!Yu No Save Weswan Sid Bambae i Grugud!

“Yu mas planem ol kakae long garen blong yu long moning, mo long sapa tu, from we yu no save weswan bambae oli gru gud.”—PRI. 11:6.

 1. ?Taem yumi luk olsem wanem ol sid oli gru, from wanem yumi sapraes mo yumi harem se yumi smol nomo?

WAN man blong wokem garen i mas gat longfala tingting. (Jem. 5:7) Afta we hem i planem sid, hem i mas wet gogo sid ya i gru mo i kam bigwan. Sipos hem i planem sid long gudfala graon mo i gat smol ren, sloslo ol smosmol gru bambae oli kamaot. Biaen oli kam antap gogo oli kam strong mo oli karem kakae. Taem kakae ya i rere, man blong wokem garen i save go karem. !Yes, taem yumi luk olsem wanem kakae i save gru, yumi sapraes! !Hem i olsem wan merikel! Yumi harem se yumi smol nomo taem yumi tingbaot Hu nao i mekem sid ya i gru. Yumi save lukaotgud long sid ya. Yumi save putum wota long hem mo tekemaot ol rabis gras raon long hem. Be God nomo i save mekem i gru.—Skelem wetem 1 Korin 3:6.

 2. ?Tufala parabol blong Jisas we yumi tokbaot finis long laswan stadi, tufala i tijim yumi long wanem samting long saed blong wan man we i kam disaepol?

² Olsem yumi tokbaot long laswan stadi, Jisas i talem se wok ya blong talemaot Kingdom i olsem we wan man i sakem sid long garen blong hem. Long parabol blong Jisas long saed blong ol defren kaen graon, hem i makem se, nating we man i sakem gudfala sid, be i dipen long hat blong wanwan man sipos sid ya i gru gogo i karem frut, no nogat. (Mak 4:3-9) Long parabol blong man we i planem sid nao biaen hem i slip, Jisas i makem se man ya we i planem sid i no kasem save fulwan long fasin blong sid ya blong gru. Hemia from we paoa blong God nao i mekem sid ya i gru, i no ol traehad blong man ya. (Mak 4:26-29) Naoia, bambae yumi tokbaot tri moa parabol blong Jisas—parabol blong sid blong mastad, parabol blong is, mo parabol blong net blong pulum fis.a

Parabol Blong Sid Blong Mastad

3, 4. ?Parabol blong sid blong mastad i soemaot wanem samting long saed blong tok blong Kingdom?

³ Parabol blong sid blong mastad we hem tu i stap long Mak japta 4, i soemaot tufala samting ya: faswan, se namba blong ol man we oli lesin long tok blong Kingdom i kam antap bigwan; namba tu samting, se taem man i bilif long tok blong Kingdom samting ya i protektem hem. Jisas i talem se: “?Kingdom blong God i olsem wanem samting? ?Bambae yumi makem long wanem samting blong soemaot? Hem i olsem sid blong mastad. Taem man i planem sid ya, hem i smol moa long olgeta narafala sid long wol. Be afta we man i planem mo hem i gru, hem i kam bigwan i winim olgeta narafala kakae long garen. Hem i gat ol bigbigfala han blong hem, nao ol pijin we oli flae olbaot long skae oli save kam sidaon long sed blong hem.”—Mak 4:30-32, NW.

⁴ Ol tok ya i soemaot fasin blong “kingdom blong God” blong gru. Samting ya i kamaot taem tok blong Kingdom i goaot long plante ples, mo taem Kristin kongregesen i kam bigwan, stat long Pentekos long yia 33 K.T. i go. Sid blong mastad i smol we i smol, mo i save minim samting we i smol nomo. (Skelem wetem Luk 17:6.) Be sloslo, sid ya i gru mo i kam antap gogo i hae olsem 3 no 5 mita, mo hem i gat ol bigbigfala han blong hem olsem wan tri.—Mat. 13:31, 32, NW.

 5. ?Olsem wanem Kristin kongregesen i gru long faswan handred yia?

⁵ Kristin kongregesen i stat long smol fasin nomo, taem tabu spirit i makemaot 120 disaepol blong Jisas long yia 33 K.T. I no longtaem biaen, smol kongregesen blong ol disaepol ya i gru gogo i kam plante taosen man blong bilif. (Ridim Ol Wok 2:41; 4:4; 5:28; 6:7; 12:24; 19:20.) Long 30 yia, namba blong ol man blong karem kakae long garen i kam antap bigwan, taswe aposol Pol i talem long kongregesen blong Kolosi se gud nius i goaot finis “long olgeta man long wol.” (Kol. 1:23) !Hem i gru bitim mak!

6, 7. (a) ?Stat long 1914, olsem wanem wok blong Kingdom i gru? (b) ?Olsem wanem bambae sid ya i gru moa yet?

⁶ Stat long taem we Kingdom blong God i stanap long heven long 1914, ol han blong mastad “tri” ya oli kam bigwan bitim samting we ol man oli bin tingbaot. Ol man blong God oli luk olsem wanem profet tok ya blong Aesea i kamtru, se: “Smolwan bambae i kam taosen man, mo hemia we i olsem nating nomo bambae i kam wan strongfala neson.” (Aes. 60:22, NW) Smol grup blong ol man we tabu spirit i makemaot olgeta mo we oli mekem wok blong Kingdom jes afta long yia 1900, oli no tingbaot nating se long yia 2008, samwe long seven milian Witnes bambae oli mekem wok ya long bitim 230 kantri. !Tru ya, yumi sapraes blong luk olsem wanem wok ya i gru! !Hem i sem mak long sid blong mastad long parabol blong Jisas!

⁷ ?Olsem wanem? ?Bambae sid ya i no moa gru? Si. Long fiuja, wol bambae i kam fulap long ol man we oli obei long rul blong Kingdom blong God nomo. Olgeta we oli agensem Kingdom ya, bambae oli lus. I no ol man we bambae oli mekem samting ya, nogat. Hae King mo Masta Jeova, hem nomo bambae i mekem, taem hem i tekem aksen blong stretem ol trabol long wol ya. (Ridim Daniel 2:34, 34.) Long taem ya, bambae yumi luk wan narafala profet tok blong Aesea i kamtru fulwan, se: “[Wol] ya bambae i fulap gud long ol man we oli savegud Hae God, olsem we solwota i fulap gud long ples blong hem.”—Aes. 11:9.

 8. (a) ?Ol pijin long parabol blong Jisas oli minim hu? (b) ?Kristin kongregesen i stap protektem yumi long wanem samting?

⁸ Jisas i talem se ol pijin we oli flae olbaot long skae oli save kam sidaon long sed blong tri ya we i olsem Kingdom. Ol pijin ya oli no sem mak long ol pijin long parabol blong man we i sakem sid long ol defren kaen graon. Long narafala parabol ya, ol pijin oli minim ol enemi blong Kingdom we oli traem blong kakae ol gudfala sid. (Mak 4:4) Be long parabol ya, ol pijin oli minim ol man we hat blong olgeta i stret, nao oli wantem joen long Kristin kongregesen we i save protektem olgeta. Kongregesen i protektem olgeta long ol nogud fasin blong rabis wol ya we i save mekem olgeta oli kam doti long fes blong God. (Skelem wetem Aesea 32:1, 2.) Jeova tu i talem se Kingdom blong Mesaea i olsem wan tri, i talem wan profet tok long saed ya se: “Mi bambae mi holem top blong wan sida we i longfala, mi brekemaot top blong hem we i sofsof, nao bambae mi tekem i go long Isrel, mi go planem antap long wan hil we i hae we i hae. Bambae hem i gat ol han blong hem, mo i karem frut, mo bambae i kam wan nambawan sida. Mo bambae ol naranarafala pijin oli kam stap long ples ya, oli haed long hem.”—Esik. 17:23.

Parabol Blong Is

9, 10. (a) ?Wanem poen we Jisas i makem long parabol blong is? (b) ?Plante taem Baebol i yusum is blong minim wanem? ?Bambae yumi faenem ansa long wanem kwestin long saed blong is ya we Jisas i tokbaot?

⁹ Plante taem man i no save luk se wan samting i stap gru. Long nekis parabol blong Jisas, hem i makem poen ya, i se: “[“Kingdom blong God,” NW] i olsem is we woman i putum long wan bigfala dis flaoa. Nao is ya, man i no moa save luk, be i mekem olgeta flaoa ya i solap.” (Mat. 13:33) ?Is ya i minim wanem? ?Mo olsem wanem is ya i joen wetem fasin blong Kingdom blong gru?

¹⁰ Plante taem Baebol i yusum is blong minim sin. Aposol Pol i talem samting ya taem hem i tokbaot wan man long Korin bifo, we i spolem kongregesen wetem bigfala sin we hem i mekem. (1 Kor. 5:6-8) ?Olsem wanem? ?Jisas i stap yusum is bakegen long ples ya blong soemaot se samting we i nogud i stap gru?

11. ?Olsem wanem oli yusum is long Isrel bifo?

¹¹ Bifo we yumi ansarem kwestin ya, yumi mas tingbaot tri samting. Faswan se, nating we Jeova i no letem ol man oli yusum is long taem blong lafet blong Pasova, be long sam narafala taem hem i agri long ol sakrefaes we oli gat is long olgeta. Ol man oli bin yusum is long sam sakrefaes we oli mekem i go long God blong soemaot se oli stap fren gud wetem hem. Hat blong olgeta i pusum olgeta blong givim ol presen ya blong soemaot tangkiu long Jeova from ol blesing we hem i givim long olgeta. Kakae ya i wan taem blong bigfala glad.—Lev. 7:11-15.

12. ?Yumi lanem wanem from fasin blong Baebol blong yusum ol pijatok?

¹² Seken samting blong tingbaot se, nating we wan samting i save gat wan nogud mining long Baebol, be samtaem maet samting ya i gat wan gudfala mining. Tingbaot 1 Pita 5:8 we i talem se Setan i olsem wan laeon. Vas ya i wantem soemaot se Setan i save spolem yumi, hem i nogud. Be Revelesen 5:5 i talem se Jisas tu i olsem wan laeon, i kolem hem se “Laeon blong Juda.” Long vas ya, laeon i olsem wan pijatok blong soemaot se Jisas i no fraet blong jajem man long stret fasin.

13. ?Parabol blong is ya i soemaot wanem long saed blong man we i kam wan disaepol blong Jisas?

¹³ Namba tri samting blong tingbaot, se long parabol blong Jisas, hem i no talem se is i spolem olgeta flaoa ya nao man i no moa save yusum. Hem i stap tokbaot nomo fasin blong wokem bred. Man we i wokem bred i mas ademap is, mo gudfala samting i kamaot from. Is ya i haed insaed long ol flaoa. Taswe, man blong wokem bred i no save luk wok ya we is i stap mekem. Samting ya i pulum yumi blong tingbaot bakegen man ya we i planem sid, nao hem i go slip long naet. Jisas i talem se “sid ya i gru, i stap kam bigwan, be hem i no save se samting ya i hapen olsem wanem.” (Mak 4:27) !Parabol ya i yusum ol isi tok blong soemaot olsem wanem wan man i kam disaepol! Fastaem yumi no save luk olsem wanem trutok i gru long hem, be sloslo ol frut oli kamaot.

14. ?Is ya we i mekem olgeta flaoa i solap i soemaot wanem samting long saed blong wok blong prij?

¹⁴ Ol man oli no save luk olsem wanem wan man i kam wan disaepol, be i no hemia nomo. Antap long samting ya, fasin ya i stap gohed long evri ples long wol. Parabol blong is i makemgud poen ya. Is ya i mekem olgeta flaoa i solap, “wan bigfala dis flaoa.” (Luk 13:21) Wok blong talemaot Kingdom i olsem is ya. Hem i stap pulum plante man oli kam disaepol, mo wok ya i gru gogo i “finisim olgeta ples long wol.” (Wok 1:8; Mat. 24:14) !Hem i wan bigfala ona blong joen long wok blong Kingdom ya we i stap kam bigwan moa oltaem!

Net Blong Pulum Fis

15, 16. (a) Talem ol bigfala poen long parabol blong net blong pulum fis. (b) ?Net ya i minim wanem? ?Parabol ya i soemaot wanem long saed blong fasin blong Kingdom blong gru?

¹⁵ Namba blong ol man we oli talem se oli disaepol blong Jisas Kraes i no bigfala samting we i impoten. Samting we i moa impoten, hemia se ol disaepol ya oli mas ol trufala disaepol. Blong soemaot poen ya we i joen wetem fasin blong Kingdom blong gru, Jisas i talem wan narafala parabol. Hemia parabol blong net blong pulum fis. Hem i se: “Bakegen, [“kingdom blong heven,” NW] i olsem. Taem ol man oli sakem net long solwota, oli save pulum ol naranarafala fis long hem.”—Mat. 13:47.

¹⁶ Net ya we i minim wok blong talemaot Kingdom, i pulum olkaen fis. Jisas i gohed i talem se: “Taem net i fulap gud, ol man oli pulum i kamso. Nao oli sidaon, oli seraot ol fis, oli putum ol gudfala fis i go long basket blong olgeta, be ol rabis fis, oli sakem. Mo long sem fasin bambae long [“ol laswan dei blong rabis wol ya,” NW] ol enjel oli go, oli seraot ol man, ol man nogud oli go wansaed, ol gudfala man oli go wansaed. Nao bambae oli sakem ol man nogud oli go long bigfala faea ya, we long ples ya bambae olgeta oli stap krae, mo oli stap harem nogud tumas, oli stap kakae tut blong olgeta from.”—Mat. 13:48-50.

17. ?Wok blong seraotem ol gudfala fis long ol rabis fis olsem parabol blong net i tokbaot, i kamaot wetaem?

¹⁷ ?Olsem wanem? ?Taem ya we ol man oli seraotem ol gudfala fis long ol rabis fis, hemia i minim laswan jajmen blong ol sipsip mo ol nani we Jisas i talem se bambae i hapen taem hem i kamtru wetem olgeta paoa blong hem? (Mat. 25:31-33) Nogat. Jisas bambae i mekem laswan jajmen ya taem hem i kam blong mekem bigfala trabol i kasem wol ya. Be wok blong seraotem ol gudfala fis long ol rabis fis olsem parabol blong net blong pulum fis i tokbaot, hem i kamaot long “ol laswan dei blong rabis wol ya.”b Yumi stap laef long taem ya finis—ol laswan dei we bambae oli finis wetem bigfala trabol ya. ?Olsem wanem wok blong seraotem ol man i stap gohed naoia?

18, 19. (a) ?Olsem wanem wan wok blong seraotem ol man i stap gohed tede? (b) ?Olgeta we hat blong olgeta i stret oli mas mekem wanem? (Lukluk futnot tu long pej 32.)

¹⁸ Long taem blong yumi, plante milian man we oli olsem ol fis ya oli kamaot long ol man blong wol ya we oli olsem solwota, blong joen long kongregesen blong Jeova. Sam long olgeta oli stap kam long Memoriol, samfala oli stap kam long ol miting blong yumi, mo sam narafala bakegen oli glad blong stadi Baebol wetem yumi. ?Be olgeta evriwan ya oli kam ol trufala Kristin? I tru se “oli pulum [olgeta fis] i kamso,” be Jisas i talem se oli putum “ol gudfala fis” nomo i go long basket blong olgeta. Ol basket ya oli minim ol Kristin kongregesen. Ol rabis fis, oli sakem olgeta, mo long fiuja, bambae oli go long bigfala faea, we i minim se bambae oli lus blong olwe.

¹⁹ Plante man we oli olsem ol rabis fis, oli bin stadi Baebol wetem ol man blong Jeova, be samtaem biaen oli stop. Samfala we papa mama blong olgeta oli ol trufala Kristin, oli no bin wantem blong kam ol man blong Jisas. Maet oli no wantem tekem desisen blong mekem wok blong Jeova, no maet oli mekem wok ya blong smoltaem nao biaen oli stop.c (Esik. 33:32, 33) Be olgeta we hat blong olgeta i stret, oli mas joen wetem kongregesen, we i olsem basket we oli putum ol gudfala fis long hem. Oli mas mekem olsem bifo we laswan jajmen i kamtru, mo oli mas stap oltaem long wan sefples.

20, 21. (a) ?Yumi lanem wanem long stadi blong yumi long ol parabol blong Jisas long saed blong fasin blong ol samting blong gru? (b) ?Yu yu gat strong tingting blong mekem wanem?

²⁰ ?Yumi lanem wanem long stadi blong yumi long ol parabol blong Jisas long saed blong fasin blong ol samting blong gru? Faswan samting se, wok blong Kingdom long wol ya i gru gogo i kam bigwan we i bigwan, olsem sid blong mastad we i gru. !I no gat wan samting we i save blokem wok blong Jeova mo mekem se i no moa gru! (Aes. 54:17) Mo tu, taem ol man oli “kam sidaon long sed blong [tri ya],” samting ya i protektem olgeta long Setan mo rabis wol ya. Seken samting we yumi lanem se, God nao i mekem wok blong Kingdom i gru. Olsem we man i no save luk is ya we i mekem olgeta flaoa i solap, long sem fasin i no bin isi oltaem blong luksave se wok blong Kingdom i stap gru mo olsem wanem i stap gru. !Nating se i olsem, wok ya i stap gru i kam bigwan moa oltaem! Namba tri samting we yumi lanem se, i no olgeta man we oli lesin long tok blong Kingdom, we bambae oli olsem ol gudfala fis. Sam long olgeta oli olsem ol rabis fis we Jisas i tokbaot long parabol blong hem.

²¹ !Be taem yumi luk we Jeova i stap pulum plante moa man we oli olsem ol gudfala fis, samting ya i leftemap tingting blong yumi bigwan! (Jon 6:44) Yumi sek long bigfala namba blong ol man we oli stap kam disaepol long plante kantri. Yumi givim olgeta ona i go long Jeova God from. Taem yumi luk olsem wanem namba i stap kam antap, samting ya i mas pulum yumi wanwan blong folem advaes ya we wan man i raetemdaon plante handred yia finis, se: “Yu mas planem ol kakae long garen blong yu long moning, . . . from we yu no save weswan bambae oli gru gud. Maet olgeta evriwan oli karem gudfala kakae, no narawan nomo i karem, narawan i no gat.”—Pri. 11:6.

[Ol futnot]

?Bambae Yu Yu Ansa Olsem Wanem?

• ?Parabol blong sid blong mastad i tijim yumi long wanem samting long saed blong fasin ya we Kingdom i gru mo i protektem yumi long Setan mo rabis wol ya?

• ?Is long parabol blong Jisas i minim wanem? ?Jisas i makem wanem trutok long saed blong fasin blong Kingdom blong gru?

• ?Parabol blong net blong pulum fis i makem wanem samting long saed blong fasin blong Kingdom blong gru?

• ?Olsem wanem yumi save meksua se yumi stap oltaem wetem ol fis we ‘ol man oli putum olgeta long basket’?

[Tok blong pija long pej 29]

?Parabol blong sid blong mastad i tijim yumi long wanem samting long saed blong fasin blong Kingdom blong gru?

[Tok blong pija long pej 30]

?Yumi lanem wanem long parabol blong is ya?

[Tok blong pija long pej 31]

?Taem ol man oli seraotem ol gudfala fis long ol rabis fis, hemia i pija blong wanem samting?