hem i nogud olgeta.”​—Matiu 7:​24-27.

?Laef blong yu i stanap long wanem fandesen? ?Hem i stanap long waes blong ol man we i olsem sanbij we i no strong nao biaen bambae i lus? ?No, hem i stanap long fasin blong obei long ol tok blong Jisas Kraes, we i olsem bigfala ston we bambae i halpem yu blong stanap strong tru long ol trabol blong laef?