Japta 85

Lukaot Sipsip We i Lus

JISAS i wantem tumas blong lukaot mo faenem olgeta we oli wantem wosip long God wetem tingting daon. Taswe hem i storeyan wetem olgeta man evriwan long saed blong Kingdom, nating we ol man ya oli mekem bigfala sin long laef blong olgeta. Long taem ya, i gat plante man nogud we i kam kolosap long Jisas blong lesin long hem.

Nao ol Farisi mo ol tija blong Loa oli luk samting ya, oli stap tok agens long Jisas from we hem i storeyan wetem ol man we olgeta oli ting se oli rabis man nomo. Oli talem se: “Man ya, hem i glad blong luk ol man nogud, mo blong go kakae wetem olgeta.” !Ol flas tija ya oli no save mekem samting ya! Oli tingbaot ol parakot man olsem graon we i blong purumbut nomo. Oli yusum wan hibru tok (‘am ha·’aʹrets) blong soemaot we oli no laekem ol parakot man. Tok ya i minim “ol man blong graon.”

Be Jisas i gat respek long ol man, hem i kaengud, mo hem i gat sore. From samting ya, plante parakot man oli glad blong lesin long hem. Sam long olgeta oli stap mekem nogud, mo ol man raonabaot oli save samting ya. Be ol Farisi we oli tingbaot ol man ya olsem nating nomo, oli no glad we Jisas i halpem olgeta. ?Olsem wanem nao long tok ya blong ol Farisi?

Jisas i talem wan pija tok blong ansa long olgeta. Hem i soemaot se hem i save tingting blong ol man Farisi, se oli stret man finis mo oli stap sef insaed long yad blong ol sipsip blong God. Be oli ting se ol nogud man ya, (ol ‘am ha·’aʹrets) oli mestem rod, oli lus finis. Lesin long kwestin we Jisas i askem:

“?Hu man long yufala we i gat handred sipsip blong hem mo wan blong olgeta i lus, be hem i no tingbaot? Sipos wan long yufala i lusum sipsip blong hem olsem, bambae hem i mas livim ol naentenaen sipsip blong hem we oli stap kakae long hil, nao hem i mas go lukaot sipsip ya we i lus, gogo i faenem. Mo taem hem i faenem sipsip ya blong hem, bambae hem i glad tumas, i mas leftemap sipsip ya blong karem long solda blong hem. Mo taem hem i kamhom, bambae hem i mas singaot ol fren blong hem wetem olgeta we oli stap raonabaot long hem, blong talem long olgeta se ‘Yufala i kam joen wetem mi, yufala i harem gud wetem mi, from we mi mi faenem sipsip ya blong mi we i lus.’ ”

Nao Jisas i talem mining blong store ya, i se: “Mo mi mi talem long yufala, bambae long heven i olsem nomo. Bambae oli glad moa long wan man nomo we i man nogud, be i tanem tingting blong hem from sin blong hem, i winim we oli glad long naentenaen stret man, we oli no mekem samting we oli mas tanem tingting blong olgeta from.”

Ol Farisi oli ting se oli stret man finis we oli no nidim blong tanem tingting blong olgeta from sin. Tu yia bifo, oli bin tok agens long Jisas from we hem i kakae long haos blong ol man we oli tekem mane blong takis, mo ol man nogud. Nao hem i bin talem long olgeta se: “Mi mi no kam blong singaot olgeta we oli stret man finis, se ‘Yufala i biaen long mi.’ Mi mi kam blong singaot ol man nogud blong oli biaen long mi.” Olgeta long heven oli no glad long ol flas Farisi ya we oli no wantem tanem tingting blong olgeta from sin. Be oli glad tumas long ol nogud man we oli sore, nao oli tanraon, oli folem Jisas.

Nao Jisas i talem wan moa pija tok blong makem long tingting blong olgeta se ol man nogud we oli jenisim fasin blong olgeta oli mekem ol enjel oli glad. Hem i se: “?Mo hu woman long yufala we i gat ten selva mane blong hem mo wan i lus, be hem i no tingbaot? Sipos wan woman long yufala i lusum wan mane blong hem olsem, bambae hem i mas laetem laet, nao hem i mas brum long haos blong lukaot mane ya gogo i faenem. Mo taem hem i faenem mane ya blong hem, bambae hem i mas singaot ol fren blong hem wetem olgeta we oli stap raonabaot long hem, blong talem long olgeta se: ‘Yufala i kam joen wetem mi, yufala i harem gud wetem mi, from we mi mi faenem smol mane ya blong mi we i lus.’ ”

Nao Jisas i talem mining blong pija tok ya we i kolosap sem mak long narafala pija tok, i se: “Mo mi mi talem long yufala, long ol enjel blong God i olsem nomo. Olgeta oli glad tumas long wan man nomo we i man nogud, be i tanem tingting blong hem from sin blong hem.”

I gud tumas we ol enjel blong God oli wantem se ol man nogud oli tanem tingting blong olgeta from sin blong olgeta, nao oli folem Jisas. Ol parakot man we ol narafala man oli no laekem olgeta, oli gat jans blong kasem laef long Kingdom blong God long heven. Oli save kasem wan ples long heven we i hae moa, i winim ol enjel. Be ol enjel oli no jelas long olgeta mo oli no kros from we olgeta oli kasem ples we i hae moa. Oli luksave se ol man ya we bifo oli nogud, oli mas winim plante trabol long laef blong olgeta. From samting ya, oli save ol trabol long wol mo oli save gat sore long ol man. Taswe oli naf blong mekem wok olsem king mo pris long heven. Luk 15:1-10; Matyu 9:13; 1 Korin 6:2, 3; Revelesen 20:6.

▪ ?From wanem Jisas i storeyan wetem ol man nogud? ?From samting ya, ol Farisi oli tok agens long hem olsem wanem?

▪ ?Ol Farisi oli tingting olsem wanem long ol parakot man?

▪ ?Jisas i talem wanem tufala pija tok? ?Tufala pija tok ya i tijim yumi long wanem samting?

▪ ?From wanem i nambawan tumas we ol enjel oli glad?