Japta 76

Hem i Kakae Wetem Wan Farisi

JISAS i jes ronemaot devel long wan man, nao man ya i save toktok. Mo tu, hem i jes givim ansa long ol man we oli stanemap wan kwestin long saed blong stampa blong paoa we Jisas i yusum blong mekem merikel ya. Nao i gat wan Farisi i singaot hem blong i go kakae long haos blong hem. Kastom blong ol Farisi i blong wasem han blong olgeta go kasem elbo fastaem, nao oli kakae biaen. Taem oli kakae finis, oli wasem han blong olgeta bakegen. Mo samtaem oli spel long medel blong kakae tu blong mekem olsem. Loa blong God i no talem se kastom ya i rong, be hem i ova long ol loa we God i givim long saed blong fasin blong klinim bodi blong olgeta.

Nao Farisi ya i sapraes tumas taem i luk we Jisas i no go wasem han blong hem fastaem. Ating hem i no talem wan samting long Jisas, be Jisas i luksave tingting blong hem. Taswe Jisas i talem long hem se: “Man, yufala Farisi, yufala i stap wasem afsaed blong ol panikin mo plet, be insaed, yufala ya i fulap long ol fasin ya we yufala i man blong stil, mo yufala i man nogud. Yufala i krangke. ?Yufala i ting se God ya we i mekem afsaed, hem i no mekem insaed tu?”

Jisas i mekem gyaman fasin blong ol Farisi i kam long klia ples. Olgeta oli stap wasem han blong olgeta blong oli klin, be oli no save wasemaot ol rabis fasin long hat blong olgeta. Nao hem i givim advaes long olgeta, i se: “Be sipos yufala i stap givim presen long ol puaman long ol samting we oli stap insaed long ol panikin mo plet blong yufala, bambae yufala i klin olgeta.” Fasin blong givim presen i go i mas kamaot long hat blong olgeta, mo oli mas mekem from we oli laekem ol man, i no from we oli wantem mekem flas long fored blong ol man, blong traem soemaot se fasin blong olgeta i stret.

Nao Jisas i talem long olgeta, i se: “Be ol Farisi, sore tumas long yufala. Yufala i stap kaontem ol smosmol lif ya we oli stap putum long kakae, min mo ru mo evri lif olsem, blong makem, wan i blong God, naen i blong yufala, wan i blong God, naen i blong yufala. Hemia i folem loa, be ol fasin ya blong mekem i stret mo blong laekem God, hemia yufala i no tingbaot. Be ol fasin ya, yufala i mas mekem, we yufala i no fogetem ol narafala fasin ya tu.” Loa we God i givim long Isrel i talem se oli mas kaontem ol kakae we oli karem long garen blong olgeta, blong makem, wan i blong God, naen i blong olgeta. Tufala smosmol lif ya, min mo ru, oli stap putum long kakae, blong mekem tes blong hem i gud moa. Nao Jisas i talem long ol Farisi se oli stap kaontem ol smosmol lif ya we oli nating nomo, blong givim smol haf i go long God, be oli no tingbaot ol bigfala fasin, olsem fasin blong laekem ol man, fasin kaengud, mo kwaet fasin.

Jisas i gohed, i tok agens long olgeta bakegen, i se: “Ol Farisi, sore tumas long yufala. Insaed long ol haos blong prea, yufala i wantem go sidaon long ol nambawan ples, mo long ol open ples, yufala i wantem tumas blong ol man oli leftemap han long yufala, blong ona long yufala. Sore tumas long yufala. Yufala i olsem gref we ol man oli no makemgud, nao taem man i purumbut long hem, hem i no save, be i kam olsem we i doti long fes blong God finis.” Ol Farisi oli stap haedem rabis fasin blong olgeta. Long fes blong ol man i luk olsem we ol fasin blong olgeta oli gud nomo. Be aninit, fasin blong olgeta i rabis nomo. Skul blong olgeta i stanap long gyaman fasin.

Nao wan tija blong Loa we hem i stap lesin long strong tok blong Jisas, i girap, nao i talem se: “Tija, taem yu stap talem ol tok ya, yu yu stap spolem mifala tu.”

Tru ya, olgeta tu oli mas karem blem from we oli no tijim gud ol man long Loa blong God. Taswe Jisas i talem long olgeta, i se: “Ol tija blong Loa, sore tumas long yufala. Yufala i stap putum ol hevi samting long solda blong ol man, we i had blong ol man oli karem. Be yufala i no save mekem wan samting nating blong givhan long ol man, blong oli karem ol hevi samting ya. Sore tumas long yufala, from we yufala i stap flasem ol gref blong ol profet ya blong bifo, we ol bubu blong yufala bifo oli kilim olgeta oli ded.”

Ol hevi samting we Jisas i stap tokbaot i minim ol kastom blong olgeta. Ol tija blong Loa oli no save tekemaot wan smol kastom nating blong givhan long ol man. Jisas i talem se long fasin ya i olsem we oli glad long ol samting we ol bubu blong olgeta bifo oli mekem, taem oli kilim ol profet oli ded. Nao hem i givim woning long olgeta, i se: “Tru mi talem long yufala, bambae yufala i kasem panis from ded blong olgeta profet, i stat long Ebel [long stat blong wol, NW], i kam kasem Sekaraea we i ded insaed long haos blong God, long medel blong olta mo tabu ples blong hem.”

Taem Adam mo If tufala i gat pikinini, tufala i statem laen blong ol man. Taswe i olsem we Ebel i laef i stap ‘taem wol i stat.’ Long saed blong profet Sekaraea, oli kilim hem i ded, nao biaen, ol ami blong ol man Siria oli kam agens long Juda, oli spolem ples ya. Be Jisas i stap talem se long taem blong hem bambae i gat trabol we i bigfala moa. Rabis fasin blong ol man long taem blong hem i bitim rabis fasin long taem blong ol man bifo. Taswe ol man long taem blong hem oli mas kasem bigfala panis moa. 38 yia biaen, long 70 K.T., oli kasem panis ya.

Nao Jisas i tok long olgeta bakegen, i se: “Ol tija blong Loa, sore tumas long yufala. I olsem we yufala i haedem ki blong doa blong haos we waes i stap insaed long hem, nao yufala i no go insaed, mo yufala i stap blokem ol narafala man tu we oli wantem go insaed.” Wok blong ol tija blong Loa i blong eksplenem Tok blong God long ol man, mo blong talemaot mining long olgeta. Be olgeta oli no stap mekem olsem. Mo oli go moa, oli stap blokem ol man, blong oli no gat jans blong kasem save long Tok blong God.

Ol Farisi mo ol tija blong Loa oli kros tumas long Jisas from we hem i mekem fasin blong olgeta i kam long klia ples. Taem Jisas i aot long haos ya, oli stap tok nogud long hem, oli stap jajem hem. Mo oli stap askem plante kwestin long hem tu, blong traem faenem sam rabis poen long hem long ol ansa blong hem. Olsem nao, oli save sanem sam soldia blong holem hem. Luk 11:37-54; Dutronome 14:22; Maeka 6:8; 2 Kronikel 24:20-25.

▪ ?From wanem Jisas i tok agens long ol Farisi mo ol tija blong Loa?

▪ ?Wanem ol hevi samting we ol tija blong Loa oli putum long solda blong ol man?

▪ ?Tok ya ‘taem wol i stat,’ i minim wetaem?