Taem Josef mo Meri tufala i aot long Ijip, nao tufala i kam long ples ya. Long taem ya, ating Jisas i gat samwe long tu yia nomo. Meri i gat wan pikinini nomo, hemia Jisas. Be i no longtaem, hem i bonem Jemes, mo afta Josef, Saemon, mo Judas. Mo Meri mo Josef tufala i gat sam pikinini gel tu, be yumi no save hameni. From samting ya, Jisas i gat sikis smol brata mo sista blong hem, no maet hem i gat moa.

Famle blong Josef i stap kam bigwan nao, taswe hem i mas wok had blong sapotem olgeta. Hem i wan kapenta. Josef i mekem olsem we Jisas i stret pikinini blong hem nomo. Taswe ol man oli kolem hem se “pikinini blong kapenta.” Josef i tijim Jisas olsem wanem blong wokem haos tu. Mo Jisas i lanem gud wok ya. Taswe biaen, ol man oli stap talem long saed blong Jisas se: “Hem i kapenta.”