Japta 58

Bred Mo Is

PLANTE tumas man oli kam long Jisas bakegen. Hem i stap long ples ya, Dekapolis, we bighaf blong man oli hiten. Samfala oli wokbaot i kam longwe blong lesin long Jisas, mo blong askem long hem blong mekem sik blong olgeta i kamgud bakegen. Oli karem kakae blong olgeta i kam long ol bigfala basket. Long ples blong ol hiten man ya, oli yusum ol bigfala basket ya blong karem olting blong olgeta, taem oli wokbaot i go sam ples.

Be biaen, Jisas i singaot ol disaepol blong hem oli kam long hem, nao hem i talem long olgeta se: “Mi mi sore tumas long ol man ya. Oli biaen long mi tri dei finis, nao oli no mao gat kakae. Mo sipos mi sanem olgeta oli gohom we oli no kakae, bambae oli hafded long hanggri long rod, from we sam oli kam longwe tumas tu.”

Ol disaepol blong Jisas oli ansa long hem, se: “?Bambae yumi tekem kakae blong olgeta ya olsem wanem? Ples ya i wan trabol ples ya.”

Nao Jisas i askem bakegen long olgeta, i se: “?Yufala i gat hamas bred?”

Oli talem se: “Seven, wetem sam smol fis.”

Nao Jisas i talem long olgeta man blong oli sidaon long graon. Nao hem i tekem ol seven bred ya, wetem ol fis, i talem tangkyu long God from olgeta, nao i brekem olgeta, i givim long ol man blong hem. Mo ol man blong hem oli givimaot long olgeta man. Nao olgeta evriwan oli kakae, oli ­fulapgud. Nating we 4,000 man wetem ol woman mo ol pikinini tu oli kakaegud, be biaen ol man blong Jisas oli fulumap ol hafkakae ya we i stap long seven basket we oli fulapgud.

Nao Jisas i sanemaot ol man ya oli gohom. Mo hem wetem ol disaepol blong hem oli klaem long wan bot, oli gokros long bigfala lugun ya blong Galili, oli kasem wes saed blong hem. Long ples ya, sam Farisi mo sam man blong skul ya we oli kolem Sadusi, oli kam luk Jisas. Oli wantem traem Jisas, nao oli askem long hem blong i mekem wan bigfala saen, long paoa blong heven.

Jisas i save se oli wantem traem hem, nao hem i ansa long olgeta, i se: “Taem san i godaon, yufala i save talem se ‘Bambae i gud taem tumora, from we skae ya i red.’ Mo long eli moning, yufala i save talem se ‘Bambae i gat ren tede, from we skae ya i red, mo i gat klaod.’ Yufala i save luk ol saen long skae blong makem we taem bambae i olsem wanem. ?Ale, olsem wanem yufala i no save luksave ol saen blong taem ya blong mi?”

Nao Jisas i tok strong long olgeta, i talem se oli man nogud, we oli stap mekem i krangke long God olsem woman we i stap mekem i krangke long man blong hem. Nao hem i givim woning long olgeta. Olsem hem i talem finis long ol Farisi, bambae oli no gat saen. Saen blong Jona nomo bambae God i save givim long olgeta. Nao Jisas wetem ol disaepol blong hem oli aot long olgeta, oli klaem long bot bakegen, oli gokros long narasaed blong bigfala lugun blong Galili, long ples ya we oli kolem Betsaeda. Nao ol disaepol blong hem oli no tingbaot blong karem sam bred, oli gat wan bred nomo long bot.

Jisas i stap tingtingbak long tok blong ol Farisi mo ol Sadusi, we oli man blong Herod. Nao Jisas i tok blong wekemap ol man blong hem, i se: “Yufala i mas openem ae blong yufala, yufala i mas lukaot long is blong ol Farisi mo long is blong Herod.” Taem ol disaepol oli harem we hem i stap tokbaot is, oli ting se hem i minim we oli no karem sam bred i kam. Nao oli stap rao long bisnes ya. Be Jisas i save tingting blong olgeta, nao hem i talem se: “?From wanem yufala i stap store long bisnes we yumi no gat bred?”

Oli luk we Jisas i mekem merikel, nao hem i givim bred long plante taosen man finis. Wan no tu dei bifo nomo hem i mekem wan merikel olsem. Taswe oli mas save se hem i no stap tingbaot prapa bred. Ale hem i talem long olgeta se: “?Ating yufala i fogetem ol samting we yumi mekem finis? ?Taem mi tekem faef bred ya, mi brekem blong givim long faef taosen man, biaen, yufala i fulumap hamas basket long ol hafkakae ya we i stap?”

Oli ansa se: “Twelef.”

Mo bakegen, hem i askem se: “?Mo taem mi tekem seven bred ya blong givim long fo taosen man, biaen yufala i fulumap hamas basket long ol hafkakae ya we i stap?”

Oli ansa se: “Seven.”

Nao hem i talem long olgeta, i se: “?Oraet, be weswe yufala i no save samting ya yet?” Hem i gohed, i se: “?Weswe yufala i no haremsave we mi mi no tok long yufala from bred? Yufala i mas lukaot long is blong ol Farisi mo ol Sadusi.”

Nao long taem ya oli save we hem i no tok long olgeta blong lukaot long is blong mekem bred. Is i wan samting we oli putum long sam kaen kakae blong hem i jenis, i kam narakaen. Oli yusum long bred blong mekem hem i solap. Taswe Jisas i yusum is olsem wan pija tok blong eksplenem samting we i save jenisim no spolem trutok. Ale nao ol disaepol blong hem oli save we tok blong Jisas i wan pija tok nomo. Oli luksave se Jisas i stap givim woning long olgeta, se oli mas lukaot long “ol tok we ol Farisi mo ol Sadusi oli save tijim olgeta long hem.” Oli mas mekem olsem from we ol gyaman tijing ya oli save spolem olgeta. Mak 8:1-21; Matyu 15:32 kasem 16:12.

▪ ?From wanem ol man oli karem ol bigfala basket i kam wetem olgeta?

▪ ?Taem Jisas i aot long Dekapolis, i tekem bot, nao hem i go wea?

▪ ?Taem ol disaepol blong Jisas oli harem we hem i stap storebaot is, oli ting se hem i minim wanem?

▪ ?Wanem mining blong tok blong Jisas: “Is blong ol Farisi mo ol Sadusi”?