Japta 35

Toktok Ya i Moa Gud i Winim Ol Narafala Toktok

JISAS i sidaon long saed blong wan bigfala hil. Hem i stap talem toktok we i nambawan tumas long ol disaepol blong hem. Hem i stap samples kolosap long bigfala lugun blong Galili, ating kolosap long Kapaneam. Fastaem, Jisas i stap wan ful naet we hem i stap prea long God. Afta, hem i singaot ol man blong hem oli kam long hem, nao hem i jusumaot 12 man long olgeta blong oli kam aposol. Nao Jisas wetem ol man ya blong hem, oli aot long bigfala hil ya, oli kamdaon, oli stap long wan level ples. Ol toktok we Jisas i talem long ples ya, ol man tede oli tingting moa long hem, i bitim ol narafala toktok long Baebol.

Yumi save se Jisas i taed tumas, mo ating hem i wantem slip. Be i gat fulap man oli kam long ples ya blong harem tok blong hem. Samfala oli aot long Judia mo Jerusalem, oli wokbaot i kam. Oli wokbaot samwe long 100 no 110 kilomita blong harem tok blong Jisas. Sam narafala oli kam long not, samwe kolosap long tufala taon ya Taea mo Saedon. Olgeta ya oli kam blong harem tok blong Jisas, mo blong hem i tekemaot ol sik long bodi blong olgeta. Mo i gat sam man we ol rabis enjel blong Setan oli stap long olgeta, nao oli kam long Jisas blong hem i ronemaot ol rabis enjel ya.

Taem Jisas i stap kamdaon long bigfala hil, ol sikman ya oli kam kolosap long hem blong traem tajem hem, nao hem i stap mekem olgeta evriwan ya oli gud bakegen. Afta, Jisas i klaem i go antap long hil ya lelebet. Ale hem i sidaon, mo ol man oli kam sidaon raon long hem long level ples ya, nao hem i stap tijim olgeta. !Traem tingbaot! Long olgeta man ya, i no gat wan man we bigfala sik i stap yet long bodi blong hem.

Ol man ya oli wantem tumas blong harem tija ya we i save mekem ol bigfala merikel. Be fastaem Jisas i wantem toktok long ol disaepol blong hem nomo. Ating olgeta oli stap raon long hem, kolosap nomo. Be yumi wantem harem tok ya blong Jisas tu. Taswe Matyu mo Luk tufala i raetemdaon tok ya.

Store blong Matyu i fo taem moa longfala, i bitim store blong Luk. Matyu i raetemdaon sam toktok blong Jisas, nao hem i talem se Jisas i bin talem ol tok ya long bigfala hil. Be Luk i talem se Jisas i bin talem ol tok ya long wan narafala taem long minista wok blong hem. Yumi luk samting ya sipos yumi skelem Matyu 6:9-13 wetem Luk 11:1-4, mo Matyu 6:25-34 wetem Luk 12:22-31. Yumi no mas sapraes long samting ya. Jisas i no talem ol tok ya wan taem nomo. Hem i talem sem samting long plante ples bakegen. Taswe Matyu i raetemdaon sam tok we Jisas i talemaot long ples ya. Be Luk i raetemdaon ol tok we Jisas i talem taem hem i stap nara ples.

Tok blong Jisas antap long hil ya i nambawan tumas. ?From wanem? From we hem i tijim plante dip save long saed blong speret long ol man. Mo tu, fasin blong Jisas blong talemaot ol trutok ya, i klia mo i isi nomo. Hem i yusum ol samting we oli kamaot long laef blong ol man long taem ya. Taswe sipos ol man ya oli stap lukaot wan laef we i moa gud, we i stanap long ol loa blong God, i isi nomo long olgeta blong kasem save long ol tok ya blong hem.

?Hu Man We i Rili Harem Gud?

Yumi evriwan i wantem harem gud. Jisas i save samting ya, taswe blong statem toktok blong hem antap long bigfala hil, hem i tokbaot ol man we oli rili hapi. Wantaem nomo, toktok ya i pulum ol man blong lesin long hem. Be taem oli harem ol fas tok blong Jisas, maet plante man i ting se sam haf blong hem i agens long sam narafala haf blong hem.

Fastaem, hem i toktok long ol disaepol blong hem nomo, i se: “Yufala we i puaman, yufala i save harem gud, from we [Kingdom blong God i blong yufala, NW]. Yufala we i stap hanggri naoia, yufala i save harem gud, from we bambae bel blong yufala i fulap. Yufala we i stap krae naoia, yufala i save harem gud, from we bambae yufala i save laf. Taem we ol man . . . oli stap mekem i nogud tumas long yufala, yufala i save harem gud. . . . Taem we oli mekem olsem, yufala i save glad, yufala i save jyajyam from glad blong yufala, from we presen we bambae God i givim long yufala long heven, hem i bigfala tumas.”

Hemia fas tok blong Jisas olsem Luk i raetemdaon. Be long fas tok we Matyu i raetemdaon, Jisas i talem tu se ol man we oli kwaet man, we oli gat sore long man, we tingting blong olgeta i klin gud, mo we oli man blong mekem pis, olgeta ya tu oli save harem gud. Oli save harem gud from we God bambae i givim wol ya long olgeta, God bambae i gat sore long olgeta, bambae oli luk God, mo God bambae i talem se: ‘Yufala i pikinini blong mi.’

?Be wanem mining blong tok blong Jisas, se ‘harem gud’? Hem i no minim se man ya bambae i laf oltaem, olsem taem hem i stap pleplei nomo. Fasin blong rili harem gud i dip moa. Man we i harem gud hem i rili hapi long hat blong hem. Hem i glad long laef blong hem, mo hem i harem gud long ol samting we hem i stap mekem.

Ale, Jisas i soemaot se olgeta we oli rili harem gud, oli luksave se oli nidim ol samting long saed blong speret. Oli no glad long ol sin we oli stap mekem, nao oli traehad blong save gud God mo mekem wok blong hem. Ale, nating we ol man oli no laekem olgeta no oli mekem i nogud long olgeta from we oli stap mekem wok blong God, be oli harem gud. ?From wanem oli harem gud? From we oli save se oli stap mekem samting we God i glad long hem. Mo oli save se God bambae i givim presen long olgeta, hemia laef we i no save finis.

Be plante man we oli stap lesin long Jisas oli ting se man i mas gat plante samting blong harem gud, mo i mas pleplei oltaem blong harem gud. Plante man tede oli tingting olsem tu. Be Jisas i save se tingting ya i no stret. Ating plante man we oli stap lesin long hem oli sapraes long nekis tok blong hem, from we hem i tok long defren fasin nao. Hem i talem se:

“Be yufala we i rijman, sore tumas long yufala, from we yufala i kasem taem blong glad blong yufala finis. Yufala we bel blong yufala i fulap naoia, sore tumas long yufala, from we bambae yufala i save hanggri. Yufala we i stap laf naoia, sore tumas long yufala, from we bambae yufala i save krae, we wora i ron long ae blong yufala. Taem we ol man oli stap leftemap nem blong yufala, sore tumas long yufala. Fasin ya, hemia sem fasin nomo we ol olfala blong olgeta oli bin mekem long ol gyaman profet blong bifo.”

?Jisas i minim wanem? Hem i talem se ol man we oli rij, we oli stap ronem ol pleplei nomo, mo we oli harem gud from we ol man oli leftemap nem blong olgeta, oli save kasem trabol. ?From wanem? From we taem wan man i gat plante samting mo hem i laekem ol samting ya, hem i save fogetem wok blong God. Wosip blong God nomo i save mekem man i rili harem gud. Be Jisas i no minim se wan man i mas pua no i mas hanggri no i mas krae blong hem i harem gud. No gat. Be plante taem, ol man we oli no gat plante samting mo oli harem nogud, oli lesin moa long ol tijing blong Jisas, i bitim ol narafala man. From samting ya, oli kasem blesing, oli rili hapi.

Nao Jisas i tok stret long ol disaepol blong hem, i se: “Yufala i olsem sol long ol man long wol.” Hem i no minim se olgeta disaepol blong hem oli olsem prapa sol nomo. Hemia wan pija tok. Sol i save mekem kakae i stap gud, i no kam rotin. Wan bigfala hif sol i stap kolosap long olta long haos prea blong Jeova. Ol pris oli putum sol ya long ol sakrafaes we oli givim i go long Jeova.

Ol disaepol blong Jisas oli “olsem sol long ol man long wol,” from we oli save gat paoa long laef blong ol man blong oli no kam nogud. Hemia i olsem sol we i blokem mit blong i no kam nogud. Tru tumas, mesej we olgeta oli talemaot, i save sevem laef blong olgeta we oli harem mesej ya. Taem oli mekem tok ya i wok long laef blong olgeta, oli save kasem plante gudfala fasin, olsem fasin fasgud long God mo strong bilif. Ale, oli save blokem enikaen nogud fasin we i save mekem olgeta oli kam olsem rotin long saed blong speret.

Nao Jisas i talem long ol disaepol blong hem se: “Yufala i olsem laet long ol man long wol.” Taem man i laetem laet, hem i no kavremap long wan basket. Be hem i putum i stap antap, long ples blong laet, nao olgeta long haos i gat laet. Taswe Jisas i talem se: “Long sem fasin, yufala i mas letem laet blong yufala i saenaot i kasem ol man.” Ol disaepol blong Jisas oli mekem samting ya taem oli prij long ol man. Mo tu, ol gudfala fasin blong olgeta oli laenap wetem ol loa blong Baebol. From samting ya, oli saenaot olsem wan laet.

Wan Hae Mak We Ol Disaepol Oli Mas Kasem

Long taem blong Jisas, ol lida blong skul oli talem se hem i stap brekem ol loa blong God. I no longtaem oli bin mekem plan blong kilim hem i ded. Taswe, taem Jisas i gohed long ol toktok blong hem antap long hil, hem i talem se: “I nogud yufala i ting se mi mi kam blong sakemaot Loa blong Moses, wetem ol tok blong ol profet, no gat. Mi mi no kam blong sakemaot ol tok ya, mi kam blong folem olgeta, blong mekem oli klia moa [blong mi fulumap ol samting ya, GNB].”

Jisas i tinghae long ol loa blong God mo hem i pulum ol narafala man blong mekem olsem. Hem i talem se: “From samting ya, yufala i no save brekem ol loa ya. Nating we i wan tok blong ol loa ya we i daon moa long ol narafala tok blong hem, be yufala i no save brekem, mo yufala i no save tijim ol narafala man blong oli brekem. Man we i mekem fasin ya bambae i daon moa long ol narafala man long [kingdom long heven, GNB].” Hem i minim se man we i mekem fasin ya i no save go insaed long Kingdom blong God.

Jisas i neva brekem ol loa blong God, no gat. Be hem i tok strong agens long ol nogud tingting we oli save pulum man blong brekem ol loa blong God. Olsem ya nao, Jisas i tokbaot Loa blong Moses we i talem se: “Yu no save kilim man i ded.” Nao Jisas i talem se: “Be mi mi talem long yufala, se ‘Man we i [stap] kros long brata blong hem, i stret blong hem i pas long kot.”

Fasin blong stap kros long brata blong yumi i wan nogud fasin. Hem i save pulum man blong kilim brata blong hem i ded. Taswe Jisas i gohed blong soemaot se yumi mas traehad blong frengud wetem brata blong yumi. Hem i talem se: “From samting ya, sipos yu kam long olta blong God blong givim presen long hem, nao yu tingbaot we [brata blong yu i gat poen long yu, NW] yu mas livim presen ya i stap long fes blong olta fastaem. Nao yu mas go stretem poen ya wetem brata blong yu blong yutufala i fren gud, nao biaen yu save kambak bakegen blong givim presen blong yu long God.”

Nao Jisas i gohed blong tokbaot namba seven blong ol Ten Bigfala Loa, i se: “Yufala i harem finis we ol tija oli bin talem bifo, se ‘Bambae yu no stilim woman blong narafala man.’ ” Be Jisas i go moa, hem i tok strong agens long ol nogud tingting we oli save pulum man blong stilim woman blong narafala man. Hem i se: “Be mi mi talem long yufala se ‘Man we i stap luk nogud long wan woman olsem we i wantem go long hem, hem i stilim woman ya finis, long tingting blong hem.’ ”

Jisas i no stap tokbaot wan rong tingting we i pastru long maen blong yumi kwiktaem nomo. Hem i tokbaot fasin blong ‘stap luk nogud’ long wan woman. Fasin ya i save mekem ol rong tingting oli kam strong. Ale sipos man ya i gat jans, tingting ya i save pulum hem blong stilim woman ya. ?Olsem wanem man i save blokem fasin ya? Jisas i talem wan pija tok blong soemaot se man i mas strong blong mekem olsem. Hem i se: “Sipos raet ae blong yu i mekem yu yu foldaon long sin, i gud yu tekemaot, yu sakem. . . . Mo sipos raet han blong yu i mekem yu yu foldaon, i gud yu katemaot, yu sakem.”

Samtaem man i save kasem wan sik long han no long leg blong hem, nao dokta i mas katemaot han ya no leg ya blong hem. Yes, man ya i mas rere blong lusum han no leg blong hem blong sevem laef blong hem. Sem mak nomo, Jisas i talem se man i mas ‘sakemaot’ enikaen samting—nating we samting ya i sas olsem wan ae no wan han—blong blokem rabis tingting mo rabis fasin long laef blong hem. Sipos no, bambae hem i save lus long Gehena. Gehena i wan ples blong doti kolosap long Jerusalem, we faea i laet oltaem nomo long hem, mo hem i minim ded blong olwe.

?Yumi mas mekem wanem long ol man we oli mekem i no stret long yumi? Jisas i talem se: “Bambae yufala i no givimbak long man we i wantem mekem i nogud long yufala. Sipos man i slavem fes blong yu long raet saed, yu mas letem hem i slavem fes blong yu long lef saed tu.” Jisas i no minim se man i no mas traem blokem narafala man we i wantem kilim hem no kilim famle blong hem, no gat. Be taem man i slavem fes blong narafala man, hem i no rili wantem kilim hem. Hem i wantem stikim hem nomo, blong mekem se hem i harem nogud. Ale, Jisas i stap talem se sipos wan man i slavem yumi no i talem sam toktok blong stikim yumi, blong traem pulum yumi blong faet no agyu wetem hem, yumi no mas givimbak long hem.

Nao Jisas i gohed blong tokbaot loa blong God we hem i talem se: “Yu mas laekem ol man we oli stap raonabaot long yu.” Hem i talem se: “Be mi mi talem long yufala, se ‘Yufala i mas laekem ol enemi blong yufala, mo yufala i mas prea from olgeta we oli stap ronem yufala.’ ” ?From wanem? Jisas i talem se: “Blong bambae yufala i stret pikinini blong Papa blong yufala long heven, yufala i folem fasin blong hem. From we hem i save mekem san blong hem i saen long ol gudgudfala man mo ol man we oli nogud, long sem mak nomo.”

Nao Jisas i finisim haf ya blong toktok blong hem, i se: “Be fasin blong yufala i mas stret olgeta, olsem we fasin blong Papa blong yufala long heven i stret olgeta.” Jisas i no minim se man i save kam stret man, olsem we God i stret olgeta. Be hem i minim se man i save folem fasin blong God. Hem i save mekem lav blong hem i kam bigwan moa, gogo hem i save laekem ol enemi blong hem tu. Long store we Luk i raetemdaon, hem i talem toktok blong Jisas olsem: “Yufala i mas gat sore, olsem we Papa blong yufala i gat sore.”

Prea, Mo Fasin Blong Trastem God

Jisas i gohed long toktok blong hem antap long hil. Hem i tok strong long ol man we oli gat tu fes, we oli stap mekem ol gudfala fasin long fored blong ol man, blong soemaot se oli man blong God. Hem i talem se: “Taem yu givim presen long ol puaman blong givhan long olgeta i nogud yu blou long pupu from, olsem we olgeta ya we oli gat tu tingting oli stap mekem.”

Mo Jisas i gohed i talem se: “Taem yu prea, i nogud yu folem fasin blong olgeta ya we oli gat tu tingting. Olgeta ya oli laekem tumas blong stanap blong prea insaed long ol haos blong prea, mo afsaed long ol open ples, blong ol man oli save luk olgeta.” Nao Jisas i tokbaot narakaen fasin, i se: “Be taem yu yu prea, i gud yu go yu wan insaed long rum blong yu, yu satem doa, nao yu prea long Papa ya blong yu we i stap long ples ya we ol man oli no save luk.” Jisas i no stap talem se ol prea long open ples oli rong olgeta. No gat. Hem tu i mekem sam prea long pablik ples. Be hem i stap tok agens long olgeta man we oli mekem prea blong leftemap olgeta nomo long fored blong ol man, mo blong pulum ol man blong oli ona long olgeta.

Nao Jisas i givim sam moa advaes bakegen, i se: “Mo taem yufala i prea, i nogud yufala i stap talem sem tok bakegen evritaem, olsem we ol hiten man oli stap mekem.” (NW) Jisas i no minim se i rong blong talem sem samting bakegen long prea blong yumi. Wan taem hem i stap prea, nao hem tu i talem bakegen “sem tok” nomo. Be Jisas i no wantem we man i lanem tok we hem i talem long prea, nao hem i talem sem tok ya “bakegen evritaem.” Fasin ya i stap kamaot long olgeta we oli yusum ol bidbid blong prea.

Blong tijim ol man olsem wanem blong prea, Jisas i givim wan eksampel long olgeta. Long prea ya, hem i askem seven defren samting long God. Namba wan, namba tu, mo namba tri samting oli leftemap hae rul blong God mo ol plan blong hem. Fastaem Jisas i askem long God blong mekem nem blong hem i tabu. Afta, hem i askem God blong letem Kingdom blong hem i kam. Mo namba tri samting: Hem i wantem we olgeta man long wol oli mekem olsem we God nomo i wantem. Ol nekis fo samting we Jisas i askem long prea ya, hemia sam samting we yumi wanwan i nidim. Yumi save askem long God blong givim kakae evri dei, blong fogivim ol sin blong yumi, blong no letem sam samting i kam traem yumi tumas, mo blong blokem Setan i no kam spolem yumi.

Nao Jisas i storebaot wan trap we man i save foldaon long hem. Hem i save tingting tumas long ol samting blong laef. Jisas i talem se: “I nogud yufala i stap hivimap ol gudgudfala samting blong yufala long wol ya blong kam rijman. Long ples ya i gat kakros oli save kam kakae, mo rosta tu i save spolem ol samting. Mo i gat man blong stil we oli save brekem haos, blong oli stil.” Ol sas samting ya, oli save lus. Mo tu, oli no save givhan long wan man blong God i agri long hem.

Taswe Jisas i talem se: “Yufala i mas hivimap ol gudgudfala samting blong yufala long heven.” Yumi save mekem olsemia sipos yumi mekem wok blong God fastaem long laef blong yumi. Ale, yumi save gat gudnem long fes blong God, mo yumi save kasem wan nambawan pei from. I no gat wan man we i save tekemaot pei ya no gudnem ya long yumi. Nao Jisas i go moa, i talem se: “Long ples ya we ol gudgudfala samting blong yu i stap, be tingting blong yu tu bambae i stap oltaem long ples ya.”

Nao Jisas i tok moa long saed blong fasin blong hivimap plante tumas samting blong wol. Hem i talem pija tok ya, i se: “Ae blong man, hem i olsem laet blong bodi blong hem. Sipos ae blong yu i klia gud, bambae i olsem we bodi blong yu i fulap olgeta long laet. Be sipos ae blong yu i nogud, bambae i olsem we bodi blong yu i fulap olgeta long tudak.” Ae we i save luklukgud i olsem wan laet we i stap saen long ples we i tudak. Be blong luklukgud, ae i mas klia gud. Hemia i min se ae i mas lukluk i go long wan samting nomo. Sipos ae i no klia gud, man i no save skelemgud evri samting. Nao man ya i save tingbaot ol samting blong laef fastaem, be hem i save putum wok blong God i stap seken ples nomo long laef blong hem. From samting ya, bodi blong hem i save kam “fulap olgeta” long tudak.

Nao Jisas i talem wan pija tok blong givim paoa long toktok blong hem, i se: “I no gat man we i save wok blong tu masta wantaem. Sipos man i mekem olsem, bambae hem i save agens long wan masta blong hem be i stap laekem tumas narafala masta blong hem. No bambae hem i save ona long wan masta blong hem be i stap lukluk nogud long narafala masta blong hem. Yufala i no save mekem we yufala i man blong wok blong God, nao long semtaem nomo, yufala i man blong wok blong mane.”

Jisas i givim ol advaes ya, nao biaen hem i leftemap tingting blong ol man ya. Hem i talem long olgeta se sipos oli stap tingbaot wok blong God fastaem long laef blong olgeta, oli no save sot long ol samting we oli nidim long laef, olsem kakae mo klos. Hem i talem se: “Yufala i traem tingbaot ol pijin ya we oli stap flae olbaot. Olgeta ya oli no planem garen, oli no go karem kakae i kam, mo oli no putumgud kakae i stap long haos. Be Papa blong yufala long heven i stap givim kakae long olgeta.” Nao Jisas i askem wan kwestin long olgeta, i se: “?Yufala i no ting se yufala i hae moa long ol pijin?” (NW)

Nao Jisas i pulum ol man ya blong oli tingbaot ol flaoa we oli gru olbaot. Hem i talem se: “King Solomon ya bifo, we hem i bigfala haeman, be klos blong hem i no flas olsem ol flaoa ya.” Nao hem i gohed moa, i se: “Ol flaoa ya . . . God i stap flasemgud olgeta. ?Yufala i ting se bambae hem i no save givim klos long yufala? !Man, bilif blong yufala i smol nomo!” Nao Jisas i finisim tok ya, i se: “I nogud yufala i stap tingting tumas, se: ‘?Bambae yumi kakae wanem?’ no ‘?Bambae yumi dring wanem?’ no ‘?Bambae yumi kasem klos blong yumi olsem wanem?’ . . . Papa blong yufala long heven, hem i save we yufala i mas gat olgeta samting ya. Fastaem yufala i mas [lukaot Kingdom blong God, NW] mo . . . mekem ol stret fasin we hem i wantem. Nao biaen hem i save givim olgeta samting ya tu long yufala.”

Rod Blong Kasem Laef

Rod blong kasem laef i blong obei long ol tijing blong Jisas. Be samting ya i no isi blong mekem. Yumi save tingbaot ol Farisi, we oli jajem ol narafala man. Mo ating plante man oli folem fasin blong olgeta tu. Taswe, long nekis haf blong toktok blong Jisas antap long hil, hem i givim advaes ya se: “Bambae yufala i no jajem narafala man. Sipos yufala i no jajem narafala man, bambae God i no save jajem yufala. From we fasin we yufala i folem blong jajem man, hemia fasin we God bambae i folem blong jajem yufala.”

Man i save kasem bigfala trabol sipos hem i folem fasin blong ol Farisi we oli strong tumas, oli stap jajem ol man. Luk i raetemdaon pija tok we Jisas i yusum long poen ya, i se: “Yufala i traem tingbaot. ?Blaenman i save lidim blaenman blong tufala i wokbaot? Sipos wan blaenman i stap lidim wan narafala blaenman bambae tufala i mas foldaon long hol.”

Ale, sipos man i stap jajem ol narafala man, mo i stap mekem ol smosmol mastik blong olgeta oli kam bigwan, hem i stap mekem wan bigfala rong. Taswe Jisas i askem long olgeta se: “?Olsem wanem yu yu stap lukluk pis wud ya we i smol nomo we i stap long ae blong brata blong yu, be yu no save luk bigfala timba ya we i stap long ae blong yu? ?Weswe yu save talem long brata blong yu se ‘E, brata, mi tekemaot smol pis wud ya we i stap long ae blong yu,’ be yu no save luk bigfala timba ya we i stap yet long ae blong yu? Man, yu yu man blong gyaman. Fastaem yu yu mas tekemaot bigfala timba ya we i stap long ae blong yu, nao bambae yu save lukluk gud blong tekemaot smol pis wud ya we i stap long ae blong brata blong yu.”

Jisas i no stap talem long ol disaepol blong hem se oli mas fogetem fasin luksave. No gat. Oli mas traem luksave tingting blong narafala man, from we hem i talem se: “I nogud yufala i givim ol samting we oli tabu, oli go long ol dog. . . . Mo i nogud yufala i givim ol perel blong yufala, we hemia ol gudfala samting, oli go long ol pig.” Ol trutok we oli kamaot long Baebol oli tabu tumas. Oli olsem ol gudfala perel. Be sipos sam man, we oli gat fasin olsem dog no pig, oli soemaot se oli no tinghae long ol gudfala trutok ya, ol disaepol blong Jisas oli mas livim olgeta. Oli mas go lukaot ol man we oli wantem harem ol trutok ya.

Long toktok ya blong Jisas antap long bigfala hil, hem i storeyan finis long saed blong prea. Be naoia hem i makem long tingting blong ol man se oli mas gohed blong prea. Hem i se: “Taem yufala i wantem samting, yufala i mas stap askem, nao bambae yufala i save kasem.” Blong soemaot se God i rere blong ansa long ol prea, Jisas i talem pija tok ya long olgeta, i se: “I no gat wan long yufala we taem pikinini blong hem i askem bred long hem, be hem i givim ston long hem. . . . Yufala i man nogud be yufala i save givim ol gudgudfala presen long ol pikinini blong yufala. Be Papa blong yufala long heven, hem i save go moa olgeta blong givim ol gudgudfala samting long ol man we oli askem samting long hem.”

Nao Jisas i stanemap wan gudfala rul we ol man oli save folem. Plante man oli kolem rul ya ‘rul we i olsem gol.’ Hem i talem se: “Yufala i mas mekem long ol narafala man, olsem we yufala i wantem blong ol narafala man oli mekem long yufala.” Blong folem rul ya, yu mas givhan long ol narafala man. Yu mas mekem i gud long olgeta olsem we yu wantem blong oli mekem long yu tu.

Nao Jisas i givim wan advaes long olgeta, blong soemaot se rod blong kasem laef i no isi. Hem i talem se: “Yufala i mas pas long get ya we i smol nomo blong go insaed. From we get ya we i bigfala, mo rod ya we i isi nomo, hemia i blong go lus. Mo plante man oli stap folem rod ya. Be get ya we i smol nomo, mo rod we i strong, hemia i blong go kasem laef. Mo smol man nomo oli faenem.”

I isi nomo blong letem wan samting i pulum yumi blong lego smol rod ya. Taswe Jisas i givim woning, i se: “Yufala i mas lukaot long ol gyaman profet, blong oli no kam spolem yufala. Olgeta ya oli save kam long yufala we oli kwaet olsem sipsip nomo, be fasin blong olgeta oli olsem wael dog stret.” Taem wan tri i karem gud frut, yumi save se tri ya i gud. Mo yumi luksave wan tri we i nogud from nogud frut blong hem. Taswe Jisas i talem se yumi luksave ol gyaman profet from ol nogud fasin mo ol gyaman tijing blong olgeta.

Long nekis haf blong toktok blong Jisas, hem i eksplenem se i no ol samting we wan man i talem nomo we oli mekem se hem i wan disaepol blong Jisas, no gat. Be ol samting we hem i mekem, oli soemaot se hem i wan tru disaepol blong Jisas. Samfala oli talem se Jisas i Masta blong olgeta, be oli no mekem wok blong Papa blong hem. Taswe Jisas i talem se: “Bambae mi mi save talem stret long fes blong olgeta se ‘Neva mi mi save yufala. Yufala i man blong mekem i nogud, yufala i gowe long mi.’ ”

Nao Jisas i talem las tok blong hem antap long bigfala hil. Yumi no save fogetem tok ya. Hem i talem se: “Man we i harem ol tok ya blong mi, nao i stap mekem ol samting ya, hem i olsem wan waesman we i wokem haos blong hem antap long wan bigfala ston. Biaen, ren i stap kam, mo ol wora oli stap ron bigfala, mo win i blu, i stap kilim haos ya, be haos ya i no foldaon, from we man ya i stanemap long bigfala ston ya.”

Be Jisas i tokbaot wan narafala man tu, i se: “Be man we i harem ol tok ya blong mi be i no mekem ol samting ya, hem i olsem man we i no gat hed, we i wokem haos blong hem long sanbij nomo. Biaen, ren i kam mo ol wora oli ron bigfala mo win i blu, i kilim haos ya, nao haos ya i foldaon. Mo taem hem i foldaon, hem i nogud olgeta.”

Taem Jisas i finisim ol tok ya blong hem antap long hil, ol man oli sapraes. From we tok blong hem i gat paoa, i no olsem tok blong ol tija blong Loa blong olgeta. Luk 6:12-23; Matyu 5:1-12; Luk 6:24-26; Matyu 5:13-48; 6:1-34; 26:36-45; 7:1-29; Luk 6:27-49.

▪ ?Jisas i stap wea taem hem i givim impoten tok ya blong hem? ?Hu olgeta we oli stap lesin long Jisas long taem ya? ?Wanem samting i jes kamaot bifo we hem i givim tok ya?

▪ Sam tok we Jisas i talem antap long hil, Luk i raetemdaon se hem i talem long wan defren taem bakegen. ?From wanem yumi no mas sapraes long samting ya?

▪ ?Wanem samting i mekem se tok blong Jisas i nambawan tumas?

▪ ?Hu olgeta we oli rili harem gud? ?From wanem?

▪ ?Hu olgeta we oli stap trabol? ?From wanem?

▪ ?Olsem wanem ol disaepol blong Jisas oli olsem “sol long ol man long wol”? ?Olsem wanem ol disaepol blong hem oli olsem “laet long ol man long wol”?

▪ ?Olsem wanem Jisas i soemaot se hem i tinghae long ol loa blong God?

▪ ?Jisas i givim wanem advaes blong man i blokem tingting we i save pulum hem blong kilim man i ded no blong stilim woman blong narafala man?

▪ ?Wanem mining blong tok ya blong Jisas: “Sipos man i slavem fes blong yu long raet saed, yu mas letem hem i slavem fes blong yu long lef saed tu”?

▪ ?Olsem wanem yumi save stret olgeta, olsem we Papa blong yumi long heven i stret olgeta?

▪ ?Wanem ol rul we Jisas i givim long saed blong prea?

▪ ?From wanem i moa gud blong hivimap ol gudgudfala samting long heven, i winim we yumi hivimap ol gudgudfala samting long wol? ?Olsem wanem yumi save hivimap ol gudgudfala samting long heven?

▪ ?Jisas i talem wanem pija tok blong givhan long ol man, blong oli blokem fasin blong wantem plante tumas samting blong wol?

▪ ?From wanem Jisas i talem se yumi no mas tingting tumas from ol samting blong laef?

▪ ?Jisas i talem wanem long saed blong fasin blong jajem narafala man? ?Be olsem wanem hem i soemaot se ol disaepol blong hem oli mas luksave ol tingting blong ol narafala man?

▪ ?Jisas i givim wanem advaes moa long saed blong prea? ?Mo hem i givim wanem nambawan rul we yumi save folem long laef blong yumi?

▪ ?Olsem wanem Jisas i soemaot se i no isi blong folem rod blong kasem laef? ?Olsem wanem hem i soemaot se i gat sam samting we oli save pulum yumi blong lego rod blong laef?

▪ ?Olsem wanem Jisas i finisim tok blong hem antap long hil? ?Taem ol man oli harem ol tok blong hem, oli tingting olsem wanem?