Lesen 18

!Stap Fren Blong God Olwe!

Man i mas traehad blong gat wan fren, mo hem i mas traehad tu blong no lusum fren ya. Ol traehad we yu mekem blong kam wan fren blong God mo blong stap fren blong hem oltaem, bambae oli karem blesing long yu. Jisas i talem long olgeta we oli bilif long hem se: “Trutok ya bambae i mekem yufala i fri man.” (Jon 8:32) ?Samting ya i minim wanem?

Yu save harem gud from fasin fri naoia. Yu save kam fri long ol giaman tijing mo toktok we Setan i stap mekem. Yu save kam fri long ol tingting ya we oli mekem plante milian man oli no gat hop long laef blong olgeta from we oli no save Jeova. (Rom 8:22) Mo tu, ol fren blong God oli fri long ol tingting ya we oli mekem man i “fraet long ded.”—Hibrus 2:14, 15.

Yu save harem gud long fasin fri long niufala wol blong God. !Bambae yu save harem gud tumas long wan nambawan fasin fri long fiuja! Long Paradaes long wol, bambae man i fri long faet, sik, mo fasin blong brekem loa. Fri long fasin pua mo fasin blong hanggri. Fri long fasin blong kam olfala mo ded. Fri long fasin fraet, fasin we man i spolem narafala man, mo fasin blong mekem i no stret long narafala. Baebol i tokbaot God se: “Yu stap givim plante kakae long olgeta, mo yu stap mekem olgeta evriwan oli harem gud.”—Ol Sam 145:16.

Ol fren blong God bambae oli laef blong olwe. Laef we i no save finis hem i wan presen we i sas tumas, we God bambae i givim long olgeta we oli wantem fren wetem hem. (Rom 6:23) !Tingbaot wan laef we neva bambae i gat en blong hem!

Bambae yu gat taem blong mekem plante samting. Maet bambae yu wantem lanem blong plei long wan tul blong miusik. No maet yu wantem lanem blong pentem ol pija no mekem wok blong kapenta. Maet yu laekem blong lanem moa long saed blong ol anamol mo flaoa no tri. No ating yu wantem wokbaot mo visitim ol defren kantri mo man. !Sipos yumi gat laef we i no save finis, bambae yumi gat taem blong mekem olgeta samting ya!

Bambae yu gat taem blong fren wetem plante man. Laef blong olwe bambae i givim jans long yu blong save plante narafala man we olgeta tu oli fren blong God. Bambae yu save wanem samting we olgeta ya oli gat gudhan blong mekem mo wanem gudfala fasin we oli gat, mo bambae oli save kam fren blong yu tu. Bambae yu lavem olgeta, mo olgeta tu bambae oli lavem yu. (1 Korin 13:8) !Sipos yu gat laef we i neva gat en long hem, bambae yu gat taem blong fren wetem evri man long wol ya! Be, beswan samting se, fasin fren blong yu wetem Jeova bambae i kam strong moa long ol handred yia we bambae oli pas. !I gud sipos yu stap fren blong God, gogo i no save finis!