Japta 90

Laef Bakegen Long Ded

JISAS i kamtru long velej ya Betani, we hem i stap kolosap long Jerusalem, samting olsem tri kilomita nomo. Hem i faenem we oli berem Lasros finis, sam dei bifo. Meri mo Mata, tufala sista blong Lasros, tufala i stap harem nogud from ded blong brata blong tufala. Mo i gat plante man Isrel oli kam luk Mata mo Meri, blong leftemap tingting blong tufala.

Taem tufala i stap harem nogud yet, Mata i harem nyus we Jisas i stap kam. Nao hem i girap, i go kwik blong mitim hem. Ating hem i no talem long sista blong hem se Jisas i stap kam. Taem hem i luk Jisas, Mata i talem long hem se: “Masta, sipos yu yu stap long ples ya, bambae brata blong mi i no ded, be yu yu no stap.” Long fo dei we i jes pas finis, ating Meri mi Mata tufala i bin talem tok ya bakegen plante taem.

Mata i talem sam tok we i soemaot se hem i putum tingting blong hem i stap strong long ol promes blong God. Hem i se: “Be mi mi save se naoia wanem samting we yu yu askem long God, be hem i save givim long yu.” Hem i tok olsem from we hem i wantem se Jisas i mekem wan samting blong givhan long brata blong hem.

Nao Jisas i promes long hem, i se: “Brata blong yu bambae i laef bakegen long ded.”

Mata i ting se Jisas i stap tokbaot laef bakegen long wol long fyuja. Ebraham mo ol narafala man blong God bifo oli bilif long promes ya tu. Taswe Mata i talem se: “Mi mi save we bambae long Lasdei, hem i save laef bakegen long ded, long taem ya we olgeta man bambae oli laef bakegen long ded.”

Be Jisas i pulum hem blong tingbaot samting we hem i save mekem long taem ya nomo. Hem i se: “Stampa blong laef bakegen long ded, mi ya. Stampa blong laef, mi ya.” Hem i talem long Mata se God i givim paoa long hem finis, blong hem i save winim ded, i se: “Man we i bilif long mi, nating we bambae i ded, hem bambae i mas laef. Mo man we i laef, i bilif long mi, hem bambae i no save ded samtaem.”

Jisas i no min se ol man we oli gat bilif long taem ya oli no save ded. No gat. Be hem i min se olgeta we oli bilif long hem oli save kasem laef we i no save finis. Bighaf blong ol man bambae oli kasem laef ya, taem oli laef bakegen long Lasdei. Be sam narafala we oli stanap strong long bilif blong olgeta, bambae oli save pastru long en blong rabis fasin blong wol. Olsem Jisas i talem, olgeta ya oli no save ded samtaem. Jisas i talem nambawan promes ya long Mata, nao hem i askem long hem se: “?Yu yu bilif long tok ya blong mi?”

Hem i talem long hem, i se: “Yes Masta, mi mi bilif se yu yu Mesaea, yu yu Pikinini blong God, yu yu man ya we olgeta bifo oli bin talem se bambae i kam long wol.”

Taem Mata i talem tok ya finis, hem i go singaot sista blong hem Meri, blong i kam. Hem i tok smosmol long hem, i se: “Tija ya i kam finis. Hem i wantem luk yu.” Nao taem Meri i harem tok ya, hem i girap kwik, i go blong luk Jisas. Nao ol man we oli stap wetem Meri long haos blong leftemap tingting blong hem bakegen, oli luk we hem i girap kwik, i go afsaed. Ale oli biaen long hem, from we oli ting se hem i go long beregraon.

Taem Meri i kamtru long ples ya we Jisas i stap, hem i nildaon long hem, hem i krae long hem, i se: “Masta, sipos yu yu stap long ples ya, bambae brata blong mi i no ded, be yu yu no stap.” Jisas i luk we woman ya i stap krae mo ol man Isrel tu we oli wetem hem oli stap krae. Nao long tingting blong hem, hem i harem i nogud tumas, we i pulum win blong hem from. Nao hem i askem long olgeta, i se: “?Yufala i berem hem wea?”

Olgeta oli ansa long hem se: “Masta, yu kam luk.”

Jisas tu i krae. Nao ol man Isrel oli talem se: “!Ei, olgeta! Hem i laekem man ya we i bitim mak.”

Sam long olgeta oli tingtingbak long Lafet blong ol Wansaed Haos we oli bin mekem i no longtaem. Long taem ya, i gat wan man we taem hem i bon, ae blong hem i blaen. Nao Jisas i mekem ae blong man ya i kamgud. Nao, oli talem se: “Hemia man ya we bifo i mekem ae blong blaenman i kamgud. ?Olsem wanem hem i no blokem samting ya, blong man ya i no ded?” Jon 5:21; 6:40; 9:1-7; 11:17-37.

▪ ?Wetaem Jisas i kamtru long velej ya Betani? ?Taem Jisas i kamtru, wanem i hapen?

▪ ?Bilif blong Mata long saed blong laef bakegen i stanap long wanem?

▪ ?Jisas i harem olsem wanem, taem hem i luk we Lasros i ded?