Setan i No Jes Wan Giaman Tingting Blong Mekem Man i Fraet
“Plante tok we i stap long Niutesteman i soemaot se i gat wan bigfala faet i stap gohed. Long wan saed i gat paoa blong God mo ol gudfala samting, mo long narasaed i gat rabis paoa blong Setan. Hemia i no tingting blong wan no tu man blong raetem Baebol nomo, be i tingting blong plante long olgeta. . . . Taswe pruf blong Niutesteman i klia. Setan i wan trufala man we i stap, we fasin blong hem i rabis, mo oltaem hem i agensem God mo ol man blong God.”—“The New Bible Dictionary.”
?ALE, from wanem plante man we oli talem se oli Kristin, mo oli talem se oli bilif long Baebol, oli sakemaot tingting ya se Setan hem i stap? Blong talem stret, hemia from we oli no rili bilif se Baebol hem i Tok blong God. (Jeremaea 8:9) Oli talem se, ol man blong raetem Baebol oli stap talemaot waes blong ol man raonabaot long olgeta, be oli no talemaot stret trutok we God i givim. Hans Küng, we i wan haeman blong Katolik Jos, i talem se: “Ol kastom stori long saed blong Setan mo ol rabis devel blong hem . . . oli kamaot long ol kastom stori blong ol man Babilon. Ol man Jiu oli tekem bilif ya i kam insaed long skul blong olgeta. Mo from samting ya nao, ol kastom stori ya oli stap long Niutesteman.”—On Being a Christian.
Be Baebol i no tok blong man nomo. Hem i rili tok we i kamaot long God. Taswe, yumi waes sipos yumi tinghevi long wanem we Baebol i talem long saed blong Setan.—2 Timoti 3:14-17; 2 Pita 1:20, 21.
?Jisas i Gat Wanem Tingting Long Saed Ya?
Jisas Kraes i bilif se Setan i rili stap. I no tru se wan rabis fasin insaed long hat blong Jisas i bin traem hem. Wan trufala man i bin agensem Jisas, mo biaen, Jisas i talem se man ya i “masta blong wol ya.” (Jon 14:30; Matiu 4:1-11) Mo tu, Jisas i bilif se sam narafala spirit man oli sapotem Setan long ol rabis plan blong hem. Jisas i bin ronemaot devel long sam man we “devel i stap” long olgeta. (Matiu 12:22-28) Sam man we oli no bilif long God oli raetem wan buk ya, A Rationalist Encyclopædia we i makem samting ya i se: “I gat wan samting we oltaem ol haeman blong jos oli harem nogud long hem, hemia se, taem ol Gospel oli tokbaot Jisas, oli soemaot we hem i bilif long ol devel.” Taem Jisas i tokbaot Setan mo ol rabis devel blong hem, hem i no jes talem bakegen ol giaman tingting blong mekem man i fraet, we oli stap long ol kastom stori blong ol man Babilon bifo. Jisas i save se oli rili stap.
Yumi lanem plante samting long saed blong Setan taem yumi tingbaot tok we Jisas i talem long ol tija blong jos we oli stap long taem blong hem: “Yufala i gat sem fasin nomo we papa blong yufala Setan, hem i gat. Mo oltaem yufala i wantem mekem ol samting we hem i wantem. Fasin blong hem we i stat bifo olgeta, hem i man blong kilim man. Neva hem i stap wetem olgeta we oli tok tru, from we i no gat trutok nating long hem. Taem we hem i stap giaman, hem i stap mekem fasin blong hem nomo, from we hem i man blong giaman, we i stamba blong ol giaman toktok.”—Jon 8:44.
Vas ya i talem se, Setan, we nem blong hem i minim “man we i stap talem ol rabis giaman tok agensem wan narafala man,” hem i “man blong giaman, we i stamba blong ol giaman toktok.” Hem nao i faswan blong talem giaman tok long saed blong God, mo hem i bin mekem samting ya long garen blong Iden. Jeova i bin talem long faswan papa mama blong yumi, Adam mo Iv, se bambae tufala i “ded” sipos tufala i kakae long tri we frut blong hem i save mekem tufala i save ol fasin we i gud, mo ol fasin we i nogud. Setan i yusum wan snek blong talem se tok ya blong Jeova i no tru. (Jenesis 2:17; 3:4) Taswe i stret we hem i karem nem ya, se “snek ya blong bifo we nem blong hem ‘Setan.’ ”—Revelesen 12:9.
Setan i bin giaman long saed blong tri ya we frut blong hem i save mekem Adam mo Iv i save ol fasin we i gud, mo ol fasin we i nogud. Hem i talem se i no stret nating we God i blokem tufala blong kakae frut blong tri ya, mo i talem se God i yusum paoa blong hem long wan fasin we i spolem tufala. Mo tu, hem i talem se bambae Adam mo Iv, tufala i save kam “olsem God” from we bambae tufala nomo oli jusumaot wanem i gud mo wanem i nogud. Setan i givim tingting long Adam mo Iv se sipos God i putum fasin long tufala se tufala i fri blong jusumaot rod blong tufala, ale tufala i mas gat raet blong mekem olgeta samting we tufala i wantem. (Jenesis 3:1-5) Tok ya we i agensem fasin blong God blong rulum man, i stanemap sam impoten kwestin. Taswe Jeova i letem taem i pas blong stretem bisnes ya. I min se God i letem Setan i gohed blong laef blong smol taem. Naoia, taem blong hem klosap i finis. (Revelesen 12:12) Be, hem i gohed yet blong giaman mo trikim man, blong traem pulum olgeta blong stap longwe long God. Mo hem i yusum ol man olsem ol tija blong Loa mo ol Farisi we oli stap laef long taem blong Jisas, blong oli mekem ol tijing blong hem i kasem fulap man.—Matiu 23:13, 15.
Jisas i talem tu se, ‘fasin blong Setan we i stat bifo olgeta, hem i man blong kilim man,’ mo se “neva hem i stap wetem olgeta we oli tok tru.” Hemia i no min se Jeova i wokem Setan olsem wan “man blong kilim man.” God i no wokem Setan olsem wan rabis samting we i bos long faea we i blong bonem man mo mekem oli safa sipos oli agensem God. Nogat. “Hel” we Baebol i tokbaot i no hom blong Setan. Hel i minim nomo, beregraon blong olgeta man.—Ol Wok 2:25-27; Revelesen 20:13, 14.
Fastaem, Setan i “tok tru.” Hem i bin joen long famle blong Jeova long heven olsem wan pikinini blong God we i stretgud olgeta. Be hem i no “stap wetem olgeta we oli tok tru.” Hem i wantem folem tingting blong hem mo mekem ol samting we i stanap long giaman fasin. “Fasin blong hem we i stat bifo olgeta,” i no minim taem we God i wokem hem olsem wan enjel we i pikinini blong hem, be taem hem i mekem jus blong rebel agensem Jeova nao i giaman long Adam mo Iv. Setan i olsem ol man we oli bin rebel agensem Jeova long taem blong Moses. Long saed blong olgeta ya, Baebol i talem se: “Be olgeta nomo oli jusum blong mekem nogud fasin. Oli no ol pikinini blong God, olgeta nomo oli mekem sin.” (Dutronome 32:5, NW ) Yumi save talem olsem long saed blong Setan tu. Hem i kam “wan man blong kilim man” taem hem i rebel mo i givim ded long Adam mo Iv, mo biaen, long olgeta man.—Rom 5:12.
Ol Enjel We Oli No Obei
Sam narafala enjel oli bin joenem Setan taem hem i rebel. (Luk 11:14, 15) Long taem blong Noa, ol enjel ya oli “livim prapa ples blong olgeta” mo oli jenisim bodi blong olgeta i kam olsem man, blong oli save harem gud long saed blong seks wetem “ol gel blong wol ya.” (Jud 6; Jenesis 6:1-4; 1 Pita 3:19, 20) “Wan haf blong ol sta,” hemia i min se wan smol grup blong ol enjel, oli folem rod ya.—Revelesen 12:4.
Buk blong Revelesen, we i gat fulap pijatok long hem, i tokbaot Setan olsem ‘bigfala algita we i red olsem faea.’ (Revelesen 12:3) ?From wanem? I no from we hem i gat wan bodi we i narakaen mo i nogud. Blong talem stret, yumi no save se bodi blong ol spirit man i olsem wanem, be ating bodi blong Setan i olsem ol narafala enjel nomo. Nating se i olsem, tok ya, ‘bigfala algita we i red olsem faea’ i stret blong soemaot fasin blong Setan we i wantem tumas blong spolem man, mekem man i fraet, yusum bigfala paoa blong hem, mo kilim man i ded.
Naoia Setan mo ol rabis enjel oli no moa save mekem evri samting we oli wantem. Oli no moa save jenisim bodi blong olgeta blong i kam olsem man, olsem we oli bin mekem fastaem. I no longtaem afta we God i putum Kingdom blong Hem long han blong Jisas long 1914, oli sakemaot Setan mo olgeta enjel blong hem oli aot long heven, oli kamdaon long wol.—Revelesen 12:7-9.
Setan i Wan Bigfala Enemi
Yes, Setan i stap olsem wan enemi blong yumi we i gat bigfala paoa. Hem i “olsem wan laeon we i stap singaot bigwan, i stap lukaot man blong i kakae.” (1 Pita 5:8) Setan i no jes ol nogud fasin we oli stap insaed long ol sinman. I tru, evri dei yumi mas faet agens long ol nogud fasin we sin i pulum yumi blong mekem. (Rom 7:18-20) Be bigfala faet blong yumi hem i “agens long ol devel we oli stap olbaot long wol ya. Hemia ol lida blong olgeta, mo olgeta we oli gat paoa, mo ol jif blong olgeta we oli stamba blong ol fasin blong tudak long wol ya.”—Efesas 6:12.
?Setan i gat paoa long hamas man? Aposol Jon i talem se: “Olgeta man blong wol ya oli stap long paoa blong Setan.” (1 Jon 5:19) I tru se yumi no wantem tingting bitim mak long saed blong Setan, no letem ol giaman tingting long saed blong hem oli winim yumi mo mekem yumi fraet tumas. Be yumi waes sipos yumi stap wekap gud mo luksave ol wok we Setan i mekem blong traem haedem trutok long yumi, mo blong pulum yumi blong lego God.—Job 2:3-5; 2 Korin 4:3, 4.
I no evri taem we Setan i yusum raf fasin blong agensem ol man we oli wantem mekem wok blong God. Sam samtaem hem i tanem fasin blong hem blong mekem i luk “olsem we hem i wan enjel blong laet.” Aposol Pol i givim woning long ol Kristin long saed blong denja ya, taem hem i talem se: “Mi mi fraet se bambae tingting blong yufala i gorong, nao bambae yufala i foldaon olsem we fas woman ya Iv i foldaon fastaem, we snek i giaman long hem long ol giaman toktok blong hem. Mi fraet se bambae yufala i lego gudfala fasin ya blong yufala, we yufala i stap lavem Kraes tumas long fasin we i stret mo i klin gud.”—2 Korin 11:3, 14.
Taswe yumi mas ‘lukaot gud, yumi mas rere, mo yumi mas stanap strong long bilif blong yumi, blong blokem hem.’ (1 Pita 5:8, 9; 2 Korin 2:11) Yumi no mas joen long enikaen wok blong ol rabis spirit, from we samting ya bambae i mekem i isi blong Setan i lidim yumi i go krangke. (Dutronome 18:10-12) Stadi long Tok blong God oltaem, mo rimemba se Jisas Kraes i yusum Tok blong God bakegen mo bakegen, taem Setan i traem hem. (Matiu 4:4, 7, 10) Prea mo askem tabu spirit blong God. Frut blong tabu spirit ya i save halpem yu blong no mekem ol samting we tingting blong yu nomo i wantem, hemia ol fasin we i isi nomo blong Setan i pulum ol man blong mekem. (Galesia 5:16-24) Mo tu, prea strong long Jeova taem yu harem se Setan mo ol enjel blong hem oli stap mekem trabol long yu, long enikaen rod long laef blong yu.—Filipae 4:6, 7.
Yumi no nid blong fraet bitim mak long Setan. Jeova i promes finis blong protektem yumi long eni samting we Setan i save mekem. (Ol Sam 91:1-4; Ol Proveb 18:10; Jemes 4:7, 8) Aposol Pol i talem se: “Yufala i mas joen long Masta blong yumi, blong kasem paoa. Hem i gat olgeta paoa, mo yufala i mas kam strong long paoa blong hem.” Sipos yumi mekem olsem, “taem Setan i stap wokem ol giaman trik blong hem, be bambae yufala i save stanap strong.”—Efesas 6:10, 11.
[Tok blong pija long pej 5]
Jisas i save se Setan i rili stap
[Tok blong pija long pej 6]
“Olgeta man blong wol ya oli stap long paoa blong Setan”
[Credit Line]
NASA photo
[Tok blong pija long pej 7]
Stadi long Tok blong God mo prea oltaem blong stanap strong agens long Setan