Kwestin

Taem wan man we yumi lavem hem tumas i ded, yumi krae from we yumi sore se bambae hem i no moa stap wetem yumi. Jisas i laekem Lasaros. Nating se i olsem, hem i no krae from we Lasaros i ded. Hem i krae from we hem i sore long ol famle blong Lasaros, olsem stori long buk blong Jon i soemaot.—Jon 11:36.

Fastaem, taem Jisas i harem se Lasaros i sik, hem i no hareap blong go luk hem blong mekem hem i kamgud bakegen. Baebol i talem se: “Taem [Jisas] i kasem nius ya we Lasaros i sik, hem i stap tu dei bakegen long ples ya we hem i stap long hem.” (Jon 11:6) ?From wanem Jisas i no hareap blong go luk Lasaros? Hem i mekem olsem from wan risen. Hem i talem se: “Lasaros i sik, be sik blong hem i no blong ded, i blong soemaot bigfala paoa blong God. Sik ya, hem i rod blong God i leftemap nem blong mi, mi Pikinini blong hem.” (Jon 11:4) Taswe, Jisas i wantem yusum ded blong Lasaros blong “soemaot bigfala paoa blong God.” ?Bambae hem i soemaot olsem wanem? Jisas i rere blong mekem wan bigfala merikel, taem hem i mekem gudfala fren blong hem i laef bakegen.

Taem Jisas i stap storian wetem ol disaepol blong hem, hem i talem se man we i ded i sem mak long man we i slip. Taswe hem i talem se: “Bambae mi mi go blong wekemap [Lasaros].” (Jon 11:11) Long tingting blong Jisas, taem bambae hem i mekem Lasaros i laef bakegen, hemia i olsem we wan papa no mama i go wekemap pikinini blong hem we i slip. Taswe, i no ded blong Lasaros we i mekem Jisas i sore nao i krae.

?Ale from wanem Jisas i krae? Bakegen, ol toktok long stori ya i givim ansa long kwestin ya. Taem Jisas i mitim Meri, sista blong Lasaros, mo i luk se hem wetem ol narafala we oli stap wetem hem oli krae, hem “i harem nogud tumas we i stap pulum win blong hem from.” Jisas i luk se oli harem nogud tumas, mo samting ya i mekem se hem tu i “harem nogud tumas.” Taswe “Jisas i krae.” Jisas i sore tumas blong luk se ol gudfala fren blong hem oli harem nogud from Lasaros.—Jon 11:33, 35.

Stori ya i soemaot se Jisas i gat paoa blong mekem ol famle blong yumi oli laef bakegen long niufala wol wetem gudfala helt. Mo i givhan long yumi tu blong kasem save se Jisas i sore long olgeta we famle blong olgeta i ded from sin blong Adam. Wan narafala samting we yumi save lanem long stori ya, hemia se yumi mas sore long olgeta we oli harem nogud from famle no fren blong olgeta we i ded.

Jisas i save se bambae hem i mekem Lasaros i laef bakegen. Nating se i olsem, hem i sore long ol famle mo ol fren blong Lasaros we oli harem nogud tumas. Long sem fasin, sipos yumi sore long ol man, samting ya bambae i pulum yumi blong ‘krae wetem olgeta we oli stap krae.’ (Rom 12:15) Taem yumi sore olsem, hemia i no soemaot se yumi no bilif long promes ya blong laef bakegen. Taswe, i stret nomo we Jisas i sore long ol fren mo famle blong Lasaros, nao i krae from olgeta, nating se hem i rere blong mekem Lasaros i laef bakegen. Long rod ya, hem i soemaot wan gudfala eksampol long yumi.