Japta 82

Jisas i Wokbaot i Go Long Jerusalem Bakegen

NAO Jisas i stap wokbaot, i stap pas long ol taon mo velej, i stap tijim ol man. Hemia long ples ya Peria, we i stap kolosap long Judia, long narasaed Jodan Reva i go. Be Jisas i stap folem rod we i go long Jerusalem.

Nao wan man i askem wan kwestin long Jisas, i se: “?Masta, ol man we God bambae i sevem olgeta, bambae plante man, no smol nomo?” Ating man ya i stap tingbaot tijing blong ol man Jyu, we oli talem se smol man nomo oli save kasem laef. Ansa blong Jisas i pulum ol man blong tingbaot ol samting we oli mas mekem blong kasem laef, i se: “Mi mi talem long yufala, yufala i mas traehad [hadwok, no harem soa long bodi] blong pas long doa ya we i smol nomo, blong go insaed.”

I impoten tumas we oli traehad naoia from we Jisas i talem se “i gat plante man we bambae oli traem go insaed, be oli no save go.” ?From wanem oli no save go insaed? Hem i eksplenem se ‘masta blong haos ya i save girap, i save satem doa blong haos ya. Nao bambae ol man oli stap stanap afsaed, we oli stap kilkilim doa, mo oli save talem long hem se: “Masta, plis yu openem doa long mifala,” be hem bambae i save ansa long olgeta, se: “Mi no save ples we yufala i aot long hem. Yufala evriwan i man nogud, yufala i gowe long mi.” ’

Olgeta ya we oli stap stanap afsaed, oli kam kilkilim doa long taem we olgeta nomo oli wantem. Taswe oli mestem jans blong olgeta, from we doa i sat finis. Blong go insaed, oli mas kam eli, nating sipos i hadwok long olgeta blong mekem olsem. Tru tumas, olgeta we oli stap tektaem tumas, oli no putum wosip blong Jeova long fas ples long laef blong olgeta, bambae oli harem nogud tumas.

Bighaf long ol man Jyu we Jisas i kam blong tijim olgeta, oli no tekem jans blong olgeta blong oli save kasem laef from Jisas. From samting ya, Jisas i talem se bambae olgeta oli save krae, olgeta oli save kakae tut blong olgeta, from we oli stap afsaed nomo, oli no save go insaed. Be bambae i gat ol man oli aot long “is mo wes mo not mo saot,” yes, ol man we oli kamaot long olgeta laen long wol, we bambae oli save “kam sidaon long lafet ya insaed long kingdom blong God.” (GNB)

Nao Jisas i talem se: “I gat sam man oli stap long las ples [olgeta we ol man Jyu oli stap daonem olgeta, olsem ol man we oli no blong laen blong olgeta, mo sam man Jyu tu we oli gat tingting daon], we bambae oli mas tekem nambawan ples, mo i gat sam oli stap long nambawan ples [ol man Jyu we oli gat plante jans blong kasem fulap samting long saed blong bodi mo long saed blong speret] we bambae oli mas godaon long las ples.” Olgeta we oli mas godaon long las ples, hemia ol les man, we oli no gat tangkyu nating, nao oli no save go insaed long Kingdom blong God.

Nao stret long taem ya, ol Farisi oli kam talem long Jisas, se: “I gud yu aot long ples ya, yu go, from we King Herod [Antipas] i wantem kilim yu yu ded.” Maet Herod hem wan i bin talem toktok ya olbaot blong mekem se Jisas i ronwe i goaot long ples ya. No maet Herod i stap fraet, from we hem i bin joen long bisnes blong kilim Jon Baptaes i ded, nao maet hem i fraet blong mekem sem samting long wan narafala profet blong God bakegen. Be Jisas i talem long ol Farisi se: “Herod ya, hem i man blong trik, olsem wael dog. Yufala i go talemaot long hem we mi mi talem se: ‘Yu luk. Long smol taem ya we mi stap yet, bambae mi stap ronemaot devel long man, mo mi stap mekem ol sikman oli gud bakegen, mo biaen bambae mi finisim ol wok blong mi.’ ”

Taem Jisas i finisim wok blong hem long ples ya, hem i wokbaot i stap folem rod we i go long Jerusalem. Hem i talem risen from wanem hem i mekem olsem, i se: “From we i no stret blong oli kilim profet i ded long sam narafala ples, oli mas kilim long Jerusalem nomo.” ?From wanem oli mas kilim Jisas i ded long Jerusalem nomo? From we Jerusalem i bigfala taon, mo long ples ya oli stap kilim ol anamol blong givim olgeta oli go long God. Mo tu, hae kot we oli kolem Sanhedrin wetem ol 71 memba blong hem, i stap long Jerusalem. Taswe ‘Smol Sipsip ya blong God,’ oli mas kilim hem i ded long Jerusalem nomo.

Nao Jisas i krae from ol man Jerusalem, i se: “O, Jerusalem, Jerusalem. Yufala i stap kilim ol profet oli ded. Yufala i stap stonem ol man blong karem tok blong God oli ded. Plante taem, mi mi wantem putum han blong mi i goraon long yufala evriwan, olsem we faol i pulum ol pikinini blong hem oli kam haed aninit long wing blong hem, be yufala i no glad. Oraet, be yufala i luk. God i gowe long yufala finis.” From we oli sakem pikinini blong God, God i jajem laen blong olgeta.

Nao Jisas i stap wokbaot i folem rod i go long Jerusalem. Long wan Sabat dei, wan lida blong ol Farisi i singaot Jisas blong i go kakae long haos blong hem. Nao olgeta long haos ya oli stap lukluk ol fasin blong Jisas, from we i gat wan sikman i stap we ol wora long bodi blong hem i mekem ol han mo leg blong hem oli solap tumas. Nao Jisas i askem long ol tija blong Loa mo ol Farisi we oli stap, i se: “?Olsem wanem? ?Long Sabat dei, Loa blong yumi i letem blong yumi mekem sikman i gud bakegen, no i no letem?”

Olgeta oli no talem wan samting. Nao Jisas i tekem man ya, i mekem bodi blong hem i gud bakegen, nao i letem hem i gohom. Mo i talem long olgeta, i se: “?Hu man long yufala we pikinini blong hem no buluk blong hem i foldaon long wel long Sabat dei, be hem i no go wantaem nomo blong pulumaot?” Bakegen, oli no save ansa long hem. Luk 13:22–14:6; Jon 1:29.

▪ ?Jisas i talem se ol man oli mas mekem wanem blong kasem laef? ?From wanem plante man oli stap stanap long doa, be oli no save kam insaed?

▪ ?Hu ya ol man we oli stap long “las ples,” we bambae oli mas kam tekem nambawan ples? ?Mo hu ya olgeta man we oli stap long “nambawan ples,” we bambae oli mas godaon long las ples?

▪ ?From wanem toktok i goraon se Herod i wantem kilim Jisas i ded?

▪ ?From wanem oli no save kilim wan profet i ded afsaed long Jerusalem?