Japta 65
Oli Wokbaot Olsem We Oli Stap Haed Blong Go Long Jerusalem
KOL taem i stap kam kolosap nao, long yia 32 K.T. Hemia i kolosap long taem blong wan lafet blong ol man Isrel, nem blong hem, Lafet we oli Wokem ol Wansaed Haos. Long 31 K.T., long taem blong Lafet blong Pasova, ol man Jyu oli wantem kilim Jisas i ded. Taswe i stat long taem ya, Jisas i mekem bighaf blong ol wok blong hem long Galili nomo. Ating Jisas i go long Jerusalem blong joen long ol lafet blong ol man Jyu nomo. Oli stap mekem tri lafet evri yia.
Nao ol brata blong Jisas oli talem long hem se: “I gud yu aot long ples ya, yu go long Judia.” Jerusalem hem i bigfala taon blong Judia. Mo hem i stampa taon blong skul blong ol man Isrel. Tingting blong ol brata blong Jisas i olsem se: “Man we i wantem ol man oli save hem, hem i no save haedem ol wok blong hem.”
Jemes mo Saemon mo Josef mo Judas oli no bilif se bigfala brata blong olgeta Jisas, hem i Mesaea. Nating we oli tingting olsemia, be oli wantem se Jisas i soemaot bigfala paoa blong hem long olgeta man we oli hivap long lafet ya. Be Jisas i luksave se trabol i save kamaot. Taswe hem i talem long olgeta se: “Ol man long wol ya oli no save agens long yufala. Be oli stap agens long mi, from we mi mi stap soemaot long olgeta se fasin blong olgeta i no stret.” Nao hem i talem long ol brata blong hem se: “I gud yufala i go long lafet. Mi mi no save go long lafet ya.”
Lafet ya we oli Wokem ol Wansaed Haos i stap gohed gogo seven dei i finis. Long namba eit dei, oli mekem wan bigfala seremoni blong finisim lafet ya. Oli mekem lafet ya evri yia blong makem taem we oli finisim wok blong olgeta long garen. Oli hapi tumas long taem ya, mo oli givim plante presen i go long Jeova blong talem tangkyu long hem. Ol brata blong Jisas oli go long lafet ya, nao sam dei biaen, Jisas wetem ol disaepol blong hem olgeta tu oli go. Be oli no wokbaot long klia ples, oli wokbaot olsem we oli stap haed. Oli no folem rod we ol man oli stap folem, kolosap long Jodan Reva. Be oli folem rod we i pastru long Sameria.
Nao Jisas mo ol disaepol blong hem oli lukaot wan ples blong slip long wan velej blong Sameria. Ale Jisas i sanem sam man blong hem oli go fastaem blong mekemrere wan ples long olgeta. Be ol man long ples ya oli no wantem tekem hem i kam insaed long ples blong olgeta, from we oli harem se hem i stap go long Jerusalem. Taem Jemes mo Jon tufala i luk samting ya, tufala i girap, tufala i askem long Jisas se: “?Masta yu wantem mitufala i prea, mitufala i singaot faea i kamaot long heven, i kamdaon, i kakae olgeta?” Be Jisas i tanraon, i tok strong long tufala, i blokem tufala. Nao olgeta oli go long wan narafala velej.
Taem Jisas wetem ol man blong hem oli stap wokbaot long rod, wan tija blong Loa i talem long hem se: “I nomata weples bambae yu yu go long hem, be mi bambae mi biaen long yu.”
Nao Jisas i talem long hem, i se: “Ol wael dog oli gat ol hol blong slip blong olgeta, mo ol pijin oli gat ol bed blong olgeta. Be mi, mi Pikinini blong Man, mi no gat ples blong mi blong go slip long hem.” Jisas i stap talem long tija blong Loa ya se i no isi blong folem hem. Sipos hem i biaen long hem, hem i mas kasem hadtaem. From ol tok ya blong Jisas, i luk olsem we tija blong Loa ya i flas tumas blong folem fasin blong laef blong Jisas.
Nao Jisas i talem long wan narafala man, i se: “Yu biaen long mi, yu man blong mi.”
Be man ya i ansa long Jisas, i se: “Masta, plis yu letem mi mi go berem papa blong mi fastaem.”
Nao Jisas i ansa long hem, i se: “Yu letem ol dedman oli go berem ol dedman blong olgeta. Yu go talemaot [nyus blong kingdom blong God, GNB].” Yumi save se papa blong man ya i no ded yet. From we sipos hem i ded finis, man ya i no stap wokbaot long rod ya, we i save lesin long ol tok blong Jisas. Be man ya i wantem wet gogo papa blong hem i ded fastaem. Hem i no rere blong mekem ol wok blong Kingdom blong God fastaem long laef blong hem.
Taem oli stap wokbaot long rod ya we i go kasem Jerusalem, wan narafala man i talem long Jisas se: “Masta, bambae mi mi biaen long yu, mi man blong yu. Be plis yu letem mi mi gobak long ples blong mi fastaem, blong talem tata long ol famle blong mi.”
Be Jisas i ansa long hem, i se: “Man we i stap holem stia blong bot, be oltaem i stap luklukbak long ples blong hem, hem i no naf blong [kingdom blong God, GNB].” Olgeta we oli wantem biaen long Jisas, oli mas lukluk nomo long ol wok blong Kingdom. Sipos wan man we i holem stia blong bot i luklukbak oltaem, bot ya i save go fas long rif. Olsem ya nao, man we i stap luklukbak long ol samting blong wol ya, hem i save foldaon long sin, nao hem i save livim rod we i go kasem laef blong olwe. Jon 7:2-10; Luk 9:51-62; Matyu 8:19-22.
▪ ?Hu ya ol brata blong Jisas? ?Oli tingting wanem long hem?
▪ ?From wanem ol man Sameria oli no wantem tekem Jisas i kam long velej blong olgeta? ?Jemes mo Jon tufala i wantem mekem wanem long olgeta?
▪ ?Hu ya trifala man ya we Jisas i storeyan wetem trifala long rod? ?Olsem wanem hem i makem long tingting blong olgeta se oli mas rere blong livim sam samting blong biaen long hem?