Japta 53

Hae Rula We Ol Man Oli Wantem

TAEM ol man oli luk we Jisas i mekem merikel blong givim kakae long plante taosen man, oli sapraes tumas. Nao oli talem se: “Tru hemia nao profet ya, we bifo oli bin talem se ‘Bambae hem i kam long wol.’ ” Olgeta oli luksave se hemia profet we i gat moa paoa bitim Moses. Mo oli luksave se hem i save mekem wan gudfala rula long olgeta. Taswe oli wantem kam tekem hem, oli wantem fosem hem blong i kam king blong olgeta.

Be Jisas i save plan blong olgeta. Kwiktaem hem i goaot long olgeta bakegen, blong oli no save fosem hem blong i kam king long olgeta. Nao hem i sanemaot ol man oli gobak long ples blong olgeta, mo hem i strong long ol disaepol blong hem blong oli tekem bot, oli go long wan ples kolosap long Kapaneam. Nao hem i go antap long wan hil blong prea. Tudak i kam, be Jisas i stap hem wan long hil ya.

Ale, kolosap i brok delaet, nao Jisas i lukluk i godaon long bigfala lugun ya. Hem i luk we i gat wan bigfala win i blu, we i mekem lugun ya i gat bigsi long hem. Hem i save luk klia from mun i stap saenaot. Kolosap i fulmun, from we Lafet blong Pasova i stap kam kolosap nao. Jisas i luk bot i stap longwe long medel lugun. Mo i gat bigsi i stap wasem olgeta from we strong win i agens long olgeta. Hem i luk olgeta we oli stap pul long bot, oli stap harem nogud from we oli stap pul we win i agensem olgeta.

Taem Jisas i luk samting ya, hem i girap, nao hem i wokbaot i godaon long bigfala hil. Nao hem i wokbaot i go antap long wora. Taem olgeta oli pul i go olsem faef no sikis kilomita finis, oli luk Jisas i stap wokbaot antap long wora, i stap kam kolosap long bot blong olgeta. Be hem i stap wokbaot olsem we bambae i pas kolosap long olgeta, i go. Taem olgeta oli luk hem, oli fraet tumas, mo oli singaot bigfala se: “Hemia wan devel ya.”

Be Jisas i tok slou long olgeta, i se: “Yufala i no harem nogud. Mi nomo ya. Yufala i no fraet.”

Be Pita i ansa long hem i se: “Masta, sipos i yu tru, yu talem long mi blong mi wokbaot antap long wora, mi kam long yu.”

Jisas i talem se: “Yu kam.”

Nao Pita i aot long bot ya, i stat wokbaot antap long wora, nao i go kolosap long Jisas. Be taem hem i harem we win ya i strong hem i fraet, nao i stat draon, mo i singaot se: “Masta, plis yu sevem mi.”

Wantaem nomo, Jisas i stretem han blong hem, i holem Pita, nao i talem se: “?Man, weswe tingting blong yu i seksek olsem? !Bilif blong yu i smol nomo!”

Nao Pita mo Jisas tufala i gobak, mo taem tufala i klaem long bot, win ya i finis. Olgeta oli sapraes tumas. ?Be from wanem oli sapraes? Sipos oli bin tingtingbak long bigfala merikel we Jisas i mekem finis long dei ya, taem hem i givim kakae long plante taosen man. Mo sipos oli bin kasem save long “mining blong bisnes ya blong bred,” taem Jisas i fidim ol man ya wetem faef bred mo tu smol fis nomo. Sipos oli luksave ol samting ya, oli no save sapraes we Jisas i save wokbaot antap long wora, mo we hem i save kwaetem bigfala win. Ale, nao olgeta ya long bot oli nildaon, oli ona long Jisas, oli talem se: “Tru, yu yu Pikinini blong God.”

Kwiktaem nomo, olgeta oli gokros long bigfala lugun ya, oli kasem wan ples, nem blong hem Genesaret. Hem i wan flat ples kolosap long Kapaneam. Hem i naes, mo graon blong hem i gud. Ale, oli fasem bot long ples ya, nao oli gosoa. Ol man long ples ya oli luksave Jisas wantaem nomo. Nao oli resis oli go long evri ples raonabaot, oli tekem ol sikman oli kam. Oli karem olgeta oli kam long bed blong olgeta nomo. Nao taem ol sikman ya oli tajem en nomo blong klos blong Jisas, biaen oli gud bakegen.

Nao i gat fulap man we oli stap yet long narasaed bigfala lugun ya. Olgeta oli bin luk merikel we Jisas i mekem, taem hem i givim kakae long plante taosen man. Nao oli luk we Jisas i no moa stap long ples ya. Ale taem sam smol bot oli aot long Taebirias oli kamsoa kolosap long olgeta, oli klaem long ol bot ya, oli gobak long Kapaneam blong lukaot Jisas bakegen. Nao taem ol man ya ol faenem Jisas long narasaed blong lugun ya, oli askem long hem se: “?Tija, yu yu kam long ples ya long wetaem?” Nao Jisas i tok strong long olgeta, olsem nekis store i soemaot. Jon 6:14-25; Matyu 14:22-36; Mak 6:45-56.

▪ ?Taem ol man oli luk merikel we Jisas i mekem taem hem i givim kakae long plante taosen man, oli wantem mekem wanem long hem?

▪ ?Taem Jisas i stap hem wan antap long bigfala hil, hem i luk wanem longwe? ?Nao hem i mekem wanem?

▪ ?Ol disaepol oli sapraes long samting we i hapen from we oli no luksave wanem?

▪ ?Taem oli gosoa, wanem i kamaot?