Japta 83

Hem i Kakae Wetem Wan Farisi

JISAS i stap yet long haos blong wan lida blong ol Farisi. I gat wan sikman i stap we wora long bodi blong hem i mekem ol han mo leg blong hem oli solap tumas. Nao Jisas i mekem sikman ya i gud bakegen. Nao Jisas i luk we sam man we masta blong haos ya i singaot olgeta blong oli kam kakae, oli stap jusumaot ol nambawan ples long kakae ya. Nao Jisas i tok long olgeta blong tijim wan lesen long olgeta long saed blong tingting daon.

Hem i talem se: “Taem we man i singaot yu blong yu joen long wan kakae blong mared, bambae yu no go sidaon long nambawan ples. Maet man ya we i singaot yu, i singaot wan narafala man we i hae moa long yu, blong hem tu i joen. Nao hem bambae i kam long yu, i talem long yu se ‘Yu letem man ya i tekem ples ya,’ nao yu bambae yu sem, from we yu mas go sidaon long las ples.”

Nao Jisas i givim advaes long olgeta se: “Taem we man i singaot yu blong yu go joen long wan kakae, yu mas go sidaon long las ples. Nao man ya we i singaot yu bambae i kam luk yu, i se ‘Fren, yu kam sidaon long ples ya we i moa gud.’ Long fasin ya, hem bambae i leftemap yu long fes blong olgeta ya we oli stap kakae wetem yu.” Nao Jisas i makem poen ya long tingting blong olgeta, i se: “From we man ya we i stap leftemap hem blong i kam haeman, bambae God i putum hem i stap daon. Be man we tingting blong hem i stap daon, bambae God i leftemap hem i kam haeman tru.”

Nao Jisas i tok long man ya we i singaot hem blong i kam kakae long haos blong hem, i talem long hem olsem wanem hem i save mekem God i glad long kakae we hem i mekemrere. Hem i se: “Taem we yu mekem bigfala kakae long medel dei no long sapa, i no gud yu singaot ol fren blong yu, no ol brata blong yu, no ol famle blong yu, no ol rijman we oli stap raonabaot long yu blong oli kam joen. Sipos yu mekem olsem, bambae olgeta ya oli save singaot yu bakegen blong yu go kakae wetem olgeta. Nao long fasin ya, bambae yu yu kasem jenis blong samting ya we yu mekem. Be yu mas mekem i narafala. Taem we yu mekem bigfala kakae, yu mas singaot ol puaman mo ol blaenman, mo ol man we bodi blong olgeta i nogud, mo ol man we leg blong olgeta i nogud, blong oli kam kakae. Nao God bambae i mekem i gud long yu, from we olgeta ya oli no save givim jenis long yu bakegen.”

Man we i givim kakae long ol man olsem ol blaenman no ol puaman hem i save harem gud. Olsem Jisas i talem long man ya, “taem we ol stret man oli laef bakegen long ded, God bambae i givim pei blong yu long yu.” Nao wan man long ol man we oli stap sidaon long kakae ya i harem we Jisas i stap tokbaot kakae we God i glad long hem, nao hem i tingbaot wan narakaen kakae, i se: “Man we bambae i sidaon blong kakae long [kingdom blong God, GNB] hem i save harem gud.” Nao Jisas i talem wan parabol blong soemaot long olgeta se i no olgeta man evriwan we oli tinghae long gudfala fyuja ya we God i wantem givim long olgeta.

Jisas i talem long hem se: “I gat wan man we i mekem wan bigfala kakae, mo i singaot plante man blong oli kam joen long hem. Nao . . . hem i sanem man blong hem blong i go talemaot long olgeta ya we hem i singaot olgeta finis, se ‘Yufala i kam, kakae ya i rere finis.’ Be nao olgeta evriwan oli stat mekem eskyus se oli no save kam. Faswan long olgeta i talem se ‘O, sore, mi mi no save kam, from we mi jes pem wan pis graon, mo mi mas go luk hem.’ Mo narafala man i talem se ‘O, sore, mi mi no save kam, from we mi jes pem ten buluk blong pulum kat, mo mi mas go blong traem olgeta.’ Mo narafala man bakegen i talem se ‘O, mi mi no save kam, from we mi jes mared ya.’ ”

!Ol eskyus ya oli no strong nating! Wan man we i pem finis wan pis graon no sam buluk, hem i lukluk graon no ol buluk bifo we hem i pem. Taswe taem hem i pem olgeta finis, i no impoten nating we hem i go luk olgeta bakegen. Mo tu, wan man we i jes mared i no mas letem mared blong hem i blokem hem, blong hem i no harem tok blong haeman ya we i singaot hem blong i go kakae. Taem masta i harem ol eskyus ya, hem i kros tumas, nao hem i talem long slef blong hem se:

“ ‘Yu hareap, yu go long ol rod mo ol ples olbaot long taon ya, yu faenem ol puaman mo ol blaenman, ol man we bodi blong olgeta i nogud, mo ol man we leg blong olgeta i nogud, yu tekem olgeta oli kam.’ Nao man ya i talem se ‘Masta, ol samting ya we yu yu talem, mifala i mekem finis, be i gat ples i stap yet.’ Nao masta ya i talem long man blong hem, i se ‘Ale, yu go long ol rod mo ol ples raonabaot afsaed long taon, nao yu tok gud long ol man, blong pulum olgeta oli kam insaed, blong haos ya blong mi bambae i fulap gud. . . . I no gat wan long olgeta ya we mi singaot olgeta fastaem, we bambae i save kakae wan samting, long kakae ya blong mi.’ ”

?Parabol blong Jisas i minim wanem? “Masta” we i mekem wan bigfala kakae i minim Jeova God. “Man blong hem” we i singaot plante man blong oli kam joen long kakae ya i minim Jisas Kraes. Mo “bigfala kakae ya,” hemia jans blong ol man blong go insaed long Kingdom blong heven.

Fastaem, ol lida blong ol man Jyu long taem blong Jisas oli gat jans blong kam insaed long Kingdom blong God. Be oli sakem jans blong olgeta. Ale, i stat long Pentekos blong yia 33 K.T., Masta i singaot ol man long laen blong ol man Jyu we oli gat tingting daon, we ol narafala man oli toktok nogud long olgeta. Be olgeta we oli tekem jans blong olgeta, oli smol nomo, oli no naf blong fulumap ol 144,000 ples long Kingdom blong God long heven. Taswe tri mo haf yia biaen, long 36 K.T. Masta i singaot olgeta we oli no blong laen blong ol man Jyu, oli no sakomsaes. Ale, kam kasem taem blong yumi tede, hem i stap hivimap sam long olgeta blong go insaed long Kingdom. Luk 14:1-24.

▪ ?Jisas i tijim wanem lesen long ol man long saed blong tingting daon?

▪ ?Olsem wanem wan man i save mekem wan kakae we God i glad long hem? ?From wanem man ya i save harem gud?

▪ Olgeta we oli gat jans blong kam kakae, oli talem plante eskyus. ?From wanem ol eskyus ya oli slak tumas?

▪ ?Wanem mining blong parabol blong Jisas long saed blong “bigfala kakae”?