?Hu Ya “Ol Trifala Waes Man”?

Plante taem, long ol pija blong dei we Jisas i bon long hem, i gat trifala man wetem ol longfala klos oli stap wetem ol kamel blong olgeta, mo oli stap go long wan haos blong ol anamol. Long haos ya i gat bebi Jisas i stap slip long ples we ol anamol oli stap kakae long hem. Plante man oli singaot ol man ya we oli kam luk Jisas se ol trifala waes man. ?Baebol i talem wanem long saed blong ol man ya?

Folem tok blong Baebol, ol man ya we oli talem se oli waes oli “aot long wan kantri long saed i go long is, oli kam,” mo long kantri ya nao oli kasem nius se Jisas i bon. (Matiu 2:1, 2, 9) Ating ol man ya oli mas wokbaot longtaem blong go kasem Judia. Taem oli faenem Jisas, hem i no moa wan bebi we i jes bon i stap long haos blong ol anamol. Defren olgeta, ol man ya oli faenem Meri wetem “pikinini ya” tufala i stap laef long wan haos.—Matiu 2:11.

Baebol i singaot ol man ya se ol magi, no ol “man we oli waes long ol fasin blong sta,” mo hem i no talem se i gat hamas man. The Oxford Companion to the Bible i eksplenem se: “Bigfala intres we ol man ya oli gat long sta ya we i lidim olgeta i go kasem Betlehem, i soemaot se majik i laenap wetem fasin blong ridim ol sta.” Baebol i tok klia agensem ol defren kaen majik mo fasin ya blong ol man Babilon we oli lukluk ol sta blong traem talemaot fiuja.—Dutronome 18:10-12; Aesea 47:13.

Ol save we ol man ya oli kasem i no karem gudfala frut. Save ya i mekem rabis King Herod i kros mo i jalus bigwan. Mo from samting ya, Josef, Meri, mo Jisas, trifala i mas ronwe i go long Ijip, mo Herod i kilim i ded olgeta pikinini boe long Betlehem “we yia blong olgeta i no bitim tu yia yet.” Ol man ya we oli waes long fasin blong ridim ol sta, olgeta nao oli givim save long Herod long saed blong taem we Jisas i bon long hem. (Matiu 2:16) Taem yumi luk olgeta trabol we i kamaot from visit blong ol man ya, i stret blong talem se sta ya we oli luk, mo mesej we oli kasem long saed blong “pikinini ya we i jes bon, we hem i king blong ol laen blong Isrel,” tufala i kamaot long enemi blong God, Devel Setan, we i wantem kilim Jisas.—Matiu 2:1, 2.