Japta 60

Oli Luk Kraes Long Kingdom

JISAS i kam kasem ol ples raonabaot long Siseria Filipae, nao hem i stap tijim ol man wetem ol aposol blong hem. Nao hem i talem wan samting long olgeta we oli sek from. Hem i se: “Tru mi talem long yufala, i gat sam man oli stap stanap long ples ya, we bambae oli no save ded, gogo oli luk mi, mi Pikinini blong Man, mi kamtru [long kingdom blong mi, GNB].”

Ating ol disaepol blong hem oli stap talem se: ‘?Wanem mining blong tok ya?’ Ale samting olsem wan wik i pas, nao Jisas i tekem Pita mo Jemes mo Jon, trifala i biaen long hem, nao oli go antap long wan bigfala hil. Ating oli go long naet, from we ol disaepol oli wantem slip. Nao taem Jisas i stap prea, bodi blong hem i jenis, i kam narafala. Fes blong hem i saen olsem san, mo klos blong hem i kam waet we i saen tumas.

Nao wantaem nomo, tu man i kamtru, “hemia Moses mo Elaeja.” Nao tufala ya i stap store wetem Jisas. Tufala i stap tokbaot “fasin we bambae hem i aot long wol. Hemia ol samting ya we bambae hem i mekem long Jerusalem.” Yes, oli stap storebaot ded blong Jisas, mo taem we hem i laef bakegen long ded. Ale, storeyan blong olgeta i soemaot se Jisas i mas ded. Hem i no save ronwe long ol samting blong sem we bambae oli mekem long hem, nating we Pita i wantem olsem.

Taem ol disaepol oli luk samting ya, oli sek. Nao ae blong olgeta i opengud, oli stap luklukgud mo lesingud long evri samting. I olsem we oli luk wan drim we God i givim long olgeta. Be long tingting blong Pita, i no wan drim nomo, hem i rili tru. Taswe hem i talem long Jisas, i se: “Masta, i gud we mifala i stap long ples ya. Sipos yu wantem, bambae mi mi wokem tri wansaed haos long ples ya, wan blong yu, wan blong Moses, mo wan blong Elaeja.”

Pita i stap tok yet, nao wan klaod we i saen tumas i kam kavremap olgeta. Nao oli harem wan voes i kamaot long klaod, i se: “Hemia Pikinini blong mi, we mi laekem hem tumas, tingting blong mi i harem gud tumas long hem. Yufala i mas lesingud long hem.” Taem ol disaepol blong Jisas oli harem tok ya, oli foldaon, oli slip we fes blong olgeta i godaon long graon, from we oli seksek tumas. Be Jisas i talem long olgeta se: “Yufala i girap, yufala i no fraet.” Nao taem olgeta oli girap, oli no moa luk tufala ya, Jisas nomo i stap.

Long tumora blong hem, olgeta oli aot long bigfala hil ya, oli kamdaon bakegen. Nao Jisas i tok strong long trifala ya, i se: “Samting ya we yufala i luk, i olsem drim we God i givim long yufala, bambae yufala i no talemaot long ol man, gogo kasem we mi, mi Pikinini blong Man, bambae mi laef bakegen long ded.” Be from we trifala i jes luk Elaeja bakegen, wan kwestin i stap long tingting blong trifala, se: “?From wanem ol tija blong Loa oli stap talem se ‘Fastaem Elaeja i mas kam’?”

Jisas i ansa: “Elaeja i kam finis, mo ol man oli no save hem.” Be Jisas i stap tokbaot Jon Baptaes, we i mekem wok olsem Elaeja i mekem longtaem bifo. Jon Baptaes i mekemrere rod blong Kraes, olsem Elaeja i mekemrere rod blong Elaesa.

Samting we oli luk, we i olsem drim we God i givim long olgeta, i givim paoa long Jisas mo ol disaepol blong hem. Drim ya i soemaot Jisas, olsem we hem i tekem paoa blong hem finis, i stap rul long Kingdom blong hem long heven. Wan wik bifo, Jisas i bin promes samting ya long ol disaepol blong hem. Hem i bin talem long olgeta se bambae oli luk ‘hem, Pikinini blong Man, bambae hem i kamtru long kingdom blong hem.’ Biaen long ded blong Jisas, Pita i raetem leta blong hem, we i talem se trifala ya i luk ‘laet ya we i saenaot long Kraes, we i saen we i saen, taem trifala i stap wetem hem long bigfala hil ya we i tabu.’

Ol Farisi oli bin askem long Jisas blong mekem wan saen blong soemaot se hem nao hem i King ya we ol profet tok blong Baebol i stap tokbaot. Be hem i no givim wan saen long olgeta. Be i no mekem olsem long ol disaepol blong hem we oli frengud wetem hem. God i letem olgeta oli luk Jisas, taem bodi blong hem i jenis, i kam narafala, blong mekem bilif blong olgeta i kam moa strong long ol profet tok long saed blong Kingdom. Taswe, biaen Pita i save raetem long leta blong hem, se: “Ol samting ya oli mekem mifala i save moa we tok blong ol profet i tru.” Matyu 16:13, 28; Matyu 17:1-13; Mak 9:1-13; Luk 9:27-37; 2 Pita 1:16-19.

▪ ?Olsem wanem samfala oli luk Kraes i kamtru long Kingdom blong hem, bifo we oli ded?

▪ ?Long samting ya olsem drim we God i givim long olgeta, Moses mo Elaeja, tufala i storeyan wetem Jisas long wanem samting?

▪ ?From wanem samting ya i givim paoa long ol disaepol blong Jisas?