?Yu Yu Stap Leftemap Hae Rul Blong Jeova?

‘Yumi mas talemaot long olgeta man blong ol narafala kantri se, “!Hae God Jeova, hem i King!”’—Ol Sam 96:10.

1, 2. (a) ?Wanem bigfala samting i hapen samwe long manis Oktoba long yia 29 K.T.? (b) ?Taem samting ya i hapen, Jisas i save wanem?

LONG Oktoba blong yia 29 K.T.,a wan bigfala samting we man i neva luk bifo, i hapen long wol. Gospel blong Matiu i talem se: ‘Taem Jon i baptaesem Jisas finis, Jisas i kamaot long wota, nao wantaem nomo skae i open long hem, mo [Jon Baptaes] i luk spirit blong God i stap kamdaon olsem wan sotleg, i kam sidaon long [Jisas]. Nao God i tok i talem se, “Hemia pikinini blong mi, we mi lavem hem tumas. Mi mi glad tumas long hem.”’ Plante samting we i bin hapen, sam long ol Gospel nomo oli tokbaot, be hemia, ol fofala Gospel evriwan oli tokbaot.—Matiu 3:16, 17; Mak 1:9-11; Luk 3:21, 22; Jon 1:32-34.

² Taem tabu spirit i kamdaon long Jisas, samting ya i soemaot se Jisas i Mesaea no Kraes, hemia i min se Man we God i Makemaot. (Jon 1:33) !Longtaem finis God i promes blong sanem wan “sid,” mo naoia “sid” ya i kamtru! Man ya we i stanap long fored blong Jon Baptaes, hemia Man we Setan bambae i givim kil long leg blong hem daon, mo hemia Man we bambae i smasem hed blong bigfala enemi ya blong Jeova mo hae rul blong Hem. (Jenesis 3:15, NW) Stat long taem ya, Jisas i savegud se hem i mas wok blong mekem plan blong Jeova i kamtru long saed blong hae rul mo Kingdom blong God.

 3. ?Wanem samting i mekem Jisas i rere from wok we hem i mas mekem blong leftemap hae rul blong Jeova?

³ ‘Taem Jisas i aot long Jodan Reva blong gobak long ples blong hem, tabu spirit i fulap long hem, mo i lidim hem i pas long draeples.’ Samting ya i hapen blong rerem Jisas from wok we hem i mas mekem. (Luk 4:1; Mak 1:12) Jisas i stap 40 dei long draeples. Hem i gat taem blong tingting dip long bigfala kwestin we Setan i stanemap long saed blong hae rul blong God, mo blong tingbaot rod we hem i mas folem blong leftemap hae rul blong Jeova. Evri man long heven mo wol oli mas tingbaot samting ya. Taswe i gud yumi lukluk fasin blong Jisas blong stap tru long God, mo yumi traem luksave wanem we yumi mas mekem blong soemaot se yumi tu yumi wantem leftemap hae rul blong Jeova.—Job 1:6-12; 2:2-6.

Kwestin i Stanap Long Saed Blong Hu i Rulum Heven Mo Wol

 4. ?Setan i mekem wanem samting we i soemaot bigfala kwestin ya long saed blong hae rul long heven mo wol?

⁴ Setan i luk ol samting we i hapen long baptaes blong Jisas. Wantaem nomo, hem i girap agensem impoten Man ya long “sid” blong “woman” blong God. (Jenesis 3:15, NW) Tri taem Setan i traem Jisas. Hem i wantem se Jisas i mekem samting we i gud long hem wan, i no samting we Papa blong hem i wantem. Namba tri traem i rili soemaot bigfala kwestin ya long saed blong hae rul long heven mo wol. Setan i soemaot long Jisas “olgeta kantri long wol ya wetem ol gudgudfala samting we oli gat.” Nao hem i talem long Jisas se: “Sipos yu bodaon long mi, yu mekem wosip long mi, bambae mi mi givim olgeta samting ya i go long yu.” Jisas i savegud se Setan i stap bos long “olgeta kantri long wol,” be hem i givim wan ansa long Setan we i soemaot gud se hem i stanap long saed blong hae rul blong Jeova. Hem i se: ‘!Setan! !Yu gowe long mi! Baebol i talem se, “Yu mas mekem wosip long Jeova we i God blong yu, mo bambae yu mas mekem wok blong hem nomo.”’—Matiu 4:8-10.

 5. ?Wanem strong wok we Jisas i mas mekem?

⁵ Laef blong Jisas i soemaot klia se long tingting blong hem, samting we i moa impoten i bitim ol narafala samting hemia blong leftemap hae rul blong Jeova. Jisas i savegud se hem i mas stap tru long God go kasem we hem i ded long han blong Setan, from we profet tok i talemaot finis se Setan bambae i givim kil long leg blong “sid” blong woman. Sipos Jisas i stanap strong go kasem ded, bambae hem i pruvum se hae rul blong God i stret. (Matiu 16:21; 17:12) Mo tu, Jisas i mas givim witnes se Jeova bambae i yusum Kingdom ya olsem wan tul, mo givim paoa long Kingdom blong kilimdaon stronghed ya Setan mo putum pis mo oda i stap bakegen long heven mo wol. (Matiu 6:9, 10) ?Olsem wanem Jisas i mekem strong wok ya?

“Kingdom Blong God i Kam Klosap Finis”

 6. ?Olsem wanem Jisas i mekem ol man oli save se Kingdom nao bambae i “brekemdaon ol wok we Setan i mekem”?

⁶ “Jisas i kam long distrik ya Galili, i stap talemaot gud nius blong God. Hem i talem se, ‘Taem blong hem i stret nao. [“Kingdom blong God i kam klosap finis,” NW].’” (Mak 1:14, 15) Hem i talem tu se: “Mi mas talemaot gud nius ya [“blong Kingdom blong God,” NW], from we God i sanem mi blong mi mekem olsem.” (Luk 4:18-21, 43) Jisas i wokbaot long olgeta ples long kantri ya, “i stap talemaot gud nius ya blong Kingdom blong God.” (Luk 8:1, NW) Jisas i mekem plante merikel long fes blong ol man tu. Hem i givim kakae long bigfala hip blong man, hem i kwaetem win mo solwota, hem i tekemaot sik long man, mo hem i mekem dedman i laef bakegen. Taem Jisas i mekem ol merikel ya, hem i pruvum se God i save tekemaot ol trabol mo soa we i kamaot from stronghed fasin long garen blong Iden. Olsem nao, hem i save “brekemdaon ol wok we Setan i mekem.”—1 Jon 3:8.

 7. ?Jisas i talem long ol man blong hem blong oli mekem wanem? ?Wanem i kamaot from?

⁷ Blong mekem se gud nius blong Kingdom i go long plante moa ples, Jisas i hivimap wan grup blong man we oli folem hem, nao hem i trenem olgeta blong mekem wok ya. Fastaem, hem i singaot 12 aposol mo hem i “sanemaot olgeta blong oli talemaot gud nius blong kingdom blong God.” (Luk 9:1, 2, NW) Biaen, hem i sanem 70 narafala oli go blong talemaot se: “Kingdom blong God i kam klosap long yufala.” (Luk 10:1, 8, 9, NW) Taem ol disaepol ya oli kambak mo oli givim ripot long Jisas se oli karem plante frut long wok ya blong talemaot Kingdom, Jisas i se: “Mi mi luk Setan i aot long heven, i foldaon olsem we laetning i sut i kamdaon.”—Luk 10:17, 18.

 8. ?Jisas i soemaot wanem long laef blong hem?

⁸ Jisas i wok had blong talemaot Kingdom, mo hem i neva mestem wan janis blong givim witnes long saed ya. Hem i wok oltaem, long dei mo long naet, mo hem i lego plante samting we oli save mekem laef blong hem i isi mo mekem hem i haremgud. Hem i talem se: “Ol wael dog oli gat ol hol blong slip blong olgeta, mo ol pijin oli gat ol bed blong olgeta. Be mi, mi Pikinini blong Man, mi no gat ples blong mi, blong go slip long hem.” (Luk 9:58; Mak 6:31; Jon 4:31-34) Smoltaem bifo we Jisas i ded, hem i talem stret long Ponjes Paelat se: “Mi mi bon, mi kam long wol ya bilong wan samting nomo, bilong mi wetnes long trutok.” (Jon 18:37, Gud Nyus Bilong Jisas Krais) Long laef blong Jisas, hem i no soemaot nomo se hem i wan nambawan tija mo man blong mekem merikel, mo se hem i rere blong lego laef blong hem blong sevem ol man. Hem i soemaot tu se hem i kam blong mekem samting we hae Rula Jeova i wantem, mo blong soemaot se God i naf blong mekem samting we hem i wantem, tru long Kingdom blong hem.—Jon 14:6.

“Olgeta Samting i Finis Nao”

 9. ?Olsem wanem Setan i givim kil long leg blong “sid” blong woman blong God?

⁹ Bigfala Enemi ya Setan i no glad long ol samting we Jisas i mekem long saed blong Kingdom. Plante taem Setan i yusum “sid” blong hem long wol, hemia ol man blong politik mo skul, blong traem kilim i ded “sid” blong woman blong God. Stat long taem we Jisas i bon go kasem we laef blong hem long wol i finis, Setan mo ol man blong hem oli agensem hem. Ale, long yia 33 K.T., taem ol tri oli stat putum flaoa, stret taem i kam blong Pikinini blong man i go long han blong Bigfala Enemi blong hem blong i givim kil long leg blong hem daon. (Matiu 20:18, 19; Luk 18:31-33) Ol Gospel oli soemaot klia olsem wanem Setan i pulum ol man olsem Judas Iskariot, ol hae pris, ol tija blong Loa, ol Farisi, mo ol man Rom, blong oli jajem Jisas mo nilim hem long wan pos blong i harem i soa gogo i ded.—Ol Wok 2:22, 23.

10. ?Taem Jisas i ded long pos, hem i finisim wanem bigfala wok?

¹⁰ ?Taem yumi tokbaot we Jisas i harem i soa gogo hem i ded long wan pos, wanem i kam long tingting blong yu? Maet yu tingbaot olsem wanem Jisas i lego laef blong hem blong givim wan sakrefaes blong sevem yumi ol sinman. (Matiu 20:28; Jon 15:13) Maet yu tingbaot bigfala lav we Jeova i soemaot taem hem i mekem plan ya se Jisas bambae i ded olsem sakrefaes. (Jon 3:16) Maet yu gat sem filing olsem soldia blong Rom we hem i talem se: “Tru ya. Hem i Pikinini blong God ya.” (Matiu 27:54) Olgeta tingting mo filing ya oli stret nomo. Be i gud blong tingbaot ol laswan tok blong Jisas bifo we hem i ded long pos, hem i se: “Olgeta samting i finis nao.” (Jon 19:30) ?Wanem samting i finis? Jisas i mekem plante samting long laef blong hem mo tru long ded blong hem tu. Be bigfala risen from wanem Jisas i kam long wol ya i blong ansa long kwestin ya we Setan i stanemap long saed blong hae rul blong Jeova. Profet tok i bin talem se Setan bambae i traem “sid” ya Jisas gogo kasem ded. Sipos Jisas i stanap strong, hem i save tekemaot doti we Setan mo ol man oli sakem long nem blong Jeova. (Aesea 53:3-7) Hemia ol hevi wok ya, be nating, Jisas i mekem olgeta wok ya fulwan. !Tru ya, hem i finisim wan bigfala wok!

11. ?Olsem wanem Jisas bambae i mekem profet tok long Iden i kamtru fulwan?

¹¹ From we Jisas i stap tru long God gogo kasem ded, God i mekem hem i laef bakegen, i no olsem wan man long wol, be olsem wan “Spirit we i save givim laef.” (1 Korin 15:45; 1 Pita 3:18) Jeova i leftemap Pikinini blong hem i go antap long heven, mo hem i promes long Jisas se: “Yu sidaon long raet saed blong mi, yu wet. Bambae mi mekem ol enemi blong yu oli stap aninit long paoa blong yu, oli slef blong yu.” (Ol Sam 110:1) ‘Ol enemi blong hem,’ faswan blong olgeta hemia Setan, wetem olgeta we oli “sid” blong hem. Jisas Kraes we i King blong Kingdom blong Mesaea, hem bambae i lidim wok ya blong spolem ol stronghed ya long heven mo long wol. (Revelesen 12:7-9; 19:11-16; 20:1-3, 10) Long taem ya, profet tok blong Jenesis 3:15 bambae i kamtru fulwan, wetem prea ya tu we Jisas i tijim ol man blong hem blong mekem se: “Plis, yu mekem kingdom blong yu i kam. Plis yu mekem samting we yu yu wantem i kamaot long wol, olsem we i kamaot long heven.”—Matiu 6:10, NW; Filipae 2:8-11, NW.

Fasin We Yumi Save Folem

12, 13. (a) ?Tede wanem i kamaot from wok ya blong talemaot gud nius blong Kingdom? (b) ?Wanem samting we yumi mas tingbaot sipos yumi wantem folem fasin blong Jisas?

¹² Tede ol man blong God oli stap talemaot gud nius blong Kingdom long plante kantri, olsem Jisas i talem long profet tok blong hem. (Matiu 24:14) From samting ya, plante milian man oli givim laef blong olgeta i go long God. Oli haremgud tumas long tingting blong olgeta from ol blesing we Kingdom bambae i givim. Oli stap tingbaot blong laef olwe long pis mo blong stap gud oltaem long wan paradaes long wol ya, mo oli glad blong talemaot ol nambawan promes ya long ol narafala man. (Ol Sam 37:11; 2 Pita 3:13) ?Olsem wanem? ?Yu yu wan long ol man ya blong talemaot Kingdom? Sipos yes, samting ya i gud tumas. Be i gat wan narafala samting yet we yumi wanwan i mas tingbaot.

¹³ Aposol Pita i raetem se: “Kraes, hem i harem nogud long bodi blong hem, blong sevem yufala, mo hem i soemaot fasin ya long yufala, blong bambae yufala i biaen long hem.” (1 Pita 2:21) Makemgud se Pita i no tokbaot olsem wanem Jisas i wok strong blong prij no gudhan we hem i gat blong tijim ol man. Be hem i tokbaot se Jisas i harem nogud long bodi blong hem. Pita i luk samting ya wetem prapa ae blong hem, taswe hem i savegud se Jisas i rere blong safa bigwan blong obei long hae rul blong Jeova mo blong pruvum se Setan i man blong giaman. ?Olsem wanem yumi save folem eksampol ya blong Jisas? Yumi mas tingbaot se: ‘?Mi mi rere blong safa go kasem wanem mak blong sapotem mo obei long hae rul blong Jeova? ?Fasin blong laef blong mi mo wok blong prij we mi mekem i soemaot tingting ya se i moa impoten blong leftemap hae rul blong God i bitim ol narafala samting?’—Kolosi 3:17.

14, 15. (a) ?Taem samfala oli traem pulum Jisas blong tingting no mekem samting we i rong, hem i mekem wanem? ?From wanem? (b) ?Wanem bigfala kwestin we i mas stap long tingting blong yumi oltaem? (Talem sam tingting we oli stap long bokis ya “Stanap Long Saed Blong Jeova.”)

¹⁴ Evri dei, yumi kasem traem mo yumi mas mekem sam desisen, samfala oli bigwan, sam oli smol. ?Olsem wanem yumi save rod blong folem? Tingbaot sipos wan traem i kasem yumi we i pulum yumi blong mekem samting we i save spolem gudnem blong yumi wetem God. ?Bambae yumi mekem wanem? Tingbaot taem ya we Pita i talem long Jisas se hem i no mas mekem i strong tumas long hem wan. ?Jisas i talem wanem long Pita? Hem i se: “Setan. Yu gowe long mi. . . . Tingting blong yu i no tingting blong God, i tingting blong man nomo.” (Matiu 16:21-23) ?Olsem wanem sipos yumi gat janis blong winim moa mane no kasem wan wok we i gud moa? ?Sipos wok ya i save spolem ol Kristin wok blong yumi no fasin fren blong yumi wetem God, bambae yumi mekem olsem Jisas? Taem Jisas i save se olgeta we oli luk ol merikel blong hem “oli wantem kam tekem hem blong fosem hem, blong i kam King blong olgeta,” hem i aot long olgeta kwiktaem.—Jon 6:15.

¹⁵ ?From wanem Jisas i tekem strong aksen long taem ya mo long sam narafala taem bakegen? From we i klia long tingting blong hem se i gat wan samting we i moa impoten i bitim we hem i stap sef mo i kasem plante samting long saed blong bodi. Hem i gat strong tingting blong mekem samting we Papa blong hem i wantem mo blong leftemap hae rul blong Jeova, nomata wanem hadtaem hem i kasem from. (Matiu 26:50-54) Taswe, bigfala kwestin ya long saed blong hae rul blong Jeova i mas klia oltaem long tingting blong yumi, olsem we i klia long tingting blong Jisas. Sipos no, bambae i gat denja se yumi save lego Jeova no mekem samting we i no stret. ?From wanem i gat denja ya? From we i isi nomo blong yumi foldaon long ol giaman trik blong Setan. Hem i jampion long wok ya blong tanem samting we i rong i kam olsem samting we i gud. Hemia nao samting we hem i mekem blong pulum Iv.—2 Korin 11:14; 1 Timoti 2:14.

16. ?Wanem bigfala mak blong yumi taem yumi givhan long ol narafala?

¹⁶ Long wok blong prij, yumi traehad blong storian wetem ol man long saed blong ol samting we oli wari long olgeta, mo blong soemaot ol tok blong Baebol long olgeta. Hemia wan gudfala rod blong pulum man blong stadi Baebol. Be mak blong yumi i no blong givhan long ol man blong save Baebol nomo, mo blong save ol blesing we Kingdom blong God bambae i givim, nogat. Yumi mas givhan long olgeta blong kasem save long bigfala kwestin ya we Setan i stanemap long saed blong hae rul blong Jeova. ?Olsem wanem? ?Oli rere blong kam ol trufala Kristin mo karem “pos we oli save ded long hem” mo safa from Kingdom blong God? (Mak 8:34, NW) ?Oli rere blong joen wetem olgeta we oli leftemap hae rul blong Jeova, mo long rod ya pruvum se Setan i wan man blong giaman mo wan man blong spolem nem blong God? (Ol Proveb 27:11) Yumi gat janis ya yumi wan mo yumi gat janis blong halpem ol narafala tu, blong yumi evriwan i leftemap hae rul blong God.—1 Timoti 4:16.

God Bambae i Kam Olsem “Olgeta Samting Long Olgeta Man”

17, 18. ?Sipos yumi soemaot se yumi stanap long saed blong hae rul blong Jeova, yumi save tingting strong long wanem nambawan taem?

¹⁷ Naoia, yumi mas mekem bes blong yumi long ol fasin blong yumi mo long wok blong prij, blong soemaot se yumi stap long saed blong hae rul blong Jeova. Olsem nao, yumi save tingting strong long taem ya we Jisas Kraes “bambae i putum kingdom i stap long han blong God mo Papa blong hem.” ?Wetaem bambae hem i mekem samting ya? Aposol Pol i eksplenem se: “Fastaem bambae hem i spolem olgeta gavman, olgeta haeman, mo olgeta paoa, from we hem i mas rul olsem king gogo God i putum olgeta enemi oli stap daon aninit long leg blong hem. . . . [Nao] Pikinini ya tu, bambae i putum hem wan i stap daon aninit long paoa blong God we fastaem hem i putum olgeta samting oli stap aninit long paoa blong Pikinini blong hem. Nao God bambae i kam olsem olgeta samting long olgeta man.”—1 Korin 15:24, 25, 28, NW.

¹⁸ !Taem God i kam olsem “olgeta samting long olgeta man” hemia bambae i wan nambawan taem! Long taem ya, Kingdom i mekem finis fulwan wok we hem i mas mekem. Hem i spolem finis olgeta evriwan we oli agensem hae rul blong Jeova. Pis mo oda bambae i stap bakegen long heven mo wol. Olsem man blong raetem Ol Sam i talem, olgeta samting we God i wokem bambae oli singsing se: ‘!Nem blong Jeova i hae we i hae! !Yumi presem hem! . . . Yumi mas talemaot long olgeta man blong ol narafala kantri se, “!Hae God Jeova, h em i King!”’—Ol Sam 96:8, 10.

[Futnot]

?Yu Yu Save Ansa?

• ?Olsem wanem Jisas i soemaot se kwestin long saed blong hae rul blong God i impoten moa i winim ol narafala samting?

• ?Wanem bigfala samting we Jisas i mekem tru long wok blong prij mo ded blong hem?

• ?Olsem wanem yumi save folem eksampol blong Jisas mo soemaot se yumi stanap long saed blong hae rul blong Jeova?

[Bokis blong pija long pej 11]

STANAP LONG SAED BLONG JEOVA

Plante brata we oli kasem bigfala traem long Koria mo ol narafala ples, oli save se ol Kristin oli mas gat klia tingting from wanem ol traem oli kasem olgeta.

Wan Witnes blong Jeova we hem i stap long kalabus long taem ya we Soviet gavman i bin rul, i talem se: “Samting we i givhan long mifala blong stanap strong, hemia klia save we mifala i gat long kwestin ya we Setan i stanemap long garen blong Iden, long saed blong raet blong God blong rul. . . . Mifala i save se mifala i gat janis blong stanap long saed blong rul blong Jeova. . . . Samting ya i mekem mifala i strong mo i givhan long mifala blong holemstrong long God.”

Wan Witnes bakegen i talemaot samting we i givhan long hem mo sam narafala Witnes long wan kalabus we oli fosem olgeta blong wok strong bitim mak, i se: “Jeova i givhan long mifala. Nating se i had we i had, be mifala i stap wekapgud long saed blong spirit. Oltaem mifala i lefleftemap tingting blong mifala wetem gudfala tok ya se mifala i stap stanap long saed blong Jeova long bigfala kwestin ya blong hae rul blong heven mo wol.”

[Tok blong pija long pej 8]

?Olsem wanem Jisas i leftemap hae rul blong Jeova taem Setan i traem hem?

[Tok blong pija long pej 10]

?Ded blong Jisas i mekem wanem wok?