Japta 77
Kwestin Long Rod Blong Seraot Olting Blong Papa
OL MAN oli save se Jisas i stap kakae long haos blong Farisi ya. Ale plante taosen man oli hivap afsaed long haos ya, nao oli wet long Jisas blong i kam afsaed. Be ol man ya oli no gat fasin olsem ol Farisi. Ol Farisi oli stap agens long Jisas, oli traem faenem sam rabis poen long hem. Be ol man ya oli lesingud long Jisas mo oli glad blong harem tok blong hem.
Nao Jisas i tok fastaem long ol disaepol blong hem, i se: “Yufala i mas lukaot long is blong ol Farisi ya. Hemia fasin ya blong olgeta, we oli gat tu tingting.” Taem Jisas i stap kakae long haos blong Farisi ya, hem i soemaot se skul blong olgeta i fulap long gyaman fasin. Nating se oli traem soemaot ol gudfala fasin long fes blong ol man, be ol rabis fasin blong olgeta we oli stap haed, bambae oli kam long klia ples. Jisas i talem se: “Olgeta samting we man i stap kavremap, bambae God i tekem i kam long klia ples. Mo olgeta samting we man i stap haedem, bambae God i tekem i kam long fes blong olgeta man.”
Nao Jisas i leftemap tingting blong ol disaepol blong hem bakegen. Hem i bin mekem olsem taem hem i sanemaot ol 12 aposol blong hem, oli go prij long ol ples olbaot long Galili. Hem i talem se: “Ol fren. Mi mi talem long yufala, bambae yufala i no fraet long olgeta ya we oli save kilim yufala i ded, be biaen oli no moa save mekem wan samting nogud long yufala bakegen.” Ol smosmol pijin olbaot, be i no gat wan long olgeta we God i fogetem hem samtaem. Taswe, Jisas i talem long ol disaepol blong hem se long fes blong God, oli winim plante smosmol pijin ya. God i no save fogetem olgeta. Nao hem i talem se: “Taem ol man oli tekem yufala blong yufala i kot long fes blong ol lida blong haos blong prea, no long fes blong gavman, no jif blong yufala, . . . Tabu Speret bambae i tijim yufala long wanem tok we bambae yufala i mas talem, stret long taem blong tok.”
Nao wan long ol man ya i girap, i talem long Jisas: “Tija, plis yu talem long brata blong mi blong i seraot ol samting ya we papa blong mitufala i promes bifo taem i no ded yet, se i blong mitufala.” Loa blong Moses i talem se taem wan papa i ded, fasbon boe long famle i mas kasem tu haf blong olting blong papa. Sipos ol pikinini oli stap folem loa ya, oli no save rao long bisnes ya. Be i luk olsem we man ya i wantem moa, i winim samting we hem i gat raet blong kasem.
Jisas i no wantem jajem bisnes ya. Hem i talem se: “Maefren, mi mi no gat raet blong jajem bisnes blong yutufala, mo blong seraot ol samting blong yutufala.” Nao hem i givim advaes long ol man we oli stap hivap long ples ya, i se: “Yufala i lukaot gud. Yufala i mas blokem olgeta fasin ya we yufala i wantem samting blong narafala man. Maet man i gat plante samting blong hem, be stampa blong prapa laef blong man i no stap long ol samting ya.” Yes, nating we wan man i gat plante samting, be hem i save ded. Sipos i olsem, hem i mas livim ol samting we hem i bin kasem. Blong makem poen ya long tingting blong olgeta, mo blong soemaot long olgeta se i moa gud we oli gat wan gudfala nem long fes blong God, Jisas i talem wan pija tok. Hem i se:
“I gat wan rijman we plantesen blong hem i stap karem fulap frut blong hem. Nao hem i stap tingbaot se ‘?Bambae mi save mekem olsem wanem? From we ol haos blong mi oli no naf blong mi putum ol samting ya oli stap gud.’ Nao i talem se ‘I gud mi mekem olsemia. Mi mas tekemaot ol haos ya we mi stap putum ol samting ya long olgeta, mo mi mas wokem sam narafala haos we oli moa big. Nao mi save putum ol samting ya oli stap gud insaed, wetem olting blong mi tu. Nao bambae mi save talem se Man, mi mi gat laki nao. Naoia mi gat plante samting we i naf long plante yia. I stat naoia, mi save spel, mi save kakae, mi save dring, we mi gat hapi taem olwe nomo.’ Be God i talem long hem se ‘Yu yu no gat hed. Naoia nomo, long naet ya, bambae yu lusum laef blong yu. ?Nao hu man bambae i tekem ol samting ya we yu yu mekem olgeta ya oli stap rere?’ ”
Nao Jisas i finisim pija tok ya, i se: “Bambae i mas olsem nomo long olgeta man we oli stap hivimap plante samting we oli blong olgeta nomo, be long fes blong God oli no rijman nating.” Ating ol disaepol blong Jisas oli no foldaon long fasin ya blong hivimap plante samting. Be sipos oli stap tingting tumas long ol samting we oli nidim long laef, olsem kakae mo klos, oli save kam slak long wok blong Jeova, nao oli no moa wosip long hem fulwan. Taswe Jisas i tekem jans ya blong talem bakegen ol gudfala advaes we hem i bin talem long olgeta wan yia haf bifo, taem hem i tijim ol man antap long hil. Ale hem i tanraon, i talem long ol disaepol blong hem se:
“From samting ya, mi mi talem long yufala, i nogud yufala i stap tingting tumas long laef blong yufala, se ‘?Bambae yumi kakae wanem tede?’ Mo i nogud yufala i stap tingting tumas long bodi blong yufala se ‘?Bambae yumi kasem klos blong yumi olsem wanem?’ . . . Yufala i luk ol pijin ya. Olgeta ya oli no planem garen, oli no karem kakae i kam, mo oli no gat haos no ples blong putumgud ol kakae blong olgeta. Be God i stap givim kakae long olgeta. . . . Yufala i traem tingbaot ol flaoa, oli gru olsem wanem. Olgeta ya oli no wok mo oli no somap klos blong olgeta. Be mi mi talem long yufala, King Solomon ya bifo, we hem i bigfala haeman, be klos blong hem oli no flas olsem ol flaoa ya. . . .
“I nogud yufala i stap tingting tumas from ol samting blong laef blong yufala, nao oltaem yufala i stap lukaot kakae mo dring blong yufala. From we ol samting ya, oltaem ol hiten man olbaot long wol oli stap lukaot olgeta. Be Papa blong yufala, hem i save we yufala i mas gat ol samting ya. Yufala i mas [putum tingting blong yufala long kingdom blong hem, GNB] nao bambae hem i save givim olgeta narafala samting ya tu long yufala.”
I gud yumi tingting hevi long ol tok ya blong Jisas, taem yumi kasem hadtaem long saed blong mane. Sipos wan man i stap tingting tumas long ol samting blong laef, be hem i save kam slak blong mekem ol samting long saed blong speret. Long fasin ya, man ya i sot long bilif, from we hem i no ting se God i save givim ol samting we ol man blong hem oli nidim. Luk 12:1-31; Dutronome 21:17.
▪ ?From wanem man ya i askem kwestin long saed blong ol samting we papa blong hem i promes long hem taem hem i no ded yet? ?Jisas i givim wanem advaes long hem?
▪ ?Jisas i talem wanem pija tok? ?Hem i yusum pija tok ya blong tijim ol man long wanem?
▪ ?Wanem advaes ya we Jisas i talem bakegen long olgeta? ?From wanem advaes ya i stret nomo?