Japta 84

Wok Blong Ol Disaepol Blong Jisas

JISAS i aot long haos blong wan lida blong ol Farisi, we maet hem i wan memba blong kot ya Sanhedrin, ale hem i wokbaot i go moa long rod we i go long Jerusalem. Nao ol man we oli stap biaen long Jisas long rod, oli plante we i plante. ?Be wanem i stap long hat blong olgeta, we i stap pusum olgeta blong biaen long Jisas? ?Oli mas mekem wanem blong kam man we i stret blong folem Jisas?

Oli stap wokbaot i go, nao Jisas i tanraon, i talem sam tok long olgeta we ating oli sek from. Hem i se: “Sipos wan man i wantem kam biaen long mi, be hem i mas no laekem nating papa mo mama blong hem, mo woman blong hem, mo ol pikinini blong hem, mo ol brata mo ol sista blong hem. Mo hem i mas no laekem sol blong hem yet. Sipos no, bambae hem i no save kam man blong mi.” (NW)

?Wanem mining blong tok ya blong Jisas? Jisas i no minim se ol man we oli folem hem oli rili mas no laekem nating ol famle blong olgeta. No gat. Be oli mas putum Jisas i nambawan long laef blong olgeta, i winim ol famle blong olgeta. Baebol i talem se bubu blong Jisas, Jekob, hem i ‘no laekem nating’ Lea, be hem i laekem tumas Rejel. Tok ya i minim se hem i laekem Rejel moa, i winim we hem i laekem sista blong hem Lea.

Mo tu, traem tingbaot tok blong Jisas we hem i talem se wan disaepol blong hem i mas no laekem nating “sol [laef] blong hem yet.” Jisas i minim se wan trufala disaepol blong hem i mas laekem Jisas moa, i winim we hem i laekem prapa laef blong hem. Jisas i talem tok ya blong makem long tingting blong olgeta se oli mas tingting hevi long wok we ol disaepol blong hem oli mas mekem. Fastaem oli mas tingtinggud long wok ya, mo biaen, oli save tekem disisin blong olgeta blong mekem wok ya.

Ol man we oli biaen long Jisas oli mas kasem trabol mo hadtaem. Hem i talem olsem, i se: “Man we i no tekem pos ya we hem i save ded long hem, blong i karem, i biaen long mi, hem i no save kam man blong mi.” (NW) Yes, wan trufala disaepol i mas rere blong kasem semkaen trabol we Jisas i bin kasem, taem ol man oli traem mekem sem long hem. Olsem Jisas, oli mas rere blong kasem ded long han blong ol enemi blong God.

Taswe ol man we oli stap biaen long Jisas long rod, oli mas tingtinggud long ol samting we oli mas mekem blong kam disaepol blong hem. Jisas i talem wan pija tok blong makem poen ya long tingting blong olgeta, i se: “?Hu man long yufala we i wantem wokem wan bigfala haos we i hae, be i no sidaon fastaem blong kaontem praes blong olgeta samting blong hem, blong luk we mane blong hem bambae i naf no i no naf? Sipos man i no makemgud fastaem, bambae hem i save putum faondesen, be i no save finisim haos ya. Nao olgeta we oli luk hem bambae oli laf long hem, oli se ‘Man ya i statem wan haos, be hem i no naf blong finisim.’ ”

Ale, Jisas i stap talem long ol man we oli biaen long hem se oli mas tingtinggud fastaem long ol wok we oli mas mekem taem oli kam disaepol blong hem. Oli mas rere blong mekem ol wok ya, mo oli mas tekem disisin blong gohed long wok ya gogo hem i finis. Oli mas mekem olsem man ya we i wantem wokem gudfala haos, we fastaem hem i mas kaontem praes blong olgeta samting, blong luk sipos mane blong hem bambae i naf blong finisim haos ya. Nao Jisas i talem wan narafala pija tok bakegen, i se:

“?Mo hu king we i gat enemi blong hem i stap kam blong faet long hem, be hem i girap i go blong faet, we i no mekem toktok wetem ol kapten blong hem fastaem? Sipos king ya i gat ten taosen man nomo, be enemi blong hem i gat twante taosen, king ya i mas luklukgud fastaem, se hu bambae i save win. Sipos hem i luk se i no save win, hem i mas sanem sam man blong karem tok blong hem taem enemi ya blong hem i stap longwe yet, blong mekem pis long hem.”

Nao Jisas i soemaot klia stampa poen blong ol pijatok blong hem, i se: “Taswe mi talem long yufala, wanem man long yufala, be sipos i no save livim olgeta samting blong hem blong kam biaen long mi, hem i no save kam man blong mi.” Yes, olgeta man ya we oli biaen long hem long rod, mo evri man we i wantem kam man blong Kraes, oli mas rere blong mekem olsem. Oli mas rere blong livim olgeta samting blong olgeta [olting blong olgeta mo laef blong olgeta tu] blong kam biaen long Jisas. ?Yu yu rere blong mekem olsem?

Nao Jisas i talem se: “Sol i wan gudfala samting.” Taem hem i tijim ol man antap long bigfala hil, hem i bin talem long ol disaepol blong hem se oli olsem “sol long ol man long wol.” Taem wan man i putum sol long kakae, hem i save mekem se kakae ya i no rotin, i stap gud. Long sem fasin, ol tok blong ol disaepol blong Jisas oli save mekem we laef blong ol man i no lus. Jisas i go moa long tok blong hem, i se: “Be sipos [sol] i no moa konkon, i no gat samting blong mekem i konkon bakegen. Hem i nogud blong putum long garen, mo i nogud tu blong tanem wetem sit blong buluk, blong putum long garen biaen. Hem i gud blong sakem nomo. Man we i gat sora blong hem i mas lesingud long tok ya.”

Ale Jisas i stap talem long ol disaepol blong hem se nating we oli bin folem hem longtaem lelebet, be oli no mas kam slak long wok blong olgeta. Oli mas gat strong tingting blong gohed. Sipos no, bambae oli kam olsem sol ya, we hem i gud blong sakem nomo. Bambae ol man blong wol oli save jikim olgeta mo tok nogud long olgeta, mo bambae oli no stret long fes blong God. Tru, oli save sakem doti long nem blong God. Olsem sol we i no moa gat paoa, i no moa konkon, bambae Jeova i save sakem olgeta. Yes, bambae oli lus. Luk 14:25-35; Jenesis 29:30-33; Matyu 5:13.

▪ ?Jisas i minim wanem taem hem i talem se ol man we oli biaen long hem oli mas “no laekem nating” ol famle blong olgeta mo laef blong olgeta tu?

▪ ?Jisas i talem wanem tufala pija tok? ?Wanem mining blong tufala pija tok ya?

▪ ?Wanem stampa poen long las tok blong Jisas long saed blong sol?