Taem ‘Win i Agensem Yumi’

Mak, we i wan man blong raetem Gospel, i tokbaot trufala samting we i hapen long ol disaepol blong Jisas taem oli stap traehad blong krosem Solwota blong Galili. Hem i talem se, “oli stap pul long bot, oli stap harem nogud from we oli stap pul agens long win.” Taem Jisas i stap long soa, hem i luk trabol we oli kasem, nao hem i mekem wan merikel, hem i wokbaot long solwota i go kasem olgeta. Nao Mak i talem se taem hem i klaem long bot wetem olgeta, win i finis.—Mak 6:48-51.

Semfala man ya blong raetem Baebol i talem se long wan taem bifo finis “wan bigfala win i girap, i blu strong.” Long taem ya, Jisas “i tok long win ya. . . . Nao win ya i finis, mo olgeta samting i kwaet.”—Mak 4:37-39.

Nating se tede yumi nogat jans blong luk ol merikel olsem ya, yumi save lanem plante samting from olgeta. Yumi no stretgud olgeta mo yumi stap laef long wan taem we i denja tumas. Taswe, yumi save fesem hadtaem we i olsem strong win. (2 Timoti 3:1-5) Be, samtaem ating yumi harem se ol wari we wanwan long yumi i kasem oli kam olsem wan bigfala strong win. !Be i gat rod blong winim problem ya! Jisas i singaot yumi i se: “Yufala evriwan we i stap hadwok tumas, mo yufala i stap karem ol hevi samting, yufala i kam long mi, nao mi bambae mi tekemaot ol hevi samting ya, mi mekem yufala i spel gud.”—Matiu 11:28.

Taem ‘win i agensem yumi,’ bambae hat blong yumi “i kam moa kwaet.” ?Olsem wanem? Hemia taem yumi trastem ol promes blong Jeova God we oli no save giaman.—Skelem wetem Aesea 55:9-11; Filipae 4:5-7.