Japta 75

Stampa Blong Fasin Glad

TAEM Jisas i stap wokbaot long Galili blong prij, hem i mekem plante merikel. Nao hem i gohed long minista wok blong hem long Judia, mo hem i mekem plante merikel we oli sem mak long olgeta we hem i mekem finis long Galili. Wan man i stap we i gat devel i stap long hem we devel ya i blokem man ya, man ya i no save toktok. Nao Jisas i ronemaot devel ya, mo man ya i stat toktok. Ol man oli sapraes tumas. Be samfala oli no glad long wok blong Jisas, nao oli talem sem tok we ol man oli talem finis long Galili. Oli talem se: “Bielsebal, jif blong ol devel, hem nao i givim paoa long man ya blong i ronemaot devel long man.” Mo i gat sam narafala man tu oli stap, we oli wantem luk sipos Jisas i kamaot long God, no no gat. Nao oli traem hem, oli askem long hem blong i wokem wan saen blong soemaot paoa blong God.

Be Jisas i save tingting blong olgeta finis. Nao hem i givim sem ansa long olgeta long Judia we hem i givim finis long ol man long Galili. Hem i talem se wan haos we ol man blong hem oli stap seraot, hem i mas kam nogud. Afta hem i askem se: “?Mo Setan tu, sipos hem i agens long hem, olsem wanem bambae hem i save holem ol man blong hem?” Nao hem i soemaot long olgeta se tingting blong olgeta i save mekem olgeta oli foldaon, i se: “Sipos mi stap ronemaot devel long man long paoa blong God, hemia i min se [kingdom blong God i bin kamtru long yufala finis, GNB].”

Plante handred yia bifo, ol man oli luk wan merikel we Moses i mekem, nao oli talem se: “Hemia fingga blong God we i mekem samting ya.” Mo tu, “fingga blong God” i raetem ol Ten Loa long tufala ston we Moses i katem. Mo “fingga blong God” bakegen, hemia tabu speret blong God, i givim paoa long Jisas blong i save ronemaot ol devel mo i save mekem sikman i kamgud bakegen. Ol man we oli luk ol merikel blong Jisas, oli mas luksave samting ya olsem ol man long taem blong Moses. Be no gat. Taswe Jisas i talem long olgeta se i olsem we Kingdom blong God i kamtru long olgeta finis. Hemia from we Jisas we bambae hem i King blong Kingdom blong God, hem i stap long medel blong olgeta finis.

Nao Jisas i soemaot long olgeta se paoa blong hem i bigwan moa, i winim paoa blong Setan, from we hem i save ronemaot ol devel. Hem i talem se Setan hem i olsem wan strong man we i stap lukaot long haos blong hem mo i stap holem ol samting blong faet. Be sipos wan narafala man we i strong moa long hem i kam, i faetem hem, hem i save winim hem, nating we man ya i holem ol tul blong faet. Hem i talem pija tok ya finis, nao hem i talem bakegen pija tok we hem i bin talem long olgeta long Galili: Wan rabis speret i save goaot long wan man, nao sipos man ya i no fulumap ol gudfala samting long ples blong devel ya, rabis speret ya i save go tekem seven narafala devel we oli nogud moa long hem, nao oli save kam insaed bakegen, blong stap long man ya. Fastaem laef blong man ya i nogud, be biaen laef blong hem i nogud moa.

Taem Jisas i stap tijim ol samting ya long ol man, wan woman we i stap long medel blong ol man ya i singaot bigfala, i se: “Woman we i bonem yu mo i givim titi long yu, hem i save harem gud.” Olgeta woman Jyu evriwan oli wantem kam mama blong wan profet. Mo oli wantem moa blong kam mama blong Mesaea. Taswe woman ya i talem olsem. Hem i ting se Meri i save harem gud tumas from we hem i mama blong Jisas.

Be kwiktaem nomo Jisas i stretem tingting blong woman ya, nao hem i talem long hem trufala stampa blong fasin glad, i se: “Yes, be man we i harem tok blong God mo i obei long hem, hem i save harem gud moa.” Jisas i neva talem se ol man oli mas givim spesel ona long mama blong hem, Meri. Be hem i talem se man we i stap mekem wok blong God, mo i stap tru long God nomo, hem nao i save harem gud tumas. Ol narafala samting we hem i save mekem long laef i no save givim glad olsem.

Nao bakegen, Jisas i mekem olsem we hem i mekem finis long Galili. Hem i tok long ol man Judia from we oli askem long hem blong wokem wan saen blong soemaot paoa blong God. Hem i talem se saen blong profet Jona bifo, hemia nomo God i save givim long olgeta. Jona i kam olsem wan saen long ol man Nineve bifo, from we hem i stap tri dei insaed long bel blong fis. Mo tu, hem i no fraet blong prij long ol man Nineve. Samting ya i mekem ol man Nineve oli tanem tingting blong olgeta from ol sin blong olgeta. Be Jisas i talem long olgeta se: “Be yufala i luk, mi mi hae moa long Jona.” Long sem fasin, kwin blong ol man long saot, long ples ya Seba, hem i wokbaot i kam blong harem waes tok blong king Solomon bifo. Be Jisas i talem se: “Be yufala i luk, mi mi waes moa long Solomon.”

Nao Jisas i eksplenem long olgeta se taem wan man i laetem laet, hem i no go haedem laet ya, no hem i no kavremap laet ya long basket. Hem i putum laet ya i stap antap, long ples blong laet, nao olgeta we oli kam insaed long haos oli gat laet. Ating hem i yusum pija tok ya blong soemaot wan samting long ol stronghed man we oli stap lesin long hem: Hem i stap tijim olgeta mo i stap mekem plante merikel long fes blong olgeta, be i olsem we laet i stap haed nomo. Ae blong olgeta i no klia gud. Oli no luksave mining blong ol merikel mo ol tijing blong Jisas. I olsem we ol merikel blong hem oli blong nating nomo.

Jisas i jes bin ronemaot devel long wan man, nao man ya i save toktok bakegen. Sipos ae blong ol man we oli luk merikel ya i klia gud, oli mas presem God from, mo oli mas glad blong talemaot gud nyus ya long ol man. Be ol man ya oli no mekem olsem. Taswe Jisas i talem se: “From samting ya, yu mas lukaot gud, blong bambae laet blong yu i no kam olsem tudak nomo. Be sipos laef blong yu i fulap olgeta long laet, bambae i no gat tudak nating long yu, i olsem we wan laet i saen, nao yu yu gat laet blong wokbaot.” Luk 11:14-36; Eksodas 8:18, 19, NW; Eksodas 31:18; Matyu 12:22, 28.

▪ ?Taem Jisas i ronemaot devel long wan man, ol man we oli luk merikel ya oli talem wanem?

▪ ?“Fingga blong God” i minim wanem? ?From wanem Jisas i talem se Kingdom blong God i kamtru long olgeta finis?

▪ ?Wanem stampa blong trufala glad?

▪ ?Olsem wanem man i save mekem ae blong hem i klia gud?