Japta 10

Ol Trep Long Jerusalem

NAOIA i taem blong ol tri oli stap putum flaoa. Evri yia long taem ya, Josef wetem famle blong hem wetem sam fren mo famle bakegen, oli wokbaot oli go long Jerusalem blong mekem Lafet blong Pasova. Oli mas wokbaot samwe long 100 kilomita blong kasem Jerusalem. Taem oli stap go long trep ya oli hapi tumas. Naoia Jisas i gat 12 yia blong hem. Hem i stap wet long ol trep ya, from we hem i intres tumas long lafet ya.

Long tingting blong Jisas mo famle blong hem, Lafet blong Pasova i no blong wan dei nomo. Oli stap seven dei biaen long lafet ya blong mekem Lafet blong Bred we i no gat Is long hem. Oli tingbaot lafet ya olsem haf blong taem blong Pasova tu. Taswe i stat long taem we oli aot long Nasaret gogo oli kambak bakegen long Nasaret, trep ya i tekem samwe long tu wik. Be long yia ya, trep ya i longfala moa, from we wan samting i kamaot long Jisas.

Trabol ya i kamaot taem oli aot long Jerusalem oli stap wokbaot blong gohom. Josef mo Meri tufala i ting se Jisas i stap wokbaot wetem sam famle mo fren we oli stap wokbaot blong gohom tu. Be taem oli spel long naet, oli luk we Jisas i no stap wetem olgeta. Nao tufala i traem lukaot hem long ol famle mo fren blong tufala. Be tufala i no save faenem hem. Ale Josef mo Meri tufala i tanraon, tufala i gobak long Jerusalem blong lukaot hem.

Tufala i stap lukaot hem wan fuldei, be tufala i no save faenem hem. Long nekis dei tu, tufala i no save faenem hem. Long namba tri dei, tufala i go long haos blong God. Nao tufala i luk we Jisas i stap sidaon insaed long haos ya, long medel blong ol tija blong ol man Isrel. Hem i stap lesin long tok blong olgeta, mo i stap askem kwestin long olgeta.

Meri i tok long hem i se: “?E pikinini blong mi, olsem wanem yu yu mekem mitufala olsem ya? Mi mo papa blong yu, mitufala i stap lukaot yu we mitufala i stap harem nogud tumas.”

Jisas i sapraes we tufala i no save faenem hem. Nao hem i askem long tufala se: “?From wanem yutufala i stap lukaot mi? ?Yutufala i no save se mi mi mas stap long haos blong Papa blong mi?”

Jisas i no kasem save from wanem papa mama blong hem tufala i no save samting ya. Nao Jisas i wokbaot wetem papa mama blong hem, oli gohom. Mo oltaem hem i stap ona long tufala. Hem i stap gruap moa long bodi blong hem mo long waes blong hem tu. Mo oltaem God i glad moa long hem, mo ol man tu oli glad moa long hem. Yes, i stat long taem we hem i pikinini nomo, Jisas i givim wan gudfala eksampel. Hem i soemaot olsem wanem blong lukaot ol samting long saed blong speret. Mo tu, hem i soemaot bigfala respek long papa mama blong hem. Luk 2:40-52; 22:7.

▪ ?Evri yia, taem ol tri oli stap putum flaoa, Jisas wetem famle blong hem oli wokbaot oli go wea? ?Trep ya i longfala olsem wanem?

▪ ?Taem Jisas i gat 12 yia blong hem, wanem i hapen long trep ya?

▪ ?Jisas i givim wanem eksampel long ol yangfala tede?