Ol Profet Tok We Oli Talem Se Mesaea Bambae i Kamtru

OL MAN Isrel oli save profet tok we Aesea mo ol narafala profet oli raetem long saed blong Mesaea, taswe longtaem finis i kam, oli stap wet long hem. Long taem blong Jisas tu, plante man Jiu oli “wet” long Mesaea from we klosap nao hem i kamtru. (Luk 3:15, NW) I gud blong makem se ol profet tok blong Baebol oli talemaot plante smosmol samting long saed blong laef blong Mesaea. I no gat wan man blong wol ya we i naf blong talemaot ol profet tok olsem, mo mekem olgeta oli kamtru long taem we Jisas i stap long wol.

Ol Smosmol Save Long Saed Blong Taem We Mesaea i Bon. Aesea i bin talemaot se wan yangfala gel, we i no bin slip wetem man samtaem, bambae i bonem Mesaea, no Kraes. Aposol Matiu i tokbaot olsem wanem Jisas i bon tru long wan merikel, mo biaen, hem i raetem se: “Nao ol samting ya i kamaot olsem, blong mekem tok ya i kamtru we Hae God i bin givim long wan profet bifo blong i talemaot, we i talem se, ‘Bambae wan yang gel we i no save man yet, hem i gat bel. Nao bambae hem i bonem wan pikinini boe.’” (Matiu 1:22, 23; Aesea 7:14) Aesea i bin talemaot tu se Kraes bambae i kamaot long laen blong Deved, i talemaot klia nem blong papa blong Deved, hemia Jese. Mo i tru, Jisas i kamaot stret long laen blong Deved. (Matiu 1:6, 16; Luk 3:23, 31, 32) Taswe, bifo we Jisas i bon, enjel Gabriel i talem long Meri, mama blong Jisas, se: “God bambae i mekem hem i King, olsem King Deved, olfala bubu blong hem bifo.”—Luk 1:32, 33; Aesea 11:1-5, 10; Rom 15:12.

Ol Smosmol Save Long Saed Blong Laef Blong Mesaea. Taem Jisas i bigman finis, hem i go long haos blong God long Nasaret, mo wetem bigfala voes, hem i ridim profet tok blong Aesea. Hem i ridim ol tok ya: ‘[“Jeova,” NW] i jusumaot mi, mo paoa blong spirit blong hem i kam fulap long mi blong mi talemaot gud nius long ol puaman.’ Jisas i soemaot se profet tok ya i stap tokbaot hem, i se: “Tede, long taem ya we yufala i stap lesin long ol tok ya blong Baebol, God i stap mekem ol samting we tok ya i talem, oli kamtru.” (Luk 4:17-21; Aesea 61:1, 2) Aesea i bin talemaot se Jisas bambae i kaen, i kwaet man, mo i gat tingting daon taem hem i stap mekem olgeta we oli sik, oli kamgud bakegen. Matiu i raetem se: “Plante man oli biaen long hem. Nao hem i stap mekem olgeta sikman oli gud bakegen, mo i blokem olgeta blong oli no talemaot nius blong hem long ol narafala man. Ol samting ya i kamaot blong mekem tok ya i kamtru we Profet Aesea i bin talemaot bifo . . . ‘Bambae hem i no save rao, mo i no save singaot bigwan. . . . Bambae i no save spolem olgeta we oli no gat paoa.’”—Matiu 8:16, 17; 12:10-21; Aesea 42:1-4; 53:4, 5.

Ol Smosmol Save Long Saed Blong Mesaea, Taem Hem i Safa. Profet Aesea i bin talemaot se bambae bighaf blong ol man Isrel oli no bilif long Mesaea, be bambae hem i kam olsem “wan ston we . . . oli save bangem leg blong olgeta long hem.” (1 Pita 2:6-8; Aesea 8:14, 15) Tok ya i tru, from we nating se Jisas i bin mekem plante merikel, be ol man “oli no bilif long hem. Samting ya i hapen blong mekem tok ya i kamtru we Profet Aesea i bin talem bifo, we i talem se, ‘Hae God. ?Sipos ol tok ya we naoia mifala i stap talemaot i kamaot bifo, hu i save bilif long hem?’” (Jon 12:37, 38; Aesea 53:1) Wan risen we i mekem se ol man Isrel oli no bilif se Jisas hem i Mesaea, hemia from wan rong tingting we plante man oli gat. Rong tingting ya se bambae Mesaea i tekem aksen kwiktaem blong tekemaot rul blong ol man Rom, mo stanemap bakegen kingdom blong Deved long wol. From we Jisas i safa mo i ded, bighaf blong ol man Isrel oli no wantem bilif se hem nao i Mesaea. Be Aesea i talem profet tok ya finis se Mesaea bambae i mas harem nogud bifo we hem i kam King.

Long buk blong Aesea, profet tok i tokbaot Mesaea se: “Taem ol man oli kam blong wipim mi, mi mi tekemaot sot blong mi, mo taem oli kam tok nogud long mi, . . . mo oli stap spet long fes blong mi, mi mi no blokem olgeta.” Matiu i talemaot samting we i hapen taem Jisas i pas long kot, i se: “Oli spet long fes blong hem mo oli faetem hem. Mo sam oli slavem hem.” (Aesea 50:6; Matiu 26:67) Aesea i raetem se: ‘Olgeta oli mekem i strong tumas long hem, be hem i no talem wan tok nating.’ Taswe, taem Paelat i askem Jisas long saed blong ol poen we ol man Isrel oli talem agens long hem, “Jisas i no talem wan samting nating long olgeta. Nao Paelat i sapraes tumas long hem.”—Aesea 53:7; Matiu 27:12-14; Ol Wok 8:28, 32-35.

Ol Smosmol Save Long Saed Blong Ded Blong Mesaea. Profet tok blong Aesea i gohed blong kamtru long taem we Jisas i ded mo biaen long taem ya tu. Aesea i bin talem se: “Oli putum hem long beregraon wetem ol man nogud, oli berem hem wetem ol rijman.” (Aesea 53:9) I luk olsem se ol tok long vas ya oli agensem olgeta bakegen. ?Taswe olsem wanem profet tok ya i save kamtru? Taem Jisas i ded, hem i stap hang long medel blong tu man blong stil. (Matiu 27:38) Be biaen, wan rijman Aramatia, we nem blong hem Josef, i putum bodi blong Jisas long wan niufala hol blong ston we hem i jes katem rere blong hem mo famle blong hem. (Matiu 27:57-60) Mo tu, ded blong Jisas i mekem wan impoten haf long profet tok blong Aesea i kamtru. Taem Aesea i tokbaot Mesaea, hem i talem se: “Man blong wok ya blong mi, hem i stret olgeta. Hem bambae i karem ol sin blong plante man, mo from ol samting we hem i mekem, mi bambae mi fogivim olgeta, mi tekemaot ol sin blong olgeta.” Mo i tru, ded blong Jisas i ransom ya we i mekem se sin i no moa holemtaet olgeta man we oli stap tru long God.—Aesea 53:8, 11; Rom 4:25.

Ol Profet Tok Oli Sua Blong Kamtru

Blong soemaot se hu nao Mesaea we Baebol i tokbaot, Jisas mo ol aposol oli yusum moa ol profet tok blong Aesea, i bitim ol narafala profet tok long Baebol. Be i no buk blong Aesea nomo we i talemaot ol samting we oli kamtru long fiuja. Plante narafala profet tok long Hibru haf blong Baebol, oli kamtru tu long Jisas, Kingdom blong hem, mo ol gudfala samting we Kingdom ya bambae i mekem long fiuja.a (Ol Wok 28:23; Revelesen 19:10) ?From wanem i sua se bambae ol profet tok ya oli kamtru? Jisas i talem long ol man Isrel we oli lesin long hem, i se: “I nogud yufala i ting se mi mi kam blong sakemaot Loa we God i givim long Moses, wetem ol tok blong ol profet [hemia Hibru haf blong Baebol], nogat. Mi mi no kam blong sakemaot ol tok ya, mi kam blong mekem mining blong olgeta i kam klia moa. Tru mi talem long yufala, bambae Loa ya i no save lus, gogo skae mo graon, tufala i lus. Bambae i no gat wan leta no wan smol haf blong Loa ya i save lus, gogo olgeta samting we Loa ya i talem, i kamtru.”—Matiu 5:17, 18.

Jisas i soemaot tu olsem wanem ol profet tok oli kamtru long saed blong sam samting we oli stap hapen raonabaot long hem, mo long sam samting we bambae oli hapen afta long ded blong hem. (Daniel 9:27; Matiu 15:7-9; 24:15) Mo tu, Jisas wetem ol disaepol blong hem oli talemaot sam samting we bambae oli kamtru plante yia biaen, mo plante long ol profet tok ya yumi luk oli stap kamtru tede. Haf we i kam biaen, bambae i tokbaot ol profet tok ya mo ol narafala profet tok we bambae oli kamtru yet long fiuja.

[Futnot]

[Tok blong pija long pej 5]

“Taem ol man . . . oli kam tok nogud long mi, . . . mi mi no blokem olgeta”