Japta 28
Kwestin Long Saed Blong Fasin Blong Livim Kakae
ISTAT long taem we Jisas i mekem Lafet blong Pasova long yia 30 K.T., kolosap wan yia i pas finis. Jon Baptaes i stap plante manis finis long kalabus. Hem i wantem we ol disaepol blong hem oli folem Kraes. Be sam nomo oli mekem.
Nao sam disaepol blong Jon Baptaes oli kam long Jisas, oli askem long hem se: “Yu luk. Mifala i save livim kakae blong mekem wosip, mo ol Farisi tu oli save mekem fasin ya. ?Be ol man blong yu oli no save mekem olsem from wanem?” Ol Farisi oli livim kakae blong olgeta tu taem long evri wik blong mekem wosip. Hemia wan kastom blong skul blong olgeta. Mo ating, ol disaepol blong Jon oli folem kastom ya tu. Maet oli harem nogud from we Jon i stap kalabus, ale oli stap livim kakae blong olgeta from. Maet oli ting se ol disaepol blong Jisas oli mas mekem olsem blong soemaot sore blong olgeta tu.
Nao Jisas i ansa long olgeta, i se: “?Taem we man we i mared i stap yet long lafet wetem ol fren blong hem, yufala i ting se ol fren blong hem oli save krae? No gat. Be i gat taem i stap kam we ol man bambae oli save tekemaot man ya we i mared, i gowe long ol fren blong hem. Ale long taem ya bambae ol fren blong hem oli save livim kakae blong olgeta.”
Bifo, Jon i talem long ol disaepol blong hem se Jisas i olsem man we i mared. Ol disaepol blong Jon oli save tingtingbak long tok ya blong hem. Taem Jisas i stap yet, Jon i no save ting se i stret blong livim kakae blong hem. Mo ol disaepol blong Jisas tu oli no save mekem olsem. Biaen nomo, taem Jisas i ded, hemia nao taem we ol disaepol blong hem oli save krae mo livim kakae. Be afta, taem hem i laef bakegen mo hem i go antap long heven, oli no moa gat risen blong krae mo livim kakae.
Nao Jisas i talem tu pija tok long olgeta, i se: “I no gat man we i save tekem wan nyufala pis kaliko, i somap long olfala klos blong hem blong blokem hol we i stap long hem. From we nyufala pis kaliko ya i save brekemaot haf blong olfala klos ya, nao hol blong hem i save kam bigfala moa. Mo i no gat man we i save tekem skin blong nani we oli yusum finis blong putum waen long hem, blong putum waen we oli jes mekem i go long hem bakegen. Sipos man i mekem olsem, skin ya bambae i bosta, nao waen bambae i ronaot, mo skin tu bambae i nogud. Be nyufala waen i mas gat nyufala skin blong nani blong i stap long hem. Nao waen mo skin, tufala i save stap gud.” ?Olsem wanem tufala pija tok ya i joen wetem fasin blong livim kakae?
Jisas i traem givhan long ol disaepol blong Jon Baptaes blong oli luksave se ol man we oli biaen long hem oli no nidim blong folem ol olfala kastom blong ol man Jyu, olsem kastom blong livim kakae. Jisas i no kam blong traem mekem ol fasin blong wosip we oli olfala finis, oli gud bakegen. No gat. Olfala fasin blong wosip kolosap i finis nao. Skul blong ol man Jyu i fas long ol kastom blong man nomo. Be ol Kristin oli no mas wosip olsem. Kristin fasin i no olsem wan nyufala pis kaliko we oli somap long wan olfala klos. Mo i no olsem wan nyufala waen we oli putum long olfala skin blong nani. Matyu 9:14-17; Mak 2:18-22; Luk 5:33-39; Jon 3:27-29.
▪ ?Hu ya ol man we oli livim kakae blong mekem wosip? ?From wanem oli mekem olsem?
▪ ?From wanem ol disaepol blong Jisas oli no livim kakae taem Jisas i stap yet? ?Mo biaen tu, from wanem bambae oli no moa gat risen blong livim kakae?
▪ ?Jisas i talem wanem tufala pija tok? ?Wanem mining blong tufala pija tok ya?