Long Laef Blong Yu, Tingbaot Fiuja

“I NOGUD yufala i stap tingting tumas from samting blong tumora.” Plante man oli save gud tok ya blong Jisas Kraes we hem i talem antap long wan bigfala hil long Galili. Jisas i gohed blong talem se: “Ol bisnes blong tumora i blong tumora.”—Matiu 6:34.

?Yu ting se Jisas i minim wanem taem hem i talem tok ya, “ol bisnes blong tumora i blong tumora”? ?Hem i wantem minim se yu mas tingbaot laef blong yu naoia nomo mo no tingbaot tumora nating? ?Hemia i laenap wetem bilif blong Jisas mo ol man blong hem?

“I Nogud Yufala i Stap Tingting Tumas”

Long Baebol blong yu, ridim fulwan toktok we Jisas i talem long Matiu 6:25-32. Haf blong ol tok ya hemia se: “I nogud yufala i stap tingting tumas from laef blong yufala se, ‘?Bambae mifala i kakae wanem?’ no ‘?Bambae mifala i dring wanem?’ Mo i nogud yufala i stap tingting tumas from bodi blong yufala se, ‘?Bambae mifala i kasem klos blong mifala olsem wanem?’ . . . Yufala i traem tingbaot ol pijin ya we oli stap flae olbaot. Olgeta oli no planem garen, oli no go karem kakae i kam, mo oli no putumgud kakae i stap long haos. Be Papa blong yufala long heven i stap givim kakae long olgeta. . . . ?Yufala i ting se taem man i stap tingting tumas from laef blong hem we i sotfala nomo, bambae i save mekem laef blong hem i kam longfala moa long fasin ya? !Nogat! ?Mo from wanem yufala i stap tingting tumas from klos blong yufala? Yufala i traem tingbaot ol flaoa ya we oli stap gru olbaot. Olgeta oli no wok, mo oli no somap klos blong olgeta. . . . Nao from samting ya, i nogud yufala i stap tingting tumas se, ‘?Bambae mifala i kakae wanem?’ no ‘?Bambae mifala i dring wanem?’ no ‘?Bambae mifala i kasem klos blong mifala olsem wanem?’ Ol hiten man, oltaem oli stap tingting tumas from ol samting olsem. Be Papa blong yufala long heven, hem i save we yufala i mas gat olgeta samting ya.”

Jisas i finisim tok ya wetem sam advaes. Faswan advaes hemia se: “Fastaem yufala i mas lukaot gud blong obei long God we i King blong yufala, mo blong folem ol stret fasin blong hem. Nao biaen hem i save givim olgeta samting ya tu long yufala.” Seken wan se: “I nogud yufala i stap tingting tumas from ol samting blong tumora. Ol bisnes blong tumora i blong tumora. Trabol blong wan dei, hem i naf finis blong dei ya.”—Matiu 6:33, 34.

Papa Blong Yufala i Save Ol Samting We Yufala i Nidim

?Yu ting se Jisas i stap talem long ol disaepol blong hem mo ol man blong wokem garen, se oli no mas “planem garen, oli no go karem kakae i kam, mo oli no putumgud kakae i stap long haos”? ?Mo hem i stap talem se oli no mas ‘wok mo somap’ klos we oli nidim? (Ol Proveb 21:5; 24:30-34; Prija 11:4) No, hem i no minim olsem. Sipos oli no moa wok, ating bambae oli “no gat kakae” long taem blong karem kakae long garen, mo bambae oli no gat klos blong werem.—Ol Proveb 20:4.

?Olsem wanem long saed blong fasin ya blong tingting tumas? ?Jisas i wantem minim se bambae i no gat wan samting nating we ol man blong hem oli save wari from? Nogat, man we i tingting olsem hem i no gat stret tingting. Jisas hem wan i bin wari bigwan mo harem nogud tumas long laswan naet bifo we ol enemi oli kam holem hem.—Luk 22:44.

Long toktok ya blong Jisas, hem i stap talem wan stamba trutok nomo. Taem yu yu wari bitim mak, samting ya i no save halpem yu nating blong winim ol problem we oli kasem yu. Fasin ya blong wari bambae i no mekem se yu laef longtaem moa. Jisas i talem se bambae man i no “save mekem laef blong hem i kam longfala moa long fasin ya.” (Matiu 6:27) Defren olgeta, sipos yu gohed blong wari longtaem samting ya i save mekem laef blong yu i kam sot moa.

Advaes ya blong Jisas i stret gud long laef blong yumi. Plante taem, yumi wari long ol samting we oli neva hapen long laef blong yumi. Wan haeman long gavman blong Briten bifo, nem blong hem Winston Churchill, i bin luksave samting ya long ol hadtaem blong Wol Wo Tu. Hem i tokbaot sam wari we hem i gat long taem ya, i se: “Taem mi tingtingbak long ol wari ya we mi bin gat, mi tingbaot stori blong wan olfala man. Jes bifo we hem i ded, hem i talem se hem i bin gat plante trabol long laef blong hem, be bighaf blong ol trabol ya oli neva rili bin kamaot long laef blong hem.” Yes, i waes blong putum tingting blong yumi i stap long ol samting we i hapen tede nomo, antap moa sipos yumi fesem ol problem mo ol hevi baden we oli save mekem yumi wari tumas.

‘Fastaem Yufala i Mas Obei Long God We i King Blong Yufala’

Jisas i no stap tingbaot nomo ol samting long saed blong bodi mo filing blong ol man. Hem i save se taem yumi wari blong kasem ol samting we yumi nidim blong laef, no yumi wantem tumas blong gat ol naesfala samting mo harem gud, ol samting ya oli save fulumap tingting blong yumi nao yumi no moa tingbaot ol samting we oli moa impoten. (Filipae 1:10) Be maet yu stap tingting se: ‘?Wanem nao i moa impoten i bitim we yumi kasem ol samting we yumi nidim blong laef?’ Hemia ol samting we oli joen wetem wosip blong yumi long God. Jisas i talem klia wanem nao stamba samting long laef blong yumi, hem i se: ‘Fastaem yumi mas obei long God we i king blong yumi mo folem ol stret fasin blong hem.’—Matiu 6:33.

Long taem blong Jisas plante man oli stap ronem ol sas samting. Bigfala mak long laef blong olgeta i blong hivimap plante sas samting. Be Jisas i pulum ol man we oli stap lesin long hem blong oli gat wan tingting we i defren. Ol man Jiu ya oli blong neson ya we i blong God. Taswe, ‘samting we God i mekem olgeta from,’ hemia se ‘oli mas tinghevi long God, ona long hem, mo obei long ol tok blong hem.’—Prija 12:13.

Fasin ya blong ronem ol samting blong bodi, no ‘tingting tumas from laef long wol ya, mo wantem tumas blong kam rijman,’ i save pulum tingting blong ol man nao oli lego wosip we oli mekem long God. (Matiu 13:22) Aposol Pol i raetem long leta blong hem se: “Ol man ya we oli wantem kam rijman, be oltaem, ol samting blong traem yumi oli stap mekem olgeta oli foldaon. Ol samting we oli wantem, we i krangke, mo we i stap spolem olgeta, i olsem trap blong kasem olgeta. Nao fasin ya blong wantem evri samting, hem i save mekem olgeta oli foldaon we laef blong olgeta i kam nogud olgeta.” (1 Timoti 6:9) Jisas i givhan long ol man blong hem blong oli no foldaon long “trap” ya, taem hem i pulum olgeta blong tingbaot olsem wanem Papa blong olgeta long heven i save ol samting ya we oli nidim. God bambae i lukaot long olgeta olsem we hem i stap lukaot long “ol pijin ya we oli stap flae olbaot.” (Matiu 6:26, 32) Ol man blong Jisas oli no mas wari bitim mak, be oli mas mekem wanem we oli naf blong mekem blong kasem samting we oli nidim blong laef. Biaen, oli putum ol wari blong olgeta oli stap long han blong Jeova mo oli trastem hem.—Filipae 4:6, 7.

Taem Jisas i talem se “ol bisnes blong tumora i blong tumora,” hem i minim nomo se yumi gat naf problem tede, i no nid blong ademap moa wari long saed blong ol samting we maet oli hapen tumora. Wan narafala Baebol i talem se: “Yu no mas wari long saed blong tumora; bambae tumora i gat ol prapa wari blong hem. Yu no nid blong ademap moa trabol long hemia blong tede.”—Matiu 6:34, Today’s English Version.

“Mekem Kingdom Blong Yu i Kam”

Be fasin ya blong no wari tumas long saed blong fiuja i defren long fasin blong no tingbaot fiuja nating. Jisas i neva talem long ol disaepol blong hem se oli no mas tingbaot fiuja nating. Defren olgeta, hem i pulum olgeta blong oli intres bigwan long fiuja. I stret we oli prea from ol samting we oli nidim naoia long laef blong olgeta, olsem kakae blong evri dei. Be fastaem, oli mas prea from ol samting we bambae oli kamtru long fiuja, olsem, oli askem long God blong mekem Kingdom blong hem i kam mo blong mekem samting we hem i wantem i kamaot long wol.—Matiu 6:9-11, NW.

Yumi no mas mekem olsem ol man long taem blong Noa. Oli bisi tumas long ol samting blong laef, “oli stap kakae, mo oli stap dring, mo oli stap mekem mared,” oli no wantem “save se bambae trabol i kam.” ?Wanem frut i kamaot from? “Wota i ron bigwan, i tekemaot olgeta.” (Matiu 24:36-42) Aposol Pita i bin tokbaot trufala samting ya we i hapen blong pulum yumi blong rimemba se yumi nidim blong tingbaot fiuja long laef blong yumi. Hem i talem se: “Nao from we olgeta samting ya bambae oli lus olsem, yufala i mas luklukgud long laef blong yufala. Taem yufala i stap wet long Dei ya blong God blong i kamtru, yufala i mas tabu, yufala i man blong God, mo yufala i mas mekem ol fasin we hem i wantem. Mo yufala i mas gohed blong wok blong mekem Dei ya i kamtru kwik [“yufala i mas tingtinggud long taem ya we bambae dei blong Jeova i stap,” NW].”—2 Pita 3:5-7, 11, 12.

Hivimap Ol Gudgudfala Samting Long Heven

Yes, yumi mas “tingtinggud long taem ya” we bambae dei blong Jeova i kamtru. Sipos yumi mekem olsem, samting ya bambae i gat paoa long fasin blong yumi blong yusum taem, paoa, gudhan we yumi gat, ol samting blong yumi, mo save we yumi gat blong mekem samting. Yumi no mas letem fasin ya blong ronem ol sas samting i kakae taem blong yumi nao yumi gat smol taem nomo i stap blong mekem ol samting we “[God] i wantem,” nating sipos ol samting we yumi ronem hemia ol samting we yumi nidim no ol samting blong mekem yumi haremgud nomo. I tru se sipos yumi tingbaot tede nomo maet i luk olsem se yumi haremgud mo yumi win, be bambae i blong smol taem nomo. Yumi waes moa sipos yumi mekem olsem Jisas i talem, nao yumi “hivimap ol gudgudfala samting blong [yumi] long heven” bitim we yumi hivimap ol samting long wol ya.—Matiu 6:19, 20.

Jisas i mekem poen ya i klia long pijatok long saed blong wan man we hem i mekem ol bigfala plan blong fiuja. Man ya i no tingbaot God long ol plan blong hem. Garen blong hem i givim fulap kakae. Hem i tekem desisen blong tekemaot ol haos ya we hem i stap putum ol kakae i stapgud long olgeta mo bambae hem i wokem sam narafala haos we oli bigwan moa. Olsemia, hem i save gat wan laef we i isi, hem i save kakae, dring, mo haremgud olwe. ?Wanem i no stret long saed blong plan ya? Man ya i ded bifo we hem i save haremgud long frut blong ol hadwok blong hem. Be samting we i mowas, hemia se man ya i no bin wokem wan fasin fren wetem God. Long en blong pijatok ya, Jisas i talem se: “Bambae i mas olsem nomo long olgeta man we oli stap hivimap plante samting we oli blong olgeta nomo, be long fes blong God oli no rijman nating.”—Luk 12:15-21; Ol Proveb 19:21.

?Bambae Yu Yu Mekem Wanem?

Yu no mas mestem, olsem man ya we Jisas i tokbaot. Traehad blong faenemaot plan we God i gat long saed blong fiuja, mo mekem plan ya i kam stamba samting long laef blong yu. God i no livim ol man oli stap long tudak long saed blong samting we bambae hem i mekem. Amos we i wan profet blong bifo, i raetem se: “Hae God i Masta blong yumi, mo ol profet oli man blong wok blong hem, mo oltaem, sipos hem i wantem mekem wan samting, hem i stap soemaot ol plan blong hem fastaem long olgeta.” (Amos 3:7) Ol samting we Jeova i soemaot tru long ol profet blong hem, yu save faenem long Tok blong hem Baebol.—2 Timoti 3:16, 17.

Baebol i soemaot se i neva bin gat wan samting we i afektem fulwol bifo olsem samting we bambae i hapen i no longtaem. Jisas i talem se: “Long taem ya, bambae i gat bigfala trabol tumas, we neva man i luk olsem bifo, i stat long taem we God i mekem wol ya, i kam kasem tede. Mo bambae i no moa gat bigfala trabol olsem bakegen samtaem.” (Matiu 24:21) I no gat wan man we i save stopem samting ya. Mo ol trufala man blong God oli no wantem stopem trabol ya tu. ?From wanem? From we trabol ya bambae i finisim olgeta rabis fasin long wol ya, mo biaen bambae i gat “niufala heven wetem niufala wol,” hemia i minim wan niufala gavman long heven mo wan niufala kampani blong ol man long wol. Long niufala wol ya, God “bambae i ravemaot wota blong ae blong olgeta. Nao bambae i no moa gat man i ded, mo bambae man i no moa krae from man we i ded. Bambae i no moa gat man i krae, mo bambae man i no moa harem nogud long bodi blong hem.”—Revelesen 21:1-4.

Taswe, i waes blong tekem taem naoia blong faenemaot wanem we Baebol i talem long saed blong samting ya we bambae i hapen. ?Olsem wanem? ?Yu yu nidim wan man blong givhan long yu blong faenemaot moa long saed ya? Askem long ol Witnes blong Jeova blong givhan long yu. No yu save raet i go long olgeta we oli wokem magasin ya. Meksua se yu yu no laef blong naoia nomo, be tingbaot nambawan fiuja tu we bambae i kamtru.

[Tok blong pija long pej 7]

“I nogud yufala i tingting tumas . . . Ol bisnes blong tumora i blong tumora”