Japta 66

Lafet Ya We Oli Wokem Ol Wansaed Haos

TRI YIA bifo, Jisas i tekem baptaes, nao hem i statem bigfala wok blong hem. Fulap man oli save Jisas, from we plante taosen man oli luk ol merikel we Jisas i mekem finis, nao oli stap talemaot ol wok blong hem olbaot long evri ples. Nao taem ol man oli stap hivap long Jerusalem blong mekem Lafet we oli Wokem ol Wansaed Haos, oli stap lukaot Jisas, oli stap askem olbaot se: “?Hem i stap wea?”

Samfala oli laekem Jisas, samfala oli no laekem hem. Sam man oli stap talem se: “Hem i wan gudfala man ya.” Be sam narafala man oli stap talem se: “No gat. Hem i stap gyaman nomo long ol man.” Olgeta oli stap tokbaot hem smosmol olsem ya, taem oli stap kam wanples blong mekem lafet ya. Be i no gat man we i save tokbaot Jisas long open ples, from we oli fraet long ol lida blong ol man Isrel.

Lafet ya i gohed wan ful wik, nao long medel blong wik ya, Jisas i kamtru. Hem i go long haos blong God, i stap tijim ol man. Ol man oli sapraes tumas long nambawan fasin blong Jisas blong tijim ol man. Jisas i no skul blong kam wan tija, taswe ol lida blong ol man Isrel oli talem se: “?Man ya i save ol samting ya blong Baebol olsem wanem? Hem i no skul long wan tija.”

Nao Jisas i ansa long olgeta, i se: “Ol tok ya we mi stap tijim ol man long hem, oli no blong mi nomo, oli kamaot long hemia we i sanem mi. Mo sipos wan man i save mekem tingting blong hem i strong blong mekem ol samting we God i wantem, hem bambae i faenemaot we tok ya blong mi i kamaot long God, no i kamaot long mi nomo.” Long tijing blong Jisas, hem i stap folem ol loa blong God. Taswe i klia we hem i no stap leftemap hem wan, be hem i stap leftemap nem blong God nomo. Nao Jisas i tok strong long olgeta, i se: “Yufala i stap talem se Moses i givim Loa long yufala, be i no gat wan long yufala we i folem ol loa ya.”

Nao Jisas i askem long olgeta se: “?Nao from wanem yufala i wantem kilim mi mi ded?”

Plante man we oli stap lesin long Jisas oli strenja, we oli kam long Jerusalem blong mekem lafet ya nomo. Oli no save se ol man oli stap lukaot Jisas from we oli wantem kilim hem i ded. Jisas i wan nambawan tija. Taswe oli no save bilif se i gat sam man we oli wantem kilim Jisas i ded. Oli ting se Jisas i krangke lelebet blong tingting olsemia. Nao oli talem long hem se: “Man, wan devel i stap long yu finis. ?Hu i wantem kilim yu?”

Nating we ol man ya oli no luksave, be ol lida blong ol man Jyu oli wantem kilim Jisas i ded. 18 manis bifo, oli traem kilim hem i ded, taem hem i mekem wan sikman i gud bakegen long Sabat dei. Ale naoia Jisas i tok blong traem soemaot long olgeta se tingting blong olgeta i no stret. Hem i se: “Moses i talem long yufala bifo, se bambae yufala i mekem sakomsaes long ol pikinini boe blong yufala. Mo from loa ya, sipos yufala i gat pikinini boe, yufala i save mekem sakomsaes long hem long Sabat dei. . . . ?Oraet, be from wanem yufala i kros long mi from we mi mekem olgeta bodi blong wan man i gud bakegen long Sabat dei? I nogud yufala i stap jajem man long fasin ya we yufala i jes lukluk nomo. Yufala i mas jajem man long fasin we i stret gud.”

Sam man blong Jerusalem, oli luk ol samting ya we i kamaot, nao oli talem se: “?Hemia man ya we olgeta oli wantem kilim hem i ded, a? Be yufala i luk. Hem i stap tijim ol man long klia ples nomo, mo i no gat man we i stap tok agens long hem. Fasin ya i olsem we ol lida blong yumi oli tingbaot hem finis se hem i Mesaea. ?Be i tru olsem?” Nao ol man ya blong Jerusalem oli eksplenem from wanem oli no bilif we Jisas hem i Kraes, oli se: “Yumi save ples ya we man ya i kamaot long hem. Be taem Mesaea i kamtru, bambae i no gat man i save weples hem i kamaot long hem.”

Jisas i ansa long olgeta, i se: “Yes, yufala i save mi, mo yufala i save ples we mi mi kamaot long hem. Be mi mi no kam long tingting blong mi nomo. I gat wan i stap we hem i sanem mi, mo hem i tru. Yufala i no save hem, be mi mi save hem, from we mi mi kamaot long hem, mo hem i sanem mi.” Nao olgeta oli traem holem Jisas. Ating oli wantem putum hem long kalabus, no oli wantem kilim hem i ded. Be i no gat man i save holem hem, from we hem i no stret taem blong hem i ded yet.

Be long olgeta we oli stap long ples ya, i gat plante man we oli bilif long hem. Olgeta i gat plante risen blong bilif long hem: Hem i wokbaot antap long solwora, hem i blokem bigfala win, hem i mekem bigsi i kam kwaet, hem i yusum 5 bred mo 2 fis nomo blong givim kakae long plante taosen man, hem i mekem ol sikman oli kamgud bakegen, hem i mekem ol man we oli no save wokbaot oli wokbaot, hem i mekem ae blong ol blaenman oli luk bakegen, hem i fiksimap sik ya leprosi long plante man, mo hem i mekem plante dedman oli laef bakegen. Ale ol man ya oli stap talem se: “?Be sipos Mesaea i kam, yufala i ting se bambae i save mekem plante saen moa, i winim man ya?”

Nao taem ol Farisi oli harem ol tok ya we ol man oli stap talem long saed blong Jisas, olgeta wetem ol jif pris, oli sanem ol soldia oli kam blong holem Jisas. Jon 7:11-32.

▪ ?Wetaem Jisas i kamtru long lafet ya? ?Ol man oli stap tokbaot hem olsem wanem?

▪ ?From wanem samfala oli talem se Jisas i gat wan devel i stap long hem?

▪ ?Sam man long Jerusalem oli gat wanem tingting long saed blong Jisas?

▪ ?From wanem plante man oli bilif long Jisas?