?Yu Yu Rimemba?

?Yu yu bin glad blong ridim ol Wajtaoa we oli kamaot long ol manis we i jes pas? Ale, traem luk sipos yu save ansa long ol kwestin ya:

• ?Wanem i mekem se Krismas i kam insaed isi nomo long Koria?

I gat wan olfala bilif long Koria mo sam narafala kantri long saed blong wan god we i lukaot long kijin. Oli talem se hem i pastru long paep we smok i stap kamaot long hem mo i karem ol presen i kam long Desemba. Mo tu, afta long Namba Tu Bigfala Faet blong Wol, ol soldia blong Amerika oli givim ol presen mo oli givhan long ol nid blong ol jos.—12/15, pej 4, 5.

• Folem profet tok ya long Aesea 21:8, ?wanem ‘wajman’ we God i gat long taem blong yumi?

Ol tabu Kristin, oli grup ya we i stap wok olsem wajman. Oli stap givim woning long ol man se ol samting we oli stap hapen oli mekem profet tok blong Baebol i kamtru. Mo tu, wajman ya i givhan long ol Baebol studen blong luksave mo ronwe long ol tijing mo fasin we oli no laenap wetem Baebol.—1/1, pej 8, 9.

• ?Hu ya ol “Brata blong Polan”?

Hemia wan smol grup blong skul long ol yia bitwin 1500 mo 1600 long Polan. Smol grup ya i leftemap tingting blong ol man blong oli folem ol tijing blong Baebol mo from samting ya, oli sakemaot ol tijing we jos i stap holem olsem Triniti, baptaesem ol bebi, mo helfaea. Biaen, ol man oli mekem bigfala trabol long olgeta mo samting ya i mekem se oli go wanwan olbaot long ol narafala kantri.—1/1, pej 21-23.

• ?From wanem yumi save trastem ol profet tok blong Baebol i bitim wanem we ol man blong stadi long fiuja no ol man blong stadi long ol sta oli talem?

Olgeta we oli mekem wok olsem profet, oli pruvum se man i no save dipen long olgeta from we oli ting nating long Jeova mo Baebol. Ol profet tok blong Baebol nomo oli save halpem yu blong kasem save olsem wanem ol samting we oli stap hapen oli joen wetem stamba tingting blong God. Mo Baebol nomo i save halpem yu mo famle blong yu blong haremgud blong olwe.—1/15, pej 3.

• ?Wanem samfala samting we oli pruvum se yumi stap laef long ol las dei?

Yumi save luk klia ol frut we i kamaot taem oli sakemaot Setan long heven. (Revelesen 12:9) Yumi stap laef long taem blong las “king” ya we Revelesen 17:9-11 i tokbaot. Namba blong ol trufala Kristin we tabu spirit i makemaot i stap godaon, mo i luk olsem se sam long olgeta bambae oli stap yet long wol ya taem bigfala trabol i stat.—1/15, pej 12, 13.

• ?Wetaem Habakuk i raetem buk blong hem, mo from wanem yumi mas intres long hem?

Habakuk i raetem buk blong hem long Baebol raonabaot 628 B.K.T. Buk ya i tokbaot jajmen blong Jeova agensem ol man Juda bifo mo agensem Babilon. Hem i tokbaot bigfala jajmen ya tu we bambae i kam agensem ol rabis man blong naoia.—2/1, pej 8.

• ?Long Baebol, weples yumi save faenem waes advaes blong wan mama we i save givhan long ol gudfala waef?

Ol nambawan advaes ya oli stap long laswan japta blong Ol Proveb, long japta 31.—2/1, pej 30, 31.

• ?From wanem yumi save soem bigfala tangkiu long Jeova from we hem i soemaot “tingting blong Kraes” long yumi? (1 Korin 2:16)

Tru long ol stori blong Gospel, Jeova i mekem se yumi save ol tingting blong Jisas, ol filing blong hem, ol wok blong hem, mo ol samting we oli moa impoten long laef blong hem. Samting ya i save halpem yumi blong kam moa olsem Jisas, antap moa taem yumi putum tingting blong yumi i stap fulwan long wok blong prij we i save sevem laef blong man.—2/15, pej 25.

• ?God i stap ansa long ol prea tede?

Yes. Be Baebol i soem se i gat sam prea we God i no stap ansa long olgeta. Nating se i olsem, sam stori long taem blong yumi oli soem se plante taem, hem i ansa long ol man we oli prea long hem blong i mekem oli harem gud mo blong winim ol problem insaed long mared.—3/1, pej 3-7.

• ?Yumi save mekem wanem blong kasem paoa blong God?

Yumi save askem paoa ya tru long prea, lukluk long Baebol blong kasem paoa long saed blong spirit, mo joen wanples wetem ol Kristin blong kam moa strong.—3/1, pej 15, 16.

• ?Olsem wanem ol papa mama oli save halpem ol pikinini blong olgeta blong kasem moa frut from ol Kristin miting?

Oli save givhan long ol pikinini blong olgeta blong stap wekap, maet oli save mekem ol pikinini oli slip bifo we oli go long miting. Oli save leftemap tingting blong ol pikinini blong tekem sam “not,” maet blong putum wan mak long pepa long ol wanwan taem we i gat sam tok no sam nem we oli savegud, i kamaot.—3/15, pej 17, 18.

• ?Wanem samfala samting we yumi save lanem long eksampel blong Job?

Job i putum fasin fren blong hem wetem God fastaem, i mekem i stret nomo long ol narafala man, i traehad blong stap tru long waef blong hem, i tingbaot ol samting we famle blong hem i nidim long saed blong spirit, mo hem i stanap strong long bilif taem hem i kasem bigfala traem.—3/15, pej 25-27.

• ?Baebol i gat wan mesej we i haed, we i givim save long ol narafala mesej?

Nogat. Ol tingting long saed blong mesej we i haed, oli stret long ol narafala buk we i kamaot long tingting blong man nomo. Long saed blong Baebol, ol mesej olsem bambae oli blong nating nomo from ol defdefren speling long Hibru hanraet.—4/1, pej 30, 31.