Japta 94

Yumi Mas Prea Mo Gat Tingting Daon

TAEM Jisas i stap tij long Judia, hem i talem wan pija tok we i soemaot se i impoten tumas blong prea oltaem. Nao long las trep blong hem long Jerusalem, hem i storeyan long prea bakegen, from we hem i wantem makem long tingting blong ol man se oli mas prea oltaem. Ating Jisas i stap yet long Sameria no long Galili, taem hem i talem pija tok ya long ol disaepol blong hem, i se:

“Long wan velej, i gat wan jif i stap we i no save fraet long God, mo i no save tingbaot ol man tu. Mo long velej ya i gat wan wido i stap, we oltaem i stap kam krae long jif ya, se ‘Plis yu stretem bisnes ya blong mi wetem enemi blong mi.’ Be jif ya, hem i stap longtaem, we hem i no wantem wokem bisnes ya, gogo hem i tingbaot se ‘Nating we mi no save fraet long God mo mi no save tingbaot ol man, be from we woman ya i stap mekem tumas trabol ya long mi, mi mi mas stretem bisnes blong hem. Sipos no, ating bambae hem i stap kam, kam, kam, gogo mi no save winim.’ ”

Nao Jisas i joenem store ya long laef blong ol man, i se: “Yufala i mas harem tok we rabis jif ya i talem. ?Be olsem wanem long God? ?Yufala i ting se ol man blong hem we hem i jusumaot olgeta, oli save krae long hem long dei mo long naet, be hem i no save stretem bisnes blong olgeta? ?Yufala i ting se hem i no save mekem kwik?”

Jisas i no minim se Jeova God i olsem wan rabis jif. No gat. Be hem i min se nating we jif ya i wan rabis man, be hem i rere blong stretem bisnes blong wido ya from we hem i stap krae long hem oltaem. Taswe yumi save se God we i stretgud olgeta, hem i rere blong ansarem prea blong ol man blong hem, sipos oli gohed blong askem, askem, askem long hem. Ale Jisas i gohed i se: “!Maewad! Mi mi talem long yufala, God bambae i kwik blong stretem ol bisnes blong ol man blong hem.”

Tede, plante taem ol man oli no mekem i stret long ol puaman mo ol man nating. Be oli stap mekem i gud long ol haeman mo ol rijman. Be fasin blong God i narakaen. Hem i mekem i stret oltaem nomo. Taswe yumi save se bambae hem i givim panis long ol rabis man. Be long ol man blong hem, bambae hem i givim laef we i no save finis. ?Be yu ting se plante man oli bilif strong se God i save stretem kwik bisnes blong ol man? ?No smol nomo oli bilif olsemia?

Nao Jisas i gohed blong tokbaot strong bilif we i mas joen wetem prea, i se: “?Be taem we mi, mi Pikinini blong Man, mi kambak long wol, bambae mi save faenem plante man blong bilif, no bambae i no olsem?” Jisas i no ansarem kwestin ya. Be maet hem i minim se taem hem i kambak olsem King wetem olgeta paoa blong hem, smol man nomo bambae oli soemaot strong bilif.

Samfala we oli stap lesin long Jisas oli ting se bilif blong olgeta i strong nomo. Oli ting se oli stret man long fes blong God, mo ol narafala oli daon moa. Maet sam long ol disaepol blong Jisas oli tingting olsem ya tu. Ale, hem i givim wan narafala pija tok long olgeta, i se:

“I gat tu man, we tufala i go insaed long haos blong God, blong tufala i prea. Wan long tufala ya, hem i Farisi, mo narawan hem i man blong tekem mane blong takis. Mo Farisi ya, hem i stanap, i prea long tingting blong hem. Hem i talem se ‘God, mi mi talem tangkyu tumas long yu, from we mi mi no olsem ol narafala man we oli man blong stilim ol samting mo blong mekem i no stret, mo blong stilim woman. Mo mi talem tankgyu long yu, from we mi no olsem man ya blong tekem mane blong takis, tu. Tu taem long wan wik, mi mi livim kakae blong mekem wosip. Mo mi stap seraot olgeta samting we mi kasem, wan i blong yu, naen i blong mi.’ ”

Fasin blong ol Farisi i olsem: Oli stap mekem ol stret fasin long fes blong ol narafala man blong ol man ya oli tinghae long olgeta. Long evri mande mo long evri tasde oli livim kakae blong olgeta blong mekem wosip. Mo olgeta kakae we oli tekem long garen blong olgeta, oli seraot olgeta, wan i blong God, naen i blong olgeta. Oli mekem olsem wetem ol smosmol ligim tu. Sam manis bifo, long Lafet ya we oli Wokem ol Wansaed Haos, oli bin tok nogud long ol man, oli se: “Ol man olbaot ya oli no save Loa blong Moses nating. [Oli save Loa blong Moses, be oli no save mining we ol Farisi nomo oli putum long Loa ya] Taswe God i kros finis long olgeta.”

Nao Jisas i gohed long pija tok blong hem, i tokbaot ol man we oli talem se “God i kros finis long olgeta,” i se: “Be man ya blong tekem mane blong takis, hem i stap longwe, mo i no save luk antap long heven. Hem i harem nogud, i stap kilim jes blong hem from, nao i stap talem se ‘Ei God, plis yu sore long mi. Mi mi man nogud.’ ” Man ya blong tekem mane blong takis hem i gat tingting daon. Hem i save se hem i sinman. Taswe Jisas i talem se: “Mi mi talem long yufala, taem tufala ya i gohom, seken man ya i stret man long fes blong God, be fas man ya i no olsem. From we man we i stap leftemap hem, God bambae i mekem hem i stap daon, be man we i mekem hem i stap daon, God bambae i leftemap hem.”

Ale bakegen, Jisas i makem poen ya, se ol man oli mas mekem tingting blong olgeta i stap daon. Long ples ya, ol Farisi we oli ting se oli stret man, oli gat bigfala paoa. Ale, ol man oli ting se haenem i impoten tumas. Taswe yumi no mas sapraes we sam long ol disaepol blong Jisas oli letem tingting blong olgeta i go antap tu. !Yes, Jisas i tijim sam nambawan lesen long ol man long saed blong tingting daon! Luk 18:1-14; Jon 7:49.

▪ ?From wanem rabis jif ya i stretem bisnes blong wido? ?Long pija tok ya, Jisas i tijim ol man long wanem lesen?

▪ ?Taem Jisas i kambak, hem i wantem we plante man oli gat wanem kaen bilif?

▪ ?Pija tok long saed blong Farisi mo man blong tekem mane blong takis, Jisas i talem long hu?

▪ ?Ol Farisi oli gat wanem tingting we yumi mas blokem?