Japta 27

Jisas i Singaot Matyu

JISAS i mekem wan sikman we haf bodi blong hem i ded, i gud bakegen. Smoltaem biaen, hem i aot long Kapaneam, i wokbaot i go long sanbij long lugun blong Galili. Mo bakegen, plante man oli kam long hem mo hem i stap tijim olgeta. Taem hem i wokbaot smol i go, hem i luk Matyu, we narafala nem blong hem Livae. Hem i wan man blong tekem mane blong takis, mo hem i stap sidaon long ofis blong hem. Nao Jisas i singaot hem, i se: “Yu biaen long mi, yu man blong mi.”

Ating Matyu i save finis plante tijing blong Jisas. Pita, mo Andru, mo Jemes, mo Jon, fofala ya tu oli save plante samting finis taem Jisas i singaot olgeta. Ale, Matyu i mekem sem mak long fofala. Hem i girap, i livim wok blong hem we i tekem mane blong takis, nao hem i biaen long Jisas.

Biaen, Matyu i mekem wan bigfala lafet long haos blong hem. Maet hem i mekem samting ya blong makem taem we Jisas i singaot hem, i biaen long hem. Ale, Jisas wetem ol disaepol blong hem oli kam kakae long haos blong Matyu. Mo tu, plante man we bifo oli fren wetem Matyu oli kam kakae wetem olgeta. Be ol man Jyu oli no laekem Matyu mo ol fren blong hem from we oli tekem mane blong takis, oli givim long gavman blong Rom ya we ol man Jyu oli no laekem nating. Mo tu, plante taem ol man blong tekem mane blong takis oli mekem i no stret. Oli askem moa mane antap long mane blong takis, blong oli save winim sam samting blong olgeta.

Nao taem ol Farisi oli luk we Jisas i stap kakae wetem ol man nogud ya mo ol man blong tekem mane blong takis, oli talem long ol man blong Jisas, se: “?Olsem wanem tija blong yufala i stap kakae wanples wetem ol man ya blong tekem mane blong takis mo ol man nogud ya?” Jisas i harem ol tok ya blong olgeta, nao hem i talem se: “Olgeta we bodi blong olgeta i strong oli no wantem dokta. Olgeta we oli gat sik, yes, oli wantem. I gud yufala i go lanem mining blong tok ya blong Baebol we God i talem se ‘Mi mi no wantem we man i stap kilim anamol blong mekem wosip, mi mi wantem we man i gat sore long man.’ From we mi mi no kam blong singaot olgeta we oli stret man finis se ‘Yufala i biaen long mi.’ Mi mi kam blong singaot ol man nogud blong oli biaen long mi.”

Matyu i singaot ol man ya blong tekem mane blong takis oli kam kakae long haos blong hem, from we hem i wantem se oli lesin long tok blong Jisas, nao Jisas i save givhan long olgeta. Ale Jisas i stap kakae wetem olgeta blong halpem olgeta blong oli frengud wetem God. Jisas i no stap tok nogud long olgeta mo i no daonem olgeta, olsem ol flas man Farisi oli stap mekem. No gat. Hem i sore long olgeta. Taswe hem i givhan long olgeta olsem wan dokta long saed blong speret.

Taem Jisas i soemaot sore long ol man nogud, hem i no stap agri wetem ol nogud fasin blong olgeta. Be hem i stap soemaot filing blong hem long olgeta, olsem hem i mekem long olgeta we oli sik long saed blong bodi. Traem tingbaot taem we hem i sore long wan man we hem i gat leprosi. Nao hem i putum han blong hem long man ya, i talem se: “Mi mi wantem. Bodi blong yu i klin.” Yumi tu, yumi mas soemaot fasin sore olsem Jisas. Yumi mas givhan long ol man we oli gat nid. Samting ya i tru moa long olgeta we oli gat nid long saed blong speret. Matyu 8:3; 9:9-13; Mak 2:13-17; Luk 5:27-32.

▪ ?Matyu i stap wea taem Jisas i luk hem?

▪ ?Matyu i stap mekem wanem wok? ?From wanem ol man Jyu oli no laekem ol man we oli stap tekem mane blong takis?

▪ ?Olsem wanem ol Farisi oli tok agens long Jisas? ?Jisas i talem wanem long ­olgeta?

▪ ?From wanem Jisas i kampani wetem ol man nogud ya?