Japta 25

Jisas i Sore Long Wan Man We i Gat Leprosi

JISAS wetem fofala disaepol blong hem oli wokbaot i go long ol taon long Galili. Nyus long saed blong ol gudfala wok we hem i stap mekem i goaot, i kavremap olgeta velej long ples ya. Nyus ya i kasem wan taon, nao long taon ya i gat wan man we i gat sik ya leprosi. Luk i wan dokta, mo store blong hem i talem se “bodi blong [man ya] i fulap long leprosi.” Taem sik ya i kam strong, sloslou hem i stap spolem ol haf blong bodi blong man. !Sore tumas long man ya!

Taem Jisas i kamtru long taon ya, man ya we i gat leprosi, i kam long hem. Loa blong God i talem se wan man we i gat sik ya leprosi, taem i stap longwe yet, hem i mas singaot se: “!Doti, doti!” Hem i mas mekem olsem blong blokem ol man, oli no kam kolosap tumas long hem. Olsem ya nao, sik ya i no save kasem fulap man. Ale man ya we i gat leprosi i foldaon, i slip long graon we fes blong hem i godaon blong i ona long Jisas. Nao i krae long hem, i se: “!Plis, Masta! Sipos yu yu wantem, yu save mekem mi mi gud bakegen.”

!Man ya i gat strong bilif long Jisas! !Mo ating olgeta man oli sore tumas long hem, from we rabis sik ya i mekem bodi blong hem i nogud olgeta! ?Bambae Jisas i mekem wanem? ?Sipos yu yu gat paoa olsem Jisas, bambae yu yu mekem wanem? Jisas i sore tumas long hem, nao i putum han blong hem long man ya, i talem long hem se: “Mi mi wantem. Bodi blong yu i klin.” Nao wantaem nomo, leprosi ya i finis long man ya, bodi blong hem i klin.

?Yu yu wantem we wan man we i gat bigfala sore olsem i kam king long yu? From fasin we Jisas i soemaot long man ya, yumi save se taem hem i rul long Kingdom blong hem, profet tok ya blong Baebol bambae i kamtru. Hem i se: “Hem bambae i gat sore long ol puaman, mo long olgeta we oli no strong, hem bambae i stap sevem laef blong olgeta we oli sot long ol samting.” Yes, long taem ya, Jisas bambae i mekem samting we hem i wantem tumas blong mekem. Bambae hem i givhan long olgeta sikman.

Taem Jisas i no tekemaot leprosi long man ya yet, be ol man oli stap tokbaot minista wok blong hem olbaot long ples ya. Nao Jisas i talem wan samting long man ya, blong mekem profet tok blong Aesea i kamtru. Hem i se: “Yu no talemaot bisnes ya long ol man.” Nao hem i gohed i se: “Be yu go pas long pris blong i luk bodi blong yu. Mo yu go mekem wosip long God, yu givim presen long hem olsem we Loa blong Moses i talem, blong soemaot long ol man we sik blong yu i finis.”

Be man ya i glad tumas, taswe taem hem i goaot, hem i stat talemaot merikel ya long open ples nomo. Hem i talemaot nyus ya i go long evri ples. I luk olsem we samting ya i mekem plante toktok i goraon, from we Jisas i no moa save wokbaot insaed long ol velej long fes blong ol man. Hem i stap afsaed nomo, long ol ples we i no gat man. Nao plante man oli aot long evri ples, oli stap kam long hem blong lesin long hem, mo blong hem i tekemaot sik long bodi blong olgeta. Luk 5:12-16; Mak 1:40-45; Matyu 8:2-4; Levitikas 13:45; 14:10-13; Ol Sam 72:13; Aesea 42:1, 2.

▪ ?Sik ya leprosi i save mekem wanem long bodi blong man? ?Taem wan man i gat leprosi mo i stap longwe yet long ol man, hem i mas singaot wanem?

▪ ?Wan man we i gat leprosi i askem wanem long Jisas? ?Ansa blong Jisas i tijim yumi long wanem?

▪ ?Olsem wanem man ya i no obei long oda blong Jisas? ?Wanem samting i kamaot from?