Yufala i Mekem Han Blong Yufala i Strong

“Tingting blong yufala i mas strong. Naoia bambae mi talemaot long yufala sem tok ya we mi bin talem long ol profet.”​—SEKARAEA 8:9.

1, 2. ?From wanem i gud yumi ridim stori we i stap long buk blong Hagae mo Sekaraea?

OL PROFET tok blong Hagae mo Sekaraea, we oli raetem samwe long 2,500 yia bifo, oli gat bigfala mining long laef blong yu. Ol stori blong Baebol we yu save ridim long tufala buk ya oli no jes ol stori blong laef blong ol man bifo nomo. Ol stori ya oli pat blong ol tok we “oli raetem long Baebol bifo, . . . blong tijim yumi.” (Rom 15:4) Plante long ol samting we yumi ridim long tufala buk ya oli mekem yumi tingbaot sam samting we oli hapen stat long 1914, taem Kingdom i stanap long heven.

² Aposol Pol i tokbaot sam samting we oli bin hapen long laef blong ol man blong God longtaem bifo mo i talem se: “Olgeta trabol ya we ol man ya oli kasem, i blong tijim olgeta. Mo oli raetem stori blong hem long buk, blong wekemap yumi ya we yumi stap laef tede, we . . . [“en,” NW ] blong wol i klosap.” (1 Korin 10:11) Taswe maet yu wantem save se, ‘?Olsem wanem buk blong Hagae mo Sekaraea i save halpem yumi tede?’

 3. ?Hagae mo Sekaraea tufala i tokbaot wanem taem?

³ Faswan stadi we yumi mekem i soemaot se profet tok blong Hagae mo Sekaraea oli tokbaot taem we ol man Jiu oli kam fri long Babilon oli kambak long graon blong olgeta we God i bin givim. Tufala profet ya tufala i tokbaot plante long saed blong wok blong bildim bak tempol. Ol man Jiu oli wokem fandesen blong tempol ya long 536 B.K.T. Long taem ya, bighaf blong ol man Jiu oli “stap singsingaot bigwan from we oli glad tumas,” nating se ol olfala oli stap krae from ol samting blong bifo we oli tingbaot. Long taem blong yumi tede, i gat wan samting tu i hapen we i bigwan mo i impoten moa i bitim hemia bifo. ?Wanem samting ya?​—Esra 3:​3-13.

 4. ?Wanem i hapen smoltaem afta long Wol Wo Wan?

⁴ Smoltaem afta long Wol Wo Wan, ol Kristin we Jeova i makemaot olgeta wetem tabu spirit blong hem oli kam fri long Bigfala Babilon. Long taem ya i klia nomo se Jeova i stap wetem olgeta from we, jes bifo long samting ya, i luk olsem se ol lida blong jos wetem ol man blong politik oli winim ol Baebol Studen mo oli stopem wok blong prij mo tij. (Esra 4:​8, 12, 21-24) Be Jeova God i karemaot ol samting ya we oli blokem wok blong prij mo pulum ol man oli kam disaepol. Long ol yia afta long 1919, wok blong Kingdom i gohed blong gru mo i no gat samting i naf blong blokem wok ya.

5, 6. ?Wanem nambawan samting we Sekaraea 4:7 i talem se i mas hapen?

⁵ Yumi save sua se bambae Jeova i gohed blong lidim ol man blong hem we oli stap mekem wok ya blong prij mo tijim man tede. Long Sekaraea 4:7 (NW ), yumi ridim se: “Bambae hem i mekem bigfala ston i kamaot, blong haos i save stanap long hem. Nao bambae oli singaot strong from hem, oli se: ‘!Hem i naes tumas! !Hem i naes tumas!’ ” ?Ol tok ya oli laenap wetem wanem samting we i hapen long taem blong yumi?

⁶ Sekaraea 4:7 i tokbaot wan taem we trufala wosip blong Haefala Masta blong heven mo wol, bambae i kasem ful mak blong hem long wol ya, we i olsem yad blong tempol long saed blong spirit. Tempol ya hem i ol plan we Jeova i stanemap blong ol man oli save wosipim hem from sakrefaes blong Jisas Kraes we i kavremap ol sin blong yumi. I tru se, bigfala tempol ya long saed blong spirit i stanap finis long faswan handred yia K.T.a Be trufala wosip we i stap long wol ya we hem i yad blong tempol, i no kasem fulmak blong hem yet. Tede i gat plante milian man long wol we oli stap wosipim Jeova long yad blong tempol ya long saed blong spirit. Ol man ya wetem plante dedman we bambae oli laef bakegen, bambae oli kam stretgud olgeta long Taosen Yia Rul blong Kraes. Long en blong taosen yia ya, wol ya bambae i fulap wetem ol trufala man blong God.

 7. ?Jisas i mekem wanem wok blong bambae trufala wosip i kasem fulmak blong hem tede, mo from wanem samting ya i mas leftemap tingting blong yumi?

⁷ Hedgavman ya Serubabel mo Hae Pris Josua, tufala i luk taem we wok blong bildim tempol i finis long 515 B.K.T. Sekaraea 6:​12, 13 i talemaot wok we Jisas bambae i mekem blong karem trufala wosip i go kasem fulmak blong hem, i se: “Mi [Jeova] mi gat olgeta paoa, mo mi talem se, ‘Man ya we nem blong hem “Han blong Tri”, hem bambae i kam bigwan, i kam strong. Man ya nao bambae i stanemap haos blong mi bakegen, mo ol man bambae oli ona gud long hem olsem we hem i king. Mo taem hem i stap rulum ol man blong hem, oltaem wan pris bambae i stap stanap long saed blong hem [“bambae hem i mekem wok blong pris tu,” NW ] ‘” Jisas we i stap long heven, i olsem han blong tri from we hem i kamaot long laen blong Deved we hem i laen blong ol king. ?From we hem i stap lidim wok blong Kingdom long tempol ya long saed blong spirit, yu ting se i gat man bambae i save blokem wok ya fulwan? !Nogat! Taswe, samting ya i mas leftemap tingting blong yumi, blong yumi gohed long wok blong prij mo yumi no letem ol wari blong laef evri dei oli pulum yumi i gowe long wok ya.

Ol Samting We Oli Impoten Moa

 8. ?From wanem yumi mas putum ol wok blong tempol long saed blong spirit long fasples long laef blong yumi?

⁸ Sipos yumi wantem we Jeova i stap wetem yumi mo i blesem yumi, yumi mas putum ol wok blong tempol long saed blong spirit oli stap fasples long laef blong yumi. I nogud yumi gat tingting olsem ol man Jiu bifo we oli talem se “i no taem yet.” Yumi mas tingbaot oltaem se yumi stap long “ol las dei.” (Hagae 1:2; 2 Timoti 3:​1, NW ) Jisas i talem se ol gudfala man blong hem bambae oli mas talemaot gud nius blong Kingdom mo bambae oli pulum ol man oli kam disaepol. Yumi mas lukaot blong no ting nating long nambawan wok ya blong talemaot gud nius. Ol man blong wol oli bin stopem wok blong prij mo tij smoltaem mo hem i stat bakegen long 1919, be hem i no finis yet. !Be yu save sua se wan dei bambae wok ya i mas finis!

9, 10. ?Jeova i save blesem yumi sipos yumi mekem wanem, mo hemia i minim wanem?

⁹ Jeova bambae i blesem yumi wanwan mo grup blong yumi ya we yumi gohed blong wok wetem strong tingting. Tingbaot promes ya we Jeova i mekem mo we i leftemap tingting blong yumi. Taem ol man Jiu oli stat mekem wosip blong Jeova bakegen wetem ful laef blong olgeta, mo oli stat wok wetem strong tingting long fandesen blong tempol, Jeova i talem se: “I stat naoia, bambae mi blesem yufala.” (Hagae 2:19) Ol man Jiu ya oli save harem gud from we Jeova i glad long olgeta bakegen. Tingbaot ol blesing ya we God i promes blong givim long olgeta: “Taem yufala i go blong planem garen blong yufala, bambae ol enemi oli no save kam spolem yufala. Ol grep blong yufala bambae oli karem plante frut, mo ol kakae we yufala i planem bambae oli karem plante kakae, from we bambae i gat ren blong mekem ol samting ya i gru gud. Mi bambae mi givim ol gudgudfala samting ya i go long yufala.”​—Sekaraea 8:​9-13.

¹⁰ Jeova i blesem ol man Jiu long saed blong spirit mo long saed blong bodi. Bambae hem i blesem yumi sem mak, sipos yumi wok had, wetem glad, long wok ya we hem i putum long han blong yumi. Ol blesing ya we hem i givim hemia pis bitwin yumi, filing we yumi harem sef, yumi no sot long wan samting mo yumi gru long saed blong spirit. Be sipos yumi wantem gohed blong kasem blesing blong God, yumi mas mekem wok long tempol long saed blong spirit stret olsem we Jeova i wantem yumi blong mekem.

11. ?I gud yumi jekemap yumi wan long saed blong wanem?

¹¹ Naoia i taem blong “Putum hat blong yu long ol rod blong yu.” (Hagae 1:​5, 7, NW ) Yumi mas tekem taem blong skelem wanem samting we yumi stap putum fasples long laef blong yumi. Blesing we Jeova i givim long yumi tede i dipen long fasin blong yumi blong leftemap nem blong hem mo blong gohed long wok blong yumi long tempol blong hem long saed blong spirit. Maet i gud yu askem long yu wan se: ‘?Ol samting we fastaem mi putum se oli moa impoten, naoia oli no moa impoten? ?Strong tingting we mi gat long Jeova, trutok, mo wok blong hem, i sem mak naoia olsem taem we mi bin baptaes? ?Intres blong mi blong gat wan gudfala laef i blokem mi blong no moa tingting plante long Jeova mo Kingdom blong hem? ?Mi mi fraet long ol man​—mi stap tingting tumas long wanem we narafala bambae i talem long saed blong mi—​nao samting ya i blokem mi?’​—Revelesen 2:​2-4.

12. ?Hagae 1:​6, 9 i tokbaot wanem long saed blong ol man Jiu?

¹² Yumi no wantem we Jeova i holembak ol blesing blong hem long yumi from we yumi slak long wok blong leftemap nem blong hem. Tingbaot ol man Jiu ya we oli kambak long ples blong olgeta. Fastaem oli wok gud long wok blong bildim bak tempol. Be biaen Hagae 1:9 i talem se oli ‘stap hadwok blong wokem ol haos blong olgeta.’ Oli stat bisi tumas blong tingbaot ol samting we oli nidim evri dei mo fasin blong laef blong olgeta. From samting ya, oli stap karem “smol kakae nomo” long garen blong olgeta, oli sot long kakae, dring, mo klos. (Hagae 1:6) Jeova i karemaot blesing blong hem long olgeta. ?Wanem lesen we yumi lanem long saed ya?

13, 14. ?Olsem wanem lesen we i stap long Hagae 1:​6, 9 i save givhan long yumi, mo from wanem i impoten blong tingbaot samting ya?

¹³ Yu yu agri se sipos yumi wantem kasem blesing blong God yumi mas lukaot long fasin blong lego wosip blong Jeova blong ronem ol samting we yumi nomo i wantem. Maet yumi letem tingting blong yumi i bisi long fasin blong ronem mane, ol plan blong kam rij kwik, skul moa blong kasem wan gudfala wok, no enikaen kos we yumi tekem blong kasem wan mak we yumi putum long laef blong yumi.

¹⁴ Ol samting ya oli no wan sin. ?Be yu yu no luksave se ol samting ya oli ol wok blong “ded nomo” from we bambae oli no halpem yumi blong kasem laef we i no save finis? (Hibrus 9:14) ?Olsem wanem ol wok ya oli blong ded nomo? Oli nating nomo long saed blong spirit, i min se oli no halpem yumi blong wosipim God mo blong frengud wetem Hem. Sipos man i bisi wetem ol samting ya bambae hem i save ded long saed blong spirit. Hemia nao samting we i hapen long ol Kristin we tabu spirit i makemaot olgeta long taem blong ol aposol bifo. (Filipae 3:​17-19) Mo i hapen long sam Kristin tede tu. Maet yu yu save long samfala we sloslo oli lego ol Kristin wok mo maet oli no moa joen wetem kongregesen from we oli ronem ol samting ya, mo naoia oli no moa intres nating blong mekem wok blong Jeova bakegen. Yumi wantem tumas se olgeta ya oli kambak long Jeova. Be i klia se taem wan man i ronem ol wok we oli “blong ded nomo” hem i save lusum blesing blong Jeova mo bambae Jeova i no moa glad long hem. Ating yu luksave se frut blong wan desisen olsem i no gud tumas. Hem i min se bambae yumi lusum glad mo pis we tabu spirit blong God nomo i save givim long yumi. !Mo tingbaot tu se yu save lusum gudfala blesing we i kamaot taem yumi kampani wetem ol Kristin brata sista!​—Galesia 1:6; 5:​7, 13, 22-24.

15. ?Olsem wanem Hagae 2:14 i soemaot se wosip blong yumi i no wan samting blong ting nating long hem?

¹⁵ I nogud blong ting nating long bisnes ya. Taem yu ridim Hagae 2:14 yu save faenemaot tingting we Jeova i gat long saed blong ol man Jiu ya we oli lego wok long haos wosip blong God from we oli wantem flasem gud ol haos blong olgeta. “[Jeova] i talem se, ‘Hemia nao, i sem mak long yufala ol man blong ples ya, mo long olgeta samting we yufala i stap mekem, mo long olgeta sakrefaes we yufala i stap bonem blong givim i kam long mi. Olgeta evriwan i doti long fes blong mi.’ ” Ol man Jiu oli bonem sakrefaes long olta blong Jerusalem, be hat blong olgeta i no fulwan long Jeova. Oli kam slak long wok blong trufala wosip, mo sipos oli gohed olsem, bambae Jeova i no save agri long ol sakrefaes ya.​—Esra 3:3.

God i Promes Blong Lukaot Long Ol Man Blong Hem

16. ?Folem ol vison we Sekaraea i luk, ol man Jiu oli save sua long wanem?

¹⁶ God i promes blong halpem ol man Jiu we oli obei long hem nao oli bildim bak tempol blong Hem. God i soemaot samting ya long ol eit vison we Sekaraea i luk. Faswan vison i soemaot se bambae tempol i mas finis fulwan mo Jerusalem mo Juda bambae oli kasem plante gudgudfala samting, sipos ol man Jiu oli obei mo gohed long wok we i stap. (Sekaraea 1:​8-17) Long seken vison Jeova i promes se bambae hem i finisim olgeta gavman we oli stap agensem trufala wosip. (Sekaraea 1:​18-21) Ol narafala vison oli soemaot se bambae God i protektem ol man blong hem taem oli mekem wok blong bildim haos tempol. Oli soemaot se plante plante man blong narafala kantri bambae oli save kam long haos tempol ya blong Jeova blong mekem wosip. Oli soemaot se bambae i gat trufala pis mo seftaem mo se ol samting we oli blokem wok blong God olsem bigfala hil, be bambae God i mekem oli lus nomo. Bambae God i karemaot ol rabis fasin, mo bambae i sanem ol enjel blong lidim mo protektem ol man blong hem. (Sekaraea 2:​5, 11; 3:10; 4:7; 5:​6-11; 6:​1-8) Olgeta nambawan promes ya we oli soemaot se bambae Jeova i lukaot long ol man blong hem, oli pulum ol man Jiu we oli gat fasin obei, blong jenisim fasin blong laef blong olgeta. Ale, oli putum tingting blong olgeta i stap strong long wok we God i wantem se oli mekem. Yes, from wok ya nao God i bin karemaot olgeta long kalabus blong Babilon.

17. ?From promes we Jeova i mekem, yumi mas askem wanem long yumi wan?

¹⁷ Jeova i promes se bambae trufala wosip i win. Samting ya i mas pusum yumi blong wok strong mo i mas pulum hat blong yumi blong yumi tinghevi long haos wosip blong Jeova. Askem long yu wan se: ‘?Sipos mi mi bilif se naoia i taem blong talemaot gud nius blong Kingdom mo pulum man i kam disaepol, fasin blong laef blong mi mo ol mak we mi putum long laef blong mi oli soemaot samting ya? ?Mi mi tekem taem blong stadi long ol profet Tok blong God, mi tinghevi long wanem mi lanem, mo mi tokbaot ol samting ya wetem ol Kristin brata sista mo narafala man we mi mitim?’

18. ?Folem Sekaraea japta 14, wanem samting yet we bambae i mas kamtru?

¹⁸ Sekaraea i tokbaot taem we God bambae i spolem Bigfala Babilon mo i tokbaot faet blong Amagedon tu. Yumi ridim tok blong hem se: “Dei ya bambae hem i dei blong Jeova. Bambae i no gat dei taem, be bambae i no gat naet taem tu, mo taem tudak i kam be bambae laet i saenaot.” !Yes, long dei ya blong Jeova, ol enemi blong hem long wol ya bambae i olsem we oli stap long wan ples we i tudak mo i kolkol! Be ol man we oli gohed blong wosipim Jeova, bambae oli stap oltaem long laet mo God bambae i glad long olgeta olwe. Mo tu, Sekaraea i tokbaot olsem wanem olgeta samting long niufala wol bambae oli leftemap Jeova we i tabu we i tabu tumas. Olgeta man long wol bambae oli joen long wan wosip nomo, hemia trufala wosip blong God long haos tempol long saed blong spirit. (Sekaraea 14:​7, 16-19, NW ) !Hemia wan nambawan promes ya! Bambae yumi harem gud blong luk ol profet tok ya oli kamtru mo luk we hae rul blong Jeova i win. !Dei ya blong Jeova bambae i rili wan nambawan dei!

Ol Blesing We Oli Stap Olwe

19, 20. ?From wanem yu ting se ol tok blong Sekaraea 14:​8, 9 oli leftemap tingting?

¹⁹ Taem haefala rul blong Jeova i win, Setan mo ol rabis enjel blong hem bambae oli go kalabus long bigfala hol ya we i godaon we i godaon. Hemia i min se bambae oli no save gohed long ol rabis wok blong olgeta. (Revelesen 20:​1-3, 7) Ale nao ol blesing blong Jeova bambae oli kam plante long Taosen Yia Rul blong Kraes. Sekaraea 14:​8, 9 i talem se: “Taem dei ya i kamtru, bambae gudfala wota [“wota we i givim laef,” NW ] i aot long Jerusalem i ron i go. Haf blong hem bambae i ron i godaon long Ded Si, mo narahaf bambae i ron i go long Mediterenian Si. Wota ya bambae i ron olwe, neva bambae i kam drae samtaem. Long taem ya nao, Hae God bambae i kam King blong olgeta man long wol ya, mo olgeta evriwan bambae oli stap mekem wosip long hem we hem nomo i God, mo olgeta man bambae oli singaot hem long wan nem nomo.”

²⁰ “Gudfala wota” ya, no ‘bigfala reva blong wota blong laef,’ i minim rod we Jeova i yusum blong givim laef. Wota ya i kamaot long jea blong Mesaea King long Kingdom, mo bambae i ron oltaem. (Revelesen 22:​1, 2) Wan bigfala kampani blong man we oli wosipim Jeova, mo we oli laef tru long faet blong Amagedon, bambae oli kasem blesing ya se bambae oli fri long panis blong ded we Adam i pasem long ol man. Mo olgeta man we oli ded, olgeta tu bambae oli kasem blesing from we bambae oli laef bakegen long ded. Long taem ya nao wan niufala laef bambae i stat long wol ya aninit long rul blong Jeova. Ol man long evri ples long wol bambae oli luksave Jeova olsem Haefala Rula blong heven mo wol, we hem nomo yumi mas wosipim.

21. ?Tingting blong yumi i mas strong blong mekem wanem?

²¹ Taem yumi tingbaot olgeta samting we Hagae mo Sekaraea tufala i talemaot mo olgeta samting we i kamtru tu olsem we tufala i talemaot, i stret nomo we yumi gohed long wok ya we God i talem se yumi mas mekem long wol ya we hem i olsem yad blong tempol long saed blong spirit. Be bifo long taem ya we trufala wosip bambae i kasem fulmak blong hem, i gud yumi traem bes blong yumi blong putum ol wok blong Kingdom fasples long laef blong yumi. Sekaraea 8:9 (NW ) i pulum yumi wetem ol tok ya se: “Yufala ol man, we naoia yufala i stap harem ol tok ya we ol profet oli stap talem, long dei ya we oli putum fandesen blong haos blong Jeova blong ol ami, blong bildim haos prea, yufala i mekem han blong yufala i strong.”

[Futnot]

?Yu Yu Tingbaot?

• ?Olsem wanem ol tok blong Hagae mo Sekaraea i stret long yumi tede tu?

• ?Hagae mo Sekaraea oli tijim yumi wanem long saed blong samting we i moa impoten?

• ?From wanem buk blong Hagae mo Sekaraea i givim gudfala tingting blong yumi long saed blong fiuja?

[Tok blong pija long pej 12]

Hagae mo Sekaraea oli leftemap tingting blong ol man Jiu blong wok wetem ful laef blong olgeta mo kasem blesing blong Jeova

[Tok blong pija long pej 13]

?Yu yu stap ‘hadwok blong wokem haos’ blong yu?

[Tok blong pija long pej 14]

Jeova i promes blong givim blesing, mo hem i holem promes ya