Japta 68

Sam Moa Tijing Long Namba Seven Dei

HEMIA i namba seven dei no laswan dei blong Lafet ya we oli Wokem ol Wansaed Haos. Jisas i stap tij long haos prea, long haf blong hem we oli kolem “ples blong sakem kleksin.” Mo tu oli kolem haf blong haos prea ya ‘Yad blong ol Woman.’ Long ples ya, i gat ol bokis i stap, nao ol man oli save kam sakem presen mane long olgeta.

Taem lafet ya i stap gohed, evri naet oli laetem ol bigfala laet mo oli putum olgeta long haf ya blong haos prea. Fastaem, oli putum fo bigfala samting we ol laet oli save stanap long olgeta. Nao oli putum fo bigfala dis we oli fulap long oel antap long olgeta wanwan. Nao oli laetem ol 16 dis ya. Laet blong olgeta i strong, i stap saenaot longwe long naet. Nao samting we Jisas i talem long ol man we oli stap lesin long hem i save pulum olgeta blong tingbaot ol laet ya. Hem i se: “Mi ya mi laet blong ol man long wol. Man we i biaen blong mi, bambae hem i no wokbaot olsem we i stap long tudak nomo. Hem bambae i gat laet blong laef.”

Be ol man Farisi oli tok long hem, oli se: ‘Yu ya yu stap talemaot yu olsem, be tok ya blong yu i no save stanap hem wan.”

Nao Jisas i ansa long olgeta, i se: “Yes, i tru we mi wan mi stap talemaot mi, be tok ya blong mi i save stanap yet, from we mi mi save weples mi aot long hem mo weples mi stap go long hem. Be yufala i no save weples mi mi aot long hem mo weples mi stap go long hem.” Hem i talem moa, i se: “Oraet, mi mi stap talemaot mi, be Papa ya blong mi we hem i sanem mi, hem tu i stap talemaot mi.”

Nao ol Farisi oli askem long hem se: “?Papa blong yu i stap wea?”

Jisas i ansa, i se: “Yufala i no save mi, yufala i no save Papa blong mi tu. Sipos yufala i save mi, bambae yufala i gat rod blong save Papa blong mi tu, be yufala i no save mi nating.” Nating we ol Farisi oli wantem holem Jisas, be i no gat man i go blong holem hem yet.

Nao Jisas i talem long olgeta bakegen, i se: “Bambae mi mi gowe long yufala. . . . Ples ya we mi bambae mi go long hem, yufala bambae i no save kam long hem.”

Nao ol lida blong ol man Isrel oli talem se: “?Tok ya we hem i talem se ‘Ples ya we mi bambae mi go long hem, yufala bambae i no save kam long hem,’ hem i min wanem? ?Hem bambae i kilim hem?”

Jisas i eksplenem long olgeta, i se: “Yufala i kam long ol ples daon. Mi mi kamaot long ples antap. Yufala i kamaot long wol ya, be mi mi no kamaot long wol ya.” Hem i gohed moa, i se: “Mo sipos yufala i no bilif we [hemia mi ya, NW], bambae yufala i ded, we sin blong yufala bambae i stap yet long yufala.”

Jisas i stap tokbaot laef blong hem bifo, taem hem i no kam long wol yet. Mo hem i stap talem se hem nao hem i Mesaea no Kraes, we ol profet tok i bin talemaot. Be olgeta oli no gat respek nating long Jisas. Oli askem long hem se: “?Yu hu?”

Jisas i luksave se oli no wantem hem, nao hem i ansa long olgeta, i se: “?Weswe mi mi stap toktok wetem yufala olsem?” (NW) Be hem i no finis yet. Hem i gohed olsem: “Hemia we i sanem mi, tok blong hem i tru nomo. Mo mi stap talemaot ol samting ya nomo we mi harem long hem, blong ol man long wol oli harem.” Jisas i tok moa, i se: “Long taem ya we bambae yufala i leftemap mi, mi Pikinini blong Man, blong mi hang antap, bambae yufala i save nao we [hemia mi ya, NW]. Mo bambae yufala i save we mi mi no mekem wan samting nating, mi wan. Mi mi stap talemaot ol samting ya nomo we Papa blong mi i tijim mi finis long hem. Hemia we i sanem mi, hem i stap wetem mi. Hem i no livim mi mi stap mi wan, from we oltaem, mi stap mekem ol samting we hem i wantem.”

Nao taem Jisas i talem ol tok ya, plante man oli bilif long hem. Hem i talem long olgeta ya se: “Sipos yufala i obei long ol tok ya blong mi, hemia, yufala i prapa man blong mi. Nao bambae yufala i save ol trutok, mo trutok ya bambae i mekem yufala i friman.”

Nao olgeta we oli agensem hem oli katem tok blong hem, oli se: “Mifala ya i kamaot long laen blong Ebraham. Neva mifala i slef blong man. ?Wanem tok ya blong yu se ‘Bambae yufala i friman’?”

Plante taem ol man Jyu oli bin stap aninit long rul blong sam narafala nesen. Be olgeta oli sem blong talem se sam narafala oli masta blong olgeta. Oli no wantem se ol man oli tingbaot olgeta olsem slef nomo. Be Jisas i talem se olgeta oli olsem ol slef nomo. ?Olsem wanem? Tok blong Jisas i ansarem kwestin ya: “Tru mi talem long yufala, olgeta man we oli mekem sin, be sin ya i olsem masta blong olgeta, we i holemtaet olgeta finis.”

Be ol man Jyu oli no wantem luksave se sin i masta blong olgeta. From samting ya, oli save kasem bigfala trabol, olsem Jisas i talem: “Nao slef, hem i no gat raet blong stap olwe long haos blong masta blong hem. Be pikinini, hem i gat raet blong stap long haos blong papa blong hem gogo i no save finis.” Jisas i minim se wan slef i no gat raet blong kasem olting blong masta blong hem, from we hem i no blong famle blong hem. Masta blong hem i save sakemaot hem eni taem. Be stret pikinini blong masta nomo, no pikinini we masta i adoptem hem, hem i gat raet blong stap insaed long haos blong masta blong “olwe,” gogo laef blong hem i finis.

Jisas i gohed moa, i se: “Sipos mi, mi Pikinini blong God, mi mekem yufala i fri, hemia yufala i friman tru.” Ale trutok we i save mekem man i fri, hemia trutok long saed blong Pikinini blong God, Jisas Kraes. Man i save fri long sin mo ded from wan samting nomo: From stret laef blong Jisas we hem i givim olsem wan sakrafaes blong pemaot yumi evriwan. Jon 8:12-36.

▪ ?Long namba seven dei blong lafet ya, Jisas i stap tij wea? ?Long evri naet long lafet ya, oli stap mekem wanem? ?Olsem wanem Jisas i joenem samting ya wetem tijing blong hem?

▪ ?Jisas i talem se hem i kamaot wea? ?From samting ya, olgeta oli mas luksave se Jisas hem i hu?

▪ ?Ol man Jyu oli slef olsem wanem? ?Wanem trutok ya we i save mekem olgeta oli friman?