Yumi Mas Folem Ol Tok Long Prea Blong Jisas

1, 2. Long yia 33, afta we Jisas i mekem Pasova wetem ol aposol blong hem, ?hem i mekem wanem?

LONG naet blong Nisan 14 long yia 33, Jisas mo ol gudfala fren blong hem oli mekem lafet blong Pasova. Lafet ya i pulum olgeta blong oli tingbaot ol samting we God i mekem blong tekemaot ol bubu blong olgeta long Ijip, mo blong sevem olgeta. Be biaen, God i sevem ol disaepol blong Jisas long wan fasin we i bigwan moa. Long nekis dei, ol enemi blong Jisas oli kilim hem i ded. Hem i givim laef blong hem, we i stret gud, olsem wan sakrefaes blong tekemaot ol man long sin mo ded.—Hib. 9:12-14.

² Jisas i wantem meksua se yumi no fogetem nambawan presen ya we i kamaot long God. Ale, afta long Pasova, hem i statem wan niufala lafet we i tekem ples blong Pasova. Hem i tekem wan bred we i no gat is long hem, i brekem, mo i givim long ol 11 gudfala aposol blong hem. Hem i talem long olgeta se: ‘Hemia i saen blong bodi blong mi, we bambae mi givim from yufala. Oltaem yufala i mas mekem samting ya blong tingbaot mi bakegen.’ Mo long sem fasin, hem i tekem kap blong red waen, i givim long olgeta, mo i talem se: “Kap ya i saen blong niufala promes blong God, mo blad blong mi, we bambae i ron from yufala, hem bambae i mekem promes ya i stanap.”—Luk 22:19, 20.

 3. (1) Afta we Jisas i ded, ?wanem bigfala jenis i kamaot? (2) Taem yumi stadi long prea blong Jisas, ?wanem tufala kwestin we yumi mas tingbaot?

³ Smoltaem biaen, promes we God i mekem wetem ol man Isrel taem hem i givim Loa long olgeta, i finis. Nao Jehova i mekem wan niufala promes wetem ol man blong Jisas we tabu spirit i makemaot olgeta. Jisas i no wantem se ol man blong hem oli kam olsem ol man Isrel. Ol man Isrel oli no joen gud blong mekem wosip long God. Samting ya i spolem nem blong God. (Jon 7:45-49; Wok 23:6-9) Jisas i wantem se ol man blong hem oli joen gud taem oli wok wanples, olsem nao bambae oli leftemap nem blong God. Ale ?Jisas i mekem wanem? Hem i prea, i askem long Papa blong hem blong i givhan long ol man blong hem. Prea ya i nambawan tumas, i no gat wan narafala prea olsem we man i save ridim samtaem. (Luk pija long stat blong stadi) Prea ya i stap long Jon 17:1-26. Taem yumi tokbaot prea ya, i gud yumi tingbaot tufala kwestin ya: “?God i ansa long prea ya finis? ?Mi mi stap folem ol tok long prea ya?”

4, 5. (1) ?Jisas i tokbaot wanem trifala samting long fas haf blong prea blong hem? (2) Taem Jisas i askem samting we hem wan i wantem, ?Jehova i mekem wanem?

⁴ Jisas i storian wetem ol disaepol blong hem go kasem let naet, i tijim olgeta long plante nambawan trutok. Afta, hem i lukluk i go antap, mo i prea se: “Papa. Taem blong mi i kamtru finis. Mi mi Pikinini blong yu, mo mi wantem blong yu leftemap nem blong mi, blong mi mi save leftemap nem blong yu. Yu yu givim paoa long mi se bambae mi rulum olgeta man, blong mi save givim laef ya we i no save finis, long olgeta ya we yu yu givim olgeta long mi.” Hem i gohed se: “Mi mi leftemap nem blong yu long wol ya, mo mi finisim ol wok ya we yu givim long mi blong mi mekem. Papa. Naoia i taem blong yu yu tekem mi mi stap wetem yu long gudfala laef blong heven, yu givim hae nem long mi, olsem we mi gat fastaem wetem yu, taem we wol ya i no stap yet.”—Jon 17:1-5.

⁵ Long prea ya, Jisas i tokbaot fastaem ol samting we oli moa impoten long tingting blong hem. Faswan, ol man oli mas leftemap nem blong Papa blong hem. Long Lodsprea tu, Jisas i tokbaot samting ya fastaem. (Luk 11:2) Nambatu samting long prea blong hem, hem i wantem givim ‘laef we i no save finis long ol disaepol blong hem.’ Afta, Jisas i askem samting we hem wan i wantem. Hem i wantem stap bakegen wetem Papa blong hem, mo i wantem gat hae nem olsem we hem i gat bifo we wol ya i stap. Jehova i harem prea ya blong Pikinini blong hem, mo hem i givim samting we i bitim wanem we Jisas i askem. God i givim wan ‘nem we i hae moa long nem blong olgeta enjel.’—Hib. 1:4.

 6. ?Ol aposol oli mas mekem wanem blong kasem laef we i no save finis? ?Yumi save olsem wanem se ol aposol oli mekem samting ya?

⁶ Long prea ya, Jisas i talem wan narafala samting tu. Hem i talem wanem we yumi mas mekem blong kasem presen ya, laef we i no save finis. (Ridim Jon 17:3.) Hem i talem se yumi mas “save” God mo Jisas. ?Yumi mekem samting ya olsem wanem? Fastaem, yumi mas mekem evri samting we yumi naf blong mekem blong kasem moa save long Jehova mo Pikinini blong hem. Afta, yumi mas yusum save ya long laef blong yumi. Yumi save se ol aposol oli mekem tufala samting ya, from we Jisas i gohed blong prea se: “Oli save samting ya from we ol tok ya we yu yu talem long mi, mi mi talemaot long olgeta, mo olgeta oli kasemgud.” (Jon 17:8) Be sipos oli wantem kasem laef we i no save finis, oli mas gohed blong tingting dip long Tok blong God, mo oli mas yusum ol save ya long laef blong olgeta evri dei. ?Olsem wanem? ?Ol aposol oli gohed blong mekem samting ya long ful laef blong olgeta? Yes. Yumi save se oli mekem olsem, from we nem blong olgeta wanwan i stap long ol 12 stamba ston blong Niufala Jerusalem, mo bambae i stap gogo i no save finis.—Rev. 21:14.

 7. “Save” God, ?hemia i minim wanem? ?From wanem i impoten tumas blong save God?

⁷ Yes sipos, yumi wantem kasem laef we i no save finis, yumi mas gohed oltaem blong “save” God moa. Be i no naf we yumi gat save nomo long ol fasin mo ol plan blong hem. Yumi mas lavem hem tu, mo yumi mas fren gud wetem hem. Yumi mas lavem ol Kristin brata mo sista blong yumi tu. Baebol i talem se: “Man we i no save lavem narafala man, hem i no save God.” (1 Jon 4:8) Mo tu, “save” God i min se yumi obei long hem. (Ridim 1 Jon 2:3-5.) !I wan bigfala blesing blong save Jehova! Be yumi mas lukaot gud se yumi no kam olsem Judas Iskariot, nao yumi no moa fren wetem God. Taswe, yumi mas wok had blong fren moa wetem Jehova. Sipos yumi mekem olsem, Jehova bambae i givim nambawan presen ya long yumi, laef we i no save finis.—Mat. 24:13.

8, 9. ?Wanem samting we i moa impoten long tingting blong Jisas? ?Wanem kastom we Jisas i no laekem nating?

⁸ Taem yumi ridim prea blong Jisas long Jon japta 17, yumi luksave se Jisas i lavem ol aposol blong hem. Be i no hemia nomo. I klia se hem i lavem yumi tu. (Jon 17:20) Be long tingting blong Jisas, samting we i moa impoten, i no we God i sevem yumi. Long ol yia we hem i stap long wol, samting we i moa impoten, hemia blong leftemap nem blong Papa blong hem. Wan eksampol, hemia taem Jisas i talem from wanem hem i kam long wol. Long taem ya, hem i ridim buk blong Aesea we i talem se: ‘Spirit blong Jehova i kam fulap long mi blong mi talemaot gud nius long ol puaman.’ Yumi save se taem Jisas i ridim vas ya, hem i talemaot nem blong God i klia nomo.—Luk 4:16-21.

⁹ Longtaem bifo we Jisas i kam long wol, ol lida blong ol man Isrel oli tijim ol man se oli no mas talem nem blong God. Yu traem tingbaot olsem wanem Jisas i mas harem nogud long kastom ya. Hem i talem long ol lida ya se: “Mi mi kam long nem blong Papa blong mi, be yufala i no glad long mi. Be sipos man i kam long nem blong hem nomo, bambae yufala i glad long hem.” (Jon 5:43) Sam dei nomo bifo we Jisas i ded, hem i talem bakegen samting we i moa impoten long tingting blong hem. Hem i prea se: “Papa, plis yu leftemap nem blong yu.” (Jon 12:28) Mo tu, long prea ya we yumi stap tokbaot, i klia se samting we i moa impoten long laef blong Jisas, hemia blong leftemap nem blong Papa blong hem.

10, 11. (1) ?Jisas i mekem wanem, blong ol man oli save nem blong Papa blong hem? (2) ?Ol disaepol blong Jisas oli stap talemaot nem blong Jehova from wanem?

¹⁰ Jisas i talem long prea blong hem se: ‘Ol man ya we yu yu tekemaot olgeta long wol ya blong givim long mi, mi mi stap talemaot nem blong yu long olgeta blong mekem olgeta oli save yu. Fastaem, olgeta oli man blong yu, be yu yu putum olgeta long han blong mi, blong oli man blong mi. Olgeta oli stap obei long ol tok blong yu. Bambae i no longtaem, mi no moa stap long wol ya. Be olgeta ya, bambae oli stap yet long wol ya. Papa, yu yu tabu. Plis yu holem olgeta ya blong oli sef from nem blong yu, we yu yu givim long mi, blong olgeta oli save stap wan nomo, olsem we yumitufala i wan nomo.’—Jon 17:6, 11.

¹¹ Taem Jisas i “talemaot” nem blong Papa blong hem long ol disaepol blong hem, hem i no mekem olgeta oli save nem ya nomo. Jisas i givhan long olgeta tu blong oli save gud se Jehova hem i hu. Hem i tijim olgeta long ol nambawan fasin blong God, mo ol samting we hem i mekem from we hem i lavem ol man. (Eks. 34:5-7) Naoia, Jisas i King long heven. Be hem i gohed yet blong givhan long ol disaepol blong hem, blong oli talemaot nem blong Jehova long ol man long wol ya. ?Oli mekem wok ya from wanem? Oli stap givhan long plante moa man blong oli save Jehova, bifo we en blong rabis wol ya i kam. Mo taem en ya i kam, bambae hem i sevem ol witnes blong hem we oli no lego hem. !Olgeta man bambae oli save nambawan nem ya blong God, Jehova!—Esik. 36:23.

12. ?Yumi mas mekem wanem trifala samting, blong yumi save finisim wok we Jisas i statem?

¹² Jisas i talem long ol disaepol blong hem se oli mas finisim wok ya we hem i statem. Hem i prea se: “Yu yu sanem mi mi kam long wol ya, mo long sem fasin mi mi sanemaot olgeta oli go long wol.” Be Jisas i save se oli no naf blong mekem wok ya long paoa blong olgeta nomo. Hem i traehad blong givhan long ol disaepol blong hem blong oli winim ol slak fasin blong olgeta. Long prea blong hem, hem i askem long Jehova blong i givhan long ol disaepol blong hem blong oli mekem trifala samting ya: (1) Oli no joen long wol blong Setan. (2) Oli obei long Tok blong God nao oli stap klin mo tabu. (3) Oli joen gud olsem we hem mo Papa blong hem i joen gud. Yumi evriwan i mas askem se: ‘?Mi mi stap mekem trifala samting ya?’ Jisas i gat strong tingting se sipos ol disaepol blong hem oli mekem trifala samting ya, plante man bambae oli bilif long tok we oli talemaot.—Ridim Jon 17:15-21.

13. Long taem blong ol fas Kristin, ?Jehova i ansa olsem wanem long prea blong Jisas?

¹³ Taem yumi stadi long buk blong Ol Wok, yumi kasem save se Jehova i ansa long prea blong Jisas. Sam long ol fas Kristin ya oli man blong ol narafala laen, sam oli rijman no oli puaman, sam oli slef no oli masta. Maet yu ting se i had blong ol defdefren man ya oli joen gud. Be aposol Pol i talem se oli joen gud olsem ol haf blong bodi blong man, mo Jisas i hed blong olgeta. (Efes. 4:15, 16) Long wol blong Setan we ol man oli seseraot, tabu spirit blong Jehova nomo i save mekem ol disaepol oli joen gud.—1 Kor. 3:5-7.

14. Long taem blong yumi, ?wanem ansa blong prea blong Jisas?

¹⁴ Sore tumas, afta we ol aposol oli ded, ol samting i jenis. Plante man oli lego trutok. Ol giaman tijing oli kam insaed long kongregesen, mo samting ya i mekem se ol Kristin oli no moa joen gud. (Wok 20:29, 30) Be long yia 1919, Jisas i mekem ol Kristin we tabu spirit i makemaot olgeta, oli kam fri long paoa blong ol giaman skul. Hem i hivimap olgeta oli kam wan grup we oli lavlavem olgeta. Yes, lav “i save joenemgud olgeta samting.” (Kol. 3:14) From we oli joen gud blong mekem wok blong prij, ?wanem frut i kamaot? Bitim seven milian man blong ‘olgeta kala, mo olgeta kantri, mo olgeta laen, mo olgeta lanwis,’ oli stap joen gud. Oli joen wanples wetem ol man we tabu spirit i makemaot olgeta, blong oli mekem wosip long Jehova. (Rev. 7:9; Jon 10:16) Hemia wan nambawan ansa long prea blong Jisas se: “Ol man blong wol ya oli save luksave we yu yu sanem mi mi kam, mo we yu lavem olgeta ya, stret olsem we yu lavem mi.”—Jon 17:23.

15. ?Jisas i askem long Jehova blong i mekem wanem samting long ol man blong hem we tabu spirit i makemaot olgeta?

¹⁵ Bifo finis, long naet ya blong Nisan 14, Jisas i ona long ol aposol blong hem, i leftemap olgeta. Hem i mekem promes wetem olgeta se bambae oli rul wetem hem long Kingdom blong hem. (Luk 22:28-30; Jon 17:22) Nao Jisas i prea from ol man blong hem we bambae tabu spirit i makemaot olgeta, i se: “Papa. Yu yu putum olgeta ya long han blong mi, se oli man blong mi. Mo mi mi wantem blong oli save stap long ples ya we bambae mi mi stap long hem, blong oli save luk bigfala paoa blong heven we mi mi gat. Paoa ya, yu yu givim long mi from we yu lavem mi bifo olgeta, taem we wol ya i no stap yet.” (Jon 17:24) Ol narafala sipsip oli no jalus from we ol Kristin we tabu spirit i makemaot olgeta bambae oli kasem gudfala presen ya. Be oli glad wetem olgeta. Samting ya tu i pruvum se ol tru Kristin tede oli joen gud.

16, 17. (1) Long en blong prea blong Jisas, ?hem i talem se bambae hem i gohed blong mekem wanem? (2) ?Yumi mas gohed blong mekem wanem?

¹⁶ Bighaf blong ol man long wol oli no wantem luksave se Jehova i gat ol man blong hem, we oli joen gud mo we oli save gud hem. Plante long olgeta oli gat tingting ya from we ol lida blong skul oli stap giaman long olgeta. Samting ya i hapen long taem blong Jisas tu. Taswe, long en blong prea blong hem, hem i talem se: “Papa, yu yu stret olgeta. Ol man blong wol ya oli no save yu, be mi mi save yu, mo olgeta ya we oli man blong mi, oli save we yu yu sanem mi mi kam. Mi mi mekem olgeta ya oli save yu. Mo bambae mi mekem olsem bakegen, blong oli save lavem mi olsem we yu yu lavem mi, mo blong laef blong mi i save joen gud long laef blong olgeta.”—Jon 17:25, 26.

¹⁷ Tru ya, Jisas i mekem ol man oli save nem blong Papa blong hem. Naoia, hem i Hed blong kongregesen, mo hem i gohed yet blong givhan long yumi, blong yumi talemaot nem blong Papa blong hem mo plan blong hem long ol narafala. Yumi mas folem gud ol samting we Jisas i mekem blong lidim yumi, mo yumi mas prij olsem we faea i laet long tingting blong yumi, blong pulum ol man oli kam man blong Jisas. (Mat. 28:19, 20; Wok 10:42) Mo tu, yumi mas wok had blong joen gud oltaem olsem wan kampani blong ol man blong God. Olsem nao, yumi stap folem ol tok long prea blong Jisas. Hemia bambae i leftemap nem blong Jehova, mo i karem glad i kam long yumi gogo i no save finis.