Japta 67

Oli No Save Holem Jisas

LAFET ya we oli Wokem ol Wansaed Haos i stap gohed yet. Nao ol lida blong ol man Jyu oli sanem ol soldia, oli kam blong holem Jisas. Jisas i no traem haed. Hem i stap gohed nomo long wok blong hem, hem i stap tijim ol man long open ples. Mo hem i talem se: “Smoltaem moa bambae mi mi save stap wetem yufala, nao biaen bambae mi gobak long hemia we i sanem mi. Long taem ya, bambae yufala i save traem lukaot mi, be bambae yufala i no save faenem mi. Ples ya we bambae mi stap long hem, yufala bambae i no save kam long hem.”

Nao ol lida blong ol man Isrel oli stap asaskem long olgeta se: “?Bambae hem i go long weples ya we yumi no save faenem hem? ?Bambae hem i go long ol man Isrel we oli stap longwe wetem ol man Gris, blong i tijim ol man Gris, no wanem? Hem i talem se ‘Long taem ya, bambae yufala i save traem lukaot mi, be bambae yufala i no save faenem mi. Ples ya we mi bambae mi stap long hem, yufala bambae i no save kam long hem.’ ?Tok ya i min wanem?” Jisas i stap tokbaot ded blong hem we i kam kolosap nao. Biaen, bambae hem i girap, i laef bakegen, i go antap long heven. Long ples ya, ol enemi blong hem oli no save kam.

Hemia laswan dei blong lafet ya, namba seven dei. Evri moning long lafet ya, wan pris i mas wokbaot i go long wora ya we oli kolem Saeloam. Nao hem i mas tekem sam wora long ples ya, i karem i kam, i kafsaedem wora ya i go long olta gogo wora ya i fulap daon raon long olta. Ating nekis tok blong Jisas i pulum ol man blong tingbaot samting ya we oli mekem evri dei long lafet ya. Jisas i singaot bigwan, i se: “Man we i tosta, i gud hem i kam long mi blong i dring. Man we i bilif long mi, hem bambae i olsem we Baebol i talem, i se: ‘Wora we i laef, bambae i kamaot long tingting blong hem, olsem wan bigfala wora we i ron.’ ”

Jisas i stap tokbaot ol bigfala samting we oli mas kamaot, taem bambae tabu speret i kam long olgeta. Wan yia biaen, tabu speret i kamdaon long olgeta we oli stap hivap long lafet ya Pentekos. Long taem ya, i olsem we wora we i laef i ron bigfala long ol 120 disaepol we oli hivap long Pentekos, nao oli stap tijim ol narafala man. Be go kasem taem ya, oli no gat tabu speret, from we tabu speret i no makemaot sam disaepol blong Kraes yet, se bambae oli go antap long heven.

Nao sam long ol man ya we oli stap, oli harem tok blong Jisas, nao oli talem se: “Man ya i profet ya we olgeta bifo oli bin tokbaot.” Oli stap tokbaot profet ya we i hae moa long Moses, olsem profet tok ya i bin talem. Mo sam narafala man oli talem se: “Hemia i Mesaea ya.” Be sam narafala man oli talem se: “?Wanem? ?Yufala i ting se Mesaea i save kamaot long Galili? Baebol i talem we Mesaea bambae i kamaot long laen blong King Deved ya bifo, mo long velej ya Betlehem we King Deved i kamaot long hem.”

Nao ol man oli seraot from hem. Samfala oli wantem putum hem long kalabus, be i no gat man i go blong holem hem. Ale ol soldia oli gobak long ol jif pris mo ol Farisi, be oli no tekem Jisas i kam. Nao oli askem long olgeta se: “?Weswe yufala i no tekem Jisas i kam?”

Ol soldia oli ansa se: “!No, be i no gat man samtaem we i stap tok olsem man ya!”

Nao ol Farisi oli kros tumas, oli stap laf long olgeta, oli talem plante gyaman toktok, mo oli stap singaot nogud long ol man ya. Oli jikim olgeta, oli se: “?Weswe? ?Hem i gyaman long yufala tu? ?Yufala i luk wan lida blong yumi we i bilif long hem finis? ?No wan Farisi? Ol man olbaot ya oli no save Loa blong Moses nating. Taswe God i kros finis long olgeta.”

Nao Nikodimas, we hem i wan Farisi mo wan haeman long ol man Jyu (wan memba blong kaonsel ya Sanhedrin), i girap, hem i no fraet blong tok long olgeta. Tu yia haf bifo, Nikodimas i kam long Jisas long naet blong toktok wetem hem, blong talemaot long ­Jisas se hem i bilif long hem. Nao hem i girap, i talem long ol man ya se: “?Olsem wanem? ?I stret long Loa blong yumi blong yumi jajem man we yumi no harem hem fastaem, mo yumi no faenemaot stret fastaem wanem samting hem i stap mekem?”

Be olgeta Farisi oli kam kros moa from we Nikodimas i wan long olgeta, be hem i stap tekem saed blong Jisas. Nao oli tok nogud long Nikodimas, oli se: “?Man, yu tu yu man Galili? Yu go ridim Baebol bakegen. Bambae yu tu yu luk we profet i no save kamaot long Galili.”

Baebol i no talem stret se bambae wan profet i kamaot long Galili. Be from ol profet tok ya, ol man oli save luksave se Kraes i mas kamaot long ples ya, from we profet tok i tokbaot “wan bigfala laet” we bambae i saenaot i kasem ol man long ples ya. Mo tu, Jisas i bon long Betlehem, mo hem i kamaot long laen blong Deved. Nating we ol man Farisi oli save samting ya, be olgeta oli stap talemaot ol gyaman toktok nomo long saed blong Jisas. Jon 7:32-52; Aesea 9:1, 2; Matyu 4:13-17.

▪ ?Evri moning long lafet ya, ol pris oli mekem wanem? ?Olsem wanem Jisas i pulum ol man blong tingbaot samting ya?

▪ ?From wanem ol soldia oli no save holem Jisas? ?Taem ol lida blong ol man Isrel oli luk samting ya, oli mekem wanem?

▪ ?Nikodimas hem i hu? ?Wanem tingting blong hem long saed blong Jisas? ?Ol narafala Farisi oli mekem wanem long hem?

▪ ?Olsem wanem ol man oli save se Kraes i mas kamaot long Galili?