Japta 86

Wan Boe We i Lusum Rod

JISAS i talem tufala pija tok long ol Farisi. Fastaem hem i storebaot wan sipsip we i lus, mo biaen, wan smol mane we i lus. Nao hem i gohed blong talem wan narafala pija tok bakegen. Hem i storebaot wan papa mo ol samting we hem i mekem long tu pikinini boe blong hem we hem i laekem tufala tumas. Tufala tugeta i gat sam nogud fasin.

Long pija tok ya, Jisas i storebaot moa sekenbon long tufala pikinini ya. Sekenbon ya i askem long papa blong hem blong seraot olting blong hem we bambae oli blong tufala ya, blong hem i save tekem haf blong hem. Ale, papa blong hem i mekem olsem. I no longtaem, sekenbon ya i tekem ol samting ya we oli blong hem, i aot long ples blong hem, nao hem i stap ronem ol rabis fasin long laef blong hem. Taem yu lesin long store blong Jisas, traem luksave mining blong ol man insaed long store ya.

Jisas i talem se: “I gat wan man we i gat tu pikinini blong hem. Nao sekenbon long tufala i talem long papa blong hem, i se: ‘Papa, plis yu seraot olting blong yu we bambae oli blong mitufala, blong mi mi save tekem haf blong mi naoia.’ Nao papa blong tufala, hem i seraot olting blong hem long tufala pikinini blong hem.” ?Nao sekenbon ya i mekem wanem long ol samting blong hem?

Jisas i talem se: “Biaen i no longtaem, sekenbon ya i tekem ol samting ya we oli blong hem, i salemaot olgeta, nao i holem mane blong ol samting ya, i aot long ples blong hem, i go long wan narafala kantri longwe. Nao long ples ya, hem i stap spolem mane ya blong hem long ol rabis fasin we i stap mekem, gogo mane blong hem i finis.” Hem i yusum ol mane blong hem blong ronem ol woman blong rod. Jisas i gohed blong talem se biaen, i gat hadtaem i kam:

“Nao long taem ya, olgeta long kantri ya oli gat hadtaem, from we i no gat kakae, mo man ya i trabol tumas. Nao hem i go wok blong wan man blong kantri ya, mo man ya i sanem hem blong i go givim kakae long ol pig blong hem. Mo long tingting blong hem, hem i talem se: ‘Man, sipos mi save fulumap bel blong mi long ol rabis kakae ya we ol pig ya oli stap kakae, hemia i gud tumas.’ Be i no gat man i givim kakae long hem.”

Traem tingbaot: Loa blong Moses i talem se ol pig oli no klin. Be from hadtaem ya, man ya i mas tekem rabis wok ya blong lukaot long ol pig. Be samting we i mekem hem i harem moa nogud, se hem i hanggri we i hanggri, nao hem i wantem kakae ol rabis kakae we ol pig oli stap kakae. Jisas i talem se from ol bigfala trabol ya we hem i kasem, “tingting blong hem i kambak long papa blong hem bakegen.”

Jisas i gohed long store ya, i se: “Mo hem i talem [long hem wan] se: ‘Man, naoia ol man blong wok blong papa blong mi oli gat kakae we oli no naf long hem. Be mi mi stap long ples ya, mi hanggri we kolosap mi ded from. Bambae mi aot long ples ya, mi gobak long papa blong mi, mi talem long hem se: “Papa, mi mi mekem i nogud long God, mo i nogud long yu tu. Naoia i no moa stret blong oli talem mi se mi pikinini blong yu. Plis yu mekem long mi olsem we mi mi man blong wok nomo.” ’ Nao hem i girap, i stat blong gobak long papa blong hem.”

Yu save makem gud poen ya: Sipos papa blong boe ya i bin tok nogud long hem mo singaot bigwan long hem taem hem i aot long haos blong papa blong hem, ating boe ya i no save tingting olsem, we hem i mas gobak long haos blong papa blong hem. Sipos papa i bin tok kros long hem, maet hem i gobak long ples blong hem, be hem i traem faenem wok long wan narafala masta, from we hem i sem tumas blong luk fes blong papa blong hem bakegen. Be boe ya i no gat tingting olsem. Hem i wantem gohom nomo.

Long pija tok ya blong Jisas, i klia nomo we papa ya i pija blong Papa blong yumi long heven, Jeova God, we hem i laekem tumas ol pikinini blong hem mo hem i gat sore long olgeta. Mo ating yu luksave se boe ya we i lusum rod, i pija blong ol man we oli stap mekem ol nogud fasin. Ol Farisi oli tok strong long Jisas finis from we hem i kakae long haos blong ol nogud man olsem. ?Be fasbon boe long pija tok ya i minim hu?

Taem Boe We i Lusum Rod i Gobak Long Papa Blong Hem

?Taem boe ya we i lusum rod i gobak long haos blong papa blong hem, papa blong hem i mekem wanem? Lesin gud nao long ansa we Jisas i givim:

“Taem hem i stap longwe yet, papa blong hem i luk hem, mo i sore tumas long hem. Nao papa blong hem i resis, i go mitim hem, nao i putum han blong hem i goraon long hem, i kis long hem.” Papa ya i sore tumas long boe blong hem, mo hat blong hem i fulap long lav blong hem. Taswe i stret nomo we man ya i pija blong Papa blong yumi long heven, Jeova God.

Ating papa ya i harem finis we boe blong hem i stap mekem rabis fasin. Be hem i no askem fastaem long boe ya blong hem blong i eksplenem from wanem hem i mekem ol rabis fasin. No gat. Taem hem i luk boe ya, wantaem nomo hem i mekem bigfala welkam long hem. Jisas tu i gat fasin olsem. Hem i no wet blong ol nogud man mo ol man we oli tekem mane blong takis, oli kam long hem. No, be hem nomo i go lukaot olgeta blong givhan long olgeta. Ol man ya oli olsem sekenbon boe ya we hem i lusum rod long pija tok ya.

Sekenbon boe ya i stap wokbaot i kam, we hem i harem nogud. Taem papa blong boe ya i luk samting ya, hem i luksave se pikinini blong hem i sore we hem i bin mekem ol rabis fasin. Nao papa blong hem i resis, i go mitim hem. Fasin ya blong papa we i soemaot se hem i laekem boe blong hem tumas, i mekem i isi long boe ya blong talemaot ol sin blong hem. Jisas i talem se: “Nao pikinini ya blong hem i talem long hem, i se: ‘Papa, mi mi mekem i nogud long God, mo i nogud long yu tu. Naoia i no moa stret blong oli talem mi se mi pikinini blong yu.’ ”

Ating boe ya i no finisim tok blong hem yet, be wantaem nomo, papa blong hem i singaot long ol man blong hem, i se: “E, yufala i go kwik, yufala i tekem kot ya we i beswan, yufala i kam putum long hem. Yufala i kam putum ring long fingga blong hem, mo but long leg blong hem. Mo biaen, yufala i go tekem smol buluk ya we oli stap fidim i fatfat gud, yufala i kilim hem blong kakae. Bambae yumi mekem wan lafet ya, from we pikinini ya blong mi, bifo i olsem we hem i ded, be naoia hem i laef bakegen. Bifo hem i lus, be naoia mi faenem hem bakegen.” Nao olgeta “oli gohed blong mekem lafet.”

Nao long taem ya, “fasbon pikinini blong man ya, hem i stap long garen.” Taem yu lesin long las haf blong store ya blong Jisas, traem luksave mining blong fasbon pikinini ya. Nao Jisas i tokbaot fasbon boe ya, i se: “Taem hem i kamhom, taem i kam kolosap long haos, hem i harem noes ya we ol man oli stap singsing, oli stap danis. Nao hem i singaot long wan man blong wok, i askem long hem se: ‘?E, wanem ya?’ Man ya i ansa long hem, i se: ‘O, brata blong yu i kamhom bakegen. Mo papa blong yu i sanem mifala blong mifala i kilim smol buluk ya we oli fidim i fatfat gud, from we hem i kasem pikinini blong hem, i kamhom bakegen we i laef yet.’ Nao fasbon pikinini ya, hem i kros tumas, i no save go insaed long haos. Nao papa blong hem i kam afsaed blong askem long hem blong hem i kam insaed. Be hem i ansa long papa blong hem, i se: ‘!Yu luk! Plante yia finis mi mi stap wok long ples ya, we mi olsem man blong wok nomo blong yu, mo neva mi brekem tok blong yu. ?Be weswe? ?Samtaem yu yu givim sam samting long mi, olsem smol nani no wanem samting blong mi save mekem wan smol lafet wetem ol fren blong mi? !No gat! Neva yu mekem long mi olsem. Be pikinini ya blong yu i bin spolem olting blong yu blong ronem ol woman blong rod. Be taem hem i kamhom, yu go kilim smol buluk ya we oli stap fidim i fatfat gud, blong mekem lafet blong hem.’ ”

?Hu nao i olsem fasbon pikinini ya? ?Hu olgeta we oli no sore mo oli no wantem givhan long ol man we oli stap mekem nogud fasin? ?Yu ting se fasin blong fasbon pikinini ya i sem mak long fasin blong ol Farisi mo ol tija blong Loa long taem blong Jisas? Tru ya, ol Farisi oli tok agens long Jisas finis se hem i glad blong luk ol man nogud mo blong kakae wetem olgeta. Taswe Jisas i talem pija tok ya. From samting ya, i klia nomo we fasbon pikinini long pija tok ya i minim ol Farisi mo ol tija blong Loa long taem blong Jisas.

Nao Jisas i storeyan moa, i talem ansa we papa i givim long boe blong hem, i se: “Pikinini blong mi, oltaem yu yu stap kolosap long mi, mo olgeta samting blong mi oli blong yu. Be i stret nomo blong yumi mekem lafet ya, yumi glad, from we brata ya blong yu we bifo i olsem we hem i ded, naoia hem i laef bakegen. Bifo hem i lus, be naoia yumi faenem hem bakegen.”

Yumi no save wanem ansa boe ya i givim long papa blong hem, from we Jisas i no talem long pija tok ya. Yumi save se biaen long ded blong Jisas mo taem we hem i girap, i laef bakegen, “plante pris tu oli bilif long Jisas.” Olgeta we Jisas i stap storeyan wetem olgeta oli gat fasin olsem “fasbon pikinini ya.” Be biaen, maet sam long olgeta oli bin jenisim fasin blong olgeta, nao oli bilif long Jisas.

?Tufala pikinini ya i minim hu long taem blong yumi? Tufala ya i minim olgeta we oli kasem save long ol plan blong Jeova, nao oli naf blong fren gud wetem hem. Fasbon pikinini i minim samfala long ‘smol kampani,’ no “ol man blong God we oli olsem ol fasbon blong hem, we nem blong olgeta i stap long heven finis.” Fastaem, sam long olgeta oli gat tingting olsem fasbon pikinini long pija tok blong Jisas. Olgeta oli no wantem mekem welkam long wan narafala kampani we bambae oli laef long wol, hemia “ol narafala sipsip.” Oli harem nogud, olsem we narafala kampani ya i stilim ples blong olgeta.

Sekenbon pikinini we i kambak long haos blong papa blong hem, hem i gat narafala fasin. Hem i pija blong samfala we oli wosip long God fastaem, nao oli livim wosip blong God, from we oli wantem harem gud long ol rabis fasin blong wol. Be biaen, olgeta oli sore tumas, nao oli tanem tingting blong olgeta from sin blong olgeta, nao oli mekem wok blong God bakegen. Tru tumas, Papa blong yumi long heven hem i gat bigfala lav mo sore long olgeta we oli luksave se oli mas gobak long hem mo askem fogif blong hem. Luk 15:11-32; Levitikas 11:7, 8; Ol Wok 6:7; Luk 12:32; Hibrus 12:23; Jon 10:16.

▪ ?Jisas i talem pija tok ya long hu? ?From wanem?

▪ ?Jisas i storebaot moa weswan long tufala man long store ya? ?Man ya i mekem wanem fasin?

▪ ?Long taem blong Jisas, papa blong tufala pikinini ya i minim hu? ?Sekenbon pikinini i minim hu?

▪ ?Olsem wanem Jisas i soemaot sore long ol man, olsem papa blong tufala boe long pija tok ya?

▪ ?Wanem tingting blong fasbon pikinini, taem papa blong hem i mekem welkam long brata blong hem? ?Olsem wanem fasin blong ol Farisi i sem mak long fasin blong fasbon pikinini ya?

▪ ?Wanem mining blong pija tok ya blong Jisas long taem blong yumi?