Pemaot Taem Blong Rid Mo Stadi

“Yufala i mas yusum evri janis [“pemaot taem,” NW] we yufala i kasem blong mekem ol gudfala wok, from we naoia, ol fasin nogud oli gat paoa.”—EFESAS 5:16.

 1. ?From wanem i gud blong skelemgud taem blong yumi, mo fasin we yumi yusum taem blong yumi i save soemaot wanem long saed blong yumi?

I GAT wan tok we i talem se, “fasin blong skelemgud taem i minim se yu sevem taem.” Wan man we i makem wan stret taem blong spenem long ol wok we oli moa impoten, hem i save kasem moa frut from wok we hem i mekem. Waes King Solomon i talem se: “Evri samting i gat wan stret aoa blong hem, i gat wan taem blong evri samting aninit long heven.” (Prija 3:1, Moffatt) Yumi evriwan i gat sem namba blong ol aoa long wan dei. I stap long yumi wanwan blong jusum olsem wanem blong yusum ol aoa ya. Ol samting we yumi putum fasples long laef blong yumi mo taem we yumi spenem long ol samting ya, oli soemaot klia wanem we hat blong yumi i laekem moa.—Matiu 6:21.

 2. (a) ?Long Bigfala Toktok blong Jisas antap long Hil, hem i talem wanem long saed blong nid blong yumi long saed blong spirit? (b) ?Yumi save mekem wanem blong jekem yumi wan?

² Oltaem, yumi spenem taem blong kakae mo slip, from we bodi blong yumi i nidim samting ya. ?Be olsem wanem long ol nid blong yumi long saed blong spirit? Yumi save se ol nid ya tu oli impoten. Long Bigfala Toktok blong Jisas antap long Hil, hem i talem se: “Olgeta we oli luksave se oli nidim ol samting long saed blong spirit, oli save haremgud.” (Matiu 5:3, NW) Taswe, oltaem “slef we i stret mo waes” i talem long yumi se i impoten tumas blong spenem taem blong ridim mo stadi Baebol. (Matiu 24:45, NW) Ating yu luksave se samting ya i impoten tumas, be maet yu stap tingting se yu nogat taem blong stadi mo ridim Baebol. Sipos i olsem, i gud yumi lukluk sam rod mo fasin blong makemaot taem blong ridim Tok blong God, blong stadi, mo blong tingting dip.

Faenem Taem Blong Ridim Baebol Mo Stadi

3, 4. (a) ?Aposol Pol i givim wanem advaes long saed blong fasin blong yusum taem blong yumi, mo advaes ya i stret long wanem samting? (b) ?Pol i minim wanem taem hem i talem se yumi mas “pemaot taem”?

³ From we yumi stap long taem blong las dei, yumi evriwan i nidim blong lesingud long ol tok blong aposol Pol se: “Yufala i mas lukaot gud long ol fasin blong yufala. Bambae yufala i no mekem fasin blong man we i no gat hed. Yufala i mas mekem fasin blong man we i waes. Yufala i mas yusum evri janis [“pemaot taem,” NW] we yufala i kasem blong mekem ol gudfala wok, from we naoia, ol fasin nogud oli gat paoa. Bambae yufala i no krangke. Yufala i mas traem save olgeta samting we Masta blong yumi i wantem blong yufala i mekem.” (Efesas 5:15-17) I tru se advaes ya i stret long evri haf blong laef blong yumi olsem ol Kristin we yumi givim laef i go finis long Jeova. Yumi mas faenem taem blong prea, stadi, go long ol miting, mo joen fulwan long wok blong talemaot “gud nius blong Kingdom.”—Matiu 24:14; 28:19, 20.

⁴ Tede, plante man blong Jeova oli faenem i hadwok blong gat taem blong ridim Baebol mo stadi dip. Tru ya, yumi no save ademap wan aoa moa long wan dei, taswe advaes blong Pol i mas gat wan defren mining. Long lanwis Grik, tok ya “pemaot taem” (we New World Translation i yusum) i minim se pemaot taem we yu stap spenem long ol narafala samting. Long Expository Dictionary, W. E. Vine i givim mining ya se “yusum evri janis, yusumgud taem ya, from we sipos yu lusum wan janis, yu no save kasem janis ya bakegen.” ?Weples yumi save pemaot taem blong ridim mo stadi Baebol?

Putum Ol Impoten Samting Long Fasples

 5. ?From wanem mo olsem wanem yumi ‘jusumaot wanem we i impoten moa’?

⁵ Yes, yumi mas wok blong givhan long yumi long saed blong bodi. Antap long hemia, yumi gat plante samting blong mekem long saed blong spirit. Yumi we i givim laef blong yumi i go finis long Jeova, yumi “gat plante wok blong mekem long wok blong Masta blong yumi.” (1 Korin 15:58, NW) From samting ya, Pol i givim advaes long ol Kristin long Filipae se oli mas ‘jusumaot wanem samting we i moa impoten.’ (Filipae 1:10, NW) Hemia i min se yumi mas jusumaot ol samting we oli moa impoten long laef blong yumi. Ol samting long saed blong spirit oli mas kam fastaem long ol samting long saed blong bodi. (Matiu 6:31-33) Be yumi mas gat fasin blong skelemgud ol samting, sipos yumi wantem mekemgud ol wok blong yumi long saed blong spirit. ?Olsem wanem yumi stap seraotem taem blong yumi long ol defren haf blong Kristin laef blong yumi? Ol seket elda oli talem se plante taem wan Kristin i fogetem blong stadi hem wan mo ridim Baebol, hemia tu long ol ‘samting we i moa impoten,’ we wan Kristin i mas mekem.

 6. ?Long saed blong wok blong winim mane mo lukaotem haos, i minim wanem blong pemaot taem?

⁶ Olsem we yumi luk finis, blong pemaot taem i minim se yumi mas “yusum evri janis” mo “yusumgud taem ya.” Taswe sipos yumi faenem se yumi no gat inaf taem blong ridim Baebol mo stadi, i gud blong jekemap olsem wanem yumi stap spenem taem blong yumi. Sipos wok blong winim mane i tekem tumas taem mo paoa blong yumi, i gud blong tokbaot bisnes ya wetem Jeova long prea. (Ol Sam 55:22) Maet yumi save jenisim sam samting blong mekem se yumi gat moa taem blong spenem long ol samting we oli moa impoten. Hemia ol samting we oli joen wetem wosip blong yumi long Jeova, olsem stadi mo ridim Baebol. I stret blong talem se ol woman oli gat plante wok blong mekem. Taswe ol Kristin sista tu oli mas luksave wanem i moa impoten long laef blong olgeta, mo oli mas putumap taem blong ridim Baebol mo mekem dip stadi.

7, 8. (a) ?Plante taem yumi save pemaot taem long wanem samting, blong yumi save rid mo stadi? (b) ?Wanem nao stamba risen blong spel, mo olsem wanem samting ya i save halpem yumi blong putum ol impoten samting long fasples?

⁷ Yumi save faenem taem blong stadi, sipos yumi no spenem tumas taem long ol samting we oli no rili impoten. Maet yumi askem long yumi wan se: ‘?Mi stap spenem hamas taem blong ridim ol buk mo niuspepa blong wol, wajem televisin, lesin long miusek, mo pleplei long ol video gem? ?Ol aoa we mi stap spenem long fored blong kompiuta i bitim ol aoa we mi spenem blong ridim Baebol?’ Pol i talem se: “Bambae yufala i no krangke. Yufala i mas traem save olgeta samting we Masta blong yumi i wantem blong yufala i mekem.” (Efesas 5:17) Plante Witnes oli no spenem inaf taem long stadi mo ridim Baebol from we oli spenem tumas taem blong wajem televisin.—Ol Sam 101:3; 119:37, 47, 48.

⁸ Samfala oli talem se oli no save stadi oltaem, oli nidim taem blong pleplei mo spel smol. Samting ya i tru, be i gud blong faenemaot hamas aoa yumi spenem blong spel mo hamas aoa yumi spenem blong stadi mo ridim Baebol. Ating bambae yumi sapraes tumas long wanem we yumi faenem. I tru se yumi nidim blong spel mo pleplei, be yumi no mas bitim mak long saed ya. Stamba risen blong spel i blong mekem yumi haremgud mo blong gat paoa blong gohed bakegen long ol wok long saed blong spirit. Plante program long televisin mo ol video gem oli mekem man i taedgud, be fasin blong stadi mo ridim Tok blong God i mekem man i haremgud mo i givim paoa bakegen.—Ol Sam 19:7, 8.

Olsem Wanem Samfala Oli Faenem Taem Blong Stadi

 9. ?From wanem i gud blong folem advaes long buklet ya Ridimgud Ol Tok Blong Baebol Evri Dei—1999?

⁹ Fastok long buklet ya Ridimgud Ol Tok Blong Baebol Evri Dei blong 1999 i talem se: “Yu save haremgud moa sipos yu ridim vas blong dei long moning wetem smol tok blong hem we i stap long buklet ya. Bambae yu harem olsem se Jeova, we i Bigfala Tija, i stap wekemap yu wetem ol tijing blong hem. Wan profet tok i talem se Jisas Kraes i kasem blesing from save blong Jeova: ‘Evri moning, hem [Jeova] i stap mekem mi mi rere gud blong harem ol tok we hem i wantem tijim mi long hem.’ Ol tijing ya oli mekem se Jisas i save gud ‘ol tok we [God] i wantem blong [hem] i talem.’ From samting ya hem i ‘save mekem olgeta we oli slak oli strong bakegen.’ (Aes. 30:20; 50:4; Mat. 11:28-30) Fasin ya blong stap wekap long saed blong spirit evri moning tru long Tok blong God, bambae i givhan long yu blong winim ol problem long laef blong yu. Be tu, bambae hem i givhan long yu blong save ‘ol tok we [God] i wantem blong [yu] talem’ blong givhan long ol narafala.”a

10. ?Samfala oli mekem wanem blong faenem taem blong stadi mo ridim Baebol, mo wanem ol blesing we oli kasem?

¹⁰ Plante Kristin oli folem advaes ya. Evri moning, oli ridim vas blong dei wetem smol tok blong hem, mo tu, oli ridim Baebol no mekem stadi. Long Franis, wan paenia sista we i gat strong bilif, i girap eli evri moning mo i spenem 30 menet blong ridim Baebol. ?Wanem i givhan long hem blong mekem samting ya long plante yia? Hem i talem se: “!Strong tingting i pusum mi, mo nomata wanem i hapen long mi, mi holemstrong long program blong mi!” Nomata wanem taem yumi jusum blong ridim Baebol, impoten samting i blong holemstrong long program blong yumi. René Mica, we hem i mekem wok blong paenia long Yurop mo Not Afrika blong bitim 40 yia finis, i talem se: “Stat long 1950, mi putum mak ya blong ridim fulwan Baebol evri yia. Mo naoia mi ridim fulwan Baebol 49 taem finis. Mi luksave se samting ya i impoten tumas, sipos mi wantem frengud oltaem wetem Man we i wokem mi. Taem mi tingtingdip long Tok blong God, mi kasem save moa long ol fasin blong Jeova, olsem stret fasin, mo samting ya i givim bigfala paoa long mi.”b

‘Seraot Kakae Long Stret Taem Blong Hem’

11, 12. (a) ?“Slef we i stret mo waes” i givim wanem “kakae” long saed blong spirit? (b) ?Olsem wanem oli givim “kakae” ya long stret taem blong hem?

¹¹ Man we i kakae gud oltaem, hem i gat strongfala bodi. Long sem fasin, man we i gat wan gudfala program blong stadi mo ridim Baebol oltaem, hem i strong long saed blong spirit. Long Gospel blong Luk, yumi ridim tok blong Jisas se: “[“Slef we i stret mo waes,” NW], we i save lukaot gud long ol wok blong masta blong hem, masta blong hem i save putumap hem i bos blong ol narafala man blong hem, blong i seraot kakae long olgeta long stret taem blong hem.” (Luk 12:42) Bitim 120 yia finis, slef ya i stap yusum Wajtaoa, mo ol narafala buk we oli stanap long Baebol, blong “seraot kakae long olgeta long stret taem blong hem.”

¹² Makemgud tok ya “long stret taem blong hem.” Long stret taem, “Bigfala Tija” (NW) blong yumi, Jeova, i yusum Pikinini blong hem mo grup ya we i olsem slef, blong lidim ol man blong hem long saed blong ol tijing mo fasin. I olsem we yumi stap harem wan voes we i talem se: “Sipos yufala i lusum rod, we yufala i gowe long hem long saed i go long lef no long saed i go long raet, be bambae yufala i save harem voes blong hem biaen long yufala, we hem i stap stanap long baksaed blong yufala, i talem se, ‘Hemia rod. Yufala i folem.’” (Aesea 30:20, 21) Mo tu, taem ol man oli ridimgud Baebol mo ol buk we oli stanap long Baebol, plante taem oli harem se ol tok we oli ridim oli go stret long olgeta. Yes, advaes we God i givim blong lidim yumi bambae i kam long stret taem we yumi nidim, nao yumi save winim ol traem no mekem waes disisen.

Kakae Gud Long Saed Blong Spirit

13. Talem sam fasin we oli soem se yumi no stap kakae gud long saed blong spirit.

¹³ Sipos yumi wantem se ‘ol kakae we yumi kasem’ long stret taem oli givhan long yumi, yumi mas gat gudfala fasin blong kakae. I impoten tumas blong gat wan program blong ridim Baebol mo stadi oltaem, mo i gud tu blong holemstrong long program ya. ?Yu yu stap kakaegud oltaem long saed blong spirit mo yu stap mekem dip stadi oltaem? ?No yu jes ridim kwiktaem nomo buk ya we oli bin reremgud, olsem we yu kakae hareap nomo, no maet yu no tekem kakae ya nating? Sam Kristin we oli no kakaegud long saed blong spirit, oli kam slak long bilif—mo sam oli lego bilif olgeta.—1 Timoti 1:19; 4:15, 16.

14. ?From wanem i gud blong tekem taem blong ridim ol haf we yumi ting se yumi savegud finis?

¹⁴ Maet samfala oli ting se oli save finis ol stamba tijing mo se i no evri magasin we i tokbaot ol niufala poen. From samting ya, oli talem se i no nid blong stadi mo go long ol miting oltaem. Be, Baebol i soem se yumi mas tingtingbak long ol samting we yumi lanem finis. (Ol Sam 119:95, 99; 2 Pita 3:1; Jud 5) Tingbaot se, wan gudfala kuk i yusum ol semfala kakae long plante defren rod we i tes gud. Long sem fasin, slef we i stret mo waes i givim ol nambawan kakae long saed blong spirit long plante defren rod. Long ol magasin we oli tokbaot ol poen we yumi stadi plante taem finis, yumi lanem plante gudfala samting we yumi no wantem mestem. Samting we i tru se, blong kasem gudfala frut from samting we yumi ridim, hem i dipen bigwan long fasin traehad blong yumi mo taem we yumi spenem blong stadi long hem.

Ol Blesing We Oli Kamaot From Fasin Blong Rid Mo Stadi

15. ?Olsem wanem fasin blong ridim mo stadi Baebol i givhan long yumi blong kam moa gud long wok blong tijim Tok blong God?

¹⁵ Yumi save kasem fulap blesing from fasin blong stadi mo ridim Baebol. Yes, bambae yumi kam inaf moa blong mekem ‘wok we God i stap harem gud long yumi we long fes blong hem, yumi no gat sem long wok blong yumi. Yumi mas kam wan man we i stap tijim ol man long trutok blong God long fasin we i stret gud.’ Hemia wan long ol stamba wok blong yumi ol Kristin. (2 Timoti 2:15) Moa we yumi ridim mo stadi long Baebol, moa we yumi kasem save ol tingting blong God. Biaen, olsem Pol, yumi save ‘yusum Baebol blong pulum tingting blong man, eksplenem mo yusum ol vas’ blong tijim ol nambawan trutok long saed blong stamba tingting blong Jeova. (Ol Wok 17:2, 3, NW) Bambae yumi kam moa gud long fasin blong tij, mo ol storian, ol tok, mo advaes blong yumi bambae oli leftemap tingting blong ol narafala long saed blong spirit.—Ol Proveb 1:5.

16. ?Olsem wanem yumi save kasem gudfala frut long laef blong yumi from fasin blong ridim mo stadi long Tok blong God?

¹⁶ Antap long samting ya, taem we yumi spenem blong stadi long Tok blong God, bambae i givhan long yumi blong mekem laef blong yumi i laenap moa wetem ol rod blong Jeova. (Ol Sam 25:4; 119:9, 10; Ol Proveb 6:20-23) Bambae ol fasin blong yumi long saed blong spirit, olsem tingtingdaon, fasin blong stap tru long God mo glad, oli kam strong moa. (Dutronome 17:19, 20; Revelesen 1:3) Taem yumi folem save we yumi kasem tru long stadi mo fasin blong ridim Baebol, bambae spirit blong God i save wok fulwan long laef blong yumi. Long evri samting we yumi mekem, bambae yumi soemaot moa ol frut blong tabu spirit.—Galesia 5:22, 23.

17. ?Fasin mo taem we yumi spenem blong rid mo stadi long Baebol i gat wanem paoa long fasin fren blong yumi wetem Jeova?

¹⁷ Samting we i impoten moa, hemia se taem we naoia yumi yusum blong ridim mo stadi long Tok blong God, we bifo yumi yusum long ol narafala samting, bambae i karem nambawan frut long saed blong fasin fren blong yumi wetem Jeova. Pol i prea from ol Kristin brata blong hem blong oli kasem ‘waes, oli luksave olgeta samting we God i wantem, blong bambae oli savegud. Nao bambae oli save mekem laef blong olgeta i kam stret gud olsem we Masta blong yumi i wantem.’ (Kolosi 1:9, 10) Long sem fasin, sipos yumi wantem ‘mekem laef blong yumi i kam stret gud olsem we Masta blong yumi i wantem,’ yumi mas kasem ‘waes, luksave olgeta samting we God i wantem, blong bambae yumi savegud olgeta.’ I klia se, blong Jeova i glad long yumi mo i blesem yumi, samting ya i dipen long hamas taem we yumi spenem mo olsem wanem we yumi mekem stadi blong yumi mo ridim Baebol.

18. ?Wanem ol blesing we yumi save kasem from we yumi folem ol tok blong Jisas long Jon 17:3?

¹⁸ “Mo laef ya [“we i no save finis,” NW], hem i min se man i save yu, we yu nomo yu tru God, mo i save mi, se mi, Jisas Kraes, we yu yu sanem mi mi kam.” (Jon 17:3) Vas ya, ol Witnes blong Jeova oli yusum plante blong halpem ol narafala man blong luksave se i impoten tumas blong stadi long Tok blong God. Be, samting ya i impoten tu long yumi wanwan. Sipos yumi wantem laef foreva, yumi mas gohed blong kasem moa save long saed blong Jeova mo Pikinini blong hem, Jisas Kraes. Mo tingbaot samting ya. !Fasin blong yumi blong kasem moa save long Jeova, neva bambae i finis samtaem—mo bambae yumi gohed blong olwe blong lanem ol samting long saed blong hem!—Prija 3:11; Rom 11:33.

[Ol futnot]

Ol Kwestin Blong Tingtingbak

• ?Fasin blong yumi blong yusum taem i soemaot wanem?

• ?Yumi save pemaot taem long wanem samting, blong yumi save ridim mo stadi Baebol?

• ?From wanem yumi mas lukaotgud long fasin we yumi folem blong tekem ol kakae long saed blong spirit?

• ?Fasin blong ridim mo stadi Baebol i save karem wanem gudfala frut?

[Tok blong pija long pej 20, 21]

Fasin blong ridim mo stadi long Baebol oltaem i mekem se yumi kam naf blong ‘tijim ol man long trutok blong God long fasin we i stret gud’

[Tok blong pija long pej 23]

Nambawan frut i save kamaot sipos yumi skelemgud ol narafala samting long bisi laef blong yumi wetem ol samting long saed blong spirit