Japta 55

Plante Disaepol Blong Jisas Oli Gowe Long Hem

JISAS i stap tij long haos prea long Kapaneam. Hem i stap talem long ol man se hem nao hem i prapa bred we i kamaot long heven. Bifo finis hem i storeyan long ol man long saed ya, taem oli faenem hem kolosap long Kapaneam. Hemia ol man we oli kakae bred mo fis we Jisas i givim long olgeta from wan merikel blong hem, nao oli klaem long ol bot long is saed blong bigfala lugun blong Galili, oli gokros long lugun ya blong lukaot Jisas.

Nao Jisas i gohed blong storeyan wetem olgeta long haos prea long Kapaneam, i se: “Bred ya we mi bambae mi givim, hemia mit blong bodi blong mi, we bambae mi givim blong ol man long wol oli gat laef.” Tu yia bifo, long 30 K.T., Jisas i bin storeyan long Nikodimas. Hem i bin talem long hem se God i laekem tumas ol man long wol, taswe hem i givim stret Pikinini blong hem blong sevem olgeta. Nao tu yia biaen, long haos prea long Kapaneam, hem i talem se eni man long wol we i kakae mit blong bodi blong hem, hem i save gat laef we i no save finis. Hem i minim se man we i soemaot se hem i bilif long Jisas mo long ded blong hem we bambae i kamaot i no longtaem, man ya i save laef gogo i no save finis.

Nao tok ya i mekem ol man ya oli girap, oli toktok tumas long olgeta. Oli talem se: “?Weswe man ya i save givim mit blong bodi blong hem blong yumi kakae?” Jisas i wantem we ol man ya oli save se tok blong hem i wan pija tok. Hem i no stap tokbaot prapa mit blong bodi blong hem. Blong makem samting ya long tingting blong olgeta, hem i talem sam narafala tok bakegen long olgeta. Be sipos oli no luksave se tok ya tu i pija tok, oli save harem nogud moa long Jisas.

Tok blong Jisas i olsem se: “Sipos yufala i no kakae mit blong bodi blong mi, yufala i no dring blad blong mi, we mi mi Pikinini blong man, bambae yufala i no gat laef long yufala. Man we i kakae mit blong mi mo i dring blad blong mi, hem i gat laef we i no save finis. Mo long Lasdei, mi bambae mi mekem hem i laef bakegen long ded. From we mit blong bodi blong mi, hem i prapa kakae blong man, mo blad blong mi, hem i prapa dring blong man. Man we i kakae mit blong mi, i dring blad blong mi, laef blong mi i joen long laef blong hem, mo laef blong hem i joen long laef blong mi.”

Tru ya, sipos Jisas i stap talem long olgeta se oli mas kakae prapa mit blong bodi blong hem, mo oli mas dring prapa blad blong hem, tok ya i no stret. Be Jisas i no stap talem samting ya long olgeta. No gat. Hem i yusum pija tok ya blong makem long tingting blong olgeta se ol man we oli wantem laef blong olwe, oli mas soemaot bilif long ded blong Jisas, long taem we bambae hem i givim stret bodi mo blad blong hem blong sevem ol man. Be plante man oli no harem tok ya blong Jisas, mo plante disaepol blong hem tu oli no traehad blong kasem save long samting we hem i stap tijim long olgeta. Oli talem se: “!Man, tok ya i strong tumas! ?Hu i save harem tok olsem?”

Nao Jisas i save se ol man blong hem oli stap toktok agens long tok ya blong hem. Nao hem i talem long olgeta se: “?Olsem wanem? ?Tok ya i mekem yufala i trabol? ?Be sipos yufala i luk mi, mi Pikinini blong man, mi go antap bakegen long ples ya we mi stap long hem fastaem, olsem wanem nao? . . . Ol tok ya we mi mi talem long yufala oli blong Tabu Speret, oli save givim laef. Be i gat sam long yufala yet we oli no bilif.”

Jisas i gohed long tok blong hem, i se: “From samting ya nao, mi mi talem finis long yufala, se ‘I no gat man i save kam long mi, sipos Papa blong mi i no openem rod long hem.’ ” Nao biaen long tok ya plante disaepol blong hem oli gowe long hem, oli no moa biaen long hem bakegen. Nao Jisas i askem long ol 12 aposol blong hem, i se: “?Olsem wanem long yufala? ?Yufala tu i wantem gowe long mi?”

Nao Pita i ansa long hem, i se: “?Masta, mifala i save go long hu? Yu nomo yu gat ol tok blong laef ya we i no save finis. Mo mifala i bilif finis long yu. Mifala i save finis we yu yu Tabu Man ya blong God.” Nating we hem mo ol narafala aposol oli no kasem save long olgeta samting we Jisas i stap tijim long olgeta long bisnes ya, be tok ya blong Pita i soemaot se hem i stap tru nomo long Jisas.

Jisas i glad long ansa blong Pita. Be hem i gohed blong talem long olgeta: “?Olsem wanem? ?Yufala i no ting se mi mi jusumaot yufala, ol twelef man blong mi? Be tru, wan long yufala hem i devel.” Hem i stap tokbaot Judas Iskariot. Ating long taem ya nao, Jisas i luksave “fastaem” we wan rabis tingting i stap long Judas. Judas i stat kam nogud nao, i stat folem rod we i blong go lus nomo.

Jisas i jes bin ronwe long ol man, blong oli no save fosem hem blong i kam king long olgeta. Oli stap harem nogud long hem from. Maet oli stap tingting se: ‘?Weswe man ya i Mesaea? Sipos hem i Mesaea, hem i mas glad blong kam king. Hemia prapa wok long hem.’ Kwestin ya i mas stap long tingting blong ol man ya. Jon 6:51-71; 3:16.

▪ ?Jisas i givim bodi blong hem blong sevem hu? ?Olsem wanem olgeta ya oli save ‘kakae mit blong bodi blong hem’?

▪ ?Ol man oli sek long wanem tok blong Jisas bakegen? ?Be hem i talem tok ya blong makem wanem long tingting blong olgeta?

▪ ?Taem plante man oli gowe long Jisas, oli no moa biaen long hem, Pita i talem wanem?