Wan Samting We i Impoten Moa i Bitim Weta

KLOSAP olgeta kantri oli gat ol toktok blong olgeta long saed blong weta. Ol Inglis man oli gat wan toktok we oli stap talem olsem se, taem skae i red long sapa, ol boskru oli glad tumas. Taem skae i red long moning, hemia wan woning long ol boskru. Ol man blong talemaot weta oli givim sam spesel risen from wanem skae we i red long aftenun i min se long moning weta bambae i gud.

Long taem blong Jisas tu, ol man oli stap lukluk ol samting long skae mo oli talemaot mining blong hem. Jisas i talem long sam man Jiu se: “Taem san i godaon, yufala i save talem se, ‘Bambae i gud taem tumora, from we skae i red.’ Mo long eli moning, yufala i save talem se, ‘Bambae i gat ren tede, from we skae i red, mo i gat klaod.’ Yufala i save luksave ol saen long skae blong makem se taem bambae i olsem wanem.” Be Jisas i gohed i talem long olgeta se: “?Olsem wanem yufala i no save luksave ol saen blong taem ya blong mi?”—Matiu 16:2, 3.

?Wanem ya ‘ol saen blong taem blong hem’? Hemia ol klia saen blong soemaot se Jisas i trufala Mesaea we God i sanem hem i kam. Ol wok blong hem oli klia nomo olsem skae we i red. Be, bighaf blong ol man Jiu oli no tinghevi long ol saen we oli soemaot se Mesaea i kam. Hemia wan samting we i impoten moa i bitim weta.

Tede tu, i gat wan saen we i impoten moa blong ol man oli kasem save long hem i bitim kala blong skae. Jisas i talem se rabis wol ya bambae i mas lus bifo we niufala wol we i moagud i save kam. Hem i tokbaot plante samting we bambae i soemaot wetaem ol jenis ya bambae oli hapen. Long olgeta samting ya i gat ol bigfala faet we i kavremap fulwol mo kakae i sot. Jisas i talem se taem ol samting ya oli kamaot, hemia i soemaot we klosap nao God bambae i jajem wol ya.—Matiu 24:3-21.

?Yu yu luksave ‘ol saen blong taem’ we yumi stap long hem naoia?