Yufala i Mas Luklukgud Long Laef Blong Yufala

1, 2. ?God bambae i glad long yumi sipos fasin blong yumi i olsem wanem?

FASIN blong yumi ol man, hemia se yumi no kea long tingting we narafala i gat long yumi. Be yumi ol Kristin, yumi mas tingbaot tingting we Jehova i gat long yumi. Hem i hae moa long olgeta man long heven mo long wol, mo hem i “stamba blong laef.”—Sam 36:9.

² Aposol Pita i pulum yumi blong yumi ‘luklukgud long laef blong yumi’ se yumi wanem kaen man long fes blong Jehova. Blong mekem olsem, hem i talem se yumi mas ‘tabu, mo yumi mekem ol fasin we [God] i wantem.’ (Ridim 2 Pita 3:11.) God bambae i glad long yumi sipos “ol fasin” blong yumi oli tabu mo oli klin. Hemia i min se ol tingting, ol filing, mo ol samting we yumi mekem long saed blong spirit oli mas klin. Mo tu, taem yumi stap mekem wosip long God mo yumi fren gud wetem hem, yumi mas mekem “ol fasin we hem i wantem.” I tru se yumi mas mekem ol gudfala fasin blong God i glad long yumi, be i no hemia nomo. Tingting blong yumi tu i mas stret. Jehova i stap “skelem tingting” blong man, taswe hem i save sipos ol fasin blong yumi oli klin, mo yumi mekem wosip long hem wetem fulhat blong yumi no nogat.—1 Kron. 29:17.

 3. ?Wanem ol kwestin we yumi mas askem?

³ Setan i enemi blong yumi. Hem i no wantem se yumi mekem samting we God bambae i glad long yumi from. Hem i traem evri rod blong pulum yumi blong yumi lego Jehova. Hem i no fraet nating blong yusum ol giaman trik blong hem, blong pulum yumi i gowe long God blong yumi. (Jon 8:44; 2 Kor. 11:13-15) From samting ya, i gud we yumi askem se: ‘?Setan i stap trikim man olsem wanem? ?Mi save mekem wanem blong mi fren gud oltaem wetem Jehova?’

 4. ?Mak blong Setan i blong mekem wanem long yumi, mo from wanem?

⁴ Disaepol Jemes i talem se: “Taem wan man i wantem tumas ol samting nogud, ol fasin nogud oli holem hem, oli pulum hem, nao hem i foldaon long sin. Mo taem hem i wantem tumas ol samting nogud, fasin ya bambae i kam bigwan moa long hem, nao bambae man ya i stap mekem ol samting nogud from. Mo taem hem i stap mekem ol samting nogud, fasin ya tu bambae i kam bigwan moa long hem, nao bambae hem i ded from.” (Jem. 1:14, 15) Setan i wantem se yumi no moa fren gud wetem Jehova. Taswe mak blong hem i blong spolem hat blong yumi, from we hem i save se long ples ya nao, olgeta samting we yumi laekem no yumi wantem i stat long hem.

5, 6. (1) ?Setan i yusum wanem blong spolem hat blong yumi? (2) ?Wanem trifala trap we Setan i stap yusum blong spolem hat blong yumi? ?Mo from wanem hem i savegud blong yusum ol trap ya?

⁵ ?Setan i yusum wanem blong spolem hat blong yumi? Baebol i talem se “olgeta man blong wol ya oli stap long paoa blong Setan.” (1 Jon 5:19) Taswe, Setan i yusum ‘ol samting we oli stap long wol’ blong spolem hat blong yumi. (Ridim 1 Jon 2:15, 16.a) Plante taosen yia finis, hem i stap mekem sam samting raonabaot long yumi blong trikim yumi. Yumi mas lukaotgud blong no foldaon long ol trik blong hem.—Jon 17:15.

⁶ I gat sam trik tu we Setan i yusum blong spolem hat blong yumi. Aposol Jon i tokbaot trifala trap we Setan i stap yusum blong pulum yumi. Trifala trap ya hemia se: (1) “Man i wantem tumas ol samting we bodi blong hem i wantem,” (2) man i “wantem tumas ol samting we ae blong hem i luk,” mo (3) man i “flas tumas long ol samting we hem i gat.” Setan i yusum trifala trap ya blong traem Jisas long draeples. Tede, Setan i savegud olsem wanem blong yusum ol trap ya long ol man wanwan. Hem i savegud blong yusum ol trap ya folem samting we man i wantem long hat blong hem. Hemia from we hem i stap yusum olgeta blong plante yia finis. Bambae yumi luk olsem wanem Setan i winim Iv long trik blong hem, be i no winim Jisas. Mo biaen, bambae yumi tokbaot ol samting we yumi mas mekem blong blokem Setan.

 7. ?Olsem wanem Setan i yusum fasin ya blong ‘wantem tumas ol samting we bodi i wantem,’ blong trikim Iv?

⁷ Yumi nidim kakae blong stap laef. Jehova i mekem wol long wan fasin we hem i save givim plante kakae. Setan i save se yumi nidim kakae, ale, hem i yusum kakae blong pulum yumi i gowe long God, yumi no moa mekem wok blong hem. Yu traem luk olsem wanem hem i trikim Iv, taem hem i yusum trap ya, hemia blong ‘wantem tumas ol samting we bodi i wantem.’ (Ridim Jenesis 3:1-6.) Setan i talem long Iv se bambae hem i no save ded, sipos hem i kakae frut blong tri ya we i “save mekem man i save ol fasin we i nogud mo ol fasin we i gud.” Hem i talem se sipos Iv i kakae frut ya, bambae ae blong hem i open mo bambae hem i kam olsem God. (Jen. 2:9) Setan i givim tingting long Iv se sipos hem i wantem laef, hem i no nid blong obei long God. !Be hemia wan bigfala giaman nomo! Taem Setan i putum rong tingting ya long Iv, Iv i gat tu desisen nao blong mekem: (1) Hem i save sakemaot tingting ya we Setan i talem long hem, no (2) hem i save folem tingting blong Setan mo i tekem frut ya. Nating se i gat plante narafala tri long garen ya we Iv i save kakae frut blong olgeta, be hem i jusum blong folem tingting blong Setan blong kakae frut blong tri we i stap long medel blong garen. Hem i “tekem sam frut blong tri ya, i kakae.” Tru ya, Setan i pulum hem blong wantem wan samting we God i putum tabu long hem.

 8. ?Olsem wanem Setan i yusum fasin ya blong ‘wantem tumas ol samting we bodi i wantem,’ blong trikim Jisas? ?Mo from wanem hem i no winim Jisas?

⁸ Setan i yusum sem trik ya blong traem Jisas long draeples. Jisas i no kakae blong 40 dei mo 40 naet. Ale, Setan i luk se Jisas i nidim kakae from we hem i hanggri tumas. Setan i talem se “Sipos yu yu pikinini blong God, yu talem long ol ston ya blong oli kam bred.” (Luk 4:1-3) Jisas i gat tu desisen blong mekem: (1) Hem i save yusum paoa blong hem blong mekem wan merikel blong kasem kakae we hem i nidim, no (2) hem i save jusum blong no yusum paoa ya blong mekem olsem. Jisas i save se hem i no mas yusum paoa blong hem blong kasem wan samting we hem nomo i wantem. Taswe, nating se hem i hanggri, be hem i no letem samting ya i kam impoten moa i bitim fasin fren we hem i gat wetem Jehova. Jisas i ansa long Setan i se: “Baebol i talem se, ‘Man i no save laef long kakae nomo. Evri tok we God i talem, hemia nao samting blong mekem man i laef.’”—Mat. 4:4.

 9. ?Wanem mining blong tok ya se man i “wantem tumas ol samting we ae blong hem i luk”? ?Setan i yusum trap ya olsem wanem blong trikim Iv?

⁹ Wan narafala trap we Jon i tokbaot, hemia fasin ya we man i “wantem tumas ol samting we ae blong hem i luk.” Tok ya i givim tingting ya se man i save stat blong wantem wan samting, sipos hem i jes lukluk samting ya nomo. Setan i yusum trap ya blong trikim Iv. Hem i talem long Iv se: “Bambae ae blong yutufala i open.” Yes, moa we Iv i stap lukluk frut ya, moa we hem i wantem tumas frut ya. Iv i “luk we tri ya i gud tumas.”

10. ?Olsem wanem Setan i yusum trap ya blong ‘wantem tumas samting we ae i luk’ blong trikim Jisas? ?Mo Jisas i ansa long Setan olsem wanem?

¹⁰ ?Olsem wanem long Jisas? ?Setan i winim hem? Setan i “soemaot long [Jisas] olgeta kantri long wol ya, mo i talem long hem se, ‘Bambae mi mi putum olgeta kantri ya, wetem olgeta gudgudfala samting blong olgeta, oli stap long han blong yu.’” (Luk 4:5, 6) Jisas i no luk olgeta kingdom blong wol ya wetem prapa ae blong hem. Be Setan i ting se, sipos hem i soemaot wan vison blong ol gudgudfala samting blong ol kantri ya, bambae hem i pulum tingting blong Jisas. Setan i talem se: “Sipos yu nildaon, yu mekem wosip long mi, bambae olgeta samting ya i blong yu.” (Luk 4:7) Jisas i no wantem folem tingting blong Setan. Hem i ansa stret long Setan se: “Baebol i talem se, ‘Yu mas mekem wosip long Hae God we i God blong yu, mo bambae yu mas mekem wok blong hem nomo.’”—Luk 4:8.

11. ?Setan i trikim Iv olsem wanem?

¹¹ Jon i tokbaot fasin ya tu we man i “flas tumas long ol samting we hem i gat.” Bifo olgeta, Adam mo Iv nomo tufala i stap long wol, taswe tufala i no save ‘flas long ol samting we tufala i gat.’ Be nating se i olsem, tufala i flas. Taem Setan i trikim Iv, hem i mekem Iv i ting se God i stap haedem wan samting we i gud long hem. Setan i talem long Iv se sipos hem i kakae frut blong ‘tri ya we i save mekem man i save ol fasin we i gud mo ol fasin we i nogud,’ bambae hem i kam “olsem [God], we i save ol fasin we i nogud mo ol fasin we i gud.” (Jen. 2:17; 3:5) Taswe i olsem we Setan i stap talem long Iv se hem i no nidim Jehova. Ale from we Iv i flas, hem i folem giaman tingting blong Setan. Hem i ting se bambae hem i no ded taem hem i kakae frut blong tri ya we God i putum tabu long hem. !Be hem i rong olgeta!

12. ?Setan i wantem se Jisas i mekem wanem, mo Jisas i talem wanem long hem?

¹² Jisas i defren olgeta long Iv. Jisas i gat tingting daon mo yumi mas folem fasin blong hem. Setan i traem narafala rod blong trikim Jisas. Hem i wantem se Jisas i mekem wan samting blong traem God. Be Jisas i sakemaot Setan kwiktaem nomo, from we hem i no wantem mekem eni samting we i save pulum hem blong traem God. !Sipos Jisas i lesin long Setan, hemia i soemaot se hem i flas! Be Jisas i no mekem olsem. Hem i talem long Setan se: “Baebol i talem se, ‘Yu no save traem Hae God we i God blong yu.’”—Ridim Luk 4:9-12.

13, 14. ?Setan i stap trikim yumi olsem wanem?

¹³ Tede, Setan i yusum ol semkaen trik we hem i bin yusum long Iv mo Jisas. Hem i yusum fasin ya we “man i wantem tumas ol samting we bodi blong hem i wantem.” Hem i mekem se wol ya we hem i bos long hem, i leftemap ol rabis fasin olsem, doti fasin blong man wetem woman, mo fasin blong bitim mak long kakae mo dring. Hem i yusum ol rabis pija long Intenet blong pulum ae blong ol man we oli no stap lukaotgud taem oli yusum Intenet, nao oli ‘wantem tumas ol samting ya we ae i luk.’ Mo tu hem i pulum ol man blong oli praod nao oli wantem hae posisen, haenem, mo ol sas samting blong oli save kam ‘flas tumas long ol samting we oli gat.’

¹⁴ Setan i yusum “ol samting blong wol ya” olsem bet we man blong huk i stap yusum blong kasem fis. Oli naes be aninit i gat wan huk i haed i stap. Setan i yusum ol samting we ol man oli nidim evri dei, blong pulum olgeta blong brekem loa blong God. Hem i mekem ol trik ya blong spolem hat blong yumi, nao yumi wantem tumas wan samting we i nogud. Hem i wantem mekem yumi putum ol samting we yumi nidim, i stap fastaem long wok we yumi mekem blong Jehova. ?Olsem wanem? ?Yu ting se Setan i save kasem yumi tu long ol trik ya blong hem?

15. ?Yumi save folem eksampol blong Jisas olsem wanem blong stanap strong agensem ol trik blong Setan?

¹⁵ Iv i foldaon long trik blong Setan, be Jisas i stanap strong. Evri taem we Setan i traem Jisas, Jisas i yusum wan vas blong Baebol blong givim ansa long hem. Hem i yusum ol tok olsem se: “Baebol i talem se.” Yes, sipos yumi stadi gud long Baebol, bambae yumi save gud ol vas blong Baebol. Nao taem wan samting i traem yumi bambae yumi save tingbaot ol vas ya mo yusum olgeta. (Sam 1:1, 2) Taem yumi tingbaot stori blong ol man long Baebol we oli holemstrong long God, hemia bambae i givhan long yumi blong folem fasin blong olgeta. (Rom 15:4) Sipos yumi lavem Jehova tru, yumi no laekem ol samting we hem i no laekem, mo yumi laekem samting we hem i laekem, bambae hem i lukaotgud long yumi.—Sam 97:10.

16, 17. Sipos yumi “yusum gud tingting blong yumi,” ?hemia i save givhan long yumi olsem wanem?

¹⁶ Aposol Pol i talem se yumi mas “yusum gud tingting blong yumi,” blong luklukgud sipos yumi gat tingting blong God no tingting blong wol. (Rom 12:1, 2) Yumi mas bos strong long tingting blong yumi. Hem i talem se: “Mifala i stap pulumdaon olgeta samting we ol man oli stap stanemap long flas blong olgeta, we oli blong blokem ol man blong oli no save God. Mo mifala i stap tanem olgeta rabis tingting blong man, blong mekem olgeta oli ona long Kraes.” (2 Kor. 10:5) Ol samting we yumi stap tingbaot oli save gat paoa long yumi, taswe yumi mas gohed blong “mekem ol fasin” we oli stret mo oli gud.—Fil. 4:8.

¹⁷ Yumi no save stap klin long fes blong God, sipos yumi stap tingting long ol nogud samting oltaem, mo sipos yumi wantem tumas ol samting we oli no stret. Yumi mas lavem Jehova we ‘laef blong yumi i klin gud,’ no wetem wan hat we i klin. (1 Tim. 1:5) Be hat blong yumi i save trikim yumi, mo maet yumi no luksave se ol samting blong wol ya oli stap spolem yumi. (Jer. 17:9) From samting ya, yumi mas stadi gud long Baebol blong ‘luklukgud long laef blong yumi. Yumi mas traem faenemaot se yumi stap holem yet fasin blong bilif, no yumi no moa holem.’—2 Kor. 13:5.

18, 19. ?From wanem yumi mas traehad blong stap olsem man we Jehova i glad long yumi?

¹⁸ Wan narafala samting we i save givhan long yumi blong stanap strong, hemia blong tingbaot ol tok blong aposol Jon we i talem se: “Wol ya wetem ol samting we ol man blong hem oli wantem, oli stap lus. Be man we i stap mekem ol samting we God i wantem, hem bambae i no save lus samtaem.” (1 Jon 2:17) I luk olsem se wol blong Setan mo ol samting we oli stap long hem oli tru mo bambae oli stap blong olwe. Be bambae oli mas finis wan dei. Sipos yumi tingbaot samting ya, bambae yumi no foldaon long ol trik blong Setan.

¹⁹ Aposol Pita i tokbaot samting we yumi mas mekem blong God i glad long yumi. Hem i talem se yumi mas stap ‘wet long Dei ya blong God blong i kamtru mo yumi mas gohed blong wok blong mekem Dei ya i kamtru kwik. Long Dei ya, bambae faea i kakae skae we i finisim olgeta, mo ol sta bambae oli ronaot long faea ya we i hot we i hot.’ (2 Pita 3:12) I no longtaem, dei ya bambae i kamtru mo Jehova bambae i spolemgud evri haf blong wol blong Setan. Gogo kasem taem ya, Setan bambae i gohed blong yusum “ol samting blong wol ya” blong traem yumi, olsem we hem i mekem long Iv mo long Jisas. Yumi no mas wantem tumas ol samting we bodi blong yumi nomo i wantem, olsem we Iv i mekem. From we sipos yumi mekem olsem, yumi save foldaon long trap ya blong luk Setan olsem se i god blong yumi. Yumi mas mekem olsem Jisas. Yumi mas stanap strong agensem ol trik blong Setan, nating se i luk olsem we oli gud mo oli naes. I gud yumi luklukgud long laef blong yumi, mo yumi traehad blong mekem Jehova i glad long yumi.