Japta 50

Rere Blong Kasem Trabol

JISAS i singaot ol aposol blong hem oli kam wanples, nao hem i talem long olgeta olsem wanem oli mas mekem wok blong prij. Mo hem i talem se i gat samfala we bambae oli mekem trabol long olgeta. Hem i talem se: “Yufala i luk. Mi mi sanem yufala i go, olsem we mi sanem ol sipsip oli go long ol wael dog. . . . Yufala i mas lukaot gud. Bambae ol man oli save mekem yufala i pas long ol kaonsel blong olgeta, blong ol kaonsel ya oli jajem yufala. Bambae oli save wipim yufala insaed long haos blong prea blong olgeta. From we yufala i man blong mi, bambae oli save pulum yufala i go stanap long fes blong ol haeman blong gavman mo long fes blong ol king. Be hemia i blong yufala i wetnes blong mi long fes blong olgeta ya.”

Nating we ol disaepol blong hem oli mas kasem bigfala trabol, be Jisas i mekem wan promes we i leftemap tingting blong olgeta, i se: “Be taem olgeta oli kam tekem yufala, bambae yufala i no tingting tumas se: ‘?Bambae mi mi tok olsem wanem? ?Bambae mi mi talem wanem tok long olgeta?’ Bambae yufala i save talemaot tok we Tabu Speret bambae i givim long yufala, stret long taem blong tok. From we bambae i no yufala nomo i tok. Speret blong Papa blong yufala bambae i tok long maot blong yufala.”

Jisas i gohed long tok blong hem, i se: “Mo bambae man i save letem stret brata blong hem i go long han blong olgeta ya, blong oli kilim hem i ded. Bambae man i save letem stret pikinini blong hem i ded olsem. Mo ol pikinini tu bambae oli save girap, oli save agens long papa mo mama blong olgeta, oli save letem tufala i go ded olsem.” Hem i gohed moa, i se: “Bambae olgeta man oli no laekem yufala, oli agens long yufala. From we nem blong mi i stap long yufala. Be man we i stanap strong gogo i finis, bambae God i sevem hem.”

Wok blong prij i impoten moa bitim ol narafala wok. Taswe Jisas i makem long tingting blong olgeta se oli mas waes, blong oli save stap fri blong gohed long wok ya. Hem i talem se: “Taem olgeta oli ronem yufala tumas long wan velej, yufala i mas ronwe i go long nekiswan. Mo sipos oli ronem yufala long ples ya, yufala i mas ronwe bakegen. Tru mi talem long yufala, bambae yufala i no save finisim ol velej long Isrel yet, gogo mi, mi Pikinini blong man, bambae mi kamtru.”

Tru, Jisas i tok long ol 12 aposol blong hem nomo long taem ya. Be ol rul, mo ol woning, mo ol tok we hem i talem long olgeta blong leftemap tingting blong olgeta, i no blong olgeta nomo. Tok ya i go long olgeta we bambae oli gohed long wok blong talemaot gud nyus long olgeta ples long wol biaen long ded blong Jisas, mo biaen we hem i laef bakegen tu. Hem i soemaot samting ya taem hem i talem long ol disaepol se: ‘Bambae olgeta man oli no laekem yufala.’ Hem i minim se i no ol man Isrel blong bifo nomo we bambae oli agensem ol disaepol blong Jisas. Mo tu, smol taem ya we Jisas i sanemaot ol aposol long wok blong prij, ol man oli no pulum olgeta oli go stanap long fes blong ol haeman blong gavman mo long fes blong ol king. Mo long taem ya, ol famle blong olgeta oli no letem olgeta oli go long han blong ol man, blong oli kilim olgeta oli ded.

Taswe taem Jisas i talem long ol disaepol blong hem se oli no save finisim ol velej long Isrel gogo ‘Pikinini blong man i kamtru,’ hem i givim wan profet tok ya. Hem i minim se ol disaepol blong hem oli no save finisim olgeta ples blong wol wetem wok blong talemaot gud nyus blong Kingdom blong God. Fastaem Jisas bambae i kamtru wetem olgeta paoa blong hem long Amageden blong spolem ol rabis man.

Jisas i gohed blong storebaot wok blong prij, i se: “Man we i stap lan, hem i no hae moa long tija blong hem, mo man blong wok i no hae moa long masta blong hem.” Taswe ol man blong Jisas oli mas save se bambae oli mas kasem sem trabol we Jisas i bin kasem, taem hem i stap talemaot Kingdom blong God. Be hem i givim wan advaes long olgeta, i se: “Bambae yufala i no fraet long olgeta ya we oli save kilim yufala i ded, be oli no save kilim speret [sol] blong yufala. Yufala i save fraet long God nomo, we hem nomo i gat raet blong mekem bodi mo speret [sol] blong yufala, tufala i lus wantaem long [Gehena.]”

Jisas i soemaot rod long olgeta. Hem i stanap strong go kasem ded. Hem i no save fraet, mo tanem baksaed blong hem long Jeova God, we i gat olgeta paoa. Yes, Jeova nomo i save spolem “sol” blong man. [Long ples ya, sol i minim gudfala laef ya we ol man oli save kasem long fyuja.] Mo Jeova nomo i save mekem man i laef bakegen. !Tru tumas, Papa blong yumi long heven, Jeova, hem i laekem tumas ol man! !Hem i sore long ol man!

Nao Jisas i talem wan pija tok long ol man blong soemaot long olgeta se Jeova i laekem olgeta, i se: “Ol smosmol pijin ya we ol man oli stap salem tate sen nomo blong tu, be i no gat wan long olgeta we i save foldaon long graon sipos Papa blong yufala i no letem. Yufala i luk. Ol hea blong hed blong yufala, be hem i kaontem evriwan finis. From samting ya, yufala i no fraet. Long fes blong hem, yufala i gud tumas, i winim plante smolfala pijin ya.”

Gud nyus blong Kingdom we Jisas i givim long ol disaepol blong talemaot long ol man, i save mekem sam famle oli seraot. Samfala long famle bambae oli laekem nyus ya, be samfala bambae oli no wantem. Taswe Jisas i talem long olgeta se: “I no gud yufala i ting se mi mi kam blong mekem olgeta man long wol oli stap kwaet. Mi mi no kam blong putum pis nomo, mi kam blong mekem ol man oli seraot tu, oli faet.” Taswe, man we i laekem trutok blong Baebol i no mas fraet blong mekem hem i wok long laef blong hem. “Man we i laekem papa no mama blong hem moa, i winim we hem i laekem mi, hem i no stret blong i kam man blong mi. Mo man we i laekem boe no gel blong hem moa, i winim we hem i laekem mi, hem i no stret blong i kam man blong mi.”

Blong finisim ol tok blong hem, Jisas i eksplenem long olgeta se man we i tekem olgeta oli go insaed long haos blong hem, i olsem we hem i tekem Jisas i go insaed. Hem i se: “Mo man we i givim kap kolwora nomo long wan man blong mi we i daon moa long ol narafala man blong mi, be from we i man blong mi, tru mi talem long yufala, hem bambae i mas gat pei blong hem from.” Matyu 10:16-42.

▪ ?Jisas i givim wanem woning long ol disaepol blong hem?

▪ ?Olsem wanem Jisas i leftemap tingting blong olgeta disaepol blong hem, blong oli harem gud long wok blong olgeta?

▪ ?From wanem yumi save se ol tok blong Jisas i stret long ol Kristin tede tu?

▪ ?Wanem mining blong tok ya blong Jisas, se: “Man we i stap lan, hem i no hae moa long tija blong hem.”?