Tok Blong Jeova i Wan Samting We i Laef

Ol Bigfala Poen Long Buk Blong Neham, Habakuk, Mo Sefanaea

NESON blong Asiria i stap rul olsem bigfala politik paoa blong wol, hem i spolem finis taon blong Sameria we i kapital blong ten laen blong Isrel. Longtaem finis, Asiria i mekem neson blong Juda tu i fraet. Profet Neham blong Juda i talemaot wan mesej long saed blong Nineve we hem i kapital blong Asiria. Bifo long yia 632 B.K.T.,a Neham i raetemdaon mesej ya long wan buk blong Baebol we i karem nem blong hem.

Babilon i kam nekis bigfala paoa blong rul long wol, mo sam king blong hem oli blong Koldia. Buk blong Habakuk, we maet hem i finisim long yia 628 B.K.T., i talemaot olsem wanem Jeova bambae i yusum Babilon olsem tul blong hem blong mekem jajmen blong hem i kamtru, mo i talemaot tu wanem bambae i hapen long Babilon.

Profet Sefanaea blong Juda i talemaot profet tok blong hem fastaem long Neham mo Habakuk. Foti yia bifo we Jerusalem i lus long 607 B.K.T., Sefanaea i talemaot bad nius mo gud nius long saed blong fiuja blong Juda. Buk blong Sefanaea i talemaot tok agens long sam narafala neson tu.

“!SORE TUMAS LONG YUFALA! . . . YUFALA I MAN BLONG KILIM MAN I DED”

(Neham 1:1–3:19)

Ol tok agensem “bigfala taon ya Nineve” i kamaot long Jeova God, we hem i “no save kros kwik, be hem i gat paoa.” I tru se “taem ol man blong hem oli stap long trabol, hem i save lukaot gud long olgeta,” hem i olsem wan sefples long olgeta we oli stap lukluk i go long hem. Be, hem i mas spolem Nineve.—Neham 1:1, 3, 7.

“Bambae Hae God i leftemap ol laen blong Isrel i givim hae nem mo paoa long olgeta bakegen.” Be ol man blong Asiria oli olsem wan ‘laeon we i terem ol anamol long ol smosmol pis,’ oli mekem ol man blong neson blong Jeova oli fraet tumas. Jeova bambae i ‘bonem ol kat blong faet blong [Nineve]. Ol soldia blong olgeta, bambae olgeta evriwan oli ded long taem blong faet.’ (Neham 2:2, 12, 13) “Ol man Nineve. !Sore tumas long yufala! . . . yufala i man blong kilim man i ded.” “Olgeta man we oli harem nius blong ol samting ya, oli harem gud tumas, oli klapem han blong olgeta from.”—Neham 3:1, 19.

Ansa Blong Sam Kwestin Long Saed Blong Baebol:

1:9—?Taem Jeova i “spolemgud” Nineve, samting ya i mekem wanem long ol man Juda? Samting ya i mekem ol man Juda oli fri long han blong ol man Asiria blong olwe; “i no gat man we i save agensem Hae God tu taem.” Neham i toktok olsem se Nineve i lus finis, hem i se: “Ol man Juda. !Yufala i luk! I gat wan man blong karem tok, hem i aot long ol hil i stap kam. !Hem i stap kam wetem gudfala nius! Hem i stap kam blong talemaot we God i winim ol enemi blong yumi finis, mo yumi gat pis. I gud yumi gohed, yumi mekem ol lafet blong yumi.”—Neham 1:15.

2:6—?Wanem “ol doa blong reva” we oli openem? Ol doa blong reva hemia ples we wota blong Taegris reva i brekemdaon ol wol blong Nineve. Long yia 632 B.K.T., taem ol ami blong Babilon mo Media oli joen tugeta blong faet agensem ol man Nineve, ol man Nineve oli no harem se oli stap long denja. Oli harem se oli sef biaen long ol bigbigfala wol blong taon, oli ting se i no gat rod blong ol ami oli kam insaed. Be bigfala ren i mekem se Taegris reva i ron bigwan i kavremap ples. Wan man blong stadi long histri, Diodorus, i talem se wota blong reva ya i ron i “kavremap wan haf blong taon mo i brekemdaon sam haf blong ol wol blong taon.” Long fasin ya nao ol doa blong reva oli open, mo olsem God i bin talem, wantaem nomo Nineve i lus olsem drae gras we faea i kakae.—Neham 1:8-10.

3:4—?Olsem wanem Nineve i olsem wan woman blong rod? Nineve i promes long sam neson se bambae hem i fren wetem olgeta mo halpem olgeta, be hem i giaman long olgeta nomo. Hem i pulum olgeta oli kam aninit long strong rul blong hem. Wan taem we hem i mekem olsem, hemia taem Siria mo Isrel oli mekem plan blong faet agens long Juda, nao Asiria i givhan long King Ahas. Be biaen, “king ya blong Asiria i . . . girap agens long [Ahas]” mo i mekem trabol long hem.—2 Kronikel 28:20.

Ol Lesen Blong Yumi:

1:2-6. Jeova i givim panis long ol enemi blong hem, hemia ol man we oli go mekem wosip long ol narafala god. Samting ya i soem se Jeova i wantem we ol man blong hem oli wosipim hem nomo.—Eksodas 20:5.

1:10. Ol bigbigfala stonwol blong Nineve wetem plante handred wajhaos blong hem, oli no save blokem profet tok blong Jeova agensem Nineve blong i no kamtru. Ol enemi blong ol man blong Jeova tede, bambae oli no save ronwe long ol strong jajmen blong God.—Ol Proveb 2:22; Daniel 2:44.

‘OLGETA WE FASIN BLONG OLGETA I STRET, BAMBAE OLI SAVE LAEF’

(Habakuk 1:1–3:19)

Long japta wan mo tu long buk blong Habakuk, profet Habakuk i stap storian wetem Jeova God. Habakuk i harem nogud tumas from ol samting we i stap hapen long Juda, ale hem i askem long God se: “?From wanem yu letem mi mi stap luk ol trabol ya olsem? ?Bambae yu yu stap lukluk ol trabol ya gogo kasem wetaem?” Jeova i ansa se: “Mi bambae mi letem long ol man Babilonia blong oli holem paoa. Ol man ya, fasin blong olgeta i strong tumas, mo oli no save stap kwaet.” Toktok blong profet Habakuk i soemaot se hem i sapraes we God bambae i yusum ol man ya we “oli nogud we i nogud,” blong panisim neson blong Juda. (Habakuk 1:3, 6, 13) God i promes long Habakuk se bambae ol man we fasin blong olgeta i stret, oli save laef, be bambae ol enemi blong olgeta i no save ronwe long panis. Habakuk i raetemdaon faef bigfala panis we ol man Babilonia bambae oli kasem.—Habakuk 2:4.

Habakuk i prea long God blong soem sore, hem i tingtingbak mo i singsing long saed blong ol taem we Jeova i soemaot bigbigfala paoa blong hem, olsem taem ya long Red Si, long draeples, mo long Jeriko. Profet Habakuk i talemaot tu se long Amagedon bambae Jeova i soemaot kros blong hem. Long en blong prea blong hem, hem i talem se: “[Jeova] nomo i stap givim paoa long mi, i stap mekem mi mi stanap strong olsem anamol ya dia. Mo taem mi stap wokbaot antap long hil, hem i stap lukaot gud long mi.”—Habakuk 3:1, 19.

Ansa Blong Sam Kwestin Long Saed Blong Baebol:

1:5, 6—?From wanem ol man Jiu oli no save bilif nating se bambae ol man Babilonia oli girap agens long ol man Jerusalem? Long taem ya we Habakuk i statem wok blong hem olsem wan profet, Ijip i gat bigfala paoa antap long Juda. (2 King 23:29, 30, 34) Paoa blong neson blong Babilon i stap kam bigwan moa, be ami blong olgeta i no winim Fero Neko yet. (Jeremaea 46:2) Tempol blong Jeova tu i stap long Jerusalem, mo i no gat man yet we i winim wan king blong laen blong Deved, we oli rul long ples ya. Taswe ol Jiu long taem ya oli ting se ‘samting we God i wantem mekem’ blong letem ol man Babilonia oli spolem Jerusalem, i no save kamtru. Be nating se i had long ol man blong bilivim toktok blong Habakuk, long 607 B.K.T., vison blong hem ‘i kamtru’ fulwan, Babilon i spolem Jerusalem.—Habakuk 2:3.

2:5—?Hu ya ‘ol man we oli stap wantem blong kasem plante samting moa,’ mo from wanem ‘oli neva save talem se “I naf ya” ’? ‘Ol man ya’ hemia ol man Babilon we strong ami blong olgeta i winim plante neson. Be bambae oli no ‘winim ol narafala kantri blong oli holem i blong olgeta,’ from we Jeova bambae i yusum ol ami blong Media mo Pesia blong spolem Babilon. Tede, ‘ol man ya we oli stap wantem blong kasem plante samting moa,’ hemia ol politik paoa. Olgeta tu oli wantem kasem plante moa kantri. Be ‘neva oli save talem se “i naf ya” ’ mo neva bambae oli ‘winim ol narafala kantri blong oli holem i blong olgeta.’ Rul blong Kingdom blong God nomo bambae i mekem olgeta man oli joengud.—Matiu 6:9, 10.

Ol Lesen Blong Yumi:

1:1-4; 1:12–2:1. Ol kwestin we Habakuk i askem oli kamaot long hat blong hem, mo Jeova i ansarem hem. Trufala God ya i harem ol prea blong ol man we oli stap tru long hem.

2:1. Olsem Habakuk, oltaem yumi mas wekap gud long saed blong spirit mo stap bisi long wok blong Jeova. Yumi mas rere tu blong jenisim tingting blong yumi taem yumi kasem “ansa” blong Jeova no taem hem i stretem yumi.

2:3; 3:16. Taem yumi stap wet long bigfala dei blong Jeova i kamtru, yumi no mas fogetem se dei ya i klosap tumas.

2:4. Sipos yumi wantem stap sef long dei we Jeova bambae i jajem ol man, yumi mas stanap strong mo putum tingting blong yumi i stap strong long Jeova nomo.—Hibrus 10:36-38.

2:6, 7, 9, 12, 15, 19. Yumi sua se God bambae i panisim man we i griri, i wantem samting we i no blong hem, mo man we i laekem raf fasin, no i mekem rabis fasin long saed blong seks, mo man we i wosipim ol aedol. Taswe yumi mas lukaotgud blong blokem ol tingting mo fasin olsem.

2:11. Sipos yumi no mekem rabis fasin blong wol ya i kam long klia ples, bambae ‘ol stonwol nomo oli girap, oli talemaot ol poen agens’ long ol rabis man. !I impoten tumas we yumi no fraet blong gohed blong talemaot Kingdom!

3:6. Bambae i no gat wan samting we i save blokem Jeova taem hem i mekem jajmen blong hem i kamtru. Nating se ol ogenaesesen blong ol man oli stanap strong olsem ol bigbigfala hil, be olgeta tu bambae oli no save mekem wan samting blong blokem jajmen ya.

3:13. Yumi save sua se long Amagedon bambae Jeova i no spolem gudfala man wetem ol man nogud. Bambae Jeova i sevem ol man we oli holemstrong long hem.

3:17-19. Maet yumi fesem hadtaem bifo Amagedon mo long taem blong Amagedon, be nating se i olsem, yumi save sua fulwan se sipos yumi gohed blong mekem wok blong Jeova wetem glad, bambae hem i givim bigfala “paoa” long yumi.

‘DEI BLONG HAE GOD I STAP KAM KLOSAP NAO’

(Sefanaea 1:1–3:20)

Long olgeta ples long Juda ol man oli stap mekem wosip long Bal. Jeova i yusum profet Sefanaea blong talemaot tok blong hem, se: “Mi bambae mi panisim yufala evriwan we i stap long Jerusalem, mo long ol narafala ples long Juda.” Sefanaea i givim woning long ol man se: “Dei ya we Hae God bambae i jajem olgeta man long hem i stap kam klosap nao.” (Sefanaea 1:4, 7, 14) Ol man we oli mekem samting we God i wantem, olgeta ya nomo bambae oli ‘no kasem panis’ long dei ya.—Sefanaea 2:3.

“Ol man Jerusalem. !Sore tumas long yufala! . . . Yufala i stap mekem i strong tumas long ol man ples blong yufala.” Jeova i talem long olgeta se: “!Yufala i lukaot! Dei ya blong mi i stap kam we mi bambae mi talemaot we olgeta kantri oli mas kasem panis. Mi mi tingbaot finis blong tekem ol man blong olgeta kantri . . . oli kam wanples, nao bambae oli haremsave paoa blong kros blong mi.” Be Jeova i promes se: “I gat taem i stap kam, we ol man ples blong yufala we oli stap olbaot long evri ples, bambae mi tekem olgeta i kambak long stret ples blong yufala bakegen. Bambae mi mekem nius blong hae nem blong yufala i kasem olgeta ples long wol ya, mo bambae mi mekem yufala i kam rijman bakegen.”—Sefanaea 3:1, 8, 20.

Ansa Blong Sam Kwestin Long Saed Blong Baebol:

2:13, 14—?Voes blong hu i “stap singaot” long taon blong Nineve we i kam ples nating nomo? From we Nineve i kam wan ples blong ol wael anamol mo pijin, voes ya we i stap singaot i minim singsing blong ol pijin, mo maet i save minim tu noes blong win we i blu, i pastru long ol windo blong ol haos we oli no moa gat man i stap long olgeta.

3:9, NW—?“Klin lanwis” ya hem i wanem? ?Mo olsem wanem ol man oli toktok lanwis ya? Hem i trutok we i kamaot long God mo we i stap long Tok blong hem, Baebol. Hem i minim ol tijing blong Baebol tu. Yumi toktok lanwis ya taem yumi bilif long trutok, taem yumi tijim gud ol narafala long trutok ya, mo taem yumi mekem laef blong yumi i laenap wetem samting we God i wantem.

Ol Lesen Blong Yumi:

1:8. I luk olsem we sam man long taem blong Sefanaea oli “stap folem ol kastom [“werem ol klos, NW] blong ol narafala kantri,” from we oli wantem se ol narafala neson ya oli laekem olgeta. !I krangke sipos sam man blong Jeova tede oli mekem sem samting blong traem kam olsem ol man blong wol!

1:12, NW; 3:5, 16. Jeova i sanem ol profet blong hem bakegen mo bakegen long ol man blong hem blong oli givim woning long saed blong ol jajmen blong hem. Hem i gohed blong mekem olsem, nating se plante man Jiu oli olsem makas blong waen we i fas long botom blong dram we oli wokem waen long hem. Yes, oli fasgud long fasin blong laef blong olgeta mo oli no wantem save long woning we ol profet oli talemaot. Taem dei blong Jeova i stap kam moa klosap, nating se plante man raonabaot long yumi oli no wantem lesin, be yumi no mas letem samting ya i mekem yumi kam slak, olsem we ‘han blong yumi i hang.’ Defren olgeta, yumi mas gohed blong talemaot Kingdom we yumi no kam slak nating.

2:3, NW. Jeova nomo i save sevem yumi long dei blong kros blong hem. Sipos yumi wantem we Jeova i glad oltaem long yumi, yumi mas ‘lukaot hem.’ Yumi mekem samting ya taem yumi stadi gud long Tok blong hem, Baebol, taem yumi prea long hem blong askem hem blong givim advaes long yumi blong lidim yumi, mo taem yumi kam klosap moa long hem. Yumi mas “lukaot stret fasin,” i min se yumi folem wan klin fasin blong laef. Mo yumi mas “lukaot tingting daon,” hemia yumi mekem taem yumi traehad blong wokem wan tingting we i stap daon mo yumi obei.

2:4-15; 3:1-5. Long dei we Jeova i mekem jajmen blong hem i kamtru, bambae Krisendomb mo ol neson we oli mekem i strong tumas long ol man blong God, oli kam olsem Jerusalem bifo wetem ol neson raonabaot long hem. (Revelesen 16:14, 16; 18:4-8) Yumi no mas fraet blong gohed blong talemaot ol jajmen blong God.

3:8, 9, NW. Taem yumi stap wet long dei blong Jeova, yumi stap rerem yumi blong yumi save sef. Yumi mekem olsem taem yumi lanem blong toktok “klin lanwis” ya, mo taem yumi ‘singaot long nem blong God,’ hemia se yumi givim laef blong yumi i go long hem. Mo tu, yumi mekem wok blong Jeova we ‘solda blong yumi i joen long solda blong ol narafala’ man blong hem, mo yumi mekem wan “sakrefaes” blong presem hem olsem we yumi givim wan presen long hem.—Hibrus 13:15.

“I No Longtaem, Bambae i Kamtru”

Man we i raetem buk blong Ol Sam i singsing se: “Bambae i no longtaem, ol man nogud oli lus. Bambae yu save lukaot olgeta, be bambae yu no save faenem olgeta.” (Ol Sam 37:10) Taem yumi tingtingbak long profet tok long buk blong Neham long saed blong Nineve, mo profet tok we i stap long buk blong Habakuk long saed blong Babilon mo ol man Juda we oli lego Jeova, yumi sua fulwan se toktok blong man blong raetem Ol Sam i mas kamtru. ?Be yumi mas wet longtaem yet?

Sefanaea 1:14 i talem se: “Bigfala Dei ya blong Hae God i kam klosap finis. I no longtaem, bambae i kamtru.” Buk blong Sefanaea i soemaot olsem wanem yumi save sef long dei ya, mo wanem we yumi mas mekem naoia blong rerem yumi blong yumi save laef tru long taem ya. Yes, “tok blong God i wan samting we i laef, mo i stap wok.”—Hibrus 4:12.

[Ol Futnot]

[Tok blong pija long pej 8]

Ol bigbigfala stonwol blong Nineve oli no blokem profet tok we Neham i talemaot blong i no kamtru

[Credit Line]

Randy Olson/National Geographic Image Collection