Fraetgud Long Jeova Mo Folem Ol Loa Blong Hem

“Yu mas fraet gud long trufala God mo yu mas folem ol loa blong hem. From we hemia nao olgeta wok we man i mas mekem.”—PRIJA 12:13, NW.

1, 2. (a) ?Olsem wanem fasin fraet i save sevem laef blong yumi? (b) ?From wanem ol papa mama we oli waes, oli tijim ol pikinini blong olgeta blong fraet long sam samting?

LEONARDO DA VINCI i talem se: “Fasin blong no fraet i save putum laef long denja. Fasin fraet i save sevem laef.” Wan man we i no fraet nating, i save mekem wan krangke samting. Hem i olsem wan blaen man, we i no save luk denja. Be, fraet i pulum ol man blong oli lukaot gud. Eksampol, sipos yumi stap antap long wan hae ples nao yumi lukluk i godaon, bighaf blong yumi bambae i fraet blong foldaon. Wantaem nomo bambae yumi muf i gobak. Long sem fasin, gudfala fasin blong fraet long God i no jes pulum yumi blong frengud wetem hem, olsem we yumi lanem long faswan stadi, be i save blokem yumi tu, blong yumi no kasem kil.

² I gat plante samting we oli denja tede. Be, yumi mas lanem blong fraet long ol samting ya. Ol yangfala pikinini oli no luksave denja blong lektrik mo ol trak long rod. Taswe i isi nomo blong oli kasem bigfala kil.a Ol papa mama we oli waes oli tijim pikinini blong olgeta blong fraet long ol samting ya. Bakegen mo bakegen, oli givim woning long ol denja raonabaot long olgeta. Ol papa mama oli luksave se fraet ya i save sevem laef blong pikinini blong olgeta.

 3. ?Olsem wanem Jeova i givim woning long yumi long ol denja long saed blong spirit? ?From wanem hem i mekem olsem?

³ Jeova tu i intres long yumi mo i wantem se yumi stap gud. Olsem wan papa we i lavem yumi tumas, hem i tijim yumi tru long Tok blong hem mo ogenaesesen blong hem, blong yumi save mekem i gud long yumi bakegen. (Aesea 48:17) Wan haf blong tijing ya, i blong givim woning “bakegen mo bakegen,” long ol trap we oli save spolem yumi long saed blong spirit. Olsem nao, yumi save lanem blong fraet long ol denja ya. (2 Kronikel 36:15, NW ; 2 Pita 3:1) Long olgeta yia we oli pas, ‘sipos ol man oli holem tingting ya oltaem nomo, . . . blong ona [“fraet,” NW ] long God oltaem, mo blong obei long olgeta tok blong hem,’ bambae oli blokem plante trabol we i mekem olgeta oli harem nogud. (Dutronome 5:29) ?Long taem blong yumi naoia, we laef long wol ya i “kam strong tumas,” olsem wanem yumi save holem wan tingting blong fraet gud long God mo blong no mekem wan samting we i save spolem yumi long saed blong spirit?—2 Timoti 3:1.

Ronwe Long Ol Fasin Nogud

 4. (a) ?Wanem ol samting we ol Kristin oli mas lanem blong no laekem nating? (b) ?Wanem tingting blong Jeova long saed blong ol fasin nogud? (Lukluk futnot.)

⁴ Baebol i eksplenem se: “Man we i stap ona [“fraet,” NW ] long Hae God, hem i no laekem ol fasin nogud, i agens long olgeta.” (Ol Proveb 8:13) Wan diksonari blong Baebol i tokbaot fasin ya blong no laekem nating, se hem i olsem “wan strong filing we man i save gat agensem ol man no samting we hem i no laekem nating, mekem se hem i no wantem joen nating wetem olgeta.” Taswe, fasin blong fraet long God i minim tu, wan filing blong no laekem nating ol samting we oli nogud long ae blong Jeova.b (Ol Sam 97:10) Fasin ya blong fraet long God bambae i pulum yumi blong ronwe long ol fasin nogud, olsem we fraet long denja bambae i pulum yumi blong muf i gobak taem yumi stap antap long wan klif. Baebol i talem se: “Man we i fraet long Jeova, hem i ronwe long ol fasin nogud.”—Ol Proveb 16:6, NW.

 5. (a) ?Olsem wanem yumi save mekem tingting blong yumi i strong moa blong no laekem nating ol fasin nogud mo blong wokem gudfala fasin blong fraet long God? (b) ?Histri blong nesen blong Isrel i tijim yumi long wanem samting?

⁵ I gud blong tingbaot nogud frut we bambae i kamaot from fasin blong mekem sin. Samting ya bambae i mekem tingting blong yumi i strong moa blong no laekem nating ol fasin nogud mo blong wokem gudfala fasin blong fraet long God. Baebol i talem se wanem sid we man i planem fastaem long garen blong hem, be frut blong hem nomo bambae man ya i kakae—nating se hem i planem rabis fasin no i planem fasin we tabu spirit i wantem. (Galesia 6:7, 8) Long klia fasin, Jeova i tokbaot nogud frut we bambae ol man oli mas kasem sipos oli no folem ol loa blong hem mo oli lego trufala wosip. From we namba blong ol man Isrel i smol, i isi nomo blong ol strongfala nesen raonabaot long olgeta i spolem olgeta. Taswe oli nidim Jeova blong lukaot long olgeta. (Dutronome 28:15, 45-48) Baebol i tokbaot ol trabol we ol man Isrel oli kasem from we oli no obei long God, hemia “blong wekemap yumi ya we yumi stap laef tede, we Lasdei blong wol i klosap.”—1 Korin 10:11.

 6. ?Wanem sam eksampol long Baebol we oli save tijim yumi blong fraet long God? (Lukluk futnot.)

⁶ Baebol i tokbaot ol samting we i hapen long ol man Isrel, olsem wan nesen. Antap long hemia, i gat plante stori long Baebol long saed blong ol man we oli foldaon long fasin jalus, fasin slip olbaot, griri fasin, mo fasin flas.c Sam long ol man ya oli mekem wok blong Jeova plante yia finis. Be, long wan taem we fasin blong olgeta blong fraet long God i no strong, oli foldaon, mo oli kasem nogud frut from. Taem yumi tingting dip long ol stori ya, yumi save mekem tingting blong yumi i strong moa blong yumi no mekem ol semfala mastik. !Sore tumas sipos yumi kasem wan bigfala trabol long laef blong yumi, from we yumi no lesingud long ol advaes we God i givim! Plante man oli talem se yumi save lan moa from ol samting we i hapen long laef blong yumi—i tru moa taem yumi mekem ol samting we yumi nomo i wantem mekem. Be, tingting ya i rong olgeta.—Ol Sam 19:7.

 7. ?Jeova i invaetem hu i kam long haos tapolen blong hem?

⁷ I gat wan narafala risen from wanem i impoten tumas blong wokem fasin blong fraet gud long God, hemia from we yumi wantem gohed blong frengud wetem Hem. Taem yumi tinghae long fasin fren blong yumi wetem Jeova, yumi fraet blong mekem hem i harem nogud. ?God i tingbaot hu olsem fren blong hem? ?Hem i invaetem hu i kam long haos tapolen blong hem? Olgeta nomo ‘we oli stap obei long Hem long evri samting, mo oltaem oli stap mekem ol samting we i stret.’ (Ol Sam 15:1, 2) Sipos yumi tinghae long nambawan fasin fren we yumi gat wetem Man we i Wokem yumi, bambae yumi lukaotgud blong obei long hem long evri samting.

 8. ?Olsem wanem sam man Isrel long taem blong Malakae oli soemaot se oli ting nating long fasin fren blong olgeta wetem God?

⁸ Sore tumas, sam man Isrel long taem blong Malakae oli ting nating long fasin fren blong olgeta wetem God. Oli no fraet mo oli no ona long Hem. Taswe, taem oli mekem sakrefaes long olta blong Jeova oli givim ol anamol we oli sik mo we wansaed leg blong olgeta i nogud. Mo tu, oli no tinghae long fasin blong mared. Oli mekem divos long waef blong olgeta from ol smosmol samting, jes blong mared bakegen wetem ol yangfala gel. Fasin ya i soemaot se oli no fraet long God. Malakae i talem long olgeta se Jeova i no laekem nating “fasin ya we man i mekem divos long woman blong hem.” Oli brekem promes we oli mekem wetem woman blong olgeta. Taswe, God i stap longwe long olgeta. Hem i no save glad long ol sakrefaes blong olgeta. Wota blong ae blong ol waef ya we oli harem nogud from we ol hasban oli lego olgeta, i kavremapgud olta blong hem. Ol fasin ya oli soemaot se ol man ya oli no gat respek nating long ol rul we Jeova i putumap. Taswe Jeova i singaot se: “?From wanem yufala i no save ona [“fraet,” NW ] long mi?”—Malakae 1:6-8; 2:13-16.

9, 10. ?Olsem wanem yumi soemaot we yumi tinghae long fasin fren blong yumi wetem Jeova?

⁹ Tede tu, plante mared oli brok from we ol hasban mo papa, no maet ol waef mo mama, oli mekem nogud fasin long saed blong seks mo oli tingbaot olgeta nomo. Be, Jeova i stap lukluk olsem wanem ol hasban, waef mo pikinini we oli no gat fol oli stap harem nogud tumas. I sua se Jeova tu i harem nogud from. Wan fren blong God bambae i traem kasem tingting blong God long saed blong mared mo bambae i wokhad blong mekem mared blong hem i stanap strong. Bambae hem i sakemaot tingting blong ol man blong wol, we oli ting nating long fasin blong stap tru insaed long mared, mo bambae hem i no “mekem fasin nogud wetem woman.”—1 Korin 6:18.

¹⁰ Yumi wantem se Jeova i glad long yumi mo i halpem yumi long mared mo tu long ol narafala samting we yumi mekem long laef blong yumi. Taswe yumi mas no laekem nating olgeta samting we oli nogud long ae blong Jeova, mo yumi mas gat bigfala tangkiu from fasin fren we yumi gat wetem Hem. Aposol Pita i talem stret se: “Naoia mi mi luk we God i stap mekem i sem mak nomo long olgeta man. Hemia wan trutok ya. Sipos wan man i ona [“fraet,” NW ] long God, mo i mekem ol samting we i stret long fes blong hem, bambae God i glad long hem, i nating we hem i wan laen blong Isrel, no i kamaot long wan narafala laen olgeta.” (Ol Wok 10:34, 35) Baebol i tokbaot plante man we fasin blong fraetgud long God i pusum olgeta blong mekem i stret, taem oli kasem traem.

Trifala We Oli Fraet Gud Long God

11. ?From wanem enjel i talem se Ebraham i “fraet gud long God”?

¹¹ Long Baebol, i gat wan man nomo we Jeova hem wan i tokbaot olsem fren blong Hem, hemia man ya Ebraham. (Aesea 41:8) Ebraham i fraet gud long God. Be hem i kasem wan bigfala traem taem Jeova i askem long hem blong kilim Aesak, wan pikinini nomo we hem i gat, olsem wan sakrefaes. Tru long pikinini ya, God i mekem promes blong hem i kamtru se laen blong Ebraham bambae i kam wan strongfala nesen. (Jenesis 12:2, 3; 17:19) ?Bambae “fren blong God” i winim strongfala traem ya? (Jemes 2:23) Stret long taem we Ebraham i tekem naef blong stikim Aesak i ded, enjel blong Jeova i talem se: “!Yu no spolem boe ya! !Yu no mekem wan samting long hem! Naoia mi mi save we yu yu stap ona tru [“fraet gud,” NW ] long God. Yu yu gat wan pikinini ya nomo, mo nating we hem wan nomo we yu yu gat, be yu rere nomo blong letem hem i ded.”—Jenesis 22:10-12.

12. ?Wanem i pusum Ebraham blong fraet gud long God, mo olsem wanem yumi save soemaot fasin ya?

¹² Bifo long taem ya, Ebraham i pruvum finis we hem i fraet gud long Jeova. Be hem i soemaot gudfala fraet ya long wan nambawan fasin, taem hem i rere blong kilim Aesak i ded. Ebraham i gat respek mo i obei long God. Be, samting we i rili pusum Ebraham blong obei long God, hem i fasin blong hem blong trastem Jeova fulwan. Hem i sua se, Papa blong hem long heven i save mekem Aesak i laef bakegen long ded, blong mekem promes blong Hem i kamtru. Pol i raetem se, Ebraham i “savegud, we bambae God i save mekem olgeta samting we hem i promes blong mekem.” (Rom 4:16-21) ?Yumi rere blong lego sam samting we yumi laekem tumas, blong mekem wanem we God i wantem? Yumi save se Jeova i “stap mekem i gud long olgeta we oli stap traem faenem hem.” (Hibrus 11:6) ?From samting ya, yu yu bilif fulwan se fasin ya blong obei bambae i karem frut we i stap olwe? Hemia nao trufala fasin blong fraet long God.—Ol Sam 115:11.

13. ?From wanem i stret we Josef i tokbaot hem wan olsem wan man we i “fraet gud long God”?

¹³ I gud yumi lukluk long wan narafala eksampol blong fasin ya blong fraet gud long God—hemia Josef. Josef i wok olsem slef long haos blong Potifa. Waef blong Potifa i traem pulum Josef evri dei, blong slip wetem hem. Be wok blong Josef i mekem se hem i mas luk waef blong masta blong hem oltaem. Oltaem woman ya i mekem fasin we i no stret blong traem pulum Josef blong slip wetem hem. Ale wan dei, hem i “holem hem long kot blong hem,” be Josef i “ronwe . . . i resis, i go afsaed long haos.” ?Wanem i pulum Josef blong ronwe wantaem nomo long fasin nogud ya? I sua se, stamba risen hemia fasin blong Josef blong fraet gud long God. Hem i no wantem nating blong “mekem sin long fes blong God.” (Jenesis 39:7-12) I stret nomo we Josef i tokbaot hem wan olsem wan man we i “ona [“fraet,” NW ] long God.”—Jenesis 42:18.

14. ?Olsem wanem fasin sore blong Josef i soemaot se hem i fraet gud long God?

¹⁴ Plante yia biaen, Josef i luk ol brata blong hem bakegen. Olgeta ya oli bin salem hem blong i kam wan slef. Oli no bin gat sore long Josef nating. Nao oli kam luk hem from we oli sot long kakae. I isi nomo blong Josef i tekem janis ya blong givimbak long olgeta from rong we oli bin mekem long hem. Be, man we i mekem i strong tumas long narafala, hem i no fraet gud long God. (Levitikas 25:43) Taswe, taem Josef i luk we ol brata blong hem oli jenisim fasin blong olgeta, hem i sore mo i fogivim olgeta. Olsem Josef, fasin blong yumi blong fraet gud long God bambae i halpem yumi blong no letem rabis fasin i winim yumi, mo i blokem yumi blong yumi no foldaon long ol traem.—Jenesis 45:1-11; Ol Sam 130:3, 4; Rom 12:17-21.

15. ?From wanem Jeova i glad long fasin blong Job?

¹⁵ Job tu, i wan nambawan eksampol long fasin fraet gud long God. Jeova i talem long Devel Setan se: “?Yu yu luk fasin blong man blong wok blong mi, Job? I no gat wan narafala man long wol ya we i olsem hem. Hem i no gat rong long hem mo hem i stret nomo. Hem i fraetgud long God mo hem i tanem baksaed long ol rabis fasin.” (Job 1:8, NW ) Blong plante yia, gudfala fasin blong Job i mekem hat blong Papa blong hem long heven i glad. Job i fraet gud long God from we hem i save se i stret blong mekem olsem, mo se hemia beswan fasin blong laef blong folem. Job i talem se: ‘Sipos yufala i wantem kasem waes, bambae yufala i mas ona [“fraet,” NW ] long [God], mo sipos yufala i wantem kasem gudfala tingting, yufala i mas tanem baksaed long ol fasin nogud.’ (Job 28:28) From we Job i mared finis, hem i no stap lukluk ol yangfala woman wetem wan tingting we i no stret. Hem i no stap tingting blong mekem nogud wetem olgeta long saed blong seks. Nating se hem i rij, hem i no putum tingting blong hem long ol rij samting, mo hem i no joen long eni kaen fasin blong wosip long ol aedol.—Job 31:1, 9-11, 24-28.

16. (a) ?Olsem wanem Job i soemaot lav mo kaen fasin? (b) ?Olsem wanem Job i soemaot we hem i gat fasin fogif?

¹⁶ Be, fasin blong fraet long God, i no jes minim we yumi ronwe long ol nogud fasin nomo. Hem i minim tu se yumi mas mekem ol fasin we i gud. Taswe, Job i intres mo i keagud long ol man we oli blaen, we oli no save wokbaot, mo we oli pua. (Levitikas 19:14; Job 29:15, 16) Job i kasem save se “wan man we i no soemaot lav mo kaen fasin long narafala, bambae i lego fasin blong fraet gud long Hae God tu.” (Job 6:14, NW ) Yumi no soemaot lav mo kaen fasin, sipos yumi no fogivim narafala no yumi gohed blong holemtaet kros blong yumi. Job i lesin long God taem God i talem long hem blong prea from trifala fren blong hem, we trifala i bin mekem hem i harem nogud tumas. (Job 42:7-10) I gud sipos yumi tu yumi soem fasin fogif olsem Job, taem wan Kristin brata blong yumi i mekem yumi harem nogud. Sipos yumi prea wetem fulhat blong yumi from brata ya, samting ya i save givhan bigwan long yumi blong winim kros. Ol blesing we Job i kasem from fasin blong hem blong fraet gud long God i soemaot “ol gudgudfala samting” we God bambae i givim ‘long ol man we oli ona [“fraet,” NW ] long hem.’—Ol Sam 31:19; Jemes 5:11.

Fraet Long God Mo Fraet Long Man

17. ?Fraet long man i save mekem wanem long yumi, mo from wanem yumi save talem se olgeta we oli fraet long man oli tingbaot naoia nomo?

¹⁷ Fraet long God i save pulum yumi blong mekem fasin we i stret. Be fraet long man i save spolem bilif blong yumi. Taswe, taem Jisas i leftemap tingting blong ol man blong hem blong wok strong blong talemaot gud nius, hem i talem long olgeta se: “Bambae yufala i no fraet long olgeta ya we oli save kilim yufala i ded, be oli no save kilim spirit [“sol,” NW ] blong yufala. Yufala i mas fraet long God, we hem nomo i gat raet blong mekem bodi mo spirit blong yufala, tufala i lus wantaem long [“Gehena,” NW ].” (Matiu 10:28) Olgeta we oli fraet long man oli tingbaot naoia nomo. Olsem Jisas i eksplenem, ol man oli no save spolem gudfala laef we yumi gat janis blong kasem long fiuja. Mo tu, yumi fraet long God from we yumi luksave bigfala paoa blong hem. Paoa blong olgeta kantri tugeta i olsem nating nomo taem yumi skelem wetem bigfala paoa blong God. (Aesea 40:15) Olsem Ebraham yumi trastem fulwan, paoa blong Jeova blong mekem ol man blong Hem oli laef bakegen. (Revelesen 2:10) Taswe yumi talem wetem strong tingting se: “God i stap wetem yumi, mo i no gat man nating we i strong moa, we bambae i save agens long yumi.”—Rom 8:31.

18. ?Jeova i givim wanem pei long olgeta we oli fraet gud long hem?

¹⁸ Nating se man we i agensem yumi i wan famle blong yumi no wan pikinini long skul, be “man we i stap ona long Hae God, hem i no save fraet. Hem i savegud se hem wetem ol famle blong hem bambae oli stap gud from we Hae God i stap lukaot gud long olgeta.” (Ol Proveb 14:26) Yumi save prea long God blong givim paoa long yumi, mo yumi save sua se hem bambae i harem yumi. (Ol Sam 145:19) Jeova i no save fogetem olgeta we oli fraet gud long hem. Hem i leftemap tingting blong yumi tru long profet Malakae se: “Long taem ya, olgeta we oli fraet gud long Jeova oli stap toktok tugeta, wanwan long fren blong hem. Mo Jeova i stap harem toktok ya mo i lesin gud. Nao oli stat raetem tok long buk blong rimemba we i stap long fored blong hem, blong rimemba long olgeta we oli fraet gud long Jeova, mo olgeta we oli tingbaot nem blong hem.”—Malakae 3:16, NW.

19. ?Wanem kaen fraet we bambae i finis, be wanem fraet we bambae i stap blong olwe?

¹⁹ I no longtaem, bambae olgeta man long wol oli wosipim Jeova. Bambae i no moa gat fasin blong fraet long man. (Aesea 11:9) Bambae ol man oli no moa fraet se bambae oli no gat naf kakae, fraet blong kasem wan bigfala sik, fraet long ol man blong brekem loa, mo long ol faet. Be, fasin blong fraet long God bambae i stap blong olwe. Ol trufala man blong God long heven mo long wol bambae oli gohed blong soem respek, fasin obei mo ona long Jeova. (Revelesen 15:4) Go kasem taem ya, i gud yumi harem advaes we God i pulum Solomon blong raetem se: “I nogud yu stap harem nogud from we yu no gat ol samting ya we ol man nogud oli gat. Yu mas mekem we oltaem long laef blong yu, yu tinghevi long Hae God nomo mo yu mas ona [“fraet,” NW ] gud long hem. Sipos yu stap mekem olsem, bambae laef blong yu i kam nambawan.”—Ol Proveb 23:17, 18.

[Ol futnot]

?Yu Yu Rimemba?

• ?Olsem wanem yumi save lanem blong no laekem nating ol fasin nogud?

• ?Olsem wanem sam man Isrel long taem blong Malakae, oli soemaot se oli ting nating long fasin blong fren wetem Jeova?

• ?Ebraham, Josef, mo Job, trifala i tijim yumi long wanem samting long saed blong fraet gud long God?

• ?Weswan fraet we neva bambae i lus samtaem, mo from wanem?

[Tok blong pija long pej 19]

Ol papa mama we oli waes oli tijim ol pikinini blong gat wan gudfala fasin fraet

[Tok blong pija long pej 20]

Fraet i mekem yumi stap longwe long denja, mo fraet long God i mekem yumi stap longwe long ol fasin nogud

[Tok blong pija long pej 23]

Job i gohed blong fraet gud long God nating se trifala giaman fren oli tok agensem hem

[Credit Line]

From the Bible translation Vulgata Latina, 1795